Numeri 10:1-36
10 Ke moka Jehofa a re go Moshe:
2 “Itirele diphalafala+ tše pedi tša silifera, gomme o di šomiše ge o kgobokanya setšhaba le ge e le nako ya go hlomolla ditente.
3 Ge diphalafala tšeo tše pedi di letšwa, setšhaba ka moka se kgobokane kgauswi le wena mojakong wa taberenakele.+
4 Ge phalafala e tee e letšwa, gona dikgošana tšeo e lego baetapele ba batho ba dikete di kgobokane kgauswi le wena.+
5 “Ge le di letša ka medumo ya go se swane, bao ba hlomilego ditente ka bohlabela+ ba di hlomolle gomme ba sepele.
6 Ge le di letša ka medumo ya go se swane ka lekga la bobedi, bao ba hlomilego ditente ka borwa+ ba di hlomolle gomme ba sepele. Diphalafala tše di swanetše go letšwa ka yona tsela ye nako le nako ge ba bangwe ba bona ba sepela.
7 “Bjale ge le kgoboketša setšhaba, le se ke la letša diphalafala+ go swana le ge le di letša ge e le nako ya gore ba bangwe ba tloge.
8 Barwa ba Arone, e lego baperisita, e be bona ba letšago diphalafala+ tšeo. Le gona go letša diphalafala tše e be molao wa go ya go ile melokong ya lena ka moka.
9 “Ge e ba le ka re le le mo nageng ya lena manaba a tla go tlo le hlasela, le letšeng diphalafala gore le ye ntweng,+ gomme Jehofa Modimo wa lena o tla le gopola ke moka a le phološa manabeng a lena.
10 “Le gona dinakong tša ge le thabile,+ e lego nako yeo le ketekago menyanya ya lena+ le nakong ya ge go thoma kgwedi e nngwe le e nngwe, le swanetše go leletša dibego tša lena tša go fišwa+ diphalafala le dihlabelo tša lena tša go dira khutšo le Modimo.+ Di tla dira gore Modimo wa lena a dule a le gopola. Ke nna Jehofa Modimo wa lena.”+
11 Bjale ka letšatši la bo-20, kgweding ya bobedi, ka ngwaga wa bobedi,+ leru le ile la tloga godimo ga taberenakele yeo e nago le maswika ao a ngwadilwego melao ya Modimo.+
12 Baisiraele ba tloga lešokeng la Sinai ka mokgwa woo ba bego ba beakantšwe gore ba sepele ka gona gomme ba sepela+ go fihlela leru le ema lešokeng la Parane.+
13 Le e be e le lekga la pele ba hlomolla ditente tša bona gomme ba tloga, ba latela taelo ya Jehofa yeo a ba neilego yona a diriša Moshe.+
14 Sehlopha sa meloko e meraro sa barwa ba Juda se ile sa tloga pele, gomme se be se eteletšwe pele ke Nahashone+ morwa wa Aminadaba.
15 Mašole a moloko wa barwa ba Isakara a be a eteletšwe pele ke Nethanele+ morwa wa Tsuari.
16 Mašole a moloko wa barwa ba Sebulone a be a eteletšwe pele ke Eliaba+ morwa wa Helone.
17 Ge taberenakele e hlahlamollwa,+ barwa ba Gerishone+ le barwa ba Merari+ bao ba šomago go rwala taberenakele ba ile ba sepela.
18 Sehlopha sa meloko e meraro sa Rubeni se ile sa sepela le mašole a sona, gomme se be se eteletšwe pele ke Elitsuri+ morwa wa Shedeuri.
19 Mašole a moloko wa barwa ba Simeone a be a eteletšwe pele ke Shelumiele+ morwa wa Tsurishadai.
20 Mašole a moloko wa barwa ba Gada a be a eteletšwe pele ke Eliasafa+ morwa wa Duele.
21 Ka gona, Bakohathe bao ba bego ba rwala dilo tša ka sekgethweng,+ ba sepela. Taberenakele e be e swanetše go ba e šetše e hlomilwe ge bona ba fihla.
22 Sehlopha sa meloko e meraro sa Efuraime sa sepela se na le mašole a sona gomme se be se eteletšwe pele ke Elishama+ morwa wa Amihudi.
23 Mašole a moloko wa barwa ba Manase a be a eteletšwe pele ke Gamaliele+ morwa wa Pedatsuri.
24 Mašole a moloko wa barwa ba Benjamini a be a eteletšwe pele ke Abidani+ morwa wa Gideoni.
25 Ke moka sehlopha sa meloko e meraro sa barwa ba Dani sa tloga le mašole a sona. Ke sona se se bego se le ka morago gore se šireletše dihlopha ka moka tša mašole, gomme se be se eteletšwe pele ke Ahiesere+ morwa wa Amishadai.
26 Mašole a moloko wa barwa ba Ashere a be a eteletšwe pele ke Pagiele+ morwa wa Okorane.
27 Mašole a moloko wa barwa ba Nafutali a be a eteletšwe pele ke Ahira+ morwa wa Enani.
28 Wo ke mokgwa woo Baisiraele ba bego ba tloga ka wona ka dihlopha tša bona tša mašole ge ba be ba hlomolla ditente gomme ba sepela.+
29 Ke moka Moshe a bolela le Hobaba morwa wa Reguele*+ wa Momidiane yoo e lego mogwe wa Moshe,* a re: “Re ya lefelong leo Jehofa a boletšego ka lona a re: ‘Ke tla le nea lona.’+ Sepela le rena,+ gomme re tla go swara gabotse, ka gobane Jehofa o tshepišitše Baisiraele dilo tše dibotse.”+
30 Eupša Hobaba yena a re: “Nka se sepele le lena, ke tla boela nageng ya gešo le go batho ba gešo.”
31 Ke moka Moshe a re: “O se ke wa re tlogela hle, ka gobane o tseba moo re ka hlomago ditente gona mo lešokeng, ebile o tla re hlahla.
32 Ge o ka sepela le rena,+ ditšhegofatšo ka moka tšeo Jehofa a re neago tšona, le wena o tlo di hwetša.”
33 Ba thoma go sepela leeto la matšatši a mararo go tloga thabeng ya Jehofa,+ gomme areka+ ya Jehofa ya kgwerano e be e rwelwe pele ga bona leetong leo la matšatši a mararo go fihlela go hwetšwa lefelo leo ba ka khutšago go lona.+
34 Leru la Jehofa+ le be le le godimo ga bona mosegare ge ba be ba tloga moo ba bego ba hlomile ditente gona.
35 E be e re ge Areka e tloga, Moshe a re: “Ema hle Jehofa,+ anke o phatlalatše manaba a gago, gomme o dire gore bao ba go hloilego ba tšhabe pele ga gago.”
36 Ge e be e bewa fase, o be a re: “Boa hle Jehofa, boa go batho ba gago ba diketekete ba Isiraele.”+
