မျက်နှာမလိုက်ခြင်း
မျက်နှာမလိုက်ခြင်း
(က၀၂ ၂/၁၅ စာမျက်နှာ ၃၁ မှအဆက်)
ဒါဝိဒ်အပေါ်မျက်နှာမလိုက်။ မောရှေအား ယေဟောဝါဆင့်ဆိုခဲ့သည့်အတိုင်း ကိုယ်တော်သည် မှားယွင်းမှုကို အချည်းနှီးသက်သက်ဖြေလွှတ်တော်မူသော ဘုရားသခင်ဖြစ်တော်မမူပေ။ (ထွ ၃၄:၆၊ ၇; ကော ၃:၂၅) ယေဟောဝါသည် မိမိနှင့်နိုင်ငံတော်ပဋိညာဉ်ဖွဲ့ခဲ့သည့် မိမိချစ်မြတ်နိုးရသောကျေးကျွန် ဒါဝိဒ်၏ကိစ္စ၌ပင် ဘုရားသခင်ခြွင်းချက်မထားခဲ့ချေ။ ဒါဝိဒ်၏အပြစ်များအတွက် ပြင်းပြင်းထန်ထန် အပြစ်ပေးခဲ့သည်။ ဗေသရှေဗနှင့် သူ၏ခင်ပွန်းဥရိယတို့နှင့်ပတ်သက်၍ ဘုရားသခင်အား ဒါဝိဒ်ပြစ်မှားပြီးသည့်နောက် သူ့ကို ယေဟောဝါက ဤသို့မိန့်တော်မူခဲ့သည်– “သင်၌ရန်ဘက်ပြုသောသူကို သင်၏အဆွေအမျိုးတို့အထဲက ငါပေါ်စေမည်။ သင့်မျက်မှောက်တွင် သင်၏မယားတို့ကိုငါယူ၍ သင့်အိမ်နီးချင်း၌အပ်သဖြင့်၊ သူသည် နေရှေ့မှာ သင်၏မယားတို့နှင့် ပေါင်းဖော်လိမ့်မည်။ သင်သည် ဤအမှုကို မထင်မရှားပြုသော်လည်း၊ နေရှေ့မှာငါလှန်ပြမည်။”—၂ရ ၁၂:၁၁၊ ၁၂။
ဒါဝိဒ်သည် မိမိ၏မိသားစုအတွင်းမှ ပြဿနာမြောက်မြားစွာကို အမှန်ပင်တွေ့ ကြုံခံစားခဲ့ရကြောင်း သမ္မာကျမ်းစာမှတ်တမ်းက ဖော်ပြသည်။ (၂ရ အခန်းကြီး ၁၃-၁၈; ၃ရ ၁) ဘုရားသခင်သည် ဒါဝိဒ်နှင့်ပြုခဲ့သည့် နိုင်ငံတော်ပဋိညာဉ်အတွက် သူ့ကိုသေဒဏ်မပေးသော်လည်း (၂ရ ၇:၁၁-၁၆)၊ ဒါဝိဒ်သည် အလွန်ဝမ်းနည်းကြေကွဲမှုများကို ခံစားခဲ့ရသည်။ ဘုရားသခင့်အစောပိုင်းကျေးကျွန်တစ်ဦးဖြစ်သူ ဧလိဟုက ဤသို့ဆိုခဲ့သည်– “မင်းတို့၏မျက်နှာကို ထောက်တော်မမူ။” (ယဘ ၃၄:၁၉) သို့ရာတွင် ယေရှုခရစ်ပေးဆက်မည့်ပူဇော်ရာယဇ်အပေါ် အခြေခံကာ နောင်တရသောဒါဝိဒ်ကို ဘုရားသခင်ခွင့်လွှတ်နိုင်ပြီး မိမိကိုယ်တော်တိုင်၏ တရားမျှတခြင်းနှင့် ဖြောင့်မတ်ခြင်းကို ဆက်ထိန်းသိမ်းတော်မူသည်။ (ရ ၃:၂၅၊ ၂၆) မိမိသားတော်၏ပူဇော်ရာယဇ်အားဖြင့် ဥရိယနှင့် အခြားသူများ၏သေခြင်းကို ချေဖျက်ပေးနိုင်သည့် တရားမျှတ၍ မျက်နှာမလိုက်သောအခြေခံရှိသဖြင့် အဆုံး၌ မည်သူမျှမတရားပြုခံရတော့မည်မဟုတ်။—တ ၁၇:၃၁။
တရားသူကြီးများကိုသွန်သင်ပေး။ ယေဟောဝါသည် မျက်နှာမလိုက်မှုနှင့်စပ်လျဉ်း၍ ဣသရေလနိုင်ငံရှိ တရားသူကြီးများကို ခိုင်မာသောသွန်သင်ချက်ပေးခဲ့သည်။ တရားသူကြီးများသည် ဤတင်းကျပ်သောအမိန့်တော်အောက်တွင်ရှိကြသည်– “တရားအမှုကိုစီရင်သောအခါ အဘယ်သူ၏မျက်နှာကိုမထောက်ရ။” (တရ ၁:၁၇; ၁၆:၁၉; သု ၁၈:၅; ၂၄:၂၃) သူတို့သည် ဆင်းရဲချို့တဲ့သူကို သူ၏ဆင်းရဲချို့တဲ့မှုအတွက်သက်သက်ကြောင့်လည်းကောင်း၊ ပြင်းပြသောခံစားချက်ကြောင့်လည်းကောင်း၊ ဥစ္စာကြွယ်ဝသူတို့ကို ဆန့်ကျင်လိုသော စိတ်စွန်းကွက်မှုကြောင့်လည်းကောင်း မျက်နှာမလိုက်ရ။ ချမ်းသာကြွယ်ဝသူကို သူ၏ဥစ္စာပေါကြွယ်မှုကြောင့် သူ၏မျက်နှာသာရဖို့အတွက်၊ တံစိုးလက်ဆောင်အတွက် သို့မဟုတ် သူ၏သြဇာအာဏာကို ကြောက်သောကြောင့်လည်း မျက်နှာသာမပေးရ။ (ဝ ၁၉:၁၅) ဘုရားသခင်သည် မိမိ၏ပညတ်တော်ကိုချိုးဖောက်သည့် ဣသရေလနိုင်ငံရှိ သစ္စာမဲ့ လေဝိယဇ်ပုရောဟိတ်တို့ကို အဆုံး၌ အပြစ်တင်ရှုတ်ချခဲ့သည်၊ အထူးသဖြင့် သူတို့သည် ပြည်တော်တွင် တရားသူကြီးများအဖြစ် အမှုထမ်းကြစဉ် မျက်နှာလိုက်ကြသည့်အတွက်ဟူ၍ ကိုယ်တော်ထောက်ပြခဲ့သည်။—မလ ၂:၈၊ ၉။
ခရစ်ယာန်အသင်းတော်တွင်။ ခရစ်ယာန်အသင်းတော်တွင် မျက်နှာမလိုက်ခြင်းသည် ပညတ်ချက်တစ်ခုဖြစ်သည်; ဘက်လိုက်ခြင်းသည် အပြစ်ဖြစ်သည်။ (ယာ ၂:၉) ဘက်လိုက်သည့်လုပ်ရပ်များကို ကျူးလွန်သူများသည် “မကောင်းသောအကြံအစည်နှင့် စီရင်” သူများဖြစ်လာကြသည်။ (ယာ ၂:၁-၄) ထိုသို့သောသူများ၌ မျက်နှာရွေးခြင်းကင်းသည့် အထက်မှသက်ရောက်သောဉာဏ်ပညာမရှိချေ။ (ယာ ၃:၁၇) အသင်းတော်တွင် တာဝန်ရှိအနေအထားရထားသူများသည် ကြီးကြပ်မှူးတစ်ဦးဖြစ်သူ တိမောသေအပေါ် တမန်တော်ပေါလုပေးအပ်သည့် ကြီးလေးသောတာဝန်ရရှိကြသည်– “ရှေ့မဆွကမစီရင်၊ ငဲ့ကွက်သောစိတ်နှင့်အလျှင်းမပြုဘဲ၊ ဤပညတ်များကိုစောင့်ရှောက်မည်အကြောင်း၊ ဘုရားသခင်နှင့်ယေရှုခရစ်ရှေ့မှာလည်းကောင်း၊ ရွေးကောက်တော်မူသော ကောင်းကင်တမန်ရှေ့မှာလည်းကောင်း ငါသည် သင့်ကိုသစ္စာပေး၏။” ယင်းသည် အထူးသဖြင့် အသင်းတော်တွင် တရားရေးကြားနာမှုများပြုလုပ်သည့်အခါ သက်ဆိုင်ပါမည်။—၁တိ ၅:၁၉-၂၁။
‘ကိုယ့်အကျိုးကိုငဲ့၍ မျက်နှာကြီးငယ်ထောက်ခြင်း။’ မျက်နှာမလိုက်မှုစည်းမျဉ်းမူကို ချိုးဖောက်ခြင်းက အကြီးအကျယ်အပြစ်တင်ခံရစေနိုင်သည်။ ယေရှု၏အမေတူအဖေကွဲညီအစ်ကို ယုဒက “ညည်းညူလျက်၊ ကိုယ့်တပ်မက်ခြင်းအတိုင်းလျှောက်သူ၊ စကားလုံးကြီးများပြောဆိုသူ၊ ကိုယ့်အကျိုးကိုငဲ့၍ မျက်နှာကြီးငယ်ထောက်သူများ” အကြောင်းကိုဖော်ပြသည်။ (ယု ၁၆၊ သမ) ဤသူများသည် “သင်းခွဲသောသူ၊ ဝိညာဉ်တော်နှင့်ကင်းသောဇာတိပကတိလူဖြစ်ကြ၏။” (ယု ၁၉) ထိုသို့သောသူများသည် “အထူးထူးအပြားပြားသော လောဘကိလေသာသွေးဆောင်ရာသို့လိုက်၍ . . . မိန်းမမိုက်တို့ကို၊ အိမ်ထဲသို့ဝင်၍ဖမ်းသွားသောသူတို့သည် ထိုသူတို့အဝင်ဖြစ်ကြ၏” ဟုပေါလုဖော်ပြထားသောသူများနည်းတူ သူတို့၏ထောင်လွှားသောစကားနှင့် မျက်နှာကြီးငယ်လိုက်မှုတို့အားဖြင့် အခြားသူများကို တိမ်းယိမ်းစေကြသည်။ (၂တိ ၃:၇) ပျက်စီးခြင်းက သူတို့ကိုစောင့်ကြိုနေပါသည်။—ယု ၁၂၊ ၁၃။
“နှစ်ဆသောဂုဏ်တင်ခြင်းကိုခံထိုက်”—မည်သို့နည်း။ အဆိုပါအရာများကိုထောက်ရှုသော် ခရစ်ယာန်အသင်းတော်တွင် ကောင်းမွန်စွာကြီးကြပ်အုပ်ချုပ်သော အသက်ကြီးသူများကို “တရားဟောခြင်း၊ ဆုံးမ [သွန်သင်] ပေးခြင်းအမှုကို ကြိုးစားအားထုတ်သော . . . အလှူနှစ်ဆကို အထူးသဖြင့်ခံထိုက်သောသူ [“နှစ်ဆသောဂုဏ်တင်ခြင်းကိုခံထိုက်၊” ကဘ]” ဟုမည်သို့ယူမှတ်နိုင်ကြမည်နည်း။ (၁တိ ၅:၁၇) ယင်းသည် ထိုအမျိုးသားတို့၏ ကိုယ်ရည်ကိုယ်သွေးများ သို့မဟုတ် သူတို့၏စွမ်းရည်များကြောင့်မဟုတ်ဘဲ သူတို့အပေါ်ပေးအပ်ထားသည့် အပိုတာဝန်များကို ဝီရိယရှိရှိနှင့် ကြိုးစားလုပ်ဆောင်မှုတို့ကြောင့်ဖြစ်သည်။ ဘုရားသခင်၏အစီအစဉ်များနှင့် တာဝန်ခန့်အပ်မှုများကို လေးမြတ်ကြရမည်။ ထိုသို့သောအမျိုးသားများသည် ဘုရားသခင့်အသင်းတော်၏လုပ်ငန်းပြီးမြောက်စေသည့်အတွက် အထူးပူးပေါင်းလုပ်ဆောင်မှုနှင့် ထောက်မကူညီမှုတို့ကိုရထိုက်သည်။ (ဗြဲ ၁၃:၇၊ ၁၇) ယေရှု၏ အမေတူအဖေကွဲညီ ယုဒက ခရစ်ယာန်အသင်းတော်ရှိ သင်ကြားပေးသူများသည် ဘုရားသခင်ရှေ့တော်တွင် ကြီးလေးသောတာဝန်ရှိကြရာ သာ၍ကြီးသောစစ်ကြောစီရင်မှုခံရကြမည်ဟု ထောက်ပြသည်။ (ယာ ၃:၁) ထို့ကြောင့် သူတို့စကားကို ကြားနာပြီး နာခံထိုက်သည်၊ သူတို့သည် ဂုဏ်တင်ခံထိုက်ကြသည်။ ထပ်တူအကြောင်းကြောင့် ဇနီးသည်သည် အိမ်ထောင်အတွက်တာဝန်ယူရန်နှင့်၊ ၎င်းနှင့်အညီ ကိုယ်တော်၏တရားစီရင်ခြင်းကိုခံရမည့် မိမိ၏ခင်ပွန်းသည်ကို ဂုဏ်တင်လေးစားသင့်သည်။ (ဧ ၅:၂၁-၂၄၊ ၃၃) ဘုရားသခင်၏အစီအစဉ်အတိုင်း ထိုသို့ တာဝန်ရှိအနေအထားရရှိထားသူများကို လေးစားခြင်းသည် မျက်နှာလိုက်ခြင်းမဟုတ်ပါ။
အုပ်စိုးသူများကိုလေးစားခြင်း။ ခရစ်ယာန်များသည် လူ့အစိုးရအုပ်ချုပ်သူများကိုလေးစားရန်လည်း မိန့်မှာခံရကြသည်။ ယင်းသည် ဤသူတို့၏ ကိုယ်ပိုင်အရည်အသွေးများကြောင့်မဟုတ်၊ သူတို့တွင် အချို့မှာ အကျင့်ပျက်ပြားကြသူများပင်ဖြစ်ပေမည်၊ သူတို့၌ အထူးအခွင့်အရေးများပေးနိုင်သည့် အနေအထားရှိကြသောကြောင့်လည်းမဟုတ်ပါ။ ဘုရားသခင်မိန့်မှာချက်ကြောင့် ခရစ်ယာန်များသည် အုပ်စိုးရှင်များကို လေးစားသည်; ထို့ပြင် သူတို့၏တာဝန်ရှိရာထူးအတွက်ကြောင့်လည်း ဖြစ်သည်။ တမန်တော်က ဤသို့ဆို၏– “အစိုးရသောမင်းအာဏာစက်၏အုပ်စိုးခြင်းကို လူတိုင်းဝန်ခံစေ။ အကြောင်းမူကား၊ ဘုရားသခင်၏အခွင့်မရှိလျှင်၊ မင်းအာဏာစက်မရှိ။ အာဏာစက်ရှိသမျှသည် ဘုရားသခင်ခန့်ထားတော်မူရာဖြစ်သတည်း။ ထို့ကြောင့်၊ မင်းအာဏာကိုဆန်သောသူသည် ဘုရားသခင်စီရင်တော်မူရာကိုဆန်သောသူဖြစ်၏။” (ရ ၁၃:၁၊ ၂) ဤသူတို့သည် သူတို့၏အခွင့်အာဏာကို တလွဲအသုံးပြုကြမည်ဆိုလျှင် ဘုရားသခင်ထံ ဖြေရှင်းချက်ပေးရမည်။ ခရစ်ယာန်တစ်ဦးသည် ဂုဏ်တင်လေးစားထိုက်သည့်ရာထူးရရှိထားသူကို ဤစည်းမျဉ်းအတိုင်း ဂုဏ်တင်လေးစားပါသည်– “လူအသီးအသီးခံထိုက်သည်အတိုင်း ပေးကြလော့။ အခွန်ကိုခံထိုက်သောသူအား အခွန်ကိုလည်းကောင်း၊ အကောက်ကိုခံထိုက်သောသူအား အကောက်ကိုလည်းကောင်း ပေးကြလော့။ ကြောက်ထိုက်သောသူကို ကြောက်ကြလော့။ ရိုသေထိုက်သောသူကို ရိုသေကြလော့။” (ရ ၁၃:၇) ခရစ်ယာန်တစ်ဦးသည် ဤကိစ္စရပ်တွင် သာမန်ပြည်သူပြည်သားများအပေါ်ထက် ရိုသေဂုဏ်တင်ခြင်းသည် မျက်နှာလိုက်ခြင်းမဟုတ်ပါ။ (it-1 1193-4)