လူတိုင်း ကျန်းမာရေးကောင်းလိုကြ!
လူတိုင်း ကျန်းမာရေးကောင်းလိုကြ!
လွန်ခဲ့သည့် နှစ်ပေါင်း ၂,၇၀၀ ကျော်က ပရောဖက်တစ်ပါးသည် ဖျားနာမှုမရှိတော့မည့် အနာဂတ်အချိန်တစ်ချိန်အကြောင်း ပြောဆိုခဲ့သည်။ ဤပရောဖက်ပြုချက်သည် ကျွန်ုပ်တို့ခေတ်အထိ တည်ရှိလာခဲ့ကာ ယင်းကို ဟေရှာယ၏ရှေးလက်ရေးစာတွင် တွေ့ရှိရ၏။ “မြို့သားကလည်း ‘ငါနာသည်’ ဟုမဆိုရ” တော့မည့်အချိန်အကြောင်း သူရေးသားခဲ့၏။ ထို့ပြင် “ထိုအခါ မျက်စိကန်းသောသူတို့သည် မျက်စိပွင့်လင်းကြလိမ့်မည်။ နားပင်းသောသူတို့သည် နားပင်းခြင်းနှင့် လွတ်ကြလိမ့်မည်။ ခြေဆွံ့သောသူတို့သည် ဒရယ်ကဲ့သို့ ခုန်ကြလိမ့်မည်။ စကားအသောသူတို့သည် သီချင်းဆိုကြလိမ့်မည်” ဟုလည်း ရေးသားခဲ့လေသည်။ (ဟေရှာယ ၃၃:၂၄; ၃၅:၅၊ ၆) ယင်းသို့သောအနာဂတ်အကြောင်းကို အခြားကျမ်းစာပရောဖက်ပြုချက်များ၌လည်း ဖော်ပြထားသည်။ ဥပမာ၊ သမ္မာကျမ်းစာ၏ နောက်ဆုံးကျမ်းဖြစ်သော ဗျာ.ကျမ်းတွင် နာကျင်မှုကို ဘုရားသခင် ဖယ်ရှားပေးမည့်အချိန်အကြောင်း ဖော်ပြထား၏။—ဗျာ. ၂၁:၄။
အဆိုပါကတိတော်များ အမှန်ပြည့်စုံလာမည်လော။ လူသားများ ကျန်းမာရေးဒေါင်ဒေါင်မြည်ကြမည့်အချိန်၊ ဖျားနာမှုလုံးဝမရှိတော့မည့်အချိန် ရောက်လာပါဦးမည်လော။ မျက်မှောက်ခေတ် လူအများစုသည် အတိတ်ကလူမျိုးဆက်ထက် ကျန်းမာရေးပိုကောင်းလာကြသည်မှာ မှန်ပါသည်။ ကျန်းမာရေးပိုကောင်းလာသည်ဟု ဆိုသော်လည်း အကောင်းဆုံးကျန်းမာရေးဟု မဆိုနိုင်ချေ။ ဖျားနာမှုက လူများစွာကို အကြီးအကျယ် ထိခိုက်နေဆဲပင်။ ဖျားနာမည်ကို စိုးရွံ့ခြင်းက အလွန်စိတ်သောကရောက်စေသည်။ လက်ခံရခက်သည့် အမှန်တရားမှာ ဤခေတ်ကာလတွင် မည်သူတစ်ဦးတစ်ယောက်မျှ ကာယနှင့်စိတ်ပိုင်းဆိုင်ရာ ရောဂါဝေဒနာများ၏ အပြင်းအထန်တိုက်ခိုက်မှုမှ လုံးလုံးလျားလျား မလွတ်မြောက်နိုင်ကြခြင်းပင်ဖြစ်သည်။
သင်ပေးဆပ်ရသည့် အဖိုးအခ
ဖျားနာမှုသည် နည်းအမျိုးမျိုးဖြင့် ဝန်ပိစေ၏။ ယနေ့ လူတို့အား ဝန်ပိစေသည့်အရာတစ်ခုမှာ ဆေးကုသစရိတ်မြင့်မားခြင်းဖြစ်သည်။ ဥပမာ၊ မကြာသေးမီနှစ်အတွင်းက ဥရောပတွင် ကျန်းမာရေးပြဿနာကြောင့် အလုပ်,လုပ်ရက်ပေါင်း သန်း ၅၀၀ ဆုံးရှုံးခဲ့ရ၏။ အခြားဒေသများ၌လည်း ထပ်တူပင်ဖြစ်သည်။ အလုပ်ခွင်တွင် ကုန်ထုတ်လုပ်မှု ကျဆင်းခြင်းနှင့် ကျန်းမာရေးစောင့်ရှောက်မှုစရိတ် မြင့်တက်လာခြင်းတို့ကြောင့် ငွေရေးကြေးရေးအရ ဝန်ပိလာပြီး လူတိုင်းကို ထိခိုက်နစ်နာစေသည်။ စီးပွားရေးကော်ပိုရေးရှင်းများနှင့် အစိုးရများသည် အကျိုးအမြတ်များဆုံးရှုံးနေကြသည်။ ဤအကုန်အကျများကို ကာမိရန် စီးပွားရေးလုပ်ငန်းများသည် ထုတ်ကုန်တန်ဖိုးကို မြှင့်တင်လိုက်ကြ၍ အစိုးရများကလည်း အခွန်အတုတ်ကို တိုးမြှင့်ကောက်ခံကြသည်။ ဤအကုန်အကျများကို မည်သူ ပေးချေရသနည်း။ သင်သာလျှင်ဖြစ်သည်။
ဝမ်းနည်းစရာမှာ နိုင်ငံများစွာတွင် ဆင်းရဲနွမ်းပါးသူတို့သည် ကျန်းမာရေးစောင့်ရှောက်မှု လုံလောက်စွာ မရရှိကြခြင်းပင်။ ယင်းသည် အဆင့်မြင့်ကျန်းမာရေး ဝန်ဆောင်မှုလုပ်ငန်းများ အကန့်အသတ်သာရှိသည့် သို့မဟုတ် လုံးဝမရှိသည့် ဖွံ့ဖြိုးဆဲနိုင်ငံများတွင် လူသန်းပေါင်းများစွာ ခံစားနေရသည့် ဝမ်းနည်းစရာ အခြေအနေတစ်ခုဖြစ်၏။ ချမ်းသာကြွယ်ဝသောနိုင်ငံများ၌ပင် အချို့သောသူတို့သည် ကျွမ်းကျင်သောဆေးဝါးကုသမှု ရရှိရန် ခက်ခက်ခဲခဲ ကြိုးစားကြရသည်။ ယင်းသည် ကျန်းမာရေးအာမခံ မရရှိကြသည့် ၄၆ သန်းသော အမေရိကန်နိုင်ငံသားများ မကြာခဏ ကြုံတွေ့နေရသည့် ကိစ္စဖြစ်၏။
ဖျားနာမှုကြောင့်ဖြစ်သည့် ဝန်ထုပ်မှာ ငွေရေးကြေးရေးသာမကချေ။ ရောဂါကျွမ်းနေ၍ နာကျင်သည့်ဝေဒနာ၊ နာတာရှည်ရောဂါ၏ ဖိစီးမှုဝေဒနာ၊ အသည်းအသန်ဖျားနာနေသူတို့ကို မြင်ရ၍ ဝမ်းနည်းသည့်ဝေဒနာ၊ ချစ်မြတ်နိုးရသူတစ်ဦး ဆုံးပါးသွား၍ ကြေကွဲသည့်ဝေဒနာ စသည်တို့ကိုလည်း အကျိုးဆက်အနေနှင့် ကျွန်ုပ်တို့ခံစားကြရသည်။
တစ်နေ့နေ့တွင် ဖျားနာမှုမရှိတော့သည့် ကမ္ဘာ၌ နေထိုင်ရမည်ဟူသော မျှော်လင့်ချက်မှာ အလွန်နှစ်သက်ဖွယ်ကောင်းလှပါသည်။ လူတိုင်း ကျန်းမာရေးကောင်းလိုကြ၏။ ယင်းသို့သောမျှော်လင့်ချက်သည် မဖြစ်နိုင်ပုံပေါက်သော်လည်း အမှန်တကယ်ဖြစ်လာမည်ဟု လူအများ ယုံကြည်ကြသည်။ လူသားများ၏နည်းပညာဖြင့် အချိန်တန်လျှင် ရောဂါဝေဒနာနှင့် ဖျားနာမှုအားလုံးနီးပါး ပပျောက်သွားလိမ့်မည်ဟု ယုံကြည်ကြသူအချို့လည်း ရှိကြသည်။ သို့သော် သမ္မာကျမ်းစာကို ယုံကြည်ကြသူတို့မူကား ဖျားနာမှုမရှိတော့မည့်ကမ္ဘာအကြောင်း ပြောဆိုထားသည့် ရှေးပရောဖက်ပြုချက်များကို ဘုရားသခင်သာလျှင် ပြည့်စုံစေလိမ့်မည်ဟု ယုံကြည်ကြသည်။ လူသားတို့သည် ဖျားနာမှုမရှိတော့မည့်အချိန်ကို ဖန်တီးပေးနိုင်မည်လော။ ဘုရားသခင်ကော ဖန်တီးပေးတော်မူမည်လော။ အနာဂတ်တွင် အဘယ်အရာဖြစ်ပျက်လာမည်နည်း။