စိတ်ရှည်ပြီး ဇွဲရှိခြင်းကြောင့် ပျော်ရွှင်မှုရရှိ
ဘုရားသခင့်နိုင်ငံတော်ကြွေးကြော်သူများမှတ်တမ်း
စိတ်ရှည်ပြီး ဇွဲရှိခြင်းကြောင့် ပျော်ရွှင်မှုရရှိ
နောက်ဆုံးကာလတွင် “အများသောသူတို့၏ ချစ်ခြင်းမေတ္တာသည် ခေါင်းပါးလိမ့်မည်” ဟုယေရှုခရစ် ကြိုဟောခဲ့သည်။ ယင်းကြောင့် ယနေ့ ကမ္ဘာ့ဒေသများစွာရှိ လူအများသည် ဘုရားသခင့်နိုင်ငံတော်သတင်းကို လျစ်လျူရှုနေကြ၏။ အချို့ဆိုလျှင် ဘာသာတရားကိုပင် အထင်အမြင်သေးကြသည်။—မဿဲ ၂၄:၁၂၊ ၁၄။
သို့တိုင် ချက်ပြည်သူ့သမ္မတနိုင်ငံမှ အောက်ပါတွေ့ကြုံမှုက ဖော်ပြသည့်အတိုင်း ဘုရားသခင့်နိုင်ငံတော်ကြွေးကြော်သူများသည် ယုံကြည်ခြင်းနှင့် စိတ်ရှည်ခြင်းပြသပြီး ထိုစိန်ခေါ်ချက်ကို အောင်မြင်စွာ ရင်ဆိုင်လျက်ရှိသည်။
သက်သေခံနှစ်ဦးသည် တံခါးအပြင်ဘက်မှနေ၍ အမျိုးသမီးတစ်ဦးကို စကားပြောခဲ့သည်။ ခဏအကြာတွင် ထိုသူသည် တံခါးကို အနည်းငယ်ဖွင့်ပြီး သက်သေခံများ ကမ်းပေးသော ကင်းမျှော်စင် နှင့် နိုးလော့! မဂ္ဂဇင်းများကို လှမ်းယူလိုက်သည်။ “ကျေးဇူးတင်ပါတယ်” ဟုအသံကြားရပြီးနောက် တံခါးပိတ်သွားသည်။ “ကျွန်မတို့ ပြန်သွားရင်ကောင်းမလား” ဟုသက်သေခံများ သိလိုခဲ့ကြသည်။ ထိုနှစ်ဦးမှ ရှေ့ဆောင် သို့မဟုတ် အချိန်ပြည့်အမှုဆောင်ဖြစ်သူက ပြန်သွားရန် ဆုံးဖြတ်လိုက်သည်၊ ပထမအကြိမ်အတိုင်း ဖြစ်ပျက်ခဲ့ပြန်သည်၊ တစ်နှစ်အထိ ထိုသို့ပင် ဆက်ဖြစ်ခဲ့သည်။
ရှေ့ဆောင်က မိမိ၏ချဉ်းကပ်နည်းကို ပြောင်းလဲသင့်သည်ဟု စိတ်ပိုင်းဖြတ်ကာ ယေဟောဝါထံ ဆုတောင်းခဲ့သည်။ နောက်တစ်ကြိမ် မဂ္ဂဇင်းများကို သွားပေးသည့်အခါ သူက “နေကောင်းလား။ မဂ္ဂဇင်းတွေ ဖတ်လို့ကောင်းသလား” ဟုထိုအမျိုးသမီးကို ရင်းရင်းနှီးနှီးမေးခဲ့သည်။ အစပထမတွင် တုံ့ပြန်မှုမရှိသော်လည်း နောက်ထပ်နှစ်ကြိမ်သုံးကြိမ်လည်ပတ်ပြီးနောက် ၎င်းအမျိုးသမီးသည် ဖော်ရွေမှုစပြလာ၏။ တစ်ကြိမ်တွင် သူက တံခါးကျယ်ကျယ်ဖွင့်ပေးသည်၊ သို့သော် စကားများများ ပြောခွင့်မရချေ။
ထိုအမျိုးသမီးသည် တံခါးဝတွင် စကားပြောလိုပုံမရှိသောကြောင့် သူ့ထံ လည်ပတ်ရသည့်ရည်ရွယ်ချက်ကို ရှင်းပြပြီး အိမ်တွင်းကျမ်းစာသင်အံမှု ကမ်းလှမ်းထားသည့် စာတစ်စောင်ရေးပို့ရန် ရှေ့ဆောင်က ဆုံးဖြတ်လိုက်သည်။ နောက်ဆုံး တစ်နှစ်ခွဲအထိ စိတ်ရှည်ရှည်နှင့် ကြိုးစားအားထုတ်ခဲ့ရာ ရှေ့ဆောင်ညီအစ်မသည် ထိုအိမ်ရှင်မနှင့် ကျမ်းစာသင်အံမှု စနိုင်ခဲ့လေသည်။ နောက်ပိုင်းတွင် ထိုအမျိုးသမီးက “ကျွန်မဆီကို ရှင်တို့ ဒီမဂ္ဂဇင်းတွေ လာပို့ပေးတဲ့အချိန်ကစပြီး ဘုရားသခင်ကို ကျွန်မယုံကြည်ခဲ့တာ” ဟုပြောလိုက်သောအခါ ရှေ့ဆောင်ညီအစ်မသည် အံ့အားသင့်ပြီး ကျေနပ်အားရခဲ့သည်။
မှန်ပါသည်၊ ဘုရားသခင့်နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်းကို စိတ်ရှည်ရှည်နှင့် ဇွဲရှိရှိ လုပ်ဆောင်လျှင် ပျော်ရွှင်စရာဆုကျေးဇူးများ ခံစားရပါလိမ့်မည်။—မဿဲ ၂၈:၁၉၊ ၂၀။