Numeri 25:1-18
25 Ge Baisiraele ba be ba dula Shithima,+ ba ile ba thoma go itshwara gampe ka tša thobalano* le basadi ba Bamoaba.+
2 Basadi ba moo ba mema Baisiraele gore ba sepele le bona ge ba yo direla medimo ya bona dihlabelo,+ gomme Baisiraele ba ja dihlabelo tšeo ba ba ba khunamela medimo yeo ya bona.+
3 Baisiraele ba ile ba thoma go rapela Baali wa Peoro,+ gomme Jehofa a ba galefela kudu.
4 Jehofa a re go Moshe: “Tšea baetapele ba bona ka moka, ke moka o ba bolaye gomme o ba fege pele ga ka nna Jehofa mosegare wa sekgalela, e le gore nna Jehofa ke se sa galefela Baisiraele.”
5 Ke moka Moshe a re go baahlodi ba Isiraele:+ “Yo mongwe le yo mongwe wa lena a bolaye banna ba gabo bao ba rapelago Baali wa Peoro.”+
6 Ka yona nako yeo gwa tšwelela monna yo mongwe wa Moisiraele a sepela le mosadi wa Momidiane+ a mo tlišitše ditenteng. O ile a feta pele ga Moshe le pele ga Baisiraele ba bangwe ka moka, nakong ya ge ba be ba lla ba le mojakong wa taberenakele.
7 Ge Finease+ morwa wa Eleasara, e lego morwa wa moperisita Arone a bona seo, a ema kapelapela gare ga setšhaba gomme a tšea lerumo.
8 Ke moka a šala monna yoo wa Moisiraele morago a tsena ka tenteng, a hlaba monna yoo a ba a hlaba le mosadi yoo sethong sa gagwe sa bong. Ka gona, bolwetši bjo bo bego bo bolaya Baisiraele bja kgaotša.+
9 Bao ba bolailwego ke bolwetši bjoo e be e le ba 24 000.+
10 Ke moka Jehofa a re go Moshe:
11 “Finease+ morwa wa Eleasara, e lego morwa wa moperisita Arone o dirile gore ke se sa galefela Baisiraele, ka gobane ga se a kgotlelela go bona batho ba sa mpotegele.+ Ke ka baka leo ke sego ka fediša Baisiraele le ge ke nyaka gore ba rapele nna ke nnoši.+
12 Ka gona mmotše o re: ‘Ke dira kgwerano ya khutšo le yena.
13 Ka baka la kgwerano yeo, yena le ditlogolwana tša gagwe e tla ba baperisita go ya go ile,+ ka gobane ga se a kgotlelela go bona batho ba sa mpotegele.+ Ka go dira bjalo, o ile a dira gore ke lebalele Baisiraele.’”
14 Leina la monna wa Moisiraele yo a bolailwego le mosadi wa Momidiane e be e le Simiri morwa wa Salu, kgošana ya moloko wa Basimeone.
15 Leina la mosadi wa Momidiane yo a bolailwego e be e le Kosibi morwedi wa Tsuri. Tsuri+ e be e le moetapele wa moloko wa Bamidiane.+
16 Ka morago Jehofa a bolela le Moshe a re:
17 “Hlaselang Bamidiane le ba bolayeng,+
18 ka gobane ba dirile gore ke le otle ka ge ba le dirišitše sebe gore le rapele Baali wa Peoro,+ ebile ba le dirišitše sebe ba šomiša Kosibi morwedi wa moetapele wa Bamidiane, yena yo a bolailwego+ mohlang wola ke be ke le otla ka ge le rapetše Baali wa Peoro.”+
Mengwalo ya Tlase
^ Bona Tlhaloso ya Mantšu.
