Numeri 5:1-31
5 Jehofa a tšwela pele a bolela le Moshe a re:
2 “Botša Baisiraele gore ba tšee motho yo mongwe le yo mongwe yo a nago le lephera,+ motho yo mongwe le yo mongwe yo a edišago+ le motho yo mongwe le yo mongwe yo a sa hlwekago ka baka la go kgwatha setopo,+ ba mo ntšhetše ka ntle ga ditente.
3 Go sa šetšwe gore motho yoo ke monna goba ke mosadi, le mo ntšhetše ka ntle. Le ba ntšhetše ka ntle ga ditente gore ba se ke ba šilafatša+ ditente tša batho ba ka, ka gobane ke dula gare ga bona.”+
4 Ka gona Baisiraele ba dira bjalo, gomme ba ntšhetša batho bao ka ntle ga ditente. Baisiraele ba dira ka mokgwa woo Jehofa a bego a boditše Moshe.
5 Jehofa a tšwela pele a bolela le Moshe a re:
6 “Botša Baisiraele o re: ‘Ge e ba monna goba mosadi a ka dira sebe le ge e le sefe gomme a se botegele nna Jehofa, motho yoo o na le molato.+
7 Motho yoo a ipobole+ sebe seo a se dirilego, gomme a patele tšhelete yeo e lekanago molato wo a o dirilego, a be a oketše ka karolo ya bohlano ya tšhelete yeo+ ke moka a e nee motho yo a mo diretšego molato.
8 Eupša ge e ba motho yo a diretšwego molato a hlokofetše gomme go se na yo a tswalanago le yena kgauswi yo a ka newago tšhelete yeo, gona tšhelete yeo e bušetšwe go Jehofa gomme e be ya moperisita. Ge motho yoo a tliša tšhelete a tliše le nku e tona go moperisita gore a e neele go Modimo e le gore a tle a lebalelwe dibe.+
9 “‘Meneelo ka moka e mekgethwa+ yeo Baisiraele ba e neago moperisita, e be ya moperisita.+
10 Moneelo o mongwe le o mongwe o mokgethwa woo motho yo mongwe le yo mongwe a o neago moperisita e tla ba wa moperisita.’”
11 Jehofa a tšwela pele a bolela le Moshe a re:
12 “Botša Baisiraele o re: ‘Ge mosadi yo a nyetšwego a ka aroga gomme a se botegele monna wa gagwe,
13 gomme a robala le monna yo mongwe,+ ke moka monna wa gagwe a se tsebe ka taba yeo ebile gwa dula go se na motho yo a tsebago ka yona, seo se ra gore ge e ba a ka itšhilafatša gomme gwa se be le bohlatse ebile a se ke a bonwa, gona go swanetše go dirwa se se latelago:
14 Ge e ba monna a ka ba le mona gomme a belaela gore mosadi wa gagwe ga se a mmotegela, go sa šetšwe gore mosadi yoo o itšhilafaditše goba ga se a itšhilafatša,
15 gona monna yoo a tliše mosadi wa gagwe go moperisita, a tle le sebego sa mosadi yoo, e lego bupi bja mabele ka sebjaneng sa dilithara tše pedi. A se ke a bo tswaka ka makhura goba seorelo se sešweu ka gobane ke sebego sa mabele seo a se neelago ka baka la mona. Ke sebego sa mabele seo se bontšhago ge e ba mosadi yoo a na le molato goba a se na molato.
16 “‘Moperisita a batametše mosadi yoo gomme a mo emiše pele ga Jehofa.+
17 Moperisita a tšee meetse a makgethwa ka sebjana sa letsopa, gomme a tšee o mongwe wa mobu wo o lego fase ka taberenakeleng a o tšhele ka meetseng ao.
18 Moperisita a emiše mosadi yoo pele ga Jehofa gomme a bofolle moriri wa mosadi yoo, ke moka ka diatleng tša mosadi yoo a tšhele sebego sa mabele seo se mo gopotšago molato woo a o dirilego, e lego sebego sa mabele seo se neetšwego ka baka la mona,+ gomme moperisita a sware ka seatleng sa gagwe meetse a galakago ao a tlišago kotlo.+
19 “‘Moperisita a dire gore mosadi yoo a ene, ke moka a re go yena: “Ge e ba o se wa robala le monna yo mongwe mola o nyalane le monna wa gago,+ goba ge e ba o se wa aroga gomme wa itšhilafatša, gona anke meetse a ao a galakago ao a tlišago kotlo a se ke a go gobatša.
20 Eupša ge e ba wena o arogile mola o nyalane le monna wa gago ka go itšhilafatša gomme wa robala le monna yo mongwe ka ntle le monna wa gago,+ gona o tlo otlwa.”
21 Ke moka moperisita a re go mosadi yoo: “Anke Jehofa a dire gore leina la gago le dirišwe go dithogako le dikeno setšhabeng sa geno. Ge e ba ka nnete o robetše le monna yo mongwe, Jehofa a ka se go dumelele go ba le bana ebile mpa ya gago e tlo kokomoga.
22 Meetse ao a tlišago kotlo a tla tsena ka maleng a gago gomme a kokomoša mpa ya gago, ebile o ka se kgone go ba le bana.” Ke moka mosadi yoo a arabe a re: “Amene! Amene!”*
23 “‘Moperisita a ngwale dithogako tšeo ka pukung gomme a di phumole ka meetse a galakago.
24 A dire gore mosadi yoo a nwe meetse ao a galakago, gomme ge a a nwele a tlo dira gore a kwe bohloko.
25 Moperisita a tšee ka seatleng sa mosadi yoo sebego sa mabele seo se neelwago ka baka la mona,+ a se tšokoletše pele le morago a le pele ga Jehofa ke moka a se batametše kgauswi le aletare.
26 Moperisita a tšee sebego sa mabele a go tlala seatla e le gore Modimo a dule a gopola sebego seo, gomme a se fišetše aletareng se thuntšhe muši,+ ka morago ga moo a nweše mosadi yoo meetse ao.
27 Ge e ba mosadi yoo a itšhilafaditše gomme a se a botegela monna wa gagwe, gona meetse ao a tlišago kotlo a tla dira gore mpa ya gagwe e kokomoge gomme a se ke a ba le bana. Ke moka leina la mosadi yoo le rogakwe setšhabeng sa gabo.
28 Eupša ge e ba mosadi yoo a se a itšhilafatša ebile a hlwekile, gona a ka se otlwe ebile o sa tlo kgona go ima gomme a ba le bana.
29 “‘Wo ke molao wa mabapi le monna yo a nago le mona+ ge mosadi wa gagwe a ka aroga gomme a itšhilafatša mola a nyalane le monna wa gagwe,
30 goba ge e ba monna a ka ba le mona gomme a belaela gore mosadi wa gagwe ga a mmotegele. Monna yoo a tliše mosadi wa gagwe pele ga Jehofa gomme moperisita a dire seo se laetšwego molaong wo.
31 Monna yoo a ka se be le molato, eupša ge e ba mosadi yoo a na le molato, gona o tla ikarabela bakeng sa molato wa gagwe.’”
Mengwalo ya Tlase
^ Goba, “A go be bjalo! A go be bjalo!”
