တၢ်မၤလိ ၁၄
ပမၤကစၢ်ယွၤအတၢ်မၤ လၢအဂ့ၤကတၢၢ် ကသ့ဒ်လဲၣ်
“မၤပှၤစံၣ်တဲၤတဲလီၤ တၢ်သးခုအကစီၣ်အတၢ်မၤန့ၣ်တက့ၢ်. တၢ်အခ့အပှၤအတၢ်လၢ နမၤအီၤန့ၣ်, မၤလၢလၢပှဲၤပှဲၤတက့ၢ်.”—၂ တံၤမသ့း ၄:၅.
တၢ်သးဝံၣ် ၅၇ စံၣ်တဲၤတဲလီၤတၢ်ဆူ ပှၤအကလုာ်ကလုာ်
တၢ်မၤလိအံၤ အတၢ်တိာ်ပာ် *
ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ ယ့ၣ်ၡူးထံၣ်လိာ်အသးဒီး အပျဲၢ်အဘီၣ်တဖၣ် ဒီးယ့ၣ်ၡူးမၢအဝဲသ့ၣ် “လဲၤဒုးကဲထီၣ်ပှၤ . . . လၢယပျဲၢ်ယဘီၣ်တက့ၢ်.” (ကွၢ်လံာ်အဆၢ ၁)
၁. ကစၢ်ယွၤအခ့အပှၤကိးဂၤဒဲး အဲၣ်ဒိးမၤဝဲတၢ်မနုၤလဲၣ် ဒီးဘၣ်မနုၤအဃိလဲၣ်. (ကွၢ်တၢ်ဂီၤလၢ လံာ်ကုခိၣ်တက့ၢ်.)
ယ့ၣ်ၡူးခရံာ် မၤလိာ်အပျဲၢ်အဘီၣ်တဖၣ်လၢ “လဲၤဒုးကဲထီၣ် ပှၤအကလုာ်တဖၣ်ခဲလၢာ်လၢ ယပျဲၢ်ယဘီၣ်တက့ၢ်” လီၤ. (မးသဲ ၂၈:၁၉) ကစၢ်ယွၤအခ့အပှၤ လၢအအိၣ်ဒီးတၢ်သးတီခဲလၢာ်န့ၣ် အဲၣ်ဒိးမၤလိအါထီၣ်အသး လၢကမၤ ‘လၢပှဲၤ’ အမူဒါ လၢကစၢ်ယွၤဟ့ၣ်လီၤအီၤန့ၣ်လီၤ. (၂ တံၤမသ့း ၄:၅) တၢ်မၤအံၤမ့ၢ်တၢ်လၢ အကဲဘျုး ဒီးအရ့ဒိၣ်န့ၢ်ဒံး တၢ်မၤအဂၤခဲလၢာ်လီၤ. အဃိ တသ့ဖဲအသ့ ပအဲၣ်ဒိးသူပတၢ်ဆၢကတီၢ် လၢပကမၤကစၢ်ယွၤအတၢ်မၤအဂီၢ်လီၤ. ဘၣ်ဆၣ် ပကမၤဒ်န့ၣ်အဂီၢ် တညီဘၣ်.
၂. ပအဲၣ်ဒိးမၤ ကစၢ်ယွၤအတၢ်မၤလၢ အဂ့ၤကတၢၢ်ဘၣ်ဆၣ် ပထံၣ်ဘၣ်ဒီးတၢ်ကီတၢ်ခဲမနုၤတဖၣ်လဲၣ်.
၂ တၢ်ဖံးတၢ်မၤအဂၤလၢအရ့ဒိၣ် လၢအကမၤလၢာ်ကွံာ် ပတၢ်ဆၢကတီၢ်ဒီး ပဂံၢ်ပဘါန့ၣ် အိၣ်ဝဲအါမးလီၤ. တနံၤဘၣ်တနံၤန့ၣ် ပဝဲအါဂၤ ပဘၣ်မၤတၢ်လၢ ပကလုၢ်အီၣ်လုၢ်အီ ပနီၢ်ကစၢ် ဒီးပဟံၣ်ဖိဃီဖိအဂီၢ်လီၤ. ဒီးဘၣ်သ့ၣ်သ့ၣ် ပကဘၣ်မၤ ဟံၣ်ဖိဃီဖိအမူဒါ လၢအဂၤတဖၣ် မ့တမ့ၢ် ပတၢ်အိၣ်ဆူၣ်အိၣ်ချ့ တဂ့ၤဘၣ်, ပသးလီၤဘှံး မ့တမ့ၢ် ခီဖျိလၢ ပသးပှၢ်ထီၣ်အဃိ ပထံၣ်ဘၣ်ဒီးတၢ်ကီတၢ်ခဲအါမံၤလီၤ. ပမ့ၢ်ထံၣ်ဘၣ်ဒီး တၢ်အိၣ်သးလၢ အကီအခဲတဖၣ်အံၤသနာ်က့ ပမၤကစၢ်ယွၤအတၢ်မၤ လၢအဂ့ၤကတၢၢ် ကသ့ဒ်လဲၣ်.
၃. ပမ့ၢ်ကွၢ်ယ့ၣ်ၡူးအတၢ်ကတိၤဖဲ မးသဲ ၁၃:၂၃ န့ၣ်ပသ့ၣ်ညါဘၣ် တၢ်မနုၤလဲၣ်.
၃ ခီဖျိလၢ ပတၢ်အိၣ်သးတဖၣ်အံၤအဃိ ပမၤယဟိဝၤယွၤ အတၢ်မၤမ့ၢ်တန့ၢ် အါအါဘၣ်န့ၣ် တလိၣ်ပသးဟးဂီၤဘၣ်. ယ့ၣ်ၡူးသ့ၣ်ညါဝဲလၢ ပဝဲကိးဂၤဒဲးန့ၣ် ပသၣ်ထီၣ်ဘီမုၢ်အတၤသၣ် ပှဲၤသိးသိး တသ့ဘၣ်. (ဖး မးသဲ ၁၃:၂၃ တက့ၢ်.) ပမ့ၢ်မၤယဟိဝၤယွၤအတၢ်မၤလၢ အဂ့ၤကတၢၢ်န့ၣ် အဝဲကပာ်လုၢ်ပာ်ပှ့ၤ ပတၢ်မၤတဖၣ်န့ၣ်လီၤ. (ဧ့ၤဘြံၤ ၆:၁၀-၁၂) ဘၣ်သ့ၣ်သ့ၣ် ပကတူၢ်ဘၣ်လၢ ပမၤအါထီၣ် ကစၢ်ယွၤအတၢ်မၤ ကသ့ဒံးလီၤ. အဃိ လၢတၢ်မၤလိအံၤအပူၤ ပကတဲသကိး ဘၣ်ဃးဒီး ပပာ်ဆိကစၢ်ယွၤအတၢ်မၤလၢ နီၢ်ဂံၢ်တၢကသ့ဒ်လဲၣ်, ပအိၣ်မူယိယိဖိ ကသ့ဒ်လဲၣ် ဒီးပမၤဂ့ၤထီၣ် ပတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ် ဒီးတၢ်သိၣ်လိနဲၣ်လိတၢ်အဂီၢ် ကသ့ဒ်လဲၣ်. အဆိကတၢၢ်န့ၣ် ပကတဲသကိး ဘၣ်ဃးဒီး ပမၤကစၢ်ယွၤအတၢ်မၤ လၢအဂ့ၤကတၢၢ်န့ၣ် အခီပညီဒ်လဲၣ်.
၄. ပကဘၣ်မၤ ကစၢ်ယွၤအတၢ်မၤလၢ အဂ့ၤကတၢၢ်န့ၣ် အခီပညီဒ်လဲၣ်.
၄ ပကဘၣ်မၤကစၢ်ယွၤအတၢ်မၤ လၢအဂ့ၤကတၢၢ်န့ၣ် အဲၣ်ဒိးတဲဝဲ တသ့ဖဲအသ့ ပကဘၣ်စံၣ်တဲၤတဲလီၤတၢ် ဒီးသိၣ်လိနဲၣ်လိပှၤဂၤလီၤ. ဘၣ်ဆၣ် တအဲၣ်ဒိးတဲဝဲထဲ ပစံၣ်တဲၤတဲလီၤတၢ် အနၣ်ရံၣ် န့ၢ်အါထဲလဲၣ်န့ၣ်ဘၣ်. တၢ်လၢအရ့ဒိၣ်ကတၢၢ်န့ၣ်မ့ၢ်ဝဲ ယဟိဝၤယွၤအဲၣ်ဒိးလၢ ပကမၤအတၢ်မၤလၢသးဒီဖျၢၣ်, ခီဖျိလၢပအဲၣ်အီၤ ဒီးပအဲၣ်ပှၤလၢပဃၢၤအဃိလီၤ. * (မၢ်ကူး ၁၂:၃၀, ၃၁; ကလီးစဲ ၃:၂၃) ပမ့မ့ၢ်ပှၤလၢ အမၤကစၢ်ယွၤ အတၢ်မၤလၢပသးဒီဖျၢၣ်န့ၣ် ပကဟ့ၣ်လီၤပသး ဒီးပကသူပတၢ်ဂံၢ်တၢ်ဘါခဲလၢာ် လၢအတၢ်မၤအပူၤလီၤ. ပမ့ၢ်ပာ်လုၢ်ပာ်ပှ့ၤ တၢ်စံၣ်တဲၤတဲလီၤတၢ်မၤန့ၣ် တသ့ဖဲအသ့ ပကစံၣ်တဲၤတဲလီၤပှၤဂၤလၢ တၢ်သးခုကစီၣ်န့ၣ်လီၤ.
၅-၆. ပှၤလၢအတၢ်ဆၢကတီၢ် တအိၣ်အါအါဘၣ်တဖၣ်န့ၣ် ပာ်ဆိကစၢ်ယွၤအတၢ်မၤကသ့ဒ်လဲၣ်. ဟ့ၣ်တၢ်အဒိတက့ၢ်.
၅ ဆိကမိၣ်ကွၢ် ပှၤသးစၢ်တဂၤလၢ အဒ့တၢ်ဒ့ မုာ်တဂၤန့ၣ်တက့ၢ်. ဖဲအဝဲချုးတဘျီဂ့ၤတဘျီဂ့ၤန့ၣ် အဝဲဒ့တၢ်ဒ့လီၤ. လၢခံ အဝဲန့ၢ်ဘၣ်တၢ်မၤလၢ ကလဲၤဒ့တၢ်လၢကျး ဖဲမုၢ်ဃုနံၤဒီးအိၣ်ဘှံးနံၤလီၤ. ဘၣ်ဆၣ် စ့လၢအမၤန့ၢ်ဝဲတဖၣ်န့ၣ် တလၢလၢအဂီၢ်ဘၣ်အဃိ အဝဲလဲၤမၤတၢ်လၢ ပှၤဆါတၢ်ပှ့ၤတၢ်အလီၢ် ဒ်ပှၤဆါတၢ်ဖိတဂၤအသိး, စးထီၣ်လၢ မုၢ်တနံၤ တုၤလၢမုၢ်ယဲၢ်နံၤလီၤ. အဝဲဘၣ်ဟ့ၣ်တၢ်ဆၢကတီၢ်လၢ ပှၤဆါတၢ်အတၢ်မၤအပူၤ အါဘၣ်ဆၣ် အသးအိၣ်လၢ တၢ်ဒ့တၢ်အူတခီလီၤ. အဝဲအဲၣ်ဒိးမၤဂ့ၤထီၣ် အတၢ်သ့တၢ်ဘၣ် ဒီးအဲၣ်ဒိးမၤဝဲ ပှၤဒ့တၢ်အတၢ်မၤလၢ ဆၢကတီၢ်လၢပှဲၤလီၤ. အဃိ တသ့ဖဲအသ့ အဝဲဃုဝဲတၢ်ခွဲးတၢ်ယာ် ဒ်သိးကဒ့တၢ်အဂီၢ်လီၤ.
၆ ဒ်န့ၣ်အသိး ပဝဲသ့ၣ်တဖၣ်န့ၣ် ပအဲၣ်ဒိး စံၣ်တဲၤတဲလီၤတၢ်အါမး ဘၣ်ဆၣ် ပတၢ်ဆၢကတီၢ် တအိၣ်အါအါဘၣ်. ဘၣ်ဆၣ် လၢတၢ်သးခုကစီၣ်တၢ်မၤအပူၤ ပအဲၣ်ဒိး ဂုာ်ကျဲးစၢး မၤဂ့ၤထီၣ်ပတၢ်သ့တၢ်ဘၣ် ဒ်သိးပတၢ်ကစီၣ် ကထုးန့ၢ်ပှၤသးအဂီၢ်လီၤ. ဘၣ်ဆၣ် တၢ်လၢပကဘၣ်မၤအီၤန့ၣ် အိၣ်ဝဲအါမးအဃိ ပကဆိကမိၣ်ဘၣ်လၢ ပပာ်ဆိ တၢ်စံၣ်တဲၤတဲလီၤတၢ်မၤလၢ ပတၢ်အိၣ်မူအပူၤ ကသ့ဒ်လဲၣ်န့ၣ်လီၤ.
နပာ်ဆိ ကစၢ်ယွၤအတၢ်မၤ ကသ့ဒ်လဲၣ်
၇-၈. ဘၣ်ဃးဒီး တၢ်မၤကစၢ်ယွၤအတၢ်မၤန့ၣ် ပကွၢ်လိမၤဒိး ယ့ၣ်ၡူးကသ့ဒ်လဲၣ်.
၇ ဘၣ်ဃးဒီး တၢ်စံၣ်တဲၤတဲလီၤတၢ်မၤန့ၣ် ယ့ၣ်ၡူးပာ်လီၤဝဲ တၢ်အဒိအတဲာ်လၢ အဂ့ၤဒိၣ်မးလီၤ. တၢ်စံၣ်တဲၤတဲလီၤ ကစၢ်ယွၤအဘီအမုၢ်အဂ့ၢ်န့ၣ် မ့ၢ်တၢ်လၢအရ့ဒိၣ်ကတၢၢ် လၢယ့ၣ်ၡူးအတၢ်အိၣ်မူအပူၤလီၤ. (ယိၤဟၣ် ၄:၃၄, ၃၅) ဒ်သိးယ့ၣ်ၡူးကစံၣ်တဲၤတဲလီၤဘၣ် ပှၤအါဂၤအဂီၢ် အဝဲလဲၤတၢ် အမံးလာ်လၢအကယၤတဖၣ်လီၤ. လၢဟံၣ်မ့ၢ်ဂ့ၤ လၢကျဲပူၤမ့ၢ်ဂ့ၤ အဝဲဟံးန့ၢ်တၢ်ခွဲးတၢ်ယာ် ကိးမံၤဒဲး ဒ်သိးအကတဲတၢ်ဒီးပှၤဂၤအဂီၢ်လီၤ. လၢယ့ၣ်ၡူးအတၢ်အိၣ်မူအပူၤ တၢ်ကိးမံၤဒဲးလၢအမၤဝဲန့ၣ် ဘၣ်ထွဲလိာ်အသးဒီး ကစၢ်ယွၤအတၢ်မၤလီၤ.
၈ ပကွၢ်လိမၤဒိး ယ့ၣ်ၡူးခရံာ်သ့ခီဖျိ တသ့ဖဲအသ့ ပဃုတၢ်ခွဲးတၢ်ယာ်လၢ ပကစံၣ်တဲၤတဲလီၤတၢ် လၢတၢ်လီၢ်ကိးပူၤဒဲး ဒီးတၢ်ဆၢကတီၢ် ကိးကတီၢ်ဒဲးလီၤ. ပသးအိၣ်တူၢ်ဆါပသးလၢ တၢ်သးခုကစီၣ်တၢ်မၤ အဂီၢ်လီၤ. (မၢ်ကူး ၆:၃၁-၃၄; ၁ ပ့းတရူး ၂:၂၁) ပဒီပုၢ်ဝဲၢ်တနီၤန့ၣ် မၤပှၤလဲၤလၢညါလီၤဆီ, ပှၤလဲၤလၢညါ မ့တမ့ၢ် ပှၤလဲၤလၢညါမၤစၢၤတၢ်လီၤ. ဒီးအဂၤတနီၤန့ၣ် မၤလိကျိာ်လၢအသီ မ့တမ့ၢ် လဲၤသုးလီၢ်သုးကျဲဆူ တၢ်လီၢ်လၢပှၤလိၣ်ဘၣ် ပှၤစံၣ်တဲၤတဲလီၤတၢ်ဖိတဖၣ်န့ၣ်လီၤ. ဘၣ်ဆၣ် တၢ်သးခုကစီၣ်တၢ်မၤ အါတက့ၢ်န့ၣ် ကဲထီၣ်လိၣ်ထီၣ်ဝဲ ခီဖျိလၢ ပှၤစံၣ်တဲၤတဲလီၤတၢ်ယိယိဖိတဖၣ် စံၣ်တဲၤတဲလီၤတၢ်အဃိလီၤ. ဒ်လဲၣ်ဂ့ၤဒ်လဲၣ်ဂ့ၤ ဖဲပမၤ “ယွၤလၢအဘၣ်တၢ်ဆိၣ်ဂ့ၤ [“ယွၤလၢအသးခု,” NWT], အတၢ်သးခုအကစီၣ်အိၣ်ဒီးအလၤကပီၤ” တဂၤအတၢ်မၤအခါ ကစၢ်ယွၤအဲၣ်ဒိးလၢ ပကအိၣ်ဒီးတၢ်သးခုလီၤ. လၢတၢ်န့ၣ်အဃိ ယဟိဝၤယွၤ တဃ့ပှၤတၢ်အါန့ၢ်ဒံး တၢ်လၢပဟ့ၣ်အီၤသ့ဘၣ်.—၁ တံၤမသ့း ၁:၁၁; ၅ မိၤၡ့ ၃၀:၁၁.
၉. (က) စီၤပီလူး ဘၣ်မၤနီၢ်ခိအတၢ်ဖံးတၢ်မၤ သနာ်က့ အဝဲပာ်ဆိဝဲ တၢ်စံၣ်တဲၤတဲလီၤတၢ်မၤလၢ နီၣ်ဂံၢ်တၢဒ်လဲၣ်. (ခ) ဒ် မၤတၢ် ၂၈:၁၆, ၃၀, ၃၁ ပာ်ဖျါထီၣ်ဝဲအသိး ဘၣ်ဃးဒီးကစၢ်ယွၤအတၢ်မၤန့ၣ် စီၤပီလူးအိၣ်ဒီး တၢ်ပာ်သူၣ်ပာ်သးဒ်လဲၣ်.
၉ တၢ်မၢဖိပီလူး ပာ်လီၤဒိဂ့ၤတဲာ်ဘၣ် ခီဖျိအဝဲပာ်ဆိ ကစၢ်ယွၤအတၢ်မၤ လၢနီၣ်ဂံၢ်တၢလီၤ. ဖဲအဝဲလဲၤတၢ်လၢ မံးၡ့ၣ်နရ့ၣ်အတၢ်လဲၤ ခံဘျီတဘျီ ဒီးအိၣ်ဝဲလၢ ဝ့ၢ်ကရံၣ်သူးအခါ အစ့အိၣ်တ့ၢ်ထဲတစဲးဖိအဃိ တဘျီတခီၣ် ဘၣ်မၤဝဲ ပှၤဆးဒဲအတၢ်မၤလီၤ. ဘၣ်ဆၣ် စီၤပီလူးတထံၣ်ဝဲ ပှၤဆးဒဲအတၢ်မၤဒ် တၢ်မၤလၢအရ့ဒိၣ်ကတၢၢ်ဘၣ်. အဝဲမၤဝဲတၢ်မၤအံၤ ဒ်သိးကမၤစၢၤအီၤလၢ ကစၢ်ယွၤအတၢ်မၤအပူၤ ဒီးကစံၣ်တဲၤတဲလီၤ တၢ်သးခုကစီၣ်ဆူ ပှၤကရံၣ်သူးဖိတဖၣ်အအိၣ်အဂီၢ်လီၤ. အဝဲတအဲၣ်ဒိးလၢ ပှၤကရံၣ်သူးဖိတဖၣ် ကဟ့ၣ်အီၤတၢ် “အဘူးအလဲ” လၢအတၢ်လၢာ်ဘူၣ်လၢာ်စ့ၤအဂီၢ်ဘၣ်အဃိ အဝဲမၤဝဲတၢ်မၤအံၤလီၤ. (၂ ကရံၣ်သူး ၁၁:၇) စီၤပီလူး ဘၣ်မၤနီၢ်ခိအတၢ်ဖံးတၢ်မၤ သနာ်က့ အဝဲဆဲးပာ်ဆိဝဲ ကစၢ်ယွၤအတၢ်မၤလၢ နီၣ်ဂံၢ်တၢ ဒီးစံၣ်တဲၤတဲလီၤတၢ်လၢ မုၢ်အိၣ်ဘှံးနံၤ ကိးနံၤဒဲးလီၤ. ဒီးဖဲအဝဲအတၢ်အိၣ်သးတဖၣ် ဂ့ၤထီၣ်အခါအဝဲ အသးစၢၢ်ဆၢအါထီၣ် တၢ်စံၣ်တဲၤတဲလီၤတၢ်မၤ န့ၢ်ဝဲလီၤ. အဝဲ “အသးပှဲၤထီၣ်ဒီး တၢ်အကလုၢ်အကထါ, ဒီးအုၣ်အသးလၢယ့ၣ်ၡူးမ့ၢ်ခရံာ်, လၢပှၤယူဒၤဖိအမဲာ်ညါလီၤ.” (မၤတၢ် ၁၈:၃-၅; ၂ ကရံၣ်သူး ၁၁:၉) လၢခံန့ၣ် ဖဲစီၤပီလူးအိၣ်လၢ ဝ့ၢ်ရိမ့ၤအခါ အဝဲဘၣ်တၢ်ဖီၣ်ဃာ်အီၤ လၢအဟံၣ်ပူၤခံနံၣ်လီၤ. ဖဲန့ၣ်အဆၢကတီၢ် အဝဲစံၣ်တဲၤတဲလီၤဝဲ ပှၤလၢအဟဲအိၣ်သကိးအီၤတဖၣ် ဒီးကွဲးဝဲလံာ်ပရၢတဖၣ်လီၤ. (ဖး မၤတၢ် ၂၈:၁၆, ၃၀, ၃၁ တက့ၢ်.) စီၤပီလူး တပျဲဝဲလၢ တၢ်အဂၤတဖၣ် ကမၤတံာ်တာ်အီၤလၢ ကစၢ်ယွၤအတၢ်မၤ နီတမံၤဘၣ်. အဝဲကွဲးဝဲလၢ “ပအိၣ်ဒီးတၢ်မၤအံၤဒီး, . . . ပတလီၤဘှံးဘၣ်” လီၤ. (၂ ကရံၣ်သူး ၄:၁) ဒ်စီၤပီလူးအသိး ပဝဲသ့ၣ်တဖၣ်န့ၣ် ပဘၣ်မၤနီၢ်ခိအတၢ်ဖံးတၢ်မၤသနာ်က့ ပပာ်ဆိဘီမုၢ်အတၢ်မၤလၢ နီၣ်ဂံၢ်တၢသ့လီၤ.
ပမၤကစၢ်ယွၤအတၢ်မၤ လၢအဂ့ၤကတၢၢ် သ့လၢကျဲအါဘိ (ကွၢ်လံာ်အဆၢ ၁၀-၁၁)
၁၀-၁၁. ပတၢ်အိၣ်ဆူၣ်အိၣ်ချ့ မ့ၢ်တဂ့ၤဘၣ်သနာ်က့ ပမၤကစၢ်ယွၤအတၢ်မၤ လၢအဂ့ၤကတၢၢ် ကသ့ဒ်လဲၣ်.
၁၀ ခီဖျိလၢ ပသးပှၢ်ထီၣ် မ့တမ့ၢ် ပတၢ်အိၣ်ဆူၣ်အိၣ်ချ့တဂ့ၤဘၣ်အဃိ ပလဲၤတဟံၣ်ဘၣ်တဟံၣ် မ့ၢ်တကဲအါအါန့ၣ် ပစံၣ်တဲၤတဲလီၤတၢ်လၢ ကျဲအဂၤတဖၣ် သ့ဝဲလီၤ. ခရံာ်ဖိလၢ တၢ်မၢဖိအစိၤတဖၣ်န့ၣ် ဖဲအဝဲသ့ၣ်လဲၤလၢ တၢ်လီၢ်တပူၤဂ့ၤတပူၤဂ့ၤ အဝဲသ့ၣ် စံၣ်တဲၤတဲလီၤတၢ်လီၤ. အဝဲသ့ၣ်ဟံးန့ၢ် တၢ်ခွဲးတၢ်ယာ်ကိးမံၤဒဲး လၢကတဲဘၣ်ပှၤဂၤလၢ တၢ်မ့ၢ်တၢ်တီလီၤ. အဝဲသ့ၣ် စံၣ်တဲၤတဲလီၤတၢ်လၢ တၢ်ဆၢကတီၢ် ကိးကတီၢ်ဒဲး ဒီးတၢ်လီၢ်ကိးတီၤဒဲး ခီဖျိလဲၤဝဲ တဟံၣ်ဘၣ်တဟံၣ် မ့တမ့ၢ် တၢ်လီၢ်လၢ ပှၤအိၣ်အါအလီၢ်န့ၣ်လီၤ. (မၤတၢ် ၁၇:၁၇; ၂၀:၂၀) ပဟးမ့ၢ်တကဲအါအါဘၣ်န့ၣ် ပဆ့ၣ်နီၤလၢ ပှၤလဲၤထီၣ်က့ၤလီၤတၢ်အါအလီၢ် ဒီးပစံၣ်တဲၤတဲလီၤ အဝဲသ့ၣ် သ့ဝဲလီၤ. မ့တမ့ၢ်ဘၣ်န့ၣ် ပမၤတၢ်စံၣ်တဲၤတဲလီၤတၢ် တပူၤလၢ်လၢ်, စံၣ်တဲၤတဲလီၤတၢ်လၢ လီတဲစိ ဒီးကွဲးလံာ်ပရၢသ့ဝဲန့ၣ်လီၤ. ပှၤစံၣ်တဲၤတဲလီၤတၢ်ဖိလၢ အသးပှၢ် မ့တမ့ၢ် အတၢ်အိၣ်ဆူၣ်အိၣ်ချ့တဂ့ၤဘၣ်တဖၣ်န့ၣ် လဲၤလၢတဟံၣ်ဘၣ်တဟံၣ် တကဲအါအါဘၣ်သနာ်က့ ခီဖျိလၢ အစံၣ်တဲၤတဲလီၤတၢ်လၢ ကျဲဒ်အံၤတဖၣ်အဃိ အဝဲသ့ၣ်ဒိးန့ၢ်ဘၣ်ဝဲ တၢ်သးခုအါမးလီၤ.
၁၁ ပတၢ်အိၣ်ဆူၣ်အိၣ်ချ့ မ့ၢ်တဂ့ၤဘၣ် သနာ်က့ ပမၤကစၢ်ယွၤအတၢ်မၤလၢ အဂ့ၤကတၢၢ်သ့လီၤ. ဆိကမိၣ်ကွၢ်ကဒီး တၢ်မၢဖိပီလူးအဂ့ၢ်တက့ၢ်. အဝဲတဲဝဲလၢ “ယမၤတၢ်ခဲလၢာ်သ့လၢ ပှၤလၢအဒုးဆူၣ်ထီၣ် ယဂံၢ်ယဘါတဂၤအပူၤလီၤ.” (ဖံလံးပံၤ ၄:၁၃) ဘၣ်တဘျီဖဲ တၢ်မၢဖိပီလူးလဲၤတၢ်လၢ မံးၡ့ၣ်နရ့ၣ် အတၢ်လဲၤအခါ အဝဲဆိးက့အဃိ အလိၣ်ဘၣ်တၢ်ဂံၢ်တၢ်ဘါလီၤ. အဝဲတဲဘၣ် ပှၤကလၤတံဖိတဖၣ်လၢ “ယဖံးယညၣ်တအိၣ်ဆူၣ်ဘၣ်ဒီး, ယစံၣ်တဲၤတဲလီၤ တၢ်သးခုအကစီၣ် လၢသု” လီၤ. (ကလၤတံ ၄:၁၃) ဒ်န့ၣ်အသိး တဘျီတခီၣ်န့ၣ် ခီဖျိလၢ ပတၢ်အိၣ်ဆူၣ်အိၣ်ချ့တဂ့ၤဘၣ်အဃိ ပကဒိးန့ၢ်ဘၣ်တၢ်ခွဲးတၢ်ယာ်လၢ ပကစံၣ်တဲၤတဲလီၤဘၣ်ပှၤဂၤ ဒ်သိးဒီး ကသံၣ်သရၣ်, ပှၤကွၢ်ထွဲပှၤဆါ ဒီးပှၤအဂၤလၢ အကွၢ်ထွဲပှၤတဖၣ်လီၤ. အဝဲသ့ၣ်အါတက့ၢ်န့ၣ် ဖဲပှၤလဲၤစံၣ်တဲၤတဲလီၤတၢ်လၢ အဟံၣ်အခါ တအိၣ်လၢဟံၣ်ဘၣ်.
နပာ်နတၢ်အိၣ်မူယိယိဖိ ကသ့ဒ်လဲၣ်
၁၂. ယ့ၣ်ၡူးတဲဝဲ ပမဲာ်ကဘၣ် “ဆး” န့ၣ်အဲၣ်ဒိးတဲဝဲတၢ်မနုၤလဲၣ်.
၁၂ ယ့ၣ်ၡူးတဲဝဲလၢ “ပနီၢ်ခိအမ့ၣ်အူဒၢအံၤ မ့ၢ်ပမဲာ်လီၤ. မၤသးဒ်န့ၣ်ဒီး နမဲာ်မ့ၢ်ဆးဒီး, နနီၢ်ခိကအိၣ်ဒီးတၢ်ကပီၤဒီဂၤညါလီၤ.” (မးသဲ ၆:၂၂) အဝဲအဲၣ်ဒိးတဲဝဲတၢ်မနုၤလဲၣ်. အဲၣ်ဒိးတဲဝဲလၢ ပကဘၣ် ပာ်ပတၢ်အိၣ်မူယိယိဖိ, မ့တမ့ၢ် သးစၢၢ်ဆၢထဲ ပဖီတၢၣ် မ့တမ့ၢ် ပတၢ်တိာ်ပာ် ထဲတခါဧိၤ ဒီးပသးတကဒံကဒါဘၣ်န့ၣ်လီၤ. ယ့ၣ်ၡူးပာ်လီၤဒိဂ့ၤတဲာ်ဘၣ် ခီဖျိအသးစၢၢ်ဆၢဝဲ ကစၢ်ယွၤအတၢ်မၤဒီး သိၣ်လိအပျဲၢ်အဘီၣ်တဖၣ်လၢ အဝဲသ့ၣ်ကဘၣ်သးစၢၢ်ဆၢ တၢ်မၤယဟိဝၤယွၤအတၢ်မၤ ဒီးဘီမုၢ်အတၢ်မၤ ထီဘိန့ၣ်လီၤ. ပကွၢ်လိမၤဒိးယ့ၣ်ၡူး ခီဖျိပပာ် ကစၢ်ယွၤတၢ်မၤ လၢနီၣ်ဂံၢ်တၢဒီး “ဃုဆိယွၤ အဘီအမုၢ်, ဒီး [ယွၤ] အတၢ်တီတၢ်လိၤ” လီၤ.—မးသဲ ၆:၃၃.
၁၃. တၢ်မနုၤကမၤစၢၤပှၤ ဒ်သိးပသးစၢၢ်ဆၢ ကစၢ်ယွၤအတၢ်မၤ ကန့ၢ်အဂီၢ်လဲၣ်.
၁၃ ကျဲတဘိလၢ ပသးစၢၢ်ဆၢကစၢ်ယွၤအတၢ်မၤသ့န့ၣ် မ့ၢ်ဝဲပပာ်ပတၢ်အိၣ်မူ ယိယိဖိလီၤ. ပမ့ၢ်မၤဒ်န့ၣ်န့ၣ် ပကအိၣ်ဒီး တၢ်ဆၢကတီၢ်အါမးလၢ ပကမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါထီၣ် ဒီးကအဲၣ်ယဟိဝၤယွၤအဂီၢ်လီၤ. * အဒိ ဒ်သိးပစံၣ်တဲၤတဲလီၤဘၣ်တၢ် အါန့ၢ်အလီၢ် ကသ့အဂီၢ် မ့ၢ်ပမၤစှၤလီၤပတၢ်ဆၢကတီၢ် လၢနီၢ်ခိအတၢ်ဖံးတၢ်မၤအဂီၢ် ကသ့ဧါ. မ့ၢ်ပသူစှၤလီၤတၢ်ဆၢကတီၢ်လၢ တၢ်မၤမုာ်မၤဖှံသးအဂီၢ် ကသ့ဧါ.
၁၄. ပှၤနီၢ်ဒီမါဝၤခံဂၤန့ၣ် ဒ်သိးအတၢ်ဆၢကတီၢ် ကအိၣ်အါထီၣ်လၢ ကစၢ်ယွၤအတၢ်မၤ ဒီးသးစၢၢ်ဆၢဝဲ တၢ်မၤအံၤကန့ၢ်အဂီၢ် အဝဲသ့ၣ် မၤဝဲတၢ်မနုၤလဲၣ်.
၁၄ တၢ်အိၣ်ဖှိၣ်သးပှၢ်လၢအမ့ၢ် အလဲယၢးစ်ဒီးအမါန့ၣ် မၤဝဲဒ်န့ၣ်လီၤ. အဝဲတဲဝဲလၢ “ပမၤပှၤလဲၤလၢညါ တန့ၢ်တဘျီဃီဘၣ်. ဘၣ်ဆၣ် ဒ်သိးပဟ့ၣ်တၢ်ဆၢကတီၢ်လၢ တၢ်စံၣ်တဲၤတဲလီၤတၢ်မၤ ကန့ၢ်အါထီၣ်အဂီၢ် တၢ်လၢပမၤသ့န့ၣ်အိၣ်ဝဲလီၤ. အဒိ ပသူစှၤလီၤစ့, သူစှၤလီၤတၢ်ဆၢကတီၢ်လၢ တၢ်မၤမုာ်မၤဖှံသးအဂီၢ် ဒီးတဲဘၣ်တၢ်မၤခိၣ်လၢ ကဆီတလဲန့ၢ်ပှၤ တၢ်မၤအဆၢကတီၢ်လီၤ. မ့ၢ်လၢပမၤဒ်အံၤအဃိ ပစံၣ်တဲၤတဲလီၤဘၣ်တၢ်လၢဟါခီ, ပပှၤမၤလိလံာ်စီဆှံဖိအါထီၣ် ဒီးပပၣ်ဃုာ်လၢ နွံဖးဖီတၢ်စံၣ်တဲၤတဲလီၤတၢ်မၤအပူၤ တလါခံဘျီ သ့ဝဲလီၤ. အဃိပသးခုဒိၣ်မးလီၤ.”
မၤဂ့ၤထီၣ် နတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ် ဒီးတၢ်သိၣ်လိနဲၣ်လိတၢ်အဂီၢ်
ပမ့ၢ်မၤထွဲ တၢ်လၢပမၤလိဘၣ်အီၤလၢ နွံဖးဖီတၢ်အိၣ်ဖှိၣ်အပူၤန့ၣ် ကမၤစၢၤပှၤဒ်သိး ပမၤကစၢ်ယွၤအတၢ်မၤ ကသ့အါထီၣ်အဂီၢ်လီၤ (ကွၢ်လံာ်အဆၢ ၁၅-၁၆) *
၁၅-၁၆. ဒ် ၁ တံၤမသ့း ၄:၁၃, ၁၅ ပာ်ဖျါထီၣ်ဝဲအသိး ပမၤဂ့ၤထီၣ် ပတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ်မၤအပူၤ ကသ့ဒ်လဲၣ်. (ကွၢ်တၢ်လွံၢ်နၢၣ်လၢအမ့ၢ် “ ဖီတၢၣ်တဖၣ်လၢ ကမၤစၢၤပှၤ ဒ်သိးပကမၤကစၢ်ယွၤအတၢ်မၤ လၢအဂ့ၤကတၢၢ်” တက့ၢ်.)
၁၅ ကျဲအဂၤတဘိလၢ ပမၤကစၢ်ယွၤအတၢ်မၤလၢ အဂ့ၤကတၢၢ်သ့န့ၣ် မ့ၢ်ဝဲပမၤဂ့ၤထီၣ် ပတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ်မၤအပူၤန့ၣ်လီၤ. တၢ်မၤတနီၤန့ၣ် ဒ်သိးပမၤအီၤကသ့ဂ့ၤဂ့ၤ ဒီးပတၢ်သ့ၣ်ညါနၢ်ပၢၢ်ကအါထီၣ်အဂီၢ် ပကဘၣ်ကၠီးလိသးထီဘိလီၤ. ဘၣ်ဃးဒီး တၢ်စံၣ်တဲၤတဲလီၤတၢ်မၤစ့ၢ်ကီး ဒ်န့ၣ်အသိးလီၤ. ဒ်သိးပတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ်မၤအပူၤ ကအါထီၣ်အဂီၢ် ပကဘၣ်ဆဲးမၤလိပသးထီဘိလီၤ.—ကတိၤဒိ ၁:၅; ဖး ၁ တံၤမသ့း ၄:၁၃, ၁၅ တက့ၢ်.
၁၆ ပဆဲးမၤဂ့ၤထီၣ် ပတၢ်စံၣ်တဲၤတဲလီၤတၢ် ကသ့ဒ်လဲၣ်. ပကဘၣ်မၤထွဲ တၢ်ဟံးစုနဲၣ်ကျဲလၢ ပဒိးန့ၢ်ဘၣ်အီၤဖဲ ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိလီၤ. တၢ်အိၣ်ဖှိၣ်အံၤ မၤစၢၤပှၤဒ်သိး ပမၤအါထီၣ် ပတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ်မၤအပူၤ ကသ့အဂီၢ်န့ၣ်လီၤ. တကးဒံးဘၣ် ဖဲပှၤဖီၣ်ကၠိဖိအမူဒါတဂၤ ဟ့ၣ်ကူၣ်ဝဲ ပှၤလၢအလဲၤမၤကၠိဖိအမူဒါအခါ ပဟံးန့ၢ်တၢ်မၤလိလၢ ပတၢ်စံၣ်တဲၤတဲလီၤတၢ်မၤအဂီၢ် သ့ဝဲလီၤ. ဒီးလၢခံတဘျီ ဖဲပလဲၤစံၣ်တဲၤတဲလီၤတၢ်အခါ ပမၤထွဲဒ် အတၢ်ဟ့ၣ်ကူၣ်အသိးသ့လီၤ. ပဃ့တၢ်မၤစၢၤလၢ တၢ်စံၣ်တဲၤတဲလီၤတၢ် ကရူၢ်အပှၤကွၢ်တၢ်အအိၣ် မ့တမ့ၢ် ပဟးစံၣ်တဲၤတဲလီၤတၢ်ဒီးအီၤ မ့တမ့ၢ် ပဟးစံၣ်တဲၤတဲလီၤတၢ်ဒီး ပှၤစံၣ်တဲၤတဲလီၤတၢ်ဖိလၢ အတၢ်လဲၤခီဖျိအါ, ပှၤလဲၤလၢညါ မ့တမ့ၢ် ကဝီၤအပှၤကွၢ်တၢ်သ့လီၤ. ဒီးပသူ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် မ့ၢ်သ့ဂ့ၤဂ့ၤန့ၣ် ပဟးစံၣ်တဲၤတဲလီၤတၢ် ဒီးသိၣ်လိတၢ် ကမုာ်ဒိၣ်ထီၣ်ဝဲလီၤ.
၁၇. နမ့ၢ်မၤ ကစၢ်ယွၤအတၢ်မၤ လၢအဂ့ၤကတၢၢ်န့ၣ် နကတူၢ်ဘၣ်ဒ်လဲၣ်.
၁၇ ယဟိဝၤယွၤ ဟ့ၣ်ပှၤအခွဲးလၢ ပကကဲဘၣ် “အပှၤမၤသကိးတၢ်” အဃိမ့ၢ် တၢ်ခွဲးတၢ်ယာ်လၢ အလီၤဆီဒိၣ်မးတခါလီၤ. (၁ ကရံၣ်သူး ၃:၉) ဖဲန “နီၤဖး တၢ်လီၤဆီတဖၣ်အဆၢ” ဒီးသးစၢၢ်ဆၢလၢ ကစၢ်ယွၤတၢ်မၤအခါ နက “မၤယွၤအတၢ်ဒီးတၢ်သးခု” လီၤ. (ဖံလံးပံၤ ၁:၁၀; စံးထီၣ်ပတြၢၤ ၁၀၀:၂) ဒ်နမ့ၢ် ကစၢ်ယွၤအခ့အပှၤတဂၤအသိး နမ့ၢ်အိၣ်ဒီး တၢ်ကီတၢ်ခဲဒ်လဲၣ်ဂ့ၤဒ်လဲၣ်ဂ့ၤ နနာ်သ့သပှၢ်ကတၢၢ်လၢ ကစၢ်ယွၤ ကဟ့ၣ်နၤတၢ်ဂံၢ်တၢ်ဘါ ဒ်သိးနမၤအတၢ်မၤလၢ အဂ့ၤကတၢၢ် ကသ့အဂီၢ်န့ၣ်လီၤ. (၂ ကရံၣ်သူး ၄:၁, ၇; ၆:၄) ခီဖျိလၢနတၢ်အိၣ်သးအဃိ နစံၣ်တဲၤတဲလီၤတၢ် န့ၢ်အါမ့ၢ်ဂ့ၤ စှၤမ့ၢ်ဂ့ၤ နမ့ၢ်မၤကစၢ်ယွၤတၢ်မၤ လၢသးဒီးဖျၢၣ်န့ၣ်န “အိၣ်ဒီးတၢ်သးခု” သ့လီၤ. (ကလၤတံ ၆:၄) ဒီးနမ့ၢ်မၤကစၢ်ယွၤအတၢ်မၤ လၢအဂ့ၤကတၢၢ်န့ၣ် မ့ၢ်ဒၣ်နပာ်ဖျါထီၣ်လၢ နအဲၣ်ယဟိဝၤယွၤ ဒီးဒီပုၢ်ဝဲၢ်မုၣ်ခွါတဖၣ်လီၤ. ဒီး “နကအုၣ်က့ၤခီၣ်က့ၤနသးဒၣ်နဲ, ဒီးပှၤလၢအနၢ်ဟူတၢ်လၢနၤတဖၣ်လီၤ.”—၁ တံၤမသ့း ၄:၁၆.
တၢ်သးဝံၣ် ၅၈ ဃုတၢ်ဃူတၢ်ဖိး အတံၤသကိးတဖၣ်
^ လံာ်အဆၢ. 5 ယ့ၣ်ၡူးဟ့ၣ်လီၤပှၤမူဒါလၢ ပကစံၣ်တဲၤတဲလီၤ ဘီမုၢ်အတၢ်သးခုကစီၣ် ဒီးလဲၤဒုးကဲထီၣ်ပှၤဂၤလၢ အပျဲၢ်အဘီၣ်လီၤ. လၢတၢ်မၤလိအံၤအပူၤ ပကတဲသကိး တၢ်ဂ့ၢ်လၢဘၣ်ဃးဒီး ပမ့ၢ်အိၣ်ဒီးတၢ်ကီတၢ်ခဲအါမး သနာ်က့ ပမၤကစၢ်ယွၤအတၢ်မၤ လၢအဂ့ၤကတၢၢ် ကသ့ဒ်လဲၣ်. ပကဲထီၣ် ပှၤစံၣ်တဲၤတဲလီၤတၢ်ဖိ လၢအဂ့ၤန့ၢ်အလီၢ် ဒီးဒိးန့ၢ်ဘၣ် တၢ်သးခုအါန့ၢ်အလီၢ် ကသ့ဒ်လဲၣ်န့ၣ်လီၤ.
^ လံာ်အဆၢ. 4 တၢ်ကတိၤအခီပညီ– ပမၤကစၢ်ယွၤအတၢ်မၤ သ့လၢကျဲအါဘိလီၤ. တၢ်မၤတဖၣ်အံၤန့ၣ် ပၣ်ဃုာ်ဒီး တၢ်စံၣ်တဲၤတဲလီၤတၢ်, တၢ်သိၣ်လိနဲၣ်လိတၢ်, တၢ်သူၣ်ထီၣ်ဘှီထီၣ်တၢ်, တၢ်ကွၢ်ထွဲဘှီဂ့ၤထီၣ်က့ၤ တၢ်ကရၢကရိ အတၢ်သူၣ်ထီၣ်တဖၣ် ဒီးတၢ်မၤစၢၤ ပှၤလၢအတူၢ်ဘၣ် န့ဆၢၣ်အတၢ်ဘၣ်ဒိဘၣ်ထံးတဖၣ်န့ၣ်လီၤ.—၂ ကရံၣ်သူး ၅:၁၈, ၁၉; ၈:၄.
^ လံာ်အဆၢ. 13 ကွၢ်ကျဲနွံဘိလၢ “နပာ်နတၢ်အိၣ်မူယိယိဖိ ကသ့ဒ်လဲၣ်” ဖဲ တၢးထီခိးတၢ် လါယူၤလံ ၂၀၁၆, ကဘျံးပၤ ၁၂, တၢ်လွံၢ်နၢၣ်အပူၤတက့ၢ်.
^ လံာ်အဆၢ. 62 တၢ်တဲဖျါထီၣ်တၢ်ဂီၤ အခီပညီ– ဖဲနွံဖးဖီတၢ်အိၣ်ဖှိၣ်အပူၤ ဒီပုၢ်ဝဲၢ်မုၣ်တဂၤ မၤဝဲကၠိဖိအမူဒါလၢအမ့ၢ် တၢ်က့ၤကဒါက့ၤလီၤ. ဒီးလၢခံ ဖဲပှၤဖီၣ်ကၠိဖိအမူဒါ ဟ့ၣ်ကူၣ်တၢ်အခါ အဝဲကွဲးနီၣ်ဃာ်ဝဲလၢ တၢ်သိၣ်လိ အလံာ်ပူၤလီၤ. ဒီးဖဲအဝဲဟးစံၣ်တဲၤတဲလီၤတၢ် ဖဲမုၢ်ဃုနံၤအိၣ်ဘှံးနံၤအခါ အဝဲမၤထွဲဝဲဒ် တၢ်လၢအမၤလိဘၣ်ဝဲလၢ တၢ်အိၣ်ဖှိၣ်အပူၤလီၤ.
