Watch Tower Bible and Tract Society of Pennsylvania, li enn lasosiasion ki pa fer okenn komers ek ki ti forme an 1884 dapre bann lalwa Commonwealth of Pennsylvania, Letazini. Bann Temwin Zeova servi sa lasosiasion-la pou soutenir travay ki zot fer dan lemond antie, sa inplik pibliye bann Labib ek bann piblikasion ki baze lor Labib.

 Dan dokiman ofisiel sa lasosiasion-la, li explike ki lobzektif sa lasosiasion-la se pou fer bann kitsoz relizie, pou ansegne, ek pou ed lezot, sirtou pou “prese ek ansegn levanzil lor Rwayom Bondie anba direksion Zezi Kris.” Se zis lor linvitasion ki enn kikenn kapav vinn enn manb sa lasosiasion-la ek li pa depann lor komie donasion li fer. Bann manb ek bann direkter sa lasosiasion-la ed Komite Santral Bann Temwin Zeova.

Bann Lasosiasion Legal ki Travay Ansam

 Apart Watch Tower Bible and Tract Society of Pennsylvania, bann Temwin Zeova servi boukou lezot lasosiasion legal dan diferan pei. Parmi sa bann lasosiasion-la ena ki dan zot nom ena “Watch Tower,” “Watchtower,” ouswa tradiksion enn sa bann term-la.

 Sa bann diferan lasosiasion legal la finn permet nou fer boukou kitsoz depi ki finn etabli zot, kouma:

•   Redaksion ek edision. Nou finn pibliye apepre 253 milyon Labib. Nou bann piblikasion disponib dan plis ki 1,050 lang. Nou sit jw.org permet bann dimounn lir Labib lor Internet san peye dan plis ki 300 lang ek gagn repons ki Labib done pou bann kestion kouma: “Ki ete Rwayom Bondie?”

•   Lansegnman. Nou ena plizir diferan lekol ki ansegn seki ena dan Labib. Par exanp, depi 1943, anviron 10,000 Temwin Zeova finn gagn bann bienfe ar Lekol Galaad ek sa finn permet zot pou servi antan-ki misioner ouswa pou soutenir nou travay dan lemond antie. Ek sak semenn, bann milyon dimounn, parmi ena bann ki pa Temwin, zot resevwar lansegnman dan bann renion ki fer dan sak lasanble. Ena osi bann kour ki montre bann dimounn lir ek ekrir ek pou sa, nou’nn fer enn brosir ki finn pibliye dan 136 lang.

•   Ed lezot. Nou finn donn enn led materyel bann ki finn pas par enn katastrof, kouma par exanp, kan ti ena enn zenosid dan Rwanda an 1994, ouswa kan ena bann katastrof natirel kouma tranbleman-de-ter ki ti ena dan Ayiti an 2010.

 Mem si nou’nn reisi akonpli boukou kitsoz gras-a sa bann lasosiasion-la, travay ki nou fer pa depann lor sa bann lasosiasion-la. Se responsabilite sak Kretien pou akonpli mision ki Bondie inn donn nou, setadir, pou pres ek ansegn bon nouvel. (Matie 24:14; 28:19, 20) Nou kone ki Bondie pe soutenir nou travay ek ki Li pou touzour sa kikenn ki “fer pouse” la.​—1 Korintien 3:6, 7.