BATISO Kombe moyangi ne joma ibiro batisi biro yudore machiegni gi ndiri mak mana kapo ni oland kamachielo. Jogo mibiro batisi onego obed kama oyangnegi kapok ochak gol twak mar batiso chieng’ Ngeso gokinyi. Ng’ato ka ng’ato kuomgi onego oting’ taulo kod law mowinjore gi batiso.

CHIWO Nitie pesa mosetigo e timo chenro mondo wayud kombe moromo, gige kowo dwol, kod gik mamoko ma miyo chokruogni dhi maber, kendo mondo omed konyowa sudo machiegni gi Jehova. Chiwo migolo konyo e chulo gigi kaachiel gi siro tij piny mangima. Sanduge mondiki ma nenore malong’o oketi kuonde mopogore opogore e chokruogni mondo obedni mayot golo chiwo. Chiwou duto konyo kama duong’ ahinya. Bura Matayo goyonu erokamano ahinya kuom chiwo magu ma konyo e chopo dwaro mag Pinyruoth.

CHIWRUOK Kapo ni diher chiwori e tich moro amora motudore gi chokruogni, ter nyingi e Migawo mar Yudo Weche kod Chiwruok mondo onyisi kama ibiro tiyoe.

GIK MOLAL Gik moko duto ma weggi ok ong’ere onego oter e Migawo mar Gik Molal. Kapo ni gimoro olalni, dhi imanye e migawoni. Nyithindo molal bende onego oter e migawoni. Kata kamano, ok onego one migawoni kaka kar rito nyithindo. Ne ni ibet gi nyithindi kinde duto.

JORWAK WELO Jorwak welo omi migawo mar konyi. Omiyo, tem ahinya luwo gima ginyisi ka luwore gi kuonde michungoe mtokni, kuonde donjo kata wuok moriwo nyaka sama masira moro otimore, mako kombe, kod e weche mamoko.

KOMBE Dew jomamoko. Ket e paro ni inyalo mana mako kombe ne joma ubirogo e mtoka achiel, joma idakgo, kod joma ipuonjorigo Muma. Kik iket gik moko e kombe ma ok imako ne ng’ato.

KONYO THIETH Keturu e paro ni migawoni konyo e weche thieth MOBIRO APOYA KENDE.

NE JOMA DIHER DHI E SKUL MAR JOLAND-INJILI MAR PINYRUOTH Jopainia ma hikgi nie kind 23 gi 65 ma diher tiyo ne Nyasaye kuom thuolo momedore igwelo e romo ma ibiro tim gi joma diher dhi e Skul mar Joland-Injili mar Pinyruoth chieng’ Jumapil. Ibiro land sa kod kama ibiro timee.