Umbadilo 23:1-30
23 Penepo Balame wanena Balake amba: “Shimika pa kino kifuko bisōkelo bisamba-bibidi,+ unongolwele ne bañombe basamba-babidi ne mikōko milume isamba-ibidi.”
2 Ponkapo Balake walonga monka mwanenene Balame. Ba Balake ne Balame balambula ñombe ne mukōko pa kisōkelo ne kisōkelo.+
3 Ebiya Balame wanena Balake amba: “Abe shala pano kubwipi na kyamulambu kyobe kisōkwe, ami keñenda. Uyuka Yehova usa kwisamba nami. Byonso byasa kunsokwela, nsa kukulombola’byo.” Penepa wakanda ku mukuna.
4 Leza wesamba na Balame,+ nandi wamusapwila’mba: “Nashimika bisōkelo bisamba-bibidi mu milongo, nalambula’po ne ñombe ne mukōko pa kisōkelo ne kisōkelo.”
5 Yehova watūla kino kinenwa mu kyakanwa kya Balame+ amba: “Jokela kudi Balake, kadi bino’bi e byokanena.”
6 Ebiya wajoka wamona Balake ne bamfumu bonso ba Moabu bemene kubwipi na kyamulambu kyandi kisōkwe.
7 Penepa wanena mu nkindi namino amba:+
“Balake mulopwe wa Moabu waunselele tamba ku Alami,+Tamba ku ngulu ya kutunduka’mba:
‘Iya umfingile Yakoba.
En-en, iya utuluje Isalela.’+
8 Le nkokeja namani kufinga boba kebafingilwepo na Leza?
Ne kadi nkokeja namani kutuluja boba bokebatulwijepo kudi Yehova?+
9 Nebamone tamba peulu pa mabwe,Kadi nebamone tamba pa mikuna.
Pamo bwa bantu, abo bashikete’ko bunka;+Kebebadilangapo abo bene mu mizo.+
10 I ani le ubwanya kubala musenga wa Yakoba+Nansha kubala’tu kipindi kimo kya pa bipindi biná bya Isalela?
Ndeke amiwa* mfwe lufu lwa moloke,Kadi leka mfulo yami ikale pamo bwa yabo.”
11 Penepo Balake wanena Balame amba: “I bika byowaunonga? Nakuselele ufinge balwana nami, pano kulongelepo kintu ino ubebesela’tu.”+
12 Nandi walondolola’mba: “Le nkifwaninwepo kwisamba kyonso kitūla Yehova mu kyakanwa kyami?”+
13 Balake wamunena’mba: “Nakwisāshila twaya ku kifuko kikwabo kobwanya kwibamona. Ukamona’ko’tu bamo kete; kukebamonepo bonso. Mfingile’bo kwine’kwa.”+
14 Ebiya wamuselela mu ntanda ya Zofimi, peulu pa Pisika,+ kadi waubaka bisōkelo bisamba-bibidi walambula ñombe ne mukōko pa kisōkelo ne kisōkelo.+
15 Penepo Balame wanena Balake amba: “Abe shala pano kubwipi na kyamulambu kyobe kisōkwe pano ponkesamba nandi kokwa.”
16 Yehova wesamba na Balame watūla kino kinenwa mu kyakanwa kyandi amba:+ “Jokela kudi Balake, kadi bino’bi e byokanena.”
17 Nandi waiya kwadi wamumona wilaije kubwipi na kyamulambu kyandi kisōkwe, ne bamfumu ba Moabu badi nandi. Balake wamwipangula’mba: “Le Yehova wanena bika?”
18 Penepa wanena mu nkindi namino amba:+
“Taluka, a Balake, teja.
Ngivwane, a mwanā Zipole.
19 Leza ke muntupo wa bitupu ubepa bubela,+Nansha mwanā muntu ushinta milangwe yandi.*+
Shi wanena kintu, le kakekilongapo?
Shi wesambe, le kakekifikidijapo?+
20 Tala’po! naselelwe kwesela;Pano aye waesela,+ kadi nkibwanyapo kushinta’byo.+
21 Katalangapo bitupu bukomo bwa majende a kulwa na Yakoba,Kadi kalekangapo makambakano padi Isalela
Yehova Leza wandi udi nabo,+Kadi bamutūtyilanga kyungwe bu mulopwe umbukata mwabo.
22 Leza ye wibatambija mu Edipito.+
Udi pamo bwa masengo a ñombe wa ntanda kobadi.+
23 Mwanda kekudipo mitāmu ya kulwa na Yakoba,+Nansha lubuko lwa kulwa na Isalela.+
Pano bakokeja kunena pa mwanda wa Yakoba ne Isalela amba:
‘Talai byalonga Leza!’
24 Aba kebo bantu bakalanguka pamo bwa ntamboKadi pamo bwa ntambo, bakemananga abo bene.+
Kebakalālapo panshi enka ne byobadya kikwatwaNe byobatoma mashi a batapibwe.”
25 Penepo Balake wanena Balame amba: “Shi kubwanyapo kumufinga, nankyo kufwaninwepo ne kumwesela kwine.”
26 Balame walondolola Balake amba: “Le nkyakulombwelepo amba, ‘Nkalonga byonso binena Yehova’?”+
27 Balake wanena Balame amba: “Nakwisāshila iya nkakutūle ku kifuko kikwabo. Uyuka kikekala kyoloke ku meso a Leza wa bine amba ukamfingile’ye kwine’kwa.”+
28 Ebiya Balake waenda na Balame peulu pa Peole, utadidile ku Yeshimone.*+
29 Penepo Balame wanena Balake amba: “Shimika bisōkelo bisamba-bibidi pa kino kifuko, unongolwele ne bañombe basamba-babidi ne mikōko milume isamba-ibidi.”+
30 Ebiya Balake walonga monka mwanenene Balame, walambula ñombe ne mukōko pa kisōkelo ne kisōkelo.
Kunshi kwa Dyani
^ Nansha’mba “muya wami.”
^ Nansha’mba “wialakanya.”
^ Bibwanika padi i, “mu ntanda mudi zolē; mu ntanda mutuputupu.”
