Levitiku 2:1-16
-
Lukau lwa mbwaza (1-16)
2 “‘Avo muntu ozolele sunzula lukau lwa mbwaza+ kwa Yave, o lukau lwandi lufwete kala lwa mfumfu yambote, kafwete lo yitila mazi yo sia lo ndumbu a nti a lebona.+
2 I bosi, otwasa lo kwa wan’a Arone, anganga. O nganga obonga koko kumosi kwa mfumfu yambote yo mazi ye ndumbu a nti a lebona yawonso, ofutumuna yo vana ziku se sinsu kisunzulanga lukau lwawonso,*+ lukau lwayoka vana tiya, lekwa kia nsunga* kuna kwa Yave.
3 Konso kina kisuva muna lukau lwa mbwaza, kia Arone yo wan’andi,+ kikala se lekwa kisundidi o vauka+ muna tukau tuveno kwa Yave vana tiya.
4 “‘Avo ozolele sunzula lukau lwa mbwaza zayokwa muna fûlu, lufwete kala lwa mfumfu yambote, i sia vo, mbolo zakondwa mfuna zina nze nlunga, zasangwa o mazi yovo mbolo zababama zakondwa mfuna, zakuswa o mazi.+
5 “‘Avo lukau lwaku, lukau lwa mbwaza lwakangwa vana mênga,+ lufwete kala lwa mfumfu yambote, yakondwa mfuna, yasangwa o mazi.
6 Lubukunua mu tini-tini, ofwete lo yitila mazi.+ Olwalu i lukau lwa mbwaza.
7 “‘Avo lukau lwaku, lukau lwa mbwaza luvangilu muna nzungu, lufwete vangilwa mu mfumfu yambote yo mazi.
8 Ofwete twasa kwa Yave o lukau lwa mbwaza luvangilu muna lekwa yayi, o lukau lusunzulwa kwa nganga, ona onata lo vana ndambu a ziku.
9 O nganga obonga e ndambu a lukau lwa mbwaza se sinsu kisunzulanga lukau lwawonso,*+ ofutumuna lo vana ziku se lukau lwayoka vana tiya, lekwa kia nsunga* kuna kwa Yave.+
10 Kina kisuva muna lukau lwa mbwaza, kia Arone yo wan’andi, kikala se lekwa kisundidi o vauka muna tukau tuveno kwa Yave vana tiya.+
11 “‘Kusunzula konso lukau lwa mbwaza ko kwa Yave lwasiwa mfuna,+ kadi kufwete futumuna mfuna ko yovo wiki se lukau lwayoka vana tiya kuna kwa Yave.
12 “‘Nulenda lo sunzula kwa Yave se lukau lwa mbongo antete,+ kansi ke nufwete yoka lekwa yoyo ko vana ziku se lekwa kia nsunga.*
13 “‘Konso lukau lwa mbwaza otambika lufwete siwa o mungwa; o mungwa kangu dia Nzambi aku, ke ufwete kondwa ko muna lukau lwaku lwa mbwaza. O tukau twaku twawonso, osunzula to kumosi yo mungwa.+
14 “‘Avo ozolele sunzula lukau lwa mbwaza lwa mbongo antete kwa Yave, ofwete sunzula mbwaza zampa zakangwa vana tiya, mbwaza zampa zatutwa se lukau lwa mbwaza lwa mbongo aku antete.+
15 Ofwete sia mazi vana lukau, sia mpe ndumbu a nti a lebona vana lukau. Olwalu i lukau lwa mbwaza.
16 O nganga ofutumuna lo se kunku kisunzulanga lukau lwawonso,*+ i sia vo, ndambu a mbwaza zatutwa, mazi kumosi ye ndumbu a nti a lebona, se lukau vana tiya kuna kwa Yave.
Mvovo vana yand'a lukaya
^ Yovo “se kunku kia luyindulu kia lukau.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “se kunku kia luyindulu kia lukau.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “se kunku kiandi kia luyindulu.”
