Numeri 24:1-25
24 Ge Bileama a bona gore Jehofa o nyaka gore Baisiraele ba šegofatšwe, ga se a ka a boela gape go yo nyaka dipheko go swana le nakong e fetilego,+ eupša o ile a leba lešokeng.
2 Ge Bileama a lebelela gomme a bona Baisiraele ba dutše go ya ka meloko ya bona,+ moya wa Modimo o ile wa ba mo go yena.+
3 Ke moka a bolela molaetša wa boporofeta a re:+
“Mantšu a Bileama morwa wa Beoro,Mantšu a monna yoo mahlo a gagwe a bulegilego,
4 Mantšu a yo a kwago lentšu la Modimo,Yo a bonego pono ya Ramatlaohle,Yo a wetšego fase a butše mahlo, a re:+
5 Ditente tša gago di botse kudu, wena Jakobo,E lego wona madulo a gago, wena Isiraele!+
6 Di fihla kgole go swana le meedi,+Di swana le dirapa tšeo di bjetšwego kgauswi le noka.Di swana le dikgopha tšeo Jehofa a di bjetšego,Di swana le mehlare ya metsedara yeo e lego kgauswi le meetse.
7 Meetse a dulela go rotha dinkgong tša gagwe tše pedi,Gomme peu ya gagwe e bjetšwe kgauswi le meetse a mantši.+
Le gona kgoši ya gagwe+ e tla ba e kgolo go feta Agaga,+Gomme mmušo wa gagwe o tla ba o mogolo.+
8 Modimo o mo ntšhitše Egepeta,Go Baisiraele o swana le dinaka tša poo ya naga.
O tla fediša ditšhaba tšeo di mo gatelelago,+Gomme a kokona marapo a tšona, a ba a di rathaganya ka mesebe ya gagwe.
9 O patlame, o robetše go swana le tau,Le gona, ke mang yo a ka lekago go go tshwenya?
Bao ba go šegofatšago le bona ba tla šegofatšwa,Gomme bao ba go rogago le bona ba tla rogwa.”+
10 Ke moka Balaka a galefela Bileama, a phaphatha diatla tša gagwe a galefile kudu, ke moka a re go yena: “Ke go biditše mo gore o tle o roge manaba a ka,+ eupša wena o a šegofaditše ka makga a a mararo.
11 Bjale sepela o ye ga geno kapelapela. Ke be ke nyaka go go putsa kudu,+ eupša Jehofa o dirile gore ke go time moputso.”
12 Bileama a re go Balaka: “Akere ke boditše batho bao o bego o ba romile ka re:
13 ‘Le ge Balaka a be a ka nnea ntlo ya gagwe yeo e tletšego silifera le gauta, ke be nka se dire selo le ge e le sefe seo Jehofa a sego a ntaela gore ke se dire, e ka ba e le se sebotse goba se sebe. Ke tla bolela feela seo Jehofa a tlago go mpotša sona.’+
14 Gona bjale ke boela setšhabeng sa gešo. Bjale etla ke go botše seo setšhaba se se tlago go se dira setšhaba sa gago nakong e tlago.”
15 Ka gona Bileama a bolela molaetša wo wa boporofeta a re:+
“Mantšu a Bileama morwa wa Beoro,Mantšu a monna yoo mahlo a gagwe a bulegilego,+
16 Mantšu a yo a kwago lentšu la Modimo,Le yo a tsebago dilo tšeo Modimo yo Godimodimo a di tsebago,Yo a bonago pono ya RamatlaohleA dutše a wela fase a butše mahlo:
17 Ke tla mmona, eupša e sego gona bjale,Ke tla mo lebelela, eupša e sego kgauswinyane.
Naledi+ e tla tšwa go Jakobo,Gomme molamo+ wa tšwelela go Isiraele.+
O tla pšhatlaganya phatla ya Moaba,+A pšhatla le marapo a hlogong a batho ka moka bao ba ratago ntwa.
18 O tla tšea Edomo ya ba bohwa bja gagwe,+Gomme Seire+ e tla ba bohwa bja manaba a gagwe,+Mola Isiraele yona e tla bontšha sebete.
19 Motho yo a tšwago go Jakobo o tla fenya manaba,+Gomme o tla fediša motho le ge e le ofe yo a phologilego mo motseng.”
20 Ge a bona Amaleke, a tšwela pele a bolela molaetša wa boporofeta a re:
“Amaleke e bile wa mathomo gare ga ditšhaba,+Eupša mafelelong o tla fedišwa.”+
21 Ge a bona Bakeni,+ a tšwela pele a bolela molaetša wa boporofeta a re:
“Lefelo la gago le šireletšegile, gomme moo o dulago gona go agilwe leswikeng.
22 Eupša go tla ba le yoo a tlago go tšhuma Bakeni.
Go tla tšea nako e kaakang pele Asiria e le iša bothopša?”
23 A tšwela pele a bolela molaetša wa boporofeta a re:
“Joo! Ke mang yo a tlago go phologa ge Modimo a dira se?
24 Go tla tla dikepe tšeo di tšwago lebopong la Khithima,+Gomme di tla hlasela Asiria,+Tša hlasela le Ebere.
Eupša le yona e tla fedišwa ka mo go feletšego.”
25 Ka morago ga moo Bileama+ a ema a boela ga gabo. Balaka le yena a sepela.
