Numeri 3:1-51
3 Bjale ye e be e le meloko ya Arone le Moshe nakong ya ge Jehofa a be a bolela le Moshe Thabeng ya Sinai.+
2 Maina a barwa ba Arone e be e le Nadaba, Abihu,+ Eleasara+ le Ithamara.+ Nadaba e be e le morwa wa leitšibulo.
3 Ao e be e le maina a barwa ba Arone bao ba bego ba tloditšwe ebile ba kgethilwe go ba baperisita.+
4 Eupša Nadaba le Abihu ba ile ba hwela pele ga Jehofa ge ba be ba tliša mollo woo Jehofa+ a bego a se a ba laela gore ba o dire kua lešokeng la Sinai, le gona ba be ba se na bana. Ge e le Eleasara+ le Ithamara+ bona ba ile ba tšwela pele ba hlankela e le baperisita gotee le Arone tatago bona.
5 Ke moka Jehofa a re go Moshe:
6 “Tliša ba moloko wa Lefi+ go moperisita Arone gomme ba tla mo thuša.+
7 Ba tla hlankela taberenakeleng le go dira mešomo ka moka yeo ba e neilwego go thuša Moshe, le go hlankela setšhaba ka moka sa Isiraele taberenakeleng yeo.
8 Ba hlokomele ditlabakelo ka moka+ tša taberenakeleng le go hlankela Baisiraele ka go dira mešomo ka moka yeo ba swanetšego go e dira taberenakeleng.+
9 O tšee Balefi o ba nee Arone le barwa ba gagwe. Ba kgethilwe mo go Baisiraele gore ba mo thuše.+
10 O kgethe Arone le barwa ba gagwe gore ba dire mešomo ya bona ya boperisita.+ Motho le ge e le ofe yo e sego moperisita yo a batamelago sekgethweng a bolawe.”+
11 Jehofa a tšwela pele a bolela le Moshe a re:
12 “Ke kgethile Balefi mo go Baisiraele gore ba tšeele legato bana ba maitšibulo ka moka ba Baisiraele,+ gomme Balefi e tla ba ba ka.
13 Ka gobane ngwana yo mongwe le yo mongwe wa leitšibulo ke wa ka.+ Letšatšing la ge ke be ke bolaya ngwana yo mongwe le yo mongwe wa leitšibulo nageng ya Egepeta,+ ke ile ka kgethagatša bana ka moka ba maitšibulo nageng ya Isiraele le leitšibulo le lengwe le le lengwe la phoofolo.+ Maitšibulo e be a ka. Ke nna Jehofa.”
14 Jehofa a tšwela pele a bolela le Moshe lešokeng la Sinai+ a re:
15 “Ngwadiša barwa ba Lefi go ya ka meloko ya bona le malapa a bona. O ngwadiše yo mongwe le yo mongwe yo motona go tloga ka wa kgwedi e tee go ya godimo.”+
16 Ka gona Moshe a ba ngwadiša go ya le ka mokgwa woo Jehofa a bego a mo laetše ka gona.
17 Maina a barwa ba Lefi e be e le Gerishone, Kohathe le Merari.+
18 Maina a barwa ba Gerishone go ya ka malapa a bona e be e le Lebini le Shimei.+
19 Barwa ba Kohathe go ya ka malapa a bona e be e le Amorama, Itsehara, Heburone le Usiele.+
20 Barwa ba Merari go ya ka malapa a bona e be e le Maheli+ le Mushi.+
Ao e be e le malapa a Balefi go ya ka meloko ya bona.
21 Go Gerishone go tšwile lapa la Balebini+ le lapa la Bashimei. Ao e be e le malapa a Bagerishone.
22 Palo ya banna ka moka bao ba ngwadišitšwego go tloga ka ngwana wa mošemane wa kgwedi go ya godimo, e be e le ba 7 500.+
23 Malapa a Bagerishone a be a hlomile ditente ka morago ga taberenakele+ ka lehlakoreng la ka bodikela.
24 Kgošana ya ba moloko wa Bagerishone e be e le Eliasafa morwa wa Laele.
25 Barwa ba Gerishone+ ba be ba ikarabela ka go hlokomela taberenakele,+ dilo tša go e khupetša ka ntle le ka gare,+ gareteine+ ya mojako wa taberenakele,
26 digareteine+ tša lapa, digareteine+ tša mojako wa lapa tšeo di lego ka mahlakoreng ka moka a taberenakele le aletare, dithapo tša tente, le mešomo ka moka yeo e sepedišanago le dilo tše.
27 Go Kohathe go tšwile lapa la Baamorama, lapa la Baitsehara, lapa la Baheburone le lapa la Bausiele. Ao e be e le malapa a Bakohathe.+
28 Palo ya banna ka moka bao ba ngwadišitšwego go tloga ka ngwana wa mošemane wa kgwedi, e be e le ba 8 600. Ba be ba ikarabela ka go hlokomela lefelo le lekgethwa.+
29 Malapa a barwa ba Kohathe a be a hlomile ditente ka borwa bja taberenakele.+
30 Kgošana ya moloko wa malapa a Bakohathe e be e le Elisafane morwa wa Usiele.+
31 Ba be ba ikarabela ka go hlokomela Areka,+ tafola,+ sehlomelamabone,+ dialetare,+ dibjana+ tša lefelong le lekgethwa tšeo di bego di dirišwa go hlankela moo, gareteine+ gotee le mešomo ka moka yeo e sepedišanago le dilo tše.+
32 Moetapele wa dikgošana tša Balefi e be e le Eleasara+ morwa wa moperisita Arone. O be a etelela pele bao ba dirago mešomo ya lefelong le lekgethwa.
33 Go Merari go tšwile lapa la Bamaheli le lapa la Bamushi. Ao e be e le malapa a Merari.+
34 Palo ya banna ka moka bao ba ngwadišitšwego go tloga ka ngwana wa mošemane wa kgwedi go ya godimo, e be e le ba 6 200.+
35 Kgošana ya moloko wa malapa a Merari e be e le Tsuriele morwa wa Abihaili. Bona ba be ba hlomile ditente ka leboa la taberenakele.+
36 Barwa ba Merari ba be ba ikarabela ka go hlokomela diforeime+ tša taberenakele, dikota tša yona,+ diphilara tša yona,+ maotwana a yona ao a nago le mašoba, dibjana tša yona ka moka,+ le mešomo ka moka yeo e sepedišanago le dilo tše,+
37 gotee le diphilara tšeo di bego di le ka mahlakoreng ka moka a lapa, le maotwana a tšona ao a nago le mašoba,+ dipikiri le dithapo tša tente.
38 Bao ba bego ba hlomile ditente ka pele ga taberenakele ka thoko ya bohlabela, e lego ka pele ga tente ya kopano, e be e le Moshe, Arone le barwa ba gagwe. Ke bona bao ba bego ba ikarabela ka go hlokomela sekgethwa bakeng sa Baisiraele. Motho le ge e le ofe yo e sego moperisita yo a batamelago sekgethweng a bolawe.+
39 Banna ka moka ba Balefi go tloga ka ngwana wa mošemane wa kgwedi go ya godimo, bao ba bego ba ngwadišitšwe ke Moshe le Arone ba laetšwe ke Jehofa go ya ka malapa a bona, e be e le ba 22 000.
40 Ke moka Jehofa a re go Moshe: “Ngwadiša bana ka moka ba maitšibulo ba bašemane ba Baisiraele go tloga ka wa kgwedi go ya godimo+ gomme o ba bale.
41 Legatong la bana ka moka ba maitšibulo ba Baisiraele+ o ntlišetše Balefi, gomme o tšee diruiwa tša Balefi legatong la maitšibulo ka moka a diruiwa tša Baisiraele.+ Ke nna Jehofa.”
42 Ke moka Moshe a ngwadiša bana ka moka ba maitšibulo ba Baisiraele go ya ka mokgwa wo Jehofa a mo laetšego ka gona.
43 Palo ya bana ka moka ba maitšibulo ba bašemane bao ba ngwadišitšwego go tloga ka wa kgwedi go ya godimo, e be e le ba 22 273.
44 Jehofa a tšwela pele a bolela le Moshe a re:
45 “Tšea Balefi legatong la bana ka moka ba maitšibulo ba Baisiraele, o tšee le diruiwa tša Balefi legatong la diruiwa tša bona, Balefi e be ba ka. Ke nna Jehofa.
46 O reke*+ bana ba maitšibulo ba Baisiraele ba 273 bao ba fetago Balefi ka palo,+
47 ka ditšhelete tše hlano tša silifera bakeng sa motho yo mongwe le yo mongwe.+ O kale tšhelete yeo o diriša tsela ya go kala ya lefelong le lekgethwa. Tšhelete e nngwe le e nngwe ya silifera e lekane le dikgerama tše 12.*+
48 O nee Arone le barwa ba gagwe tšhelete yeo e le ya go reka bana ba maitšibulo ba Baisiraele bao ba fetago Balefi ka palo.”
49 Ka gona Moshe a tšea tšhelete ya go reka bao ba bego ba feta Balefi ka palo.
50 A tšea tšhelete yeo go bana ba maitšibulo ba Baisiraele, gomme ya ba ditšhelete tša silifera tše 1 365 go ya ka tsela ya go kala tšhelete ya lefelong le lekgethwa.
51 Ke moka Moshe a nea Arone le barwa ba gagwe tšhelete yeo ya go lopolla bana ba maitšibulo ba Baisiraele go ya kamoo Jehofa a mo laetšego ka gona. Moshe a dira ka wona mokgwa woo Jehofa a mo laetšego ka gona.
Mengwalo ya Tlase
^ Phetolelo ya lentšu ka lentšu e re, “O lopolle.”
