လူများစွာက အဲဒီနေ့ကို ဒီလို မြင်ယောင်ကြတယ်– သန်းထောင်နဲ့ချီတဲ့သူတွေဟာ ဘုရားသခင့်ပလ္လင်တော်ရှေ့ ခေါ်သွင်းခံရမယ်။ ပြီးတော့ တစ်ယောက်ချင်းစီဟာ သူတို့ရဲ့ အရင်လုပ်ရပ်တွေအပေါ် မူတည်ပြီး တရားစီရင်ခံရမယ်။ တချို့က ကောင်းကင်ပေါ်မှာ အသက်ရှင်ခွင့်ရကြမှာ ဖြစ်ပြီး တချို့ကတော့ ငရဲမှာ နှိပ်စက်ခံရမယ်။ ဒါပေမဲ့ တရားဆုံးဖြတ်ရာနေ့ရဲ့ ရည်ရွယ်ချက်က လူတွေကို မတရားမှုတွေကနေ ကယ်တင်ဖို့ဖြစ်တယ်ဆိုပြီး သမ္မာကျမ်းစာမှာ ဖော်ပြထားပါတယ်။ (ဆာလံ ၉၆:၁၃) ဘုရားသခင်က ယေရှုကို တရားသူကြီးအဖြစ် ခန့်အပ်ထားပြီး ယေရှုက လူသားတွေကို ဖြောင့်မတ်တဲ့အခြေအနေသို့ ပြန်ရောက်စေမယ့်ကာလဟာ တရားဆုံးဖြတ်ရာနေ့ ဖြစ်ပါတယ်။—ဟေရှာယ ၁၁:၁-၅; တမန်တော် ၁၇:၃၁ တို့ကိုဖတ်ပါ။

ပထမဆုံးလူယောက်ျား အာဒံဟာ ဘုရားသခင်ကို တမင်တကာ ဆန့်ကျင်လိုက်တဲ့အတွက် သူ့ရဲ့ မျိုးဆက်အားလုံးကလည်း အပြစ်တရား၊ ခက်ခဲဆင်းရဲမှုနဲ့ သေခြင်းရဲ့ ကျေးကျွန်ဘဝကို ရောက်သွားကြရတယ်။ (ရောမ ၅:၁၂) အဲဒီမမျှတမှုကို မျှတအောင်လုပ်ဖို့အတွက် ယေရှုက သေဆုံးသွားတဲ့ လူသန်းပေါင်းများစွာကို ပြန်အသက်ရှင်စေမယ်။ အဲဒီအရာက ခရစ်တော်ယေရှု အုပ်ချုပ်မယ့် အနှစ်တစ်ထောင်ကာလအတွင်း ဖြစ်ပျက်မယ်ဆိုပြီး ဗျာဒိတ်ကျမ်းထဲမှာ ပြောထားတယ်။—ဗျာဒိတ် ၂၀:၄၊ ၁၁၊ ၁၂ ကိုဖတ်ပါ။

ပြန်အသက်ရှင်လာမယ့်သူတွေဟာ သူတို့ မသေခင်က လုပ်ခဲ့တဲ့အရာတွေအပေါ် အခြေခံပြီး စီရင်ခံရမှာ မဟုတ်ပါဘူး။ ဗျာဒိတ် အခန်းကြီး ၂၀ မှာဖော်ပြထားတဲ့ “စာလိပ်များ” ထဲက အရာတွေကို သူတို့လုပ်ဆောင်ခြင်း ရှိမရှိအပေါ် အခြေခံမှာဖြစ်တယ်။ (ရောမ ၆:၇) အသက်ပြန်ရှင်လာပြီး ဘုရားသခင်အကြောင်း သင်ယူခွင့်ရမယ့်သူတွေထဲမှာ “ဖြောင့်မတ်သောသူ၊ မဖြောင့်မတ်သောသူ” တွေပါဝင်မယ်လို့ တမန်တော်ပေါလု ပြောတယ်။—တမန်တော် ၂၄:၁၅ ကိုဖတ်ပါ။

ဘုရားသခင်အကြောင်း မသိလိုက်ရတဲ့အတွက် ကိုယ်တော့်အမှုတော်ကို မထမ်းဆောင်ခဲ့ရဘဲ သေဆုံးသွားတဲ့သူတွေဟာ ကိုယ့်အမူအကျင့်ကို ပြုပြင်ပြီး ကောင်းတာကိုလုပ်ဖို့ အခွင့်အရေးရမှာ ဖြစ်တယ်။ အဲဒီလို ပြုပြင်မယ်ဆိုရင် သူတို့ရဲ့ ရှင်ပြန်ထမြောက်ခြင်းက “အသက်ရှင်ရာ ရှင်ပြန်ထမြောက်ခြင်း” ဖြစ်သွားပါလိမ့်မယ်။ ဒါပေမဲ့ အသက်ပြန်ရှင်လာတဲ့သူတွေထဲက တချို့ကျတော့ ယေဟောဝါရဲ့နည်းလမ်းတွေကို သင်ယူလိုစိတ်ရှိကြမှာ မဟုတ်ပါဘူး။ သူတို့အတွက်ကတော့ “အပြစ်စီရင်ရာ ရှင်ပြန်ထမြောက်ခြင်း” ဖြစ်သွားပါလိမ့်မယ်။—ယောဟန် ၅:၂၈၊ ၂၉; ဟေရှာယ ၂၆:၁၀; ၆၅:၂၀ တို့ကိုဖတ်ပါ။

အနှစ်တစ်ထောင်ကြာမယ့် တရားဆုံးဖြတ်ရာနေ့အဆုံးမှာ နာခံမှုရှိတဲ့ လူသားတွေအတွက် စုံလင်ပြည့်ဝတဲ့ အခြေအနေဖြစ်အောင် ယေဟောဝါဘုရားသခင် လုပ်ဆောင်ပေးမှာ ဖြစ်တယ်။ (၁ ကောရိန္သု ၁၅:၂၄-၂၈) နာခံမှုရှိသူ အားလုံးအတွက် အရမ်းကောင်းတဲ့ အလားအလာပါပဲ။ နောက်ဆုံးစမ်းသပ်မှုအနေနဲ့ ဘုရားသခင်က အနှစ်တစ်ထောင် ချုပ်နှောင်ခံထားရတဲ့ စာတန်ကို တွင်းနက်ကြီးထဲကနေ လွှတ်လိုက်မှာဖြစ်တယ်။ လူတွေကို ယေဟောဝါဘုရားသခင်နဲ့ ဝေးကွာအောင် စာတန် နောက်တစ်ခေါက် ထပ်ကြိုးစားမှာဖြစ်တယ်၊ ဒါပေမဲ့ စာတန်ကို ဆန့်ကျင်သူတွေကတော့ ကမ္ဘာပေါ် ထာဝစဉ်အသက်ရှင်ခွင့် ရကြပါလိမ့်မယ်။—ဟေရှာယ ၂၅:၈; ဗျာဒိတ် ၂၀:၇-၉ တို့ကိုဖတ်ပါ။

လက်ရှိအစီအစဉ်စနစ်ကို အဆုံးတိုင်ပစ်မယ့် ဖြစ်ရပ်ကို ရည်ညွှန်းတဲ့အခါ “တရားစီရင်ရာနေ့” ဆိုတဲ့စကားလုံးကို ကျမ်းစာက အသုံးပြုတယ်။ လူဆိုးတွေအားလုံးကို ဖယ်ရှားပစ်တဲ့ နောဧခေတ် ရေလွှမ်းမိုးချိန်လိုပဲ အဲဒီတရားစီရင်ရာနေ့က ရုတ်တရက် ကျရောက်လာပါလိမ့်မယ်။ ဝမ်းသာစရာက၊ ဘာသာတရားမဲ့သူတွေအပေါ် ရောက်လာတော့မယ့် ဖျက်ဆီးခြင်းဘေးဟာ “ဖြောင့်မတ်ခြင်းတည်နေရာ” လူ့အဖွဲ့အစည်းအသစ်ကို ဖြစ်ပေါ်လာစေမှာ ဖြစ်ပါတယ်။—၂ ပေတရု ၃:၆၊ ၇၊ ၁၃ ကိုဖတ်ပါ။