၁ တၢ်ဟံးစုနဲၣ်ကျဲလၢ ပကဟးဆှဲး တၢ်ကီတၢ်ခဲ
လံာ်စီဆှံ အတၢ်ဟံးစုနဲၣ်ကျဲန့ၣ် ဟဲလၢကစၢ်ယွၤအိၣ်အဃိ “ဂ့ၤလၢသိၣ်တၢ်သီတၢ်အဂီၢ်, လၢသိၣ်ဃီၣ်တၢ်အဂီၢ်, လၢဃၣ်လိၤတၢ်အဂီၢ်” လီၤ. (၂ တံၤမသ့း ၃:၁၆) ခဲအံၤ ပကဆိကမိၣ်ကွၢ် လံာ်စီဆှံအတၢ်ဟံးစုနဲၣ်ကျဲတနီၤ လၢကမၤစၢၤပှၤဒ်သိး ပကဟးဆှဲးတၢ်ကီတၢ်ခဲ တချုးလၢအဟဲကဲထီၣ်သးဒီးပှၤန့ၣ်လီၤ.
တၢ်အီလုၣ်ကိသံး
ဒဲ(လ်)ဖံ လၢပတဲဖျါထီၣ်တ့ၢ်အဂ့ၢ်လၢအခီၣ်ထံးန့ၣ် အဝဲတူၢ်ဘၣ်ဝဲလၢ အတၢ်ကိၢ်တၢ်ဂီၤ အိၣ်အါမးအဃိ အဝဲအဲၣ်ဒိးအီသံး အါထီၣ်အါထီၣ်လီၤ. ဘၣ်ဃးဒီးတၢ်အီသံးန့ၣ် လံာ်စီဆှံတဲဝဲလၢ ပမ့ၢ်အီသံးတစဲးတမွဲးန့ၣ် တကမၣ်ဘၣ်. ဘၣ်ဆၣ် တဲကဒီးဝဲလၢပတဘၣ် “အိၣ်လၢပှၤအီလုၣ်ကိစပံးထံအကျါ” တဂ့ၤ. (ကတိၤဒိ ၂၃:၂၀) တၢ်အီလုၣ်ကိသံးန့ၣ် မၤဘၣ်ဒိ ပတၢ်အိၣ်ဆူၣ်အိၣ်ချ့သ့ဝဲ ဒီးဒုးအိၣ်ထီၣ် တၢ်အ့ၣ်လိာ်ဆိးက့ဒီးပှၤဂၤသ့ဝဲစ့ၢ်ကီးလီၤ. တကးဒံးဘၣ် ကိးနံၣ်ဒဲးန့ၣ် ပှၤလၢအကကွဲၢ်တဖၣ် ဘၣ်သံဝဲခီဖျိလၢ အဝဲသ့ၣ်အီလုၣ်ကိသံးအဃိန့ၣ်လီၤ. ဘၣ်ဆၣ် ပမ့ၢ်မၤပိာ်ထွဲ လံာ်စီဆှံ အတၢ်ဟံးစုနဲၣ်ကျဲန့ၣ် ပတထံၣ်ဘၣ် တၢ်ကီတၢ်ခဲသ့ၣ်တဖၣ်အံၤဘၣ်.
ဒဲ(လ်)ဖံ စ့ၢ်ကီး မၤထွဲဝဲတၢ်ဟံးစုနဲၣ်ကျဲတဖၣ်အံၤန့ၣ်လီၤ. အဝဲတဲလၢ– “ယနၢ်ပၢၢ်ထီၣ်လၢ တၢ်အီလုၣ်ကိသံးန့ၣ် တမၤလီၤမၢ်ကွံာ် ယတၢ်သူၣ်ကိၢ်သးဂီၤတဖၣ်ဘၣ်. ယမၤထွဲ လံာ်စီဆှံအတၢ်ဟ့ၣ်ကူၣ် ဖဲ ဖံလံးပံၤ ၄:၆, ၇, လၢအတဲဝဲလၢ– ‘သုတဘၣ်ယိၣ်တၢ်နီတမံၤတဂ့ၤ . . . ဘိးဘၣ်သ့ၣ်ညါယွၤလၢ သုတၢ်အဲၣ်ဒိးတဖၣ်န့ၣ်တက့ၢ်.’ အဃိ ကိးနၤဒဲးဖဲယတၢ်သူၣ်ကိၢ်သးဂီၤ ဟဲပၢၢ်ထီၣ်အခါန့ၣ် ယတဲဘၣ်ယဟိဝၤယွၤ လၢယတၢ်တူၢ်ဘၣ်ခဲလၢာ်လီၤ. ယတဲဘၣ်အီၤ ဘၣ်ဃးဒီး ယတၢ်သးဒိၣ်, တၢ်သူၣ်ဘၣ်ဒိသးဘၣ်ဒိ ဒီးတၢ်သးဟးဂီၤတဖၣ်အဂ့ၢ် ခဲလၢာ်လီၤ. ယဃ့ကညးကစၢ်ယွၤ ဒ်သိးအကမၤစၢၤယၤလၢ ယကအိၣ်ဒီး တၢ်ထံၣ်လၢအဂ့ၤအဂီၢ်န့ၣ်လီၤ. ဒီးဖဲမုၢ်ဆ့ၣ်ဝါထီၣ်အခါန့ၣ် ယဂုာ်ကျဲးစၢး သးပ့ၤနီၣ်ကွံာ် ယတၢ်တူၢ်ဘၣ်လၢ အတဂ့ၤတဖၣ်ခဲလၢာ်လီၤ. ခီဖျိ ယဃ့ထုကဖၣ်တၢ်လၢ ယဟိဝၤယွၤ အအိၣ်ထီဘိအဃိ မၤစၢၤယၤဒ်သိး ယကဆိကမိၣ်တၢ်လၢ အကမၤမုာ်ထီၣ်က့ၤယသးတဖၣ်, ဒီးယတဆိကမိၣ်တၢ်လၢ အကမၤဘၣ်ဒိယသးလၢၤဘၣ်. ခဲအံၤယဒိးန့ၢ်ဘၣ် တၢ်သူၣ်မံသးမုာ်လၢ အလုၢ်ဒိၣ်ပှ့ၤဒိၣ် ဒီးယတအဲၣ်ဒိးလၢ အကလီၤမၢ်နီတဘျီလၢၤဘၣ်. အဃိ ယဆၢတဲာ်လီၤယသးလၢ ယတအီသံးနီတဘျီလၢၤဘၣ်.
တၢ်မၤကမၣ်မုၣ်ကမၣ်ခွါ
တၢ်မၤကမၣ်မုၣ်ကမၣ်ခွါ ဒုးအိၣ်ထီၣ်ဝဲ တၢ်သးဟးဂီၤဒီး တၢ်ကီတၢ်ခဲအါမးလီၤ. ဘၣ်ဆၣ် လံာ်စီဆှံအတၢ်ဟံးစုနဲၣ်ကျဲ မၤစၢၤပှၤဒ်သိး ပကဟးဆှဲးတၢ်လၢ အကဆှၢပှၤဆူ တၢ်မၤကမၣ်မုၣ်ကမၣ်ခွါ ဒ်သိးဒီး တၢ်ဂဲၤလိာ်ကွဲတၢ်အဲၣ် လၢအတကြၢးတဘၣ် ဒီးတၢ်ဂီၤဘ့ၣ်ဆ့န့ၣ်လီၤ. ပိာ်ခွါသးစၢ် တဂၤလၢအမံၤမ့ၢ် စဲမၠိၤန့ၣ် တဲဝဲလၢ “တဘျီတခီၣ် ယကွၢ်ပိာ်မုၣ်တဂၤ တဂ့ၤဘၣ်သနာ်က့ ယသ့ၣ်ညါလၢ အဝဲကွၢ်ဂ့ၤယၤအဃိ ယဂဲၤလိာ်ကွဲတၢ်အဲၣ်ဒီးအီၤ မုာ်မး.” တဘျီတခီၣ် စဲမၠိၤ တဂဲၤလိာ်ကွဲတၢ်အဲၣ်သနာ်က့ ပှၤတဲဆါအီၤလၢ အဝဲဂဲၤလိာ်ကွဲတၢ်အဲၣ်ထီဘိအဃိ လၢခံန့ၣ် အဝဲဆၢတဲာ်လီၤအသးလၢ ကဂဲၤလိာ်ကွဲတၢ်အဲၣ် အနီၢ်ကီၢ်လီၤ. ဘၣ်ဆၣ် အသးလၢအသ့ၣ်ညါဒၣ်တၢ် မၤတံာ်တာ်အီၤလီၤ. ခဲအံၤအဝဲတဲဝဲလၢ “ယမၤဒ်န့ၣ် တဂ့ၤဘၣ်. ယတူၢ်ဘၣ်လၢ ယအဲၣ်လီၤထဲယသးလီၤ.”
စဲမၠိၤ ဖးဝဲတၢ်ဂ့ၢ်တဖၣ်လၢပှၤသးစၢ်အဂီၢ်လၢ jw.org ပှာ်ယဲၤသန့အပူၤ, ဒီးဆိကမိၣ်ထံဝဲ လံာ်စီဆှံအတၢ်ကတိၤဖဲ ကတိၤဒိ ၂၀:၁၁ လၢအတဲဝဲလၢ– “ဖိသၣ်ဒၣ်လဲာ်န့ၣ် အမၤတၢ်ကဆှီဧါ. အမၤတၢ်လိၤဧါန့ၣ် ပှၤသ့ၣ်ညါအီၤလၢ အမၤတၢ်လီၤ.” လံာ်စီဆှံတဆၢအံၤ ကဲထီၣ်တၢ်မၤစၢၤလၢအဂီၢ်ဒ်လဲၣ်. စဲမၠိၤ နၢ်ပၢၢ်ထီၣ်ဝဲလၢ တၢ်ဂဲၤလိာ်ကွဲတၢ်အဲၣ်န့ၣ် တမ့ၢ်တၢ်လၢအကြၢးဝဲဘၣ်ဝဲဘၣ်. ခဲအံၤအဝဲတဲဝဲလၢ– “ပှၤသးစၢ်တဖၣ်မ့ၢ်ဂဲၤလိာ်ကွဲတၢ်အဲၣ်တုၤဒၣ်လဲာ် ကဲထီၣ်လုၢ်လၢ်တခါလၢအဂီၢ်န့ၣ် ဖဲအဝဲဖျီသးအခါ အလုၢ်လၢ်အံၤ မၤဘၣ်ဒိအသးသမူတံၤသကိးသ့ဝဲလီၤ. အဃိ ယဆိကမိၣ်ထီၣ်လၢ ခါဆူညါ ယမ့ၢ်ထီၣ်ပှၢ် ဒီးယမါမ့ၢ်ထံၣ်လၢ ယဂဲၤလိာ်ကွဲတၢ်အဲၣ်ဒီး ပိာ်မုၣ်လၢအဂၤန့ၣ် မ့ၢ်ယမါကတူၢ်ဘၣ်ဝဲဒ်လဲၣ်န့ၣ်လီၤ. ဖဲန့ၣ် ယနၢ်ပၢၢ်ထီၣ်လၢ တၢ်ဂဲၤလိာ်ကွဲတၢ်အဲၣ်န့ၣ် ပမၤအီၤညီဘၣ်ဆၣ် အမၤဘၣ်ဒိပှၤဂၤအသးသ့ဝဲလီၤ.” စဲမၠိၤ ဆီတလဲအတၢ်အိၣ်မူ ဒီးဟးဆှဲးဝဲတၢ်ဂဲၤလိာ်ကွဲတၢ်အဲၣ်လီၤ. ခီဖျိလၢ အမၤဝဲဒ်န့ၣ်အဃိ ကဲထီၣ်တၢ်မၤစၢၤလၢ အကဟးဆှဲးဝဲ တၢ်မၤကမၣ်မုၣ်ကမၣ်ခွါန့ၣ်လီၤ.
မ့မ့ၢ် အဲထိနံယိၤ န့ၣ်ခီဖျိလၢ အဝဲကွၢ်ဝဲတၢ်ဂီၤဘ့ၣ်ဆ့ထီဘိအဃိ ကဲထီၣ်တၢ်လီၤဘၣ်ယိၣ်ဖးဒိၣ်လၢ ကမၤကမၣ်မုၣ်ကမၣ်ခွါအဂီၢ်လီၤ. အဝဲအဲၣ်အမါဒိၣ်မးသနာ်က့ အကွၢ်ဒံးဝဲတၢ်ဂီၤဘ့ၣ်ဆ့ တဘျီဝံၤတဘျီလီၤ. ဘၣ်ဆၣ် အဝဲတဲဝဲလၢ ၁ ပ့းတရူး ၅:၈ န့ၣ် ကဲထီၣ်တၢ်မၤစၢၤလၢအဂီၢ်ဒိၣ်မးလီၤ. လံာ်စီဆှံတဆၢအံၤတဲဝဲလၢ– “ကီၤသုသးတက့ၢ်. ဆိးသီတက့ၢ်. အဂ့ၢ်ဒ်အံၤ, ဒ်ခ့ယုၢ်ကညီၤရုၢ်ရုၢ်အသိးန့ၣ်, သုဒုၣ်သုဒါမုၣ်ကီၤလံၢ် ဟးဝ့ၤဝီၤဃုပှၤလၢ အကယူၢ်လီၤဝဲလီၤ.” ဒီးအဲထိနံယိၤ တဲဝဲလၢ– “တၢ်ဂီၤဘ့ၣ်ဆ့သ့ၣ်တဖၣ်န့ၣ် အိၣ်ဝဲသကုၤဆးဒး ဒီးပမ့ၢ်ကွၢ် တၢ်ဂီၤတဖၣ်အံၤန့ၣ် အိၣ်တ့ၢ်လၢပခိၣ်နူာ်ပူၤညီမးလီၤ. ဘၣ်ဆၣ် ခီဖျိလံာ်စီဆှံတဆၢအံၤအဃိ ယနၢ်ပၢၢ်ထီၣ်လၢ တၢ်ဂီၤဘ့ၣ်ဆ့တဖၣ်န့ၣ် ဟဲလၢမုၣ်ကီၤလံၢ်အအိၣ်န့ၣ်လီၤ. အဃိ ယမ့ၢ်ဆိကမိၣ်ထီၣ် တၢ်ဂီၤဘ့ၣ်ဆ့အဂ့ၢ်န့ၣ် ယသ့ၣ်နီၣ်ထီၣ်တဘျီဃီလၢ အဟဲလၢမုၣ်ကီၤလံၢ်အအိၣ်လီၤ. အဃိ ယသ့ၣ်ညါလၢ ဒ်သိးယ ‘ကီၤယသး ဒီးဆိးသီ’ ကန့ၢ်အဂီၢ်, ပှၤလၢအမၤစၢၤယၤသ့န့ၣ် မ့ၢ်ထဲယဟိဝၤယွၤတဂၤဧိၤလီၤ. ဒီးဒ်သိးတၢ်ဂီၤဘ့ၣ်ဆ့သုတမၤဟးဂီၤ ယတၢ်ဆီဟံၣ်ဆီဃီတဂ့ၤအဂီၢ် ဒီးဖဲယတၢ်ဆိကမိၣ်လၢအတဂ့ၤမ့ၢ်ဟဲပၢၢ်ထီၣ်န့ၣ် ယမၤနၢၤအီၤသ့ ခီဖျိလၢ ကစၢ်ယွၤအတၢ်မၤစၢၤလီၤ.” အဲထိနံယိၤ ဒိးန့ၢ်ဘၣ်ဝဲတၢ်မၤစၢၤ လၢအလိၣ်ဘၣ်ဝဲ ဒီးတက့ၤကွၢ်က့ၤဝဲ တၢ်ဂီၤဘ့ၣ်ဆ့နီတဘျီလၢၤဘၣ်. တကးဒံးဘၣ် မၤစၢၤအီၤဒ်သိး အသုတထံၣ်ဘၣ် တၢ်ကီတၢ်ခဲလၢအဂၤတဖၣ် တဂ့ၤအဂီၢ်န့ၣ်လီၤ.
ပထံၣ်ဘၣ်နီၢ်နီၢ်လၢ လံာ်စီဆှံအတၢ်ဟံးစုနဲၣ်ကျဲတဖၣ်န့ၣ် မၤစၢၤပှၤဒ်သိး ပဟးဆှဲးတၢ်ကီတၢ်ခဲတဖၣ်ကသ့ဝဲအဂီၢ်လီၤ. ဘၣ်ဆၣ် ပတၢ်ကီတၢ်ခဲမ့ၢ်အိၣ်ပာ်စၢၤဒီး ပမၤနၢၤအီၤ မ့ၢ်တညီဘၣ်န့ၣ် ပကဘၣ်မၤဒ်လဲၣ်. ပကဃုသ့ၣ်ညါလၢ ကစၢ်ယွၤအကလုၢ်ကထါန့ၣ် မၤစၢၤပှၤကသ့ဒ်လဲၣ်အဂ့ၢ်န့ၣ်လီၤ.
လံာ်စီဆှံအတၢ်ဟံးစုနဲၣ်ကျဲတဖၣ်န့ၣ် မၤစၢၤပှၤဒ်သိးပဟးဆှဲး တၢ်ကီတၢ်ခဲတဖၣ်ကသ့အဂီၢ်လီၤ
You May Also Like
တၢ်သံကွၢ်တဖၣ်လၢ အတၢ်စံးဆၢအိၣ်လၢ လံာ်စီဆှံပူၤ
ဘၣ်ဃးဒီး တၢ်အီသံးန့ၣ် လံာ်စီဆှံတဲဝဲဒ်လဲၣ်. ပှၤမ့ၢ်အီသံးန့ၣ် အကမၣ်ဧါ.
ဘၣ်ဃးဒီး စပံးထံဒီးတၢ်ထံတၢ်နိလၢ အပၣ်ဃုာ်ဒီးသံးန့ၣ် လံာ်စီဆှံ ပာ်ဖျါထီၣ်ဝဲလၢ အဂ့ၤလီၤ.
