Umbadilo 28:1-31

Mwa kulambwila byamulambu palapala (1-31)
- Byamulambu bya difuku ne difuku (1-8)
- Bya mu dya Sabato (9, 10)
- Byamulambu bya kweji ne kweji (11-15)
- Bya Pashika (16-25)
- Bya Masobo a Mayenga (26-31)

28 Yehova wanena Mosesa monka’mba: ² “Soñanya bene Isalela wibalombole amba, ‘Mufwaninwe kuta mutyima mundetele kyamulambu kyami, mikate yami. Byamulambu byami byelwe na mudilo bu luvumba luyampe* kondi bifwaninwe kulambulwa pa kitatyi kitungwe.’+ ³ “Kadi wibalombole amba, ‘Kino’ki kyo kyamulambu kyelwe na mudilo kyomukaleta kudi Yehova: twana twa mikōko tubidi tulume twampikwa bulema ku difuku bu kyamulambu kisōkwe kya kitatyi ne kitatyi.+ ⁴ Ukalambula kana ka mukōko kalume kamo lubanga, kana ka mukōko kalume kakwabo ukekalambula pa kapita i kāni,*+ ⁵ pamo ne kipindi kimo kya pa bipindi dikumi bya efa* wa bukula bupēla bwele’ko kipindi kimo kya pa bipindi biná bya hina* wa māni a mpafu miponde, bu kyamulambu kya miseke.+ ⁶ I kyamulambu kisōkwe kya kitatyi ne kitatyi,+ kyatūdilwe’ko ku Lūlu lwa Shinai bu luvumba luyampe,* kyamulambu kyelwe na mudilo kudi Yehova, ⁷ pamo ne kyamulambu kyakyo kya bitomibwa, kipindi kimo kya pa bipindi biná bya hina ku kana ka mukōko kalume kamo kamo.+ Ukapungulula bitomibwa bikolwañana mu kifuko kijila bu kyamulambu kya bitomibwa kudi Yehova. ⁸ Kadi ukalambula kana ka mukōko kalume kakwabo pa kapita i kāni.* Ne kyamulambu kya miseke kimo kyonka na kyokya kyalambulwanga lubanga ne kyamulambu kyakyo kya miseke kimo kyonka, ukaleta’kyo bu kyamulambu kyelwe na mudilo kya luvumba luyampe* kudi Yehova.+ ⁹ “‘Inoko, mu difuku dya Sabato,+ kyamulambu kikekala kya twana twa mikōko tubidi tulume twampikwa bulema twa mwaka umo umo ne bipindi bibidi bya pa bipindi dikumi bya kipimo kya efa wa bukula bupēla bwele’ko māni bu kyamulambu kya miseke, pamo ne kyamulambu kyakyo kya bitomibwa. ¹⁰ Kino’ki kyo kyamulambu kisōkwe kya Sabato, pamo ne kyamulambu kisōkwe kya kitatyi ne kitatyi ne kyamulambu kyakyo kya bitomibwa.+ ¹¹ “‘Ku ngalwilo kwa kweji ne kweji,* mukaleta kudi Yehova kyamulambu kyenu kisōkwe kya bañombe babidi bana, mukōko mulume umo, ne twana twa mikōko tusamba-tubidi twampikwa bulema twa mwaka umo umo,+ ¹² ne bipindi bisatu bya pa bipindi dikumi bya bipimo bya bukula bupēla bwele’ko māni bu kyamulambu kya miseke+ ku ñombe ne ñombe, ne bipindi bibidi bya pa bipindi dikumi bya bipimo bya bukula bupēla bwele’ko māni bu kyamulambu kya miseke ku mukōko umo,+ ¹³ ne kipindi kimo kya pa bipindi dikumi bya kipimo kya bukula bupēla bwele’ko māni bu kyamulambu kya miseke ku kana ka mukōko kalume kamo kamo, bu kyamulambu kisōkwe, luvumba luyampe,*+ kyamulambu kyelwe na mudilo kudi Yehova. ¹⁴ Kadi byamulambu byabyo bya bitomibwa bikekala kipindi kya hina umo wa vinyu ku ñombe+ umo ne kipindi kimo kya pa bipindi bisatu bya hina ku mukōko mulume,+ ne kipindi kimo kya pa bipindi biná bya hina ku kana ka mukōko kalume.+ Kino’ki kyo kyamulambu kisōkwe kya ku kweji kikaletwa kweji ne kweji mu mwaka onso mutuntulu. ¹⁵ Kadi, ne mbuji umo mwana ukalambulwa kudi Yehova bu kyamulambu kya bubi kutentekela pa kyamulambu kisōkwe kya kitatyi ne kitatyi pamo ne kyamulambu kyakyo kya bitomibwa. ¹⁶ “‘Mu kweji mubajinji, mu difuku dya 14 dya kweji’wa, kukekala Pashika ya Yehova.+ ¹⁷ Kadi mu difuku dya 15 dya kweji’wa, kukekala masobo. Mikate yampikwa kiyujo ikadibwa mu mafuku asamba-abidi.+ ¹⁸ Mu difuku dibajinji kukekala kitango kijila. Kemufwaninwepo kwingila mwingilo mukomo nansha umo. ¹⁹ Mukaleta kudi Yehova kyamulambu kisōkwe kyelwe na mudilo kya bañombe babidi bana, mukōko mulume umo, ne twana twa mikōko tulume tusamba-tubidi twa mwaka umo umo. Mukalambula banyema bampikwa bulema.+ ²⁰ Mukebalambula ne byamulambu byabo bya miseke bya bukula bupēla bwele’ko māni,+ bipindi bisatu bya pa bipindi dikumi bya bipimo ku ñombe umo ne bipindi bibidi bya pa bipindi dikumi bya bipimo ku mukōko mulume. ²¹ Ukalambula kipindi kimo kya pa bipindi dikumi bya kipimo ku kana ka mukōko kalume kamo ne kamo ka mu twana twa mikōko tulume tusamba-tubidi, ²² ne mbuji umo bu kyamulambu kya bubi, wa kwimupūtyila nandi bubi. ²³ Kutalula’mo kyamulambu kisōkwe kya lubanga, kya kyamulambu kisōkwe kya kitatyi ne kitatyi, mukalambula ne bino’bi. ²⁴ Mukalambula bino’bi muswelo umo onka difuku ne difuku mu mafuku asamba-abidi bu byakudya,* kyamulambu kyelwe na mudilo kya luvumba luyampe* kudi Yehova. Kikalambulwa pamo ne kyamulambu kisōkwe kya kitatyi ne kitatyi ne kyamulambu kyakyo kya bitomibwa. ²⁵ Mu difuku dya busamba-bubidi, mukalonga kitango kijila.+ Kemufwaninwepo kwingila mwingilo mukomo nansha umo.+ ²⁶ “‘Mu difuku dya bipa bibajinji byele,+ shi mubaleta kyamulambu kya miseke mipya kudi Yehova,+ mukalonga kitango kijila mu masobo enu a mayenga.+ Kemufwaninwepo kwingila mwingilo mukomo nansha umo.+ ²⁷ Mukaleta kyamulambu kisōkwe kya luvumba luyampe* kudi Yehova kya bañombe babidi bana, mukōko mulume umo, ne twana twa mikōko tulume tusamba-tubidi twa mwaka umo umo,+ ²⁸ ne kyamulambu kyabo kya miseke kya bukula bupēla bwele’ko māni, kipindi kimo kya pa bipindi bisatu bya bipimo ku ñombe ne ñombe, bipindi bibidi bya pa bipindi dikumi bya bipimo ku mukōko mulume umo, ²⁹ kipindi kimo kya pa bipindi dikumi ku kana ka mukōko kalume kamo kamo ka mu twana twa mikōko tulume tusamba-tubidi, ³⁰ ne mbuji mwana umo wa kwimupūtyila nandi bubi.+ ³¹ Mukebalambula kutentekela pa kyamulambu kisōkwe kya kitatyi ne kitatyi ne kyamulambu kyakyo kya miseke. Bafwaninwe kwikala banyema bampikwa bulema,+ pamo ne byamulambu byabo bya bitomibwa.