Numeri 4:1-49
4 Bjale Jehofa a bolela le Moshe le Arone a re:
2 “Mo go barwa ba Lefi le bale barwa ba Kohathe+ go ya ka malapa a bona le meloko ya bona,
3 e lego banna ka moka ba mengwaga ya go thoma ka e 30+ go ya go e 50+ bao ba lego sehlopheng seo se abetšwego go hlankela taberenakeleng.+
4 “Mešomo yeo barwa ba Kohathe ba tlago go e dira taberenakeleng+ ke selo se sekgethwakgethwa. Mešomo yeo ke ye:
5 Ge go hlomollwa ditente, Arone le barwa ba gagwe ba theoše gareteine+ gomme ba khupetše areka+ yeo e nago le maswika ao a ngwadilwego melao ya Modimo.
6 Ba e khupetše ka letlalo le boleta la phoofolo ya ka meetseng, godimo ga lona ba ale lešela le letalalerata gomme mekgokong ya yona+ ba tsenye dikota tša go e rwala.
7 “Ba ale lešela le letalalerata godimo ga tafola ya senkgwa seo se neetšwego nna Modimo,+ mo go yona ba bee dibjana, dikomiki, dikotlelwana le digo tša go tšhela dibego tša dino.+ Senkgwa seo se neelwago ka mehla,+ se dule se le moo tafoleng.
8 Ba di khupetše ka lešela le lekhwibidukhwibidu. Ba khupetše tafola yeo ka letlalo le boleta la phoofolo ya ka meetseng, gomme mekgokong ya yona ba tsenye dikota+ tša go e rwala.
9 Ke moka ba tšee lešela le letalalerata ba khupetše sehlomelamabone,+ mabone a sona,+ dithapo tša mabone, dibjana tša sona tša go swara magala+ le dibjana ka moka tša makhura tša sehlomelamabone seo gore mabone a sona a dule a tuka.
10 Ba phuthele sehlomelamabone seo le didirišwa tša sona ka moka ka letlalo le boleta la phoofolo ya ka meetseng gomme ba se bee godimo ga dikota tša go se rwala.
11 Ba khupetše aletare ya gauta+ ka lešela le letalalerata le ka letlalo le boleta la phoofolo ya ka meetseng, gomme ba tsenye dikota tša yona tša go e rwala.+
12 Ke moka ba tšee dibjana ka moka+ tšeo ba di dirišago ka mehla lefelong le lekgethwa, ba di phuthele ka lešela le letalalerata, ba di khurumetše ka letlalo le boleta la phoofolo ya ka meetseng gomme ba di bee godimo ga dikota tša go di rwala.
13 “Ba tloše melora aletareng+ gomme ba khupetše aletare yeo ka lešela le le phepolo.
14 Godimo ga aletare yeo ba bee dibjana ka moka tšeo ba di šomišago ge ba hlankela go yona, ba bee dibjana tša go swara magala, diforoko, digarafo le dikotlelwana, e lego dibjana ka moka tša ka aletareng.+ Ba e khupetše ka letlalo le boleta la phoofolo ya ka meetseng gomme ba e tsenye dikota tša yona tša go e rwala.+
15 “Ge go hlomollwa ditente, Arone le barwa ba gagwe ba khupetše lefelo le lekgethwa+ le ditlabakelo ka moka tša lefelong leo. Ge ba feditše, barwa ba Kohathe ba tle ba di rwale,+ eupša ba se ke ba kgwatha dilo tšeo tše kgethwa e le gore ba se ke ba hwa.+ Tše ke dilo tšeo barwa ba Kohathe ba bego ba swanetše go di rwala taberenakeleng.
16 “Eleasara+ morwa wa moperisita Arone a ikarabele ka go hlokomela makhura a go tšhuma mabone,+ seorelo sa go nkga bose,+ sebego sa mabele sa ka mehla le makhura a go tlotša motho ge a kgethwa.+ A hlokomele taberenakele ka moka le dilo ka moka tše di lego go yona, go akaretša le dibjana ka moka tša lefelong le lekgethwa.”
17 Jehofa a tšwela pele a bolela le Moshe le Arone a re:
18 “Le se ke la dumelela ba moloko wa malapa a Bakohathe+ ba fedišwa mo go Balefi.
19 Eupša le ba direle se e le gore ba dule ba phela gomme ba se ke ba hwa ka baka la go batamela dilo tše kgethwakgethwa.+ Arone le barwa ba gagwe ba tla tsena ka taberenakeleng gomme ba nea yo mongwe le yo mongwe mošomo wa gagwe le seo a swanetšego go se rwala.
20 Bakohathe ba se ke ba bona dilo tše kgethwa le ge e ka ba ka motsotswana, go sego bjalo ba tlo hwa.”+
21 Ke moka Jehofa a bolela le Moshe a re:
22 “O bale barwa ba Gerishone+ go ya ka meloko ya bona le malapa a bona.
23 O ngwadiše banna ka moka ba mengwaga ya go thoma ka e 30 go ya go e 50 bao ba tlago go ba sehlopheng seo se abetšwego go hlankela taberenakeleng.
24 Wo ke mošomo woo ba malapa a Bagerishone ba abetšwego go o dira:+
25 Ba rwale taberenakele,+ mašela a yona, letlalo le boleta la phoofolo ya ka meetseng leo le alwago godimo ga yona,+ gareteine ya mojako wa taberenakele,+
26 gareteine ya lapa,+ gareteine yeo e lego mojakong wa lapa+ yeo e lego ka mahlakoreng ka moka a taberenakele le aletare, dithapo tša tente, dibjana ka moka tša bona le dilo ka moka tšeo ba di dirišago mošomong wa bona. Wo ke mošomo wa bona.
27 Mošomo ka moka wa barwa ba Gerishone+ o etelelwe pele ke Arone le barwa ba gagwe, o nee barwa ba Gerishone dilo tše ka moka gore ba di rwale gore e be boikarabelo bja bona.
28 Wo ke mošomo woo ba malapa a Bagerishone ba swanetšego go o dira taberenakeleng,+ gomme mošomo wa bona o etelelwe pele ke Ithamara+ morwa wa moperisita Arone.
29 “Ge e le barwa ba Merari+ bona o ba ngwadiše go ya ka malapa a bona le meloko ya bona.
30 O ngwadiše ba mengwaga ya go thoma ka e 30 go ya go e 50, e lego banna ka moka bao ba lego sehlopheng seo se abetšwego go hlankela taberenakeleng.
31 Dilo tšeo ba ikarabelago ka go di rwala+ taberenakeleng ke tše di latelago: Ba rwale diforeime tša taberenakele,+ dikota tša yona,+ diphilara tša yona,+ maotwana a yona ao a nago le mašoba,+
32 diphilara+ tšeo di lego ka mahlakoreng ka moka a lapa, maotwana a tšona ao a nago le mašoba,+ dipikiri tša tente,+ dithapo tša tente, dilo ka moka tšeo ba di dirišago, ebile ba dire le mešomo ka moka yeo e sepedišanago le dilo tše. Le ba abele go ya ka maina a bona dilo tšeo ba swanetšego go di rwala.
33 Wo ke mošomo woo ba malapa a barwa ba Merari+ ba swanetšego go o dira taberenakeleng, ba eteletšwe pele ke Ithamara morwa wa moperisita Arone.”+
34 Moshe, Arone le dikgošana+ tša setšhaba ba ngwadiša barwa ba Bakohathe+ go ya ka malapa a bona le meloko ya bona,
35 go thoma ka ba mengwaga e 30 go ya go e 50, e lego banna ka moka bao ba lego sehlopheng seo se abetšwego go hlankela taberenakeleng.+
36 Palo ya banna ka moka bao ba ngwadišitšwego go ya ka malapa a bona e be e le ba 2 750.+
37 Ba ke bona bao ba bego ba ngwadišitšwe go ba malapa a Bakohathe, e lego banna ka moka bao ba bego ba hlankela taberenakeleng. Ke bona bao Moshe le Arone ba ba ngwadišitšego ka ge ba laetšwe ke Jehofa a diriša Moshe.+
38 Barwa ba Gerishone+ ba ngwadišitšwe go ya ka malapa a bona le meloko ya bona,
39 go thoma ka ba mengwaga e 30 go ya go e 50, e lego banna ka moka bao ba lego sehlopheng seo se abetšwego go hlankela taberenakeleng.
40 Banna ka moka bao ba bego ba ngwadišitšwe go ya ka malapa a bona le meloko ya bona e be e le ba 2 630.+
41 Ba ke bona bao ba ngwadišitšwego ba malapa a barwa ba Gerishone, e lego banna ka moka bao ba hlankelago taberenakeleng. Ba ngwadišitšwe ke Moshe le Arone go ya kamoo Jehofa a bego a laetše ka gona.+
42 Barwa ba Merari ba ngwadišitšwe go ya ka malapa a bona le meloko ya bona,
43 go thoma ka ba mengwaga e 30 go ya go e 50, e lego banna ka moka bao ba lego sehlopheng seo se abetšwego go hlankela taberenakeleng.+
44 Palo ya banna ka moka bao ba bego ba ngwadišitšwe go ya ka malapa a bona e be e le ba 3 200.+
45 Ba ke bao ba bego ba ngwadišitšwe go ba malapa a barwa ba Merari. Ke bona bao Moshe le Arone ba ba ngwadišitšego ka ge ba laetšwe ke Jehofa a diriša Moshe.+
46 Moshe, Arone le dikgošana tša Isiraele, ba ngwadiša Balefi ba ka moka go ya ka malapa a bona le meloko ya bona,
47 go thoma ka ba mengwaga e 30 go ya go e 50, gomme ka moka ga bona ba be ba neilwe mešomo ya go hlankela taberenakeleng le ya go rwala dilo tša taberenakeleng.+
48 Palo ya bao ba ngwadišitšwego e be e le ba 8 580.+
49 Moshe a ba ngwadiša go ya le kamoo Jehofa a mo laetšego ka gona. Yo mongwe le yo mongwe a ngwadišwa go ya ka mošomo wa gagwe le dilo tšeo a swanetšego go di rwala. Ba ngwadišwa go ya kamoo Jehofa a bego a laetše Moshe.
