Numeri 19:1-22
-
Kgomo ya mmala o mokhulong le meetse a go hlwekiša (1-22)
19 Jehofa a bolela gape le Moshe le Arone a re:
2 “Wo ke molao wo nna Jehofa ke o laetšego, ke re: ‘Botšang Baisiraele gore ba tle le kgomo ya mmala o mokhulong* yeo e phetšego gabotse, yeo e sa solegego+ le yeo e sa kago ya dirišwa go šoma mošomo le ge e le ofe.
3 Le e neeng moperisita Eleasara a e gapele ka ntle ga ditente, gomme e hlabje pele ga gagwe.
4 Ke moka moperisita Eleasara a kgwathe madi a yona ka monwana gomme a a rothetše gašupa go lebana le ka pele ga taberenakele.+
5 Kgomo yeo e fišwe a e lebeletše. Go fišwe letlalo la yona, nama ya yona, madi a yona le ditšhila tša yona tša ka maleng.*+
6 Moperisita a tšee kota ya mohlare wa motsedara, semela seo se bitšwago hisopo+ le lešela le lekhwibidukhwibidu gomme a di lahlele ka mollong woo kgomo yeo e fišetšwago go wona.
7 Ke moka moperisita a hlatswe diaparo tša gagwe gomme a hlape, ka morago ga moo a ka ya ditenteng, eupša e tlo ba yo a sa hlwekago go fihla mantšiboa.
8 “‘Motho yo a fišitšego kgomo yeo a hlatswe diaparo tša gagwe a be a hlape, gomme e be yo a sa hlwekago go fihla mantšiboa.
9 “‘Motho yo a hlwekilego a olele molora wa kgomo+ yeo a o bee ka ntle ga ditente lefelong leo le hlwekilego, ke moka Baisiraele ba tšee molora woo ba o bee e le gore ba tle ba o tšhele ka gare ga meetse ao ba tlago go a šomiša ge ba hlwekišwa.+ Ke sebego sa sebe.
10 Motho yo a olelago molora wa kgomo yeo a hlatswe diaparo tša gagwe, gomme e be yo a sa hlwekago go fihla mantšiboa.
“‘Woo e tla ba molao wa go ya go ile go Baisiraele le batho bao ba dulago le bona bao e sego Baisiraele.+
11 Motho yo mongwe le yo mongwe yo a ka kgwathago setopo le ge e le sefe sa motho, e tla ba yo a sa hlwekago matšatši a šupago.+
12 Motho yoo a itlhwekiše ka meetse ao letšatšing la boraro gomme e tla ba yo a hlwekilego letšatšing la bošupa. Eupša ge e ba a ka se itlhwekiše letšatšing la boraro, gona e ka se be yo a hlwekilego letšatšing la bošupa.
13 Motho yo mongwe le yo mongwe yo a kgwathago setopo sa motho le ge e le ofe gomme a se itlhwekiše, o šilafaditše taberenakele ya Jehofa,+ ka gona motho yoo a bolawe mo setšhabeng.+ Ka ge a sa ka a foketšwa ka meetse a go hlwekiša,+ o tla dula e le yo a sa hlwekago.
14 “‘Molao wa ge motho a hwela ka tenteng šo: Motho yo mongwe le yo mongwe yo a tsenago ka tenteng yeo le motho yo mongwe le yo mongwe yo a šetšego a le ka gare ga yona, e tla ba yo a sa hlwekago matšatši a šupago.
15 Sebjana se sengwe le se sengwe seo se sego sa khurumelwa gabotse, e be seo se sa hlwekago.+
16 Motho yo mongwe le yo mongwe yo a ka rego a le nageng a kgwatha motho yo a bolailwego ka sabola, goba a kgwatha setopo goba lerapo la motho goba a kgwatha lebitla, e tla ba yo a sa hlwekago ka matšatši a šupago.+
17 Ba tšeele motho yoo a sa hlwekago o mongwe wa melora ya sebego sa sebe seo se fišitšwego gomme ba o tšhele ka meetse ao a gelwego ka nokeng ka gare ga sebjana.
18 Ke moka motho yo a hlwekilego+ a tšee semela seo se bitšwago hisopo+ a se ine ka meetseng ao gomme a a foketše tenteng le dibjaneng ka moka, a be a a foketše bathong ka moka bao ba bego ba le moo le mothong yo a kgwathilego lerapo goba yo a kgwathilego motho yo a bolailwego ka sabola goba setopo goba lebitla.
19 Motho yo a hlwekilego a foketše motho yo a sa hlwekago ka meetse ao letšatšing la boraro le la bošupa, gomme a mo hlwekiše sebeng ka letšatši la bošupa.+ Ke moka motho yo a sa hlwekago a hlatswe diaparo tša gagwe a be a hlape gomme e tla ba yo a hlwekilego mantšiboa.
20 “‘Eupša motho yo a sa hlwekago le yo a sego a itlhwekiša, a bolawe mo setšhabeng+ ka gobane o šilafaditše sekgethwa sa Jehofa. Ka ge a se a ka a foketšwa ka meetse a go hlwekiša, ga se a hlweka.
21 “‘Molao wa bona wa go ya go ile šo: Motho yo a foketšago meetse a go hlwekiša+ a hlatswe diaparo tša gagwe, gomme yo a kgwathago meetse a go hlwekiša e tla ba yo a sa hlwekago go fihla mantšiboa.
22 Selo le ge e le sefe seo motho yo a sa hlwekago a se kgwathago, e tla ba seo se sa hlwekago, le motho yo a ka se kgwathago e tla ba yo a sa hlwekago go fihla mantšiboa.’”+
