တၢ်မၤလိ ၇
တၢ်ဂ့ၢ်တၢ်ကျိၤလၢအဘၣ် ဒီးပနာ်န့ၢ်အီၤသ့
လူၤကၣ် ၁:၃
ဘၣ်မၤဒ်လဲၣ်– ဒ်သိးနပှၤဒိကနၣ်တၢ်ဖိ ကသ့ၣ်ညါထီၣ် တၢ်ဂ့ၢ်လၢအဘၣ်လီၤတံၢ်လီၤဆဲးအဂီၢ် သူတၢ်ဂ့ၢ်တၢ်ကျိၤလၢ ပှၤနာ်န့ၢ်အီၤသ့တက့ၢ်.
မၤဒ်အံၤတက့ၢ်–
-
ဃုသ့ၣ်ညါ ဒီးသူတၢ်ဂ့ၢ်တၢ်ကျိၤလၢ ပှၤနာ်န့ၢ်အီၤသ့. တၢ်လၢနတဲတဖၣ်န့ၣ် ကဘၣ်သန့ၤထီၣ်အသးလၢ လံာ်စီဆှံအပူၤ ဒီးမ့ၢ်သ့န့ၣ် ဖးပၠးအီၤဒ်တၢ်ကွဲးအသးလၢ လံာ်စီဆှံအပူၤအိၣ်ဝဲအသိးတက့ၢ်. နမ့ၢ်အဲၣ်ဒိးသူတၢ်ဂ့ၢ်လၢ ပှၤစဲအ့ၣ်ဖိပာ်ဖျါထီၣ်ဝဲမ့ၢ်ဂ့ၤ, လၢတၢ်ကစီၣ်အပူၤမ့ၢ်ဂ့ၤ, ပှၤတဂၤဂၤအတၢ်လဲၤခီဖျိမ့ၢ်ဂ့ၤ ဒီးတၢ်ဂ့ၢ်အဂၤတဖၣ်မ့ၢ်ဂ့ၤ နကဘၣ်ဃုသ့ၣ်ညါဆိအီၤလၢ မ့ၢ်တၢ်ဂ့ၢ်တဖၣ်အံၤ အဘၣ်လီၤတံၢ်လီၤဆဲးဧါ မ့တမ့ၢ် မ့ၢ်ပှၤသူအီၤဒံးဧါ.
-
တၢ်ဂ့ၢ်လၢနကသူအီၤတဖၣ်န့ၣ် သူအီၤလီၤတံၢ်လီၤဆဲးတက့ၢ်. ဒ်သိးပကၡဲပၠး လံာ်စီဆှံတဆၢအံၤအဂီၢ် ပကဘၣ်နၢ်ပၢၢ်တၢ်လၢ ယဟိဝၤယွၤအဲၣ်ဒိးတဲဝဲတဖၣ် မ့ၢ်မနုၤလဲၣ်. ဒီးအကဘၣ်လီၤပလိာ်လိာ်အသးဒီး လံာ်စီဆှံ ဒီးလံာ်လဲၢ်လၢ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” ထုးထီၣ်ဝဲတဖၣ်န့ၣ်လီၤ. (မး. ၂၄:၄၅) ဒီးနမ့ၢ်သူတၢ်အုၣ်အသးအဂၤလၢ တမ့ၢ်လံာ်စီဆှံပူၤဘၣ်အခါ နကဘၣ်သူအီၤဒ် တၢ်ကွဲးအသးအိၣ်ဝဲအသိး ဒီးတဘၣ်ဆီတလဲပှၤကွဲးလံာ်ဖိ အတၢ်ကတိၤအခီပညီတဂ့ၤ.
-
ပာ်ဖျါထီၣ်န့ၢ်အီၤတၢ်အုၣ်သးတဖၣ်. ဖဲနဖးလံာ်စီဆှံ မ့တမ့ၢ် နဖးဖျါထီၣ်တၢ်ဂ့ၢ်တၢ်ကျိၤမ့ၢ်ဝံၤန့ၣ် သံကွၢ်နပှၤဒိကနၣ်တၢ်ဖိ တၢ်သံကွၢ်တဖၣ်လၢ ကထုးန့ၢ်အသး မ့တမ့ၢ် ဟ့ၣ်တၢ်အဒိလၢ ကမၤစၢၤနပှၤဒိကနၣ်တၢ်ဖိ ဒ်သိးအကနၢ်ပၢၢ်ထီၣ် ဒီးသ့ၣ်ညါထီၣ်တၢ်စံးဆၢလၢ အနီၢ်ကစၢ်တက့ၢ်.
