“ယဟိဝၤ​ပှၤအုၣ်​အသး​တဖၣ်​န့ၣ်​ အသး​ဂ့ၤ​လၢ ပှၤဂၤ​အ​ဖီခိၣ်​ တကး​ဒံးဘၣ်​ အသး​ဂ့ၤ​လၢ ယ​ထွံၣ်​ဖိ​တဖၣ်​ အ​ဖီခိၣ်​စ့ၢ်ကီး. ​ဘၣ်​တနံၤ​န့ၣ်​ ဒီပုၢ်ဝဲၢ်​မုၣ်​အံလ့ လၢ​အ​ဆၢထၢၣ်​လၢ လ့ၣ်ဆီၣ်​ကပၤ​န့ၣ်​ ဟ့ၣ်​ဒုးအီၣ်​ဝဲ ယ​ထွံၣ်​ဖိ​ခံ​ဒု​လၢ ကိၣ်​ဘံး​စကံး. လၢခံ ဖဲ​ပ​လဲၤ​ဘူးထီၣ်​လၢ​လ့ၣ်ဆီၣ်​အ​အိၣ်​ တဘျီ​ဂ့ၤ​တဘျီ​ဂ့ၤ​အခါ​န့ၣ်​ ယ​ထွံၣ်​ဖိ​ခံ​ဒု လဲၤ​ဃ့ၢ်​လၢ အဝဲသ့ၣ်​အ​အိၣ်​ ဒ်သိး​က​အီၣ်​​ဘၣ်​ကိၣ်​အဂီၢ်.

“တလါ​​ဘၣ်​တလါ ပူၤကွံာ်​ဒီး ယ​ထွံၣ်​ဖိ​ခံ​ဒု​န့ၣ်​ အီၣ်​ကိၣ်​ဘံး​စကံး​ဝံၣ်​မး ဒီး​ယၤ​နာ်​က့ ယ​တဲသကိး​တၢ်​ဒီး ယဟိဝၤ​ပှၤအုၣ်​အသး​တဖၣ်​ တစိၢ်ဖိ​န့ၣ်​မုာ်မး. ဘၣ်ဆၣ်​ ယ​တ​အဲၣ်ဒိး​​လီၤ​ဒုး​ဒီး အဝဲသ့ၣ်​ အါ​တလၢ​ဘၣ်. ယ​အိၣ်​အ​နံၣ်​ ၇၀ ဘျဲၣ်လံ ဒီး​ယဟိဝၤ​ပှၤအုၣ်​အသး​တဖၣ်​ နာ်​တၢ်မနုၤ​လဲၣ်န့ၣ်​ ယ​တ​သ့ၣ်ညါ​လီၤတံၢ်​ဘၣ်. မ့ၢ်​လၢ​ယ​သးလၢာ် ခရံာ်ဖိ​တၢ်ဘူၣ်​တၢ်ဘါ​အါမး​အဃိ ယ​အဲၣ်ဒိး​ဃု​သ့ၣ်ညါ​လံာ်စီဆှံ​လၢ ယ​နီၢ်ကစၢ်.

“ဖဲန့ၣ်​အဆၢ​ကတီၢ် လၢ​ဝ့ၢ်​ပူၤ​လၢ​တၢ်လီၢ်​အဂၤ​စ့ၢ်ကီး ယ​ထံၣ်ဘၣ်​ ယဟိဝၤ​ပှၤအုၣ်​အသး​လၢ အ​ဆၢထၢၣ်​လၢ တၢ်​စံၣ်တဲၤ​တဲ​လီၤ​လ့ၣ်ဆီၣ်​ကပၤ. အဝဲသ့ၣ်​နာ်​က့ အသး​ဂ့ၤမး. ဒီး​ယ​တၢ်​သံကွၢ်​တဖၣ်​ အ​တၢ်​စံးဆၢ​န့ၣ်​ အဝဲသ့ၣ်​ စံးဆၢ​န့ၢ်​ယၤ​လၢ လံာ်စီဆှံ​ပူၤ​ထီဘိ​အဃိ ယနာ်န့ၢ်​အဝဲသ့ၣ်​အါထီၣ်.

“​ဘၣ်​တနံၤ​န့ၣ်​ အံလ့ သံကွၢ်​ယၤ​လၢ ‘မ့ၢ်​န​နာ်​လၢ ဆၣ်ဖိ​ကီၢ်ဖိ​တဖၣ်​န့ၣ်​ မ့ၢ်​တၢ်ဟ့ၣ်​လၢ အ​ဟဲ​လၢ​ကစၢ်​ယွၤ​အ​အိၣ်ဧါ.’ ဒီး​ယ​တဲ​ဆၢ​အီၤ​လၢ ‘မ့ၢ်, ယ​နာ်​နီၢ်ကီၢ်​လီၤ.’ ဒီး​အ​ဝဲ​ဖးပၠး​ယၤ​လၢ ယၡါယၤ ၁၁:၆-၉. စးထီၣ်​ဖဲန့ၣ်​ ယ​အဲၣ်ဒိး​မၤလိ​လံာ်စီဆှံ ဘၣ်ဆၣ်​ ယ​တ​အဲၣ်ဒိး ဟံးန့ၢ်​ဖး အဝဲသ့ၣ်​အ​လံာ်​ဒံးဘၣ်.

“လၢခံ​အနံၤ​တဖၣ်​န့ၣ်​ ယ​တဲသကိး​လံာ်စီဆှံ​ဒီး အံလ့ ဒီး​အဝၤ​ဘြဲၣ်. ပ​တဲသကိး​တၢ်​ထဲ တစိၢ်ဖိ​နာ်​က့ အ​ထုးန့ၢ်​ယ​သး​ဒိၣ်မး. ဒီး​အဝဲသ့ၣ်​ ဟ့ၣ်ကူၣ်​ယၤ​လၢ ယ​က​ဖးလံာ်​မးသဲ တုၤ​လၢ လံာ်​မၤတၢ် ဒ်သိး​ယ​က​နၢ်ပၢၢ် တၢ်​လၢ​ခရံာ်ဖိ​န့ၣ်​ မ့ၢ်​မနုၤ​လဲၣ်. အဃိ ယ​ဖး​ကွၢ်​အီၤ. ဒီး​လၢခံ​တယံာ်​​ဘၣ်​ဒီး ယ​စးထီၣ်​မၤလိ​လံာ်စီဆှံ​ဒီး ဘြဲၣ်​ ဒီး​အံလ့. ဖဲန့ၣ်​အခါ ​ဘၣ်​လၢ ၂၀၁၆ တၢ်ကိၢ်​ခါ အဆၢ​ကတီၢ်.

“တၢ်​ဆၢကတီၢ်​လၢ ယ​က​မၤလိ​လံာ်စီဆှံ ဒီး​ယ​က​ထီၣ်​တၢ်​အိၣ်ဖှိၣ်​န့ၣ်​ ယ​အိၣ်ခိး​ကွၢ်လၢ်​အီၤ ကိးနွံ​ဒဲး. ယ​သ့ၣ်ညါ​ဘၣ်​ တၢ်မ့ၢ်​တၢ်တီ​လၢ လံာ်စီဆှံ​အ​ပူၤ​အဃိ ယ​တူၢ်​ဘၣ်​လၢ ယ​ဒိးန့ၢ်​​ဘၣ်​တၢ်​ဆိၣ်ဂ့ၤ ဒီး​ယ​သးခု​ဒိၣ်မး. တနံၣ်​ဝံၤ​အလီၢ်​ခံ ယ​ကဲထီၣ်​ ယဟိဝၤ​ပှၤအုၣ်​အသး​လၢ အ​ဒိး​ဘျၢထံ​ဝံၤ​တဂၤ. ခဲအံၤ​ယ​သး​နံၣ်​အိၣ်​ ၇၉ နံၣ်​လံ ဘၣ်ဆၣ်​ ယ​သ့ၣ်ညါ​ထီၣ်ဘၣ်​ တၢ်ဘူၣ်​တၢ်ဘါ​လၢ အမ့ၢ်​အတီ​အဃိ ယ​သးခု​ဒိၣ်မး. ယဟိဝၤ​ယွၤ ဆိၣ်ဂ့ၤ​ယၤ ခီဖျိ အ​ဟ့ၣ်​ယၤ​တၢ်ခွဲး​တၢ်ယာ် လၢ​ယ​က​ပၣ်ဃုာ်​​ဘၣ်​လၢ အ​ဟံၣ်ဖိ​ဃီဖိ​လၢ ဟီၣ်ခိၣ်​ဒီဘ့ၣ်​အ​ကျါ.”