1. Ki nou bizin resanti konsernan nou lafwa?

LAFWA se pa enn kitsoz ki tou dimounn ena. (2 Tesalonisien 3:2) Me Zeova donn lafwa tou bann dimounn ki ador Li. (Romin 12:3; Galat 5:22) Nou vremem rekonesan ki Zeova donn nou lafwa!

2, 3. (a) Ki bienfe nou gagne kan nou ena lafwa? (b) Ki bann kestion nou pou examine asterla?

² Zeova finn donn nou so Garson ki Li bien kontan pou ki tou bann ki ena lafwa an Zezi kapav gagn pardon zot pese. Gras-a sa, bann dimounn kapav vinn kamarad Zeova ek viv pou touletan. (Zan 6:44, 65; Romin 6:23) Zeova vremem bon anver nou! Mem si nou fer pese ek nou merit lamor, Zeova finn trouve ki nou kapav fer bann bon kitsoz. (Psom 103:10) Li finn fer nou konn bonn nouvel lor Zezi ek lor so sakrifis. Kan nou’nn koumans ena lafwa an Zezi ek nou’nn koumans swiv li, se lerla ki nou’nn gagn lesperans pou viv pou touletan!​—Lir 1 Zan 4:9, 10.

 ³ Me ki nou kapav aprann ankor lor lafwa? Si nou zis kone ki Bondie finn fer pou nou ek ki Li pou fer dan lavenir, eski savedir ki nou ena lafwa? Anou gete ki nou bizin fer ankor.

4. Kan nou ena lafwa, ki sa pous nou pou fer?

⁴ Kan nou ena lafwa an Zeova ek an Zezi, nou pa zis konn seki zot finn fer ek pou fer pou nou. Nou ena osi enn gran dezir pou viv dan fason ki zot finn ansegn nou. Ek nou bien anvi fer lezot konn Zeova ek Zezi. Lapot Pol ti dir: “Parski, si an piblik to dir . . . ki Zezi li Segner, ek si to ena lafwa dan to leker ki Bondie finn resisit li parmi bann mor, to pou gagn lavi sov. Parski se avek so leker ki enn kikenn montre lafwa pou lazistis, me se avek so labous ki li fer deklarasion piblik pou gagn lavi sov.”​—Romin 10:9, 10, NW; 2 Korintien 4:13.

5. Kifer lafwa li bien inportan, ek ki nou bizin fer pou ki nou lafwa res for? Donn enn lexanp.

⁵ Alor, pou ki nou kapav viv pou touletan dan lemond nouvo ki Bondie finn promet, nou bizin ena lafwa ek nou bizin fer sir ki li res for. Lafwa li kouma enn plant. Nou bizin aroz enn plant pou ki li res an bonn sante ek kontign grandi. Me si nou pa donn li ase delo, li pou sek ek li pou mor. Dan mem fason, nou bizin fer sir ki nou lafwa res “an bonn sante” ek ki li kontign “grandi.”​—Tit 2:2, NW; 2 Tesalonisien 1:3, NW; Lik 22:32; Ebre 3:12.

6. Kouma eski Ebre 11:1 dekrir lafwa?

⁶ Dan Ebre 11:1 (NW), Labib dir ki ete lafwa. (Lir.) (1) Lafwa se “kan nou sir ki bann kitsoz ki nou pe atann pou arive.” Parmi bann kitsoz ki nou pe atann, ena bann promes Bondie konsernan lavenir. Par exanp, nou sir ki lemal nepli pou existe ek ki pou ena enn nouvo lemond. (2) Lafwa se enn “prev sir ki bann kitsoz ki pourtan nou pa trouve, zot enn realite.” Nou kone ki Zeova, Zezi Kris, bann anz, ek Rwayom dan lesiel zot existe, mem si nou pa kapav trouv zot. (Ebre 11:3) Kouma nou kapav montre ki vremem nou ena lafwa dan bann promes Bondie ek dan bann kitsoz ki nou pa kapav trouve? Nou montre sa par nou fason viv, nou bann parol ek nou bann aksion.

7. Kouma lexanp Noe ed nou pou konpran seki sa vedir ena lafwa? (Get zimaz dan koumansman lartik.)

⁷ Ki lexanp Noe ansegn nou lor lafwa? Lapot Pol ti dir: “Par lafwa, Noe, apre ki Bondie ti’nn averti li lor bann kitsoz ki dimounn pa ti ankor trouve, ti montre ki li ti ena lakrint pou Bondie, ek li ti ranz enn lars pou sov so fami.” (Ebre 11:7, NW.) Noe ti ena lafwa dan seki Zeova ti dir li, akoz sa li ti ranz enn gran lars. Kitfwa so bann vwazin ti demann li kifer li ti pe ranz sa lars-la. Nou kapav sir ki Noe pa ti res trankil. Labib dir ki Noe ti “enn predikater lazistis.” (2 Pier 2:5) Li ti averti bann dimounn ki Bondie ti pou amenn enn deliz pou detrir tou bann  ki move. Kitfwa li ti dir zot exakteman seki Zeova ti dir li: “Mo finn desid pou detrir tou dimounn, parski later ranpli ar violans akoz zot,” ek “Mo pou amenn enn deliz lor later pou detrir tou bann ki vivan anba lesiel. Tou seki lor later pou mor.” Apre, sirman Noe ti explik zot seki zot ti bizin fer pou gagn lavi sov. Zeova ti donn sa lord-la: “To bizin rant dan lars.”​—Zenez 6:13, 17, 18.

8. Ki Zak ti dir konsernan lafwa?

⁸ Zak osi ti ekrir lor lafwa. Li ti fer sa sirman apre ki Pol ti ekrir so let pou bann Ebre. Zak ti ekrir: “Montre mwa to lafwa san bann aksion! Abe mwa, mo pou prouv twa mo lafwa par mo bann aksion.” (Zak 2:18) Zak ti explike ki, kan enn dimounn ena lafwa dan enn kitsoz, li pa zis krwar dan sa kitsoz-la. Bann demon krwar ki Bondie existe, me zot pena lafwa an Zeova. Okontrer, zot opoz zot ar Li. (Zak 2:19, 20) Dan enn lot kote, kan enn kikenn ena lafwa, li pou fer Bondie plezir kan li fer bann bon travay, ouswa bann bon aksion. Se seki Abraam ti fer. Zak ti ekrir: “Get Abraam, par so bann aksion ki Bondie finn deklar li zis letan li ti ofer so garson Izaak lor lotel. To trouve, so lafwa ek so aksion mars ansam; so aksion prouv so lafwa dan Bondie.” Apre sa, Zak ti bien fer konpran ki lafwa san bann aksion li pa servi nanye. Li ti dir: “Parey kouma enn lekor san lespri li mor, nou lafwa osi san bann aksion, li mor.”​—Zak 2:21-23, 26.

9, 10. Ki savedir exers lafwa dan Garson Bondie?

⁹ Plis ki 30 an apre, Zan ti ekrir so levanzil ek trwa let. Parey kouma bann lezot ekrivin Labib, Zan ti konpran ki ete lafwa. Bien souvan li ti servi verb Grek ki defwa an Angle tradir par “exers lafwa.”

¹⁰ Par exanp Zan ti explike: “Kikenn ki ena lafwa dan Garson Bondie ena lavi pou touletan; me kikenn ki dezobeir Garson Bondie pa pou trouv lavi, me koler Bondie res lor li.” (Zan 3:36, NW.) Pou exers lafwa dan Garson Bondie, nou bizin obeir Zezi. Dapre seki Zan finn ekrir, nou trouve ki souvan Zezi ti dir ki nou bizin exers lafwa an li ek an so Papa pou gagn lavi eternel.​—Zan 3:16; 6:29, 40; 11:25, 26; 14:1, 12.

11. Zeova finn fer nou konn laverite. Kouma eski nou kapav montre nou rekonesans anver Li?

¹¹ Zeova finn servi so lespri sin pou ed nou konpran laverite lor Li ek lor so Garson ek pou ed nou ena lafwa an zot. (Lir Lik 10:21.) Kouma nou kapav montre nou rekonesans pou tou seki Zeova finn fer pou nou? Nou bizin touletan remersie Li parski Li finn permet nou vinn pros ar Li gras-a Zezi, “Azan Prinsipal nou lafwa ek sa  Kikenn ki fer nou lafwa vinn parfe la.” (Ebre 12:2, NW.) Ek nou bizin kontign fer nou lafwa vinn pli for kan touletan nou priye Zeova ek etidie so Parol.​—Efezien 6:18; 1 Pier 2:2.

12. Ki nou pou fer si nou ena lafwa?

¹² Nou bizin kontign montre par nou bann aksion ki nou ena enn lafwa solid dan bann promes Zeova. Par exanp, nou kontign pres ar bann dimounn lor Rwayom Bondie ek nou ed zot pou vinn bann disip Zezi. Nou osi kontign fer dibien anver “tou dimounn spesialman pou bann ki pros avek nou dan lafwa.” (Galat 6:10) Ek nou travay dir pou “tir vie personalite lor [nou] ansam avek so bann pratik” parski nou pa anvi ki nanye gat nou lamitie avek Zeova.​—Kolosien 3:5, 8-10, NW.

13. Ki kantite “lafwa dan Bondie” li inportan? Kouma Labib dekrir sa, ek kifer?

¹³ Labib dir: “San lafwa, personn pa kapav fer Bondie plezir. Parski kikenn ki apros Bondie bizin krwar ki li existe e ki Bondie rekonpans dimoun ki rod li.” (Ebre 11:6) Labib montre osi ki “lafwa dan Bondie” se enn parmi bann premie kitsoz ki bann vre Kretien bizin ena. Sa form parti dan nou “fondasion.” (Ebre 6:1, NW.) Me apart lafwa, nou bizin ena bann lezot kalite inportan pou ki nou ena enn lamitie avek Zeova ek pou ki nou gard sa lamitie-la.​—Lir 2 Pier 1:5-7; Zid 20, 21.

14, 15. Kifer nou bizin ena lamour ek pa zis lafwa?

¹⁴ Bann ekrivin Labib koz lor lafwa plis ki lezot kalite. Me eski savedir ki lafwa se kalite pli inportan ki nou bizin ena?

¹⁵ Pol ti konpar lafwa ar lamour. Li ti ekrir: “Si mo ena lafwa pou bouz montagn, me mo pena lamour, mo enn nanye ditou.” (1 Korintien 13:2) Zezi ti dir ki “pli gran komannman dan lalwa” se kontan Bondie. (Matie 22:35-40) Lamour ed nou pou ena boukou lezot kalite ki fer Bondie plezir. Par exanp, Labib dir ki lamour “krwar  tou.” Alor, lamour pou ed nou pou krwar, ouswa pou ena lafwa dan tou seki Bondie dir nou dan Labib.​—1 Korintien 13:4, 7, NW.

16, 17. Ki Labib dir konsernan lafwa ek lamour? Lekel parmi sa bann kalite-la pli gran, ek kifer?

¹⁶ Lafwa ek lamour, toule-de se bann kalite bien inportan. Souvan bann ekrivin Labib mansionn toule-de ansam. Pol ti ankouraz so bann frer pou “met lafwa ek lamour kouma enn kwiras.” (1 Tesalonisien 5:8, NW.) Pier ti ekrir konsernan Zezi: “Mem si zame zot pa finn trouv li, zot kontan li. Mem si zot pa trouv li asterla, pourtan zot ena lafwa an li.” (1 Pier 1:8, NW.) Zak ti dir so bann frer ki ena lesperans pou al dan lesiel: “Bondie finn swazir bann ki pov dapre lemonn pouki zot vinn ris dan lafwa e posed rwayom ki finn promet bann ki kontan li.” (Zak 2:5) Zan ti ekrir ki komannman Bondie se ki “nou ena lafwa dan nom so Garson Zezi Kris ek ki nou kontan sakenn nou kamarad.”​—1 Zan 3:23, NW.

¹⁷ Me Pol ti ekrir osi: “Sa trwa kiksoz la reste: lafwa, lesperans ek lamour. Me dan sa trwa la, lamour pli gran.” (1 Korintien 13:13) Dan lavenir, nou pou nepli bizin ena lafwa dan bann promes Bondie konsernan lemond nouvo, parski zot pou fini realize. Nou pou deza pe viv enn lavi extraordiner ki Labib dekrir. Me touletan nou pou bizin ena lamour pou Bondie ek pou bann dimounn. Ofet, nou lamour pou zot pou kontign grandi pou touletan.

18, 19. Lefe ki pep Bondie ena lafwa azordi, ki rezilta sa finn amene, ek kisannla merit laglwar pou sa?

¹⁸ Azordi, pep Zeova ena lafwa dan Rwayom Bondie ek zot soutenir li. Zot osi kontan sakenn zot kamarad. Kifer? Parski zot les lespri sin Bondie gid zot dan zot lavi. (Galat 5:22, 23) Ki lefe sa finn ena? Plis ki wit milyon frer ek ser dan lemond antie pe konn lape ek linite dan zot kongregasion. Li kler ki lafwa ek lamour se bann kalite bien pwisan.

¹⁹ Sa linite-la li posib zis avek led Bondie. Li merite ki nou loue Li pou sa. (Izai 55:13) Nou vremem rekonesan ki Li permet nou gagn lavi sov “par mwayin lafwa.” (Efezien 2:8) Zeova pou kontign ed pli boukou dimounn ankor pou ena lafwa an Li. Lerla, finalman, later antie pou ranpli ar bann dimounn parfe, drwat, ek ere ki pou loue Zeova pou touletan!