Nyaminwa moro miluongo ni Nicole modak Colombia nowacho kama: “Ahero Od Romo marwa ahinya! En e kama anyalo bedoe gi owetena gi nyiminena ma Jokristo.” Be in bende iwinjoga kamano?

 E piny mangima, Joneno mag Jehova chokorega e Ute Romo ma dirom 63,000. Utego konyowa mondo walam Nyasaye ka wan ka mokuwe. To ok mano kende. Gikonyowa e yore mamoko bende. Painia moro mapile miluongo ni David ma wuok e piny Colombia wacho kama: “Od Romo marwa bidhoga puonj magwa. Thoth joma ohango biro e chokruogewa wuoroga kaka orite maber.” Mano ok timrega kende, to watimoga kinda ahinya mondo walos kuonde mokethore kendo timo ler kinde ka kinde. Ere kaka watimoga tijego?

Ere Kaka Ichanoga Tij Rito Ute Romo?

 Kanyakla e ma nigi ting’ mar rito Od Romo ma gitiyogo. Omiyo, owete gi nyimine timoga ler e Od Romo margi kinde ka kinde. Gilosoga kuonde matindo tindo mosechako kethore e Utegi mag Romo.

 Migawo Mochung’ ne Gedo (LDC) miyoga owete moko migawo mar tiego jo kanyakla mopogore opogore kaka ginyalo rito Ute Romo maggi. Moro ka moro kuom owetego ochung’ ne Ute Romo ma dirom auchiel nyaka apar kama. Gilimoga utego kendo tiego jolendo manie kanyaklago kaka ginyalo rito Od Romo margi. Bang’ higni adek, owetego nonoga moro ka moro kuom utego kendo manyo kuonde ma okethore kata ma nyalo kelo hinyruok.

 Owete gi nyimine morga ahinya gi tiegruok ma giyudo kokalo kuom owete ma tiego kanyakla e rito Od Romo. Nyaminwa Indhumathi ma wuok India wacho kama: “Tiegruok ma ne wayudo ne ber ahinya. Ne wamor ahinya ni nopuonjwa kaka wanyalo rito Od Romo marwa mondo osik kober.” Owadwa Evans ma wuok Kenya wacho kama: “Ne wapuonjore ni wanyalo loso kuonde matindo tindo ka pok gikethore ahinya mondo kik wati gi pesa mang’eny e losogi bang’e.”

Wayudoga Pesa Kanye?

 Higa ka higa, itiyoga gi pesa mang’eny e rito Ute Romo ka luwore gi kama moro ka moro yudoree, higni ma gisetieko, kod kwan mar kanyakla ma tiyo kodgi. Wayudoga pesa kanye ma waritogigo?

 Chiwo ma wagolo e ma itiyogo e rito Utewa mag Romo. Owadwa Alexander modak Kazakhstan wacho kama: “Moko kuom chiwo itiyogago e chulo Intanet, sitima, kod pi. Bende, wanyiewoga tishu, gige timo ler, glovs, kod rangi.” Pesa ma wadong’go ioroga e tij piny ngima mondo otigo e tijewa mamoko mag gedo ma dwaro pesa mang’eny.

Tije ma Dwaro Pesa Mang’eny

 Ka po ni pesa midhi tigo e loso kuonde mokethore e Od Romo okalo mitiyogago e rite dwe ka dwe nyadiriyo kata nyadidek, jodong-kanyakla onego otudre gi owadwa ma tiegoga kanyaklagi e rito Od Romo. Ka Migawo Mochung’ ne Gedo opwodho tijno, pesa mibiro tigo ibiro gol e chiwo ma siro tij piny ngima. E higa mar tijwa mar 2023, notim tije ma kamago ma romo 8,793, kendo noti gi dola milion 76.6 e tijego duto. Wane ane ariyo kuomgi.

 E piny Angola, Od Romo moro ma nosetieko higni 15 nosekethore ahinya. Weyni duto mag sitima nosekethore, kor ot nosebarore, kendo jirende ne wacho ni pi ma ne wuok kanyo ne mol ka donjo e utegi. Migawo Mochung’ ne Gedo nochano kaka ne idhi los gigo duto. Tijno nokawo dola 9,285. Jirendego ne mor ahinya, kendo ne giwuoro kaka notim tijno e yo maber.

 E piny Poland, wi tat Od Romo moro ne chuer kendo kapet nosekethore mokalo. Migawo Mochung’ ne Gedo nopwodho mondo olos tadono kendo mondo owil kapedno. Tijno duto nokawo dola 9,757. Nikech mano, koro ibiro ti gi Od Romono kuom higni mang’eny ma ok ochuno ni oti gi pesa mang’eny e lose kendo.

Tich ma Kelo ne Jehova Duong’

 Rito Utewa mag Romo ok kony e kungo pesa kende, to bende okelo ne Jehova duong’. Owadwa Shaun ma wuok Tonga wacho kama: “Sama warito Od Romo, mano miyo walamo Jehova kama ler kendo ka mochanore maber, to mano miyo nying Nyasachwa yudo duong’ e gweng’. Wawinjoga maber sama wagwelo ji e Od Romo.”

Ere Kaka Inyalo Konyo?

 Waduto wanyalo riwo lwedo chenro mar timo ler kendo rito kuondewa mag lamo. Owadwa Marino ma en achiel kuom owete ma tiego kanyakla e rito Od Romo e piny Australia, wacho kama: “Waduto wanyalo konyo e rito Utewa mag Romo. Sama watimo kamano, wakungo chiwo ma owete gi nyimine ogolo, kendo chiwogo inyalo tigo kama dwaroree moloyo.”

 Owadwa Joel ma wuok India bedoga mamor ahinya sama orito Od Romo margi. Owacho kama: “Tiyo kanyachiel gi owetena konya paro kaka ngima biro chalo e piny manyien.” Nicole ma nosewuo kuome motelo, wacho kama: “Nyocha nakonyo goyo dasta sama owete ne dino paip moro ma ne chuer e cho. Kata obedo ni an ne ok adino paip ma ne chuerno, amor ni nakonyo e geng’o hinyruok ma ne nyalo betie.”

 Ka diher chiwori mondo ikony e rito Od Romo maru, wuo gi jodong-kanyaklau. E wi mano, chiwo migolo ok tigo mana e rito Od Romo maru kende, to itiyo kode e rito Ute Romo mamoko e piny ngima. Inyalo golo chiwo e sanduge manie Od Romo maru, kata kokalo kuom websaitwa mar donate.jw.org. Wagoyoni erokamano ahinya kuom chiwo mari.