ပ​တဲသကိး​တ့ၢ် တၢ်ဂ့ၢ်​တဆီ​ဘၣ်​တဆီ ဒ်သိး​ပ​က​သ့ၣ်ညါ တၢ်​သံကွၢ်​လၢ​အမ့ၢ် ကစၢ်​ယွၤ​မ့ၢ်​မတၤ​လဲၣ်န့ၣ်​လီၤ. လၢတၢ်န့ၣ်​အဃိ ပ​သ့ၣ်ညါ​ထီၣ်ဘၣ်​လၢ လံာ်စီဆှံ​အ​ပူၤ​န့ၣ်​ ကစၢ်​ယွၤ​အ​မံၤ​မ့ၢ် ယဟိဝၤ ဒီး​အ​တၢ်ဂ့ၤ​တၢ်ဝါ​လၢ အ​ဒိၣ်ကတၢၢ်​တခါ​န့ၣ်​မ့ၢ်ဝဲ တၢ်အဲၣ်​တၢ်ကွံ​လီၤ. ပ​သ့ၣ်ညါ​ဘၣ်​စ့ၢ်ကီး တၢ်​လၢ​အဝဲ​မၤတ့ၢ်ဝဲ ဒီး​က​မၤဝဲ​လၢ​ခါဆူညါ လၢ​ပှၤ​ဟီၣ်ခိၣ်​ဖိ​အဂီၢ်​န့ၣ်​လီၤ. ကစၢ်​ယွၤ​အဂ့ၢ်​လၢ န​တ​သ့ၣ်ညါ​ဘၣ်​န့ၣ်​ အိၣ်ဒံး​အါမး​လီၤ. ဘၣ်ဆၣ်​ န​က​ဆိကမိၣ်​ဘၣ်​လၢ န​မ့ၢ်​သ့ၣ်ညါ​ကစၢ်​ယွၤ​အဂ့ၢ်​န့ၣ်​ က​ကဲဘျုး​လၢ​နဂီၢ်​ဒ်လဲၣ်.

ယဟိဝၤ​ယွၤ​အၢၣ်​ယ​လီၤ​ဝဲ​လၢ “န​မ့ၢ်​ဃု​အီၤ​ဒီး, န​က​ထံၣ်န့ၢ်​အီၤ​လီၤ.” (၁ ကွဲးနီၣ်​တၢ် ၂၈:၉) န​မ့ၢ်​ဃု​သ့ၣ်ညါ ကစၢ်​ယွၤ​န့ၣ်​န​က​ဒိးန့ၢ်​ဘၣ်​ တၢ်ဟ့ၣ်​အလုၢ်​ဒိၣ်​ပှ့ၤဒိၣ်​လၢ​အမ့ၢ် န​က​ကဲထီၣ်​ဘၣ်​ “အ​တံၤသကိး” ဘူးဘူး​တံၢ်တံၢ်​တဂၤ​လီၤ. (စံးထီၣ်​ပတြၢၤ ၂၅:၁၄, ခ့ခါစှီၤကျိာ်) န​မ့ၢ်​ကဲထီၣ်​ဘၣ်​ ကစၢ်​ယွၤ​အ​တံၤသကိး​န့ၣ်​ က​ကဲဘျုး​လၢ​နဂီၢ်​ဒ်လဲၣ်.

တၢ်သးခု​နီၢ်နီၢ်. ယဟိဝၤ​ယွၤ​န့ၣ်​ ဘၣ်​တၢ်​ပာ်ဖျါ​ထီၣ်​ အီၤ​လၢ အမ့ၢ် “တၢ်သးခု​ကစၢ်” န့ၣ်​လီၤ. (၁ တံၤမသ့း ၁:၁၁, NWT) န​မ့ၢ်​ကဲထီၣ်​ ကစၢ်​ယွၤ​အ​တံၤသကိး ဒီး​ကွၢ်လိမၤဒိး​အီၤ​န့ၣ်​ န​က​ဒိးန့ၢ်​ဘၣ်​တၢ်သးခု​နီၢ်နီၢ် ဒီး​က​ကဲဘျုး​လၢ န​တၢ်​ပာ်သူၣ်​ပာ်သး ဒီး​န​တၢ်ဖံး​တၢ်မၤ​တဖၣ်​အ​ဖီခိၣ်​လီၤ. (စံးထီၣ်​ပတြၢၤ ၃၃:၁၂) တကးဒံးဘၣ်​ ဒ်သိး​န​တၢ်အိၣ်မူ​က​ပှဲၤ​ဒီး တၢ်​သူၣ်ခု​သးခု​အဂီၢ်​န့ၣ်​ န​က​ဘၣ်​ဟးဆှဲး လုၢ်လၢ်​သ​ကဲး​ပ​ဝး လၢ​အ​တဂ့ၤ, န​က​ဘၣ်​မၤတၢ်​လၢ အ​က​မၤဂ့ၤ​ထီၣ်​ န​တၢ်​အိၣ်ဆူၣ်​အိၣ်ချ့ ဒီး​န​က​ဘၣ်​မၤဂ့ၤ​ထီၣ်​ န​တၢ်​ရ့လိာ်သး​ဒီး​ပှၤဂၤ​လီၤ. န​က​တူၢ်ဘၣ်​ ဒ်​ပှၤ​ကွဲး​ထါ​စံးထီၣ်​ပတြၢၤ​တဲဝဲ​လၢ “မ့မ့ၢ်​ယဲဒၣ်အံၤ ယ​သုးဘူး​ယ​သး​ဆူ​ယွၤ​အ​အိၣ်​န့ၣ်​ ဂ့ၤ​လၢ​ယ​ဂီၢ်​လီၤ.”—စံးထီၣ်​ပတြၢၤ ၇၃:၂၈.

ကဟုကယာ်​ဒီး​အံးထွဲ​ကွၢ်ထွဲ ပှၤ​တဂၤ​စုာ်စုာ်. ယဟိဝၤ​ယွၤ အၢၣ်လီၤ​အခ့အပှၤ​တဖၣ်​လၢ “ယ​က​ဟ့ၣ်ကူၣ်​နၤ​လၢ​ယ​မဲာ်​လီၤ.” (စံးထီၣ်​ပတြၢၤ ၃၂:၈) အဲၣ်ဒိးစံးဝဲ ယဟိဝၤ​ယွၤ က​ကဟုကယာ် ဒီး​အံးထွဲ​ကွၢ်ထွဲ အခ့အပှၤ​တဂၤ​စုာ်စုာ် အ​တၢ်လိၣ်ဘၣ်​လီၤ. (စံးထီၣ်​ပတြၢၤ ၁၃၉:၁, ၂) န​တၢ်​ရ့လိာ်သး​ဒီး​ယဟိဝၤ​ယွၤ မ့ၢ်​ဂ့ၤထီၣ်​န့ၣ်​ န​က​သ့ၣ်ညါ​ဘၣ်​လၢ အဝဲ​အိၣ်​ကတဲာ်​ကတီၤ​အသး​ထီဘိ​လၢ က​မၤစၢၤ​နၤ​အဂီၢ်​လီၤ.

တၢ်​မုၢ်လၢ် အဂ့ၤ​ကတၢၢ်​လၢ ခါဆူညါ​အဂီၢ်. ဆၢကတီၢ်​ခဲအံၤ ယဟိဝၤ​ယွၤ အဲၣ်ဒိး မၤစၢၤ​နၤ​လၢ န​ကအိၣ်​ဒီး တၢ်​သူၣ်ခု​သးခု ဒီး​တၢ်​သူၣ်မံ​သးမုာ် လၢ​န​တၢ်အိၣ်မူ​ပူၤ တကးဒံးဘၣ်​ အဝဲ​ဟ့ၣ်​နၤ တၢ်​မုၢ်လၢ်​အဂ့ၤ​ကတၢၢ် လၢ​ခါဆူညါ​အဂီၢ်​လီၤ. (ယၡါယၤ ၄၈:၁၇, ၁၈) လံာ်စီဆှံ​တဲဝဲ​လၢ “တၢ်မူ​အထူ​အယိာ်​န့ၣ်​ မ့ၢ်​တၢ်​သ့ၣ်ညါ​နၤ, ယွၤ​နီၢ်နီၢ်​တဂၤဃီ, ဒီး​ယ့ၣ်ၡူး​ခရံာ် လၢ​န​မၢလီၤ​အီၤ​န့ၣ်​လီၤ.” (ယိၤဟၣ်​ ၁၇:၃) ဖဲ​တၢ်​ဆၢကတီၢ်​လၢ အကီ​အခဲ​အတီၢ်ပူၤ တၢ်​မုၢ်လၢ်​လၢ ယဟိဝၤ​ဟ့ၣ်​ပှၤ​အံၤ က​မၤစၢၤ​ပှၤလၢ​ပ​က “အိၣ်ဂၢၢ်​ဆိးကျၢၤ” ဒ်​နီၣ်သက့ၤ​အသိး​လီၤ.—ဧ့ၤဘြံၤ ၆:၁၉.

တၢ်ဂ့ၢ်​တၢ်ကျိၤ​တဖၣ်​အံၤန့ၣ်​ မ့ၢ်ဒၣ်​တၢ်ဂ့ၢ်​အရ့ဒိၣ်​တနီၤ​လၢ ပ​က​သ့ၣ်ညါ​ထီၣ်​ ကစၢ်​ယွၤ ဒီး​ကဲထီၣ်​အ​တံၤသကိး​အဂီၢ်​လီၤ. န​မ့ၢ်​အဲၣ်ဒိး​သ့ၣ်ညါ​အါထီၣ်​န့ၣ်​ တဲသကိး​တၢ်​ဒီး ယဟိဝၤ​ပှၤအုၣ်​အသး​တဂၤဂၤ မ့တမ့ၢ် န​ဃု​သ့ၣ်ညါ​အါထီၣ်​ တၢ်ဂ့ၢ်​တၢ်ကျိၤ​လၢ jw.org/ksw သ့​စ့ၢ်ကီး​လီၤ.