Numeri 23:1-30
23 Ke moka Bileama a re go Balaka: “Nkagele dialetare tše šupago lefelong le+ o be o ntlhabele dipoo tše šupago le dinku tše tona tše šupago.”
2 Kapejana Balaka a dira ka mokgwa wo Bileama a boletšego. Ke moka Balaka le Bileama ba dira sehlabelo ka poo le ka nku e tona aletareng e nngwe le e nngwe.+
3 Ke moka Bileama a re go Balaka: “Ema mo kgauswi le sebego sa gago sa go fišwa, gomme nna ke tla sepela. Mohlomongwe Jehofa o tla boledišana le nna. Selo le ge e le sefe seo a tlago go mpotša sona, ke tla tla ke go botša.” Ka gona o ile a ya godimo ga mmoto.
4 Ke moka Modimo a bolela le Bileama,+ gomme Bileama a re go yena: “Ke dirile dialetare tše šupago, gomme ka neela sehlabelo ka poo le ka nku e tona aletareng e nngwe le e nngwe.”
5 Jehofa a botša Bileama+ seo a swanetšego go se bolela, a re go yena: “Boela go Balaka gomme o mmotše seo ke tlago go go botša sona.”
6 Bileama a boela go Balaka gomme a mo hwetša a na le dikgošana ka moka tša Moaba ba eme kgauswi le sebego sa gagwe sa go fišwa.
7 Ke moka Bileama a bolela molaetša wo wa boporofeta a re:+
“Balaka kgoši ya Moaba o ntlošitše Arama,+O ntlošitše dithabeng tša ka bohlabela, a re:
‘Etla o tlo nthogela ditlogolwana tša Jakobo.
Hle etla o tlo sola Baisiraele.’+
8 Nka roga bjang bao Modimo a sego a ba roga?
Le gona nka sola bjang bao Jehofa a sego a ba sola?+
9 Ke ba bona ke le godimo ga maswika,Ebile ke ba bona ke le godimo ga meboto.
Setšhaba seo se ituletše moo se nnoši,+Gomme se ipona se sa swane le ditšhaba tše dingwe.+
10 Ke mang yo a ka balago ditlogolwana tša Jakobo tšeo di swanago le lerole ka bontši,+Le gona ke mang a ka balago le kotara ya setšhaba sa Baisiraele?
Baloki ba a phela gomme mafelelong ba hwa ba kgotsofetše,Le nna ke nyaka go hwa go swana le bona.”
11 Ke moka Balaka a re go Bileama: “Kganthe o mpereka bjang? Ke go tlišitše mo gore o tle o roge manaba a ka, bjale wena o a šegofaditše kudu.”+
12 Bileama a re go Balaka: “Na ga se ka swanela go bolela selo le ge e le sefe seo Jehofa a mpotšago sona?”+
13 Ke moka Balaka a re go yena: “Hle eya le nna lefelong le lengwe moo o tlago go kgona go ba bona. O ka se kgone go ba bona ka moka, eupša o tla bona feela karolo ya bona. Ke moka o nthogele bona o le moo.”+
14 Ka gona a mo iša molaleng wa Tsofimi, ntlheng ya thaba ya Pisiga,+ a aga dialetare tše šupago a ba a neela sehlabelo ka poo le nku e tona aletareng e nngwe le e nngwe.+
15 Ka morago ga moo Bileama a re go Balaka: “Ema mo kgauswi le sebego sa gago sa go fišwa gomme nna ke ye kua ke yo bolela le Modimo.”
16 Jehofa a bolela le Bileama gomme a re go yena:+ “Boela go Balaka gomme o mmotše seo ke tlago go go botša sona.”
17 Bileama a boela go yena a mo hwetša a na le dikgošana ka moka tša Moaba ba eme kgauswi le sebego sa gagwe sa go fišwa. Ke moka Balaka a re go yena: “Jehofa o rileng?”
18 Bileama yena a bolela molaetša wa boporofeta a re:+
“Ema wena Balaka gomme o theetše.
Ntheetše wena morwa wa Tsiporo.
19 Modimo ga se motho mo a tlago go bolela maaka,+Le gona ga se motho mo a tlago go fetoša monagano wa gagwe.+
Na ge a boletše selo a ka se se dire?
Le gona na ge a tshepišitše selo a ka se se dire?+
20 Tseba gore ke laetšwe gore ke šegofatše Baisiraele,Gomme Modimo yena o ba šegofaditše,+ ka gona nna nka se kgone go fetoša seo.+
21 A ka se kgotlelele go bona ditlogolwana tša Jakobo di loiwa,Le gona a ka se dumelele Baisiraele ba welwa ke mathata.
Jehofa Modimo wa bona o na le bona,+Gomme o ba tsebišitše gore ke yena kgoši ya bona.
22 Modimo o ba ntšhitše Egepeta.+
Maatla a gagwe a ba thuša go swana le dinaka tša poo ya naga.*+
23 Ga go na motho yo a ka porofetago dilo tše mpe ka ditlogolwana tša Jakobo,+Ebile ga go na motho yo a ka loyago Baisiraele.+
Ga bjale batho ba ka bolela ka ditlogolwana tša Jakobo le Baisiraele ba re:
‘Bonang seo Modimo a se dirilego!’
24 Se ke setšhaba seo se tlago go ema go swana le tau,Gomme sa emelela ka bosona go swana le tau.+
Se ka se robale go fihlela se eja phoofolo yeo se e swerego,Le go fihlela se enwa madi a diphoofolo tšeo se di bolailego.”
25 Ke moka Balaka a re go Bileama: “Ge e ba e le gore o ka se kgone go roga setšhaba seo, gona o se ke wa ba wa leka le go se šegofatša.”
26 Bileama a araba Balaka a re: “Na ga se ka go botša ka re: ‘Ke tlo dira dilo ka moka tšeo Jehofa a di bolelago’?”+
27 Balaka a re go Bileama: “Etla hle ke go iše lefelong le lengwe gape. Mohlomongwe Modimo wa nnete o tla dumela gore o nthogele bona o le moo.”+
28 Ka gona Balaka a iša Bileama moo go lego godimo lefelong leo le bitšwago Peoro, leo le lebanego le leganata la Jeshimone.+
29 Ke moka Bileama a re go Balaka: “Nkagele dialetare tše šupago lefelong le o be o ntirele sehlabelo ka dipoo tše šupago le dinku tše tona tše šupago.”+
30 Ka gona Balaka a dira ka mokgwa wo Bileama a boletšego, gomme a dira sehlabelo ka poo le ka nku e tona aletareng e nngwe le e nngwe.
Mengwalo ya Tlase
^ Go bonagala e le phoofolo yeo e swanago le nare.
