နတၢ်အိၣ်မူလၢခါဆူညါန့ၣ် ဒိးသန့ၤထီၣ်အသးလၢ တၢ်မနုၤလဲၣ်
ပှၤအါတက့ၢ် နာ်ဝဲလၢ အဝဲသ့ၣ် အတၢ်အိၣ်မူန့ၣ် ဒိးသန့ၤထီၣ်အသးလၢ တၢ်ဟဲဝံ. ခီဖျိလၢ အဝဲသ့ၣ် နာ်ဝဲဒ်န့ၣ်အဃိ အဝဲသ့ၣ် လဲၤဒွးတၢ်ကၢ်တၢ် ဒ်သိးကမၤန့ၢ်အီၣ်ထီၣ်အဂီၢ်.
တၢ်လၢပှၤအါဂၤနာ်ဝဲ
တၢ်ဒွးဆၣ်ဧိၤဖီဧိၤ– ပှၤတနီၤ နာ်ဝဲလၢ ဖဲအဝဲသ့ၣ် အိၣ်ဖျဲၣ်ထီၣ်အခါ ဆၣ်အိၣ်ရဲၣ်လီၤအသး ဒ်လဲၣ်ဒ်လဲၣ်န့ၣ် ပာ်ဖျါထီၣ်န့ၢ်အီၤ အတၢ်အိၣ်မူလၢခါဆူညါ. အဃိ အဝဲသ့ၣ် လဲၤဒွးတၢ် ဒ်သိးကသ့ၣ်ညါဘၣ် အတၢ်အိၣ်မူလၢ ခါဆူညါအဂ့ၢ် ဒီးဒ်သိး ကမၤတၢ်ဆၢတဲာ်လၢ အဘၣ်ကသ့.
တၢ်ဘ့ၣ်ဘၣ်လၢ ပှၤဒွးတၢ်ကၢ်တၢ်အဂီၢ်– ပှၤအဂၤတနီၤန့ၣ် နာ်ဝဲလၢ အဝဲသ့ၣ် မ့ၢ်တ့ထီၣ်အဟံၣ် ဒ်အံၤဒ်နုၤန့ၣ် အဝဲသ့ၣ် အတၢ်ဖံးအီၣ်မၤအီၣ် ကလဲၤထီၣ်လဲၤထီ. အဒိ ပှၤပိာ်ခွါတဂၤလၢ အမံၤမ့ၢ်လိဝ့ * လၢအအိၣ်လၢ ဟီၣ်ကီၣ်န့ၣ် တဲဝဲလၢ “ပှၤဒွးတၢ်ကၢ်တၢ်သရၣ်တဂၤ တဲယၤလၢ ယမ့ၢ်ပာ်လီၤ လၢၢ်လီၤလီၤဆီဆီတဖျၢၣ် လၢယဆါတၢ်အလီၢ်န့ၣ် ကမၤစၢၤယၤဒ်သိး ယဆါတၢ်ကန့ၢ်အါအါ.”
တၢ်ဘူၣ်ထီၣ်ဘါထီၣ် မိၢ်ပၢ်ဖံဖုလၢ အသံတ့ၢ်တဖၣ်– ပှၤအဂၤတနီၤန့ၣ် နာ်ဝဲလၢ ဒ်သိးအဝဲသ့ၣ် ကဒိးန့ၢ်ဘၣ် တၢ်ဒီသဒၢ ဒီးတၢ်ဆိၣ်ဂ့ၤအဂီၢ် အဝဲသ့ၣ် ဘၣ်ဘူၣ်ထီၣ်ဘါထီၣ် အမိၢ်ပၢ်ဖံဖုလၢ အသံတ့ၢ်တဖၣ် မ့တမ့ၢ် ကစၢ်ထူကစၢ်ယွၤတဖၣ်. အဒိ ပှၤပိာ်မုၣ်တဂၤလၢ အမံၤမ့ၢ်ဘဲ လၢအအိၣ်လၢ ဘံၤယဲနၤန့ၣ် တဲဝဲလၢ “ယနာ်လၢ ယမ့ၢ်မၤလၤကပီၤ ယမိၢ်ပၢ်ဖံဖုလၢ အသံတ့ၢ်တဖၣ်န့ၣ် ယတၢ်အိၣ်မူခဲအံၤ ကဘီၣ်ထီၣ်ညီထီၣ် ဒီးပဟံၣ်ဖိဃီဖိ အတၢ်အိၣ်မူခါဆူညါန့ၣ် တၢ်ဘၣ်ယိၣ်တအိၣ်ဘၣ်.”
ပှၤသံဟဲကတၢထီၣ်က့ၤ– ပှၤအါဂၤ နာ်ဝဲလၢ ဖဲပှၤတဂၤသံအခါ အဟဲကတၢထီၣ်က့ၤ တဃၣ်ဝံၤတဃၣ်. ဒီးအဝဲသ့ၣ် နာ်ဝဲလၢ အတၢ်အိၣ်မူခဲအံၤန့ၣ် အထံၣ်ဘၣ်တၢ်ဂ့ၤဧါ တၢ်အၢဧါန့ၣ် ဒိးသန့ၤထီၣ်အသးလၢ တၢ်လၢအဝဲသ့ၣ် မၤတ့ၢ်ဝဲလၢအပူၤကွံာ်တဃၣ်.
ပှၤအါဂၤ တဲဝဲလၢ အဝဲသ့ၣ် တနာ်တၢ်သ့ၣ်တဖၣ်အံၤဘၣ် သနာ်က့ အဝဲသ့ၣ် လဲၤကွၢ်စုတိၤ, လဲၤကၢ်တၢ်ဒွးတၢ်, မၤတၢ်မၤကဒါမဲာ်, မၤတၢ်အူတၢ်သမူတၢ် ဒီးတၢ်လၢအဂၤတဖၣ်. အဝဲသ့ၣ် ဆိကမိၣ်ဝဲလၢ အမ့ၢ်လဲၤမၤ တၢ်သ့ၣ်တဖၣ်အံၤန့ၣ် အကသ့ၣ်ညါဘၣ်ဝဲ အတၢ်အိၣ်မူလၢခါဆူညါ ကမၤအသးဒ်လဲၣ်.
တၢ်လၢ အဝဲသ့ၣ်နာ်ဝဲန့ၣ် မၤစၢၤအဝဲသ့ၣ်ဧါ
ပှၤလၢအနာ် ဒီးမၤထွဲဝဲ တၢ်သ့ၣ်တဖၣ်အံၤန့ၣ် မ့ၢ်အဝဲသ့ၣ် အိၣ်ဘၣ်ဒီး တၢ်အိၣ်မူလၢ အဘီၣ်အညီ ဒီးအတလိၣ်ဘၣ်ယိၣ်တၢ်လၢ အတၢ်အိၣ်မူ လၢခါဆူညါအဂီၢ် လၢၤဘၣ်ဧါ.
ပကဆိကမိၣ်ကွၢ်သကိး ပှၤပိာ်ခွါတဂၤလၢ အမံၤမ့ၢ် ဟါဝူၤ လၢအအိၣ်လၢ ဘံၤယဲနၤန့ၣ် အတၢ်လဲၤခီဖျိ. ဟါဝူၤ ဒွးဆၣ်ဧိၤဖီဧိၤ, သူဝဲတၢ်ဘ့ၣ်ဘၣ်လၢ ပှၤဒွးတၢ်ကၢ်တၢ်အဂီၢ် ဒီးအဝဲဘူၣ်ထီၣ်ဘါထီၣ် အမိၢ်ပၢ်ဖံဖုလၢ အသံတ့ၢ်တဖၣ်. အမၤဝဲ တၢ်သ့ၣ်တဖၣ်အံၤ ဒ်သိး တၢ်သ့ၣ်တဖၣ်အံၤ ကဟံးစုနဲၣ်ကျဲအီၤအဂီၢ်. ဘၣ်ဆၣ် တၢ်သ့ၣ်တဖၣ်အံၤ မၤစၢၤအီၤဧါ. ဟါဝူၤ တဲဝဲလၢ “ယစ့ၡူကွံာ်ဒီဒူၣ်, ယကမၢ်ထီၣ်, ယဟံၣ်ဖိဃီဖိ တၢ်ဃူတၢ်ဖိးတအိၣ်ဘၣ်, ယသူၣ်ကိၢ်သးဂီၤတၢ် ဒီးသူၣ်ဟးဂီၤသးဟးဂီၤဖးဒိၣ်ညါ.”
ပှၤပိာ်ခွါတဂၤလၢ အမံၤမ့ၢ် ခၠီမ့ၤ လၢအအိၣ်လၢ ထဲၣ်ဝၣ်န့ၣ် နာ်စ့ၢ်ကီးဝဲ တၢ်ဒွးဆၣ်ဧိၤဖီဧိၤ, ပှၤသံဟဲကတၢထီၣ်က့ၤ, တၢ်ဟဲဝံ, တၢ်ဘ့ၣ်ဘၣ်လၢ ပှၤဒွးတၢ်ကၢ်တၢ်အဂီၢ် ဒီးတၢ်ဘူၣ်ထီဘါထီၣ် မိၢ်ပၢ်ဖံဖုလၢအသံတ့ၢ်တဖၣ်. ဘၣ်ဆၣ်လၢခံန့ၣ် အဝဲဃုသ့ၣ်ညါဝဲ တၢ်စူၢ်တၢ်နာ်တဖၣ်အံၤအဂ့ၢ် လီၤတံၢ်လီၤဆဲးဝံၤဒီး အတဲဝဲလၢ “ယသ့ၣ်ညါထီၣ်ဘၣ်လၢ တၢ်သိၣ်လိ ဒီးလုၢ်လၢ်တဖၣ်အံၤန့ၣ် တလီၤပလိာ်အသး နီတစဲးဘၣ်. အဘံဘူ ဒီးနၢ်ပၢၢ်အီၤ တညီနီတစဲးဘၣ်. ဒီးယသ့ၣ်ညါဘၣ်လၢ တၢ်ဒွးဆၣ်ဧိၤဖီဧိၤ အတၢ်စံးဆၢတဖၣ်န့ၣ် အါတက့ၢ် တဘၣ်ဘၣ်. မ့မ့ၢ်လၢ ပှၤသံဟဲကတၢထီၣ်က့ၤအဂ့ၢ်န့ၣ် ယနၢ်ပၢၢ်ထီၣ်ဘၣ်လၢ နတၢ်အိၣ်မူလၢ အပူၤကွံာ်တဃၣ် နတိၢ်နီၣ်မ့ၢ်တဘၣ်ဘၣ်န့ၣ် ဒ်သိးနတၢ်အိၣ်မူလၢခံတဃၣ် ကဂ့ၤထီၣ်အဂီၢ် နဆီတလဲနသးကသ့ဒ်လဲၣ်.”
“ယသ့ၣ်ညါထီၣ်ဘၣ်လၢ တၢ်သိၣ်လိ ဒီးလုၢ်လၢ်တဖၣ်အံၤန့ၣ် တလီၤပလိာ်အသး နီတစဲးဘၣ်. အဘံဘူ ဒီးနၢ်ပၢၢ်အီၤတညီ နီတစဲးဘၣ်.” —ခၠီမ့ၤ, ထဲၣ်ဝၣ်.
ဟါဝူၤ, ခၠီမ့ၤ ဒီးပှၤအဂၤတဖၣ် နၢ်ပၢၢ်ထီၣ်ဘၣ်ဝဲလၢ အတၢ်အိၣ်မူလၢ ခါဆူညါန့ၣ် တဒိးသန့ၤထီၣ်အသးလၢ တၢ်ဟဲဝံ, ဆၣ်ဧိၤဖီဧိၤ, မိၢ်ပၢ်ဖံဖုလၢ အသံတ့ၢ်တဖၣ် မ့တမ့ၢ် တၢ်အိၣ်မူလၢခံတဃၣ် အဖီခိၣ်ဘၣ်. မ့မ့ၢ်ဒ်န့ၣ်န့ၣ် ပတၢ်အိၣ်မူခါဆူညါ ကဂ့ၤထီၣ်အဂီၢ် ပမၤတၢ်သ့ တမံၤမံၤဒံးဧါ.
ပှၤအါဂၤဆိကမိၣ်ဝဲလၢ ဒ်သိးအဝဲသ့ၣ် ကအိၣ်ဘၣ်ဒီး တၢ်အိၣ်မူအဘီၣ်အညီ လၢခါဆူညါအဂီၢ်န့ၣ် ခဲအံၤအဝဲသ့ၣ် ကဘၣ်ဃုဝဲ တၢ်ကူၣ်ဘၣ်ကူၣ်သ့ ဒီးတၢ်ထူးတၢ်တီၤ. ဘၣ်ဆၣ် ပှၤလၢ အမၤဝဲဒ်န့ၣ်တဖၣ်န့ၣ် တၢ်ကဲထီၣ်အသးဒီး အဝဲသ့ၣ်ဒ်လဲၣ်.
^ လံာ်အဆၢ. 5 လၢလံာ်တဘ့ၣ်အံၤအပူၤ ပှၤမံၤတနီၤ ဘၣ်တၢ်ဆီတလဲအီၤ.
^ လံာ်အဆၢ. 16 တၢ်ကတိၤတထံၣ်အံၤန့ၣ် အအိၣ်လၢ လံာ်လၢပျၢၤ လၢအဟဲလၢ ကစၢ်ယွၤအအိၣ် ဖဲ ကလၤတံ ၆:၇. တၢ်ကတိၤတထံၣ်အံၤန့ၣ် အလီၤဂာ်ဒ်သိးဒီး တၢ်ကတိၤဒိလၢအမ့ၢ် “နမ့ၢ်သူၣ်လီၤတကွံထူၣ်န့ၣ် နကအီၣ်ဘၣ်တကွံသၣ်.”
You May Also Like
တၢးထီခိးတၢ်
တၢ်ဒွးဆၣ်ဧိၤဖီဧိၤ ဒီးပှၤဒွးတၢ်ဖိတဖၣ်န့ၣ် ဒုးသ့ၣ်ညါပှၤ တၢ်ကမၤအသးလၢ ခါဆူညါလီၤတံၢ်လီၤဆဲးကသ့ဧါ
ဘၣ်ဃးဒီး ပှၤဒွးတၢ်ဖိတဖၣ်န့ၣ် နနာ်န့ၢ်အဝဲသ့ၣ် ကသ့ဧါ.
တၢးထီခိးတၢ်
ဘၣ်ဃးဒီး တၢ်အိၣ်မူ ဒီးတၢ်သံန့ၣ် လံာ်စီဆှံတဲဝဲဒ်လဲၣ်
ပှၤဟီၣ်ခိၣ်ဖိအနီၢ်ခိမ့ၢ်သံန့ၣ် အကလၤအိၣ်ဒံးဧါ. ပအိၣ်ဒီးကလၤလၢ အသံတသ့ဘၣ်န့ၣ်ဧါ. ပှၤသံတဖၣ်လဲၤဖဲလဲၣ်.
