Ang’o ma Muma Wacho e Wi Krismas?

TUGE

Dwoko ma Muma chiwo

Muma ok nyiswa tarik sie ma Yesu nonyuolie, kendo ok onyiswa ni wapar odiechieng’ ma nonyuolee. Bug Cyclopedia ma nondik gi McClintock kod Strong wacho kama: “Nyasaye ne ok ochikowa ni watim nyasi mar Krismas, kendo Ndiko mag Dho-Grik mag Jokristo, [Muma Manyien] ok wuo e wi Krismas.”

Kar mano, nonro mosetim nyiso ni Krismas nochakore e nyasi mag dinde mag miriambo. Muma nyisowa ni wanyalo chwanyo Nyasaye ka po ni walame e yo ma ok oyiego.—Wuok 32:5-7.

Histori mag gik mitimoga e kinde Krismas

Paro odiechieng’ ma nonyuolie Yesu: “Jokristo mokwongo ne ok timga nyasi mar paro odiechieng’ ma nonyuolie ng’ato [Yesu], nikech ne gineno ni nyasi mar paro odiechieng’ monyuolie ng’ato otudore gi timbe mag dinde mag miriambo.”—The World Book Encyclopedia.
Desemba 25: Onge gimoro amora ma nyiso ni nonyuol Yesu e tarigno. Nenore ni jotend kanise noyiero tarigno mondo owinjre gi nyasi moko ma bende nitimo e kindego, kata ma nitimo e kinde mag koyo.
Chiwo mich, chiemo gi metho, timo nyasi: Bug Encyclopedia Americana wacho kama: “Nyasi mar Jo-Rumi ma nong’ere kaka Saturnalia, ma nitimo e dwe mar Desemba tarik 17, nopong’ gi gik mopogore opogore mitimoga e odiechieng Krismas. Kuom ranyisi, ne itimo nyasi madongo ma ji ne chiemoe kendo metho, ji ne chiwo mich, kendo ne gimoko misuma.” Bug Encyclopædia Britannica wacho ni e kinde nyasi mar Saturnalia, “ne iloroga tije kod ohendni duto.”
Teyni mag Krismas: Ka luwore gi bug The Encyclopedia of Religion, joma nodak e pinje mag Ulaya ne dusoga utegi gi “teyni maliel kod oboke mopogore opogore mang’ich,” mondo gitim nyasi mar kinde koyo kaachiel gi riembo jochiende.
Maupe molos e kit olembe, yiend Holly: “Joma nong’ere kaka Jo-Druid ne wacho ni maupe molos e kit olembe ne nigi teko moro makende. Ne ilamo yiend Holly nikech ne iparo ni en ema nosingo duogo mar wang’ chieng’ bang’ ndalo koyo.”—The Encyclopedia Americana.
Yiend Krismas: “Bang’ ka noselok Jo-Ulaya ma ne nie dinde mamoko ma gibedo Jokristo, lamo mar yiende pod nodhi nyime.” Achiel kuom gik ma nomiyo lamo yiende odhi nyime en “tim mar keto yien miluongo ni Yule e dhoot kata e i ot e kinde mag koyo.”—Encyclopædia Britannica.