လီၣ်ဖျါ အဆၢဒိၣ် ၁၃ ပာ်ဖျါထီၣ်ဝဲ ဆၣ်ဖိကီၢ်ဖိလၢအအၢလၢအအိၣ်ဒီး အခိၣ်သၣ်ဃံနွံဖျၢၣ်န့ၣ် အဲၣ်ဒိးတဲဝဲ မနုၤလဲၣ်
လံာ်စီဆှံတဲဝဲဒ်လဲၣ်
ဆၣ်ဖိကီၢ်ဖိလၢအအၢ လၢအအိၣ်ဒီးအခိၣ်သၣ်ဃံနွံဖျၢၣ်လၢ လီၣ်ဖျါ ၁၃:၁ ပာ်ဖျါထီၣ်ဝဲန့ၣ် အဲၣ်ဒိးတဲဝဲ ဟီၣ်ခိၣ်အပဒိၣ်ပပှၢ်ခဲလၢာ်.
ဆၣ်ဖိကီၢ်ဖိကီၢ်ဖိလၢအအၢတဒုအံၤ အိၣ်ဒီးတၢ်စိတၢ်ကမီၤ, လီၢ်ပစိာ် ဒီးတၢ်ခွဲးတၢ်ယာ်လၢ အကပၢတၢ်အဂီၢ်အဃိ ပသ့ၣ်ညါဘၣ်လၢ အအဲၣ်ဒိးတဲဝဲ ထံဂ့ၢ်ကီၢ်ဂ့ၢ်အတၢ်ကရၢကရိ.—လီၣ်ဖျါ ၁၃:၂.
ဆၣ်ဖိကီၢ်ဖိလၢအအၢတဒုအံၤ အပၢဝဲ “ကလုာ်ဒူၣ်ကိးဒူၣ်ဒဲး, ပှၤကိးဒူၣ်ဒဲး, ပှၤတဲတၢ်အကျိာ် ကိးကျိာ်ဒဲး ဒီးပှၤကိးကလုာ်ဒဲး” အဃိပတဲသ့လၢ အတမ့ၢ်ထဲ ထံကီၢ်တဘ့ၣ် အပဒိၣ်ပပှၢ်တဖၣ်ဘၣ်.—လီၣ်ဖျါ ၁၃:၇.
ဆၣ်ဖိကီၢ်ဖိလၢအအၢတဒုအံၤ လီၤဂာ်လိာ်သးဒီး ဆၣ်ဖိကီၢ်ဖိလွံၢ်ဒုလၢ ဒၤနံးယ့လး ၇:၂-၈ ပာ်ဖျါထီၣ်ဝဲ. အဃိဆၣ်ဖိကီၢ်ဖိလၢအအၢတဒုအံၤ အမိၢ်ပှၢ်န့ၣ် လီၤဂာ်ဒီးခ့စံၣ်ပိၣ်, အခီၣ်လၣ်န့ၣ်လီၤဂာ်ဒီး တၤသူခီၣ်လၣ်, အထးခိၣ်န့ၣ်လီၤဂာ်ဒီး ခ့ယုၢ်ထးခိၣ် ဒီးအအိၣ်ဒီး အနၢၤအဘိတဆံလီၤ. ဆၣ်ဖိကီၢ်ဖိလၢအအၢတဖၣ် လၢဝံဒၤနံးယ့လးပာ်ဖျါထီၣ်ဝဲန့ၣ် အဲၣ်ဒိးတဲဝဲ စီၤပၤတဖၣ် မ့တမ့ၢ် ထံကီၢ်လၢအဒိၣ်စိ လၢအပၢတၢ်တစိၤဘၣ်တစိၤ. (ဒၤနံးယ့လး ၇:၁၇, ၂၃) အဃိဆၣ်ဖိကီၢ်ဖိလၢအအၢလၢ လီၣ်ဖျါ အဆၢဒိၣ် ၁၃ ပာ်ဖျါထီၣ်ဝဲန့ၣ် အဲၣ်ဒိးတဲဝဲ ထံဂ့ၢ်ကီၢ်ဂ့ၢ်အတၢ်ကရၢကရိ.
ဆၣ်ဖိကီၢ်ဖိလၢအအၢတဒုအံၤ “ဟဲထီၣ်လၢ ပီၣ်လဲၣ်အပူၤ” န့ၣ်အခီပညီမ့ၢ်ဝဲ ဟီၣ်ခိၣ်အပဒိၣ်ပပှၢ်လၢ အဟဲအိၣ်ထီၣ်ဝဲ လၢပှၤဟီၣ်ခိၣ်ဖိ လၢအမၤတၢထီၣ်တၢလီၤတၢ်အကျါ.—လီၣ်ဖျါ ၁၃:၁; ယၡါယၤ ၁၇:၁၂, ၁၃.
လံာ်စီဆှံတဲဝဲလၢ ဆၣ်ဖိကီၢ်ဖိလၢအအၢတဒုအံၤ အမံၤဒီးအနီၣ်ဂံၢ်န့ၣ် မ့ၢ်ဝဲဃုသၢဖျၢၣ် (၆၆၆) ဒီးအမ့ၢ်ဝဲ “ပှၤဟီၣ်ခိၣ်ဖိအနီၣ်ဂံၢ်.” (လီၣ်ဖျါ ၁၃:၁၇, ၁၈) အဃိပသ့ၣ်ညါဘၣ်လၢ ဆၣ်ဖိကီၢ်ဖိလၢ လီၣ်ဖျါ အဆၢဒိၣ် ၁၃ ပာ်ဖျါထီၣ်ဝဲန့ၣ် အအဲၣ်ဒိးတဲဝဲ ပှၤဟီၣ်ခိၣ်ဖိ, တမ့ၢ်ပှၤနီၢ်သးဖိ ဒီးတၢ်ဝံတၢ်နါဘၣ်.
ထံကီၢ်ပဒိၣ်ပပှၢ်တဖုဒီးတဖုန့ၣ် အတၢ်ထံၣ်တလီၤဂာ်လိာ်သးကြီကြီဘၣ် သနာ်က့ အဝဲသ့ၣ်ဘၣ်သးဒိၣ်စိ အဃိ အဝဲသ့ၣ်တတူၢ်လိာ် ကစၢ်ယွၤတၢ်ပၢဘၣ်. (စံးထီၣ်ပတြၢၤ ၂:၂) ထံကီၢ်ပဒိၣ်ပပှၢ်တဖၣ်အံၤန့ၣ် ကပာ်ဖှိၣ်ထီၣ်အသး ဒ်သိးကလဲၤဒုးဝဲ ကစၢ်ယွၤအသုးမုၢ် လၢယ့ၣ်ၡူးတီခိၣ်ရိၤမဲဝဲ ဖဲအၢ်မက့းဒိၣ်တၢ်ဒုး. ဘၣ်ဆၣ်အဝဲသ့ၣ် တမၤနၢၤတၢ်ဘၣ် ဒီးအဝဲသ့ၣ် ကဟးဂီၤဝဲခဲလၢာ်.—လီၣ်ဖျါ ၁၆:၁၄, ၁၆; ၁၉:၁၉, ၂၀.
“အနၢၤ အဘိတဆံ ဒီးအခိၣ်သၣ်ဃံနွံဖျၢၣ်”
နီၣ်ဂံၢ်တနီၤလၢအအိၣ်လၢ လံာ်စီဆှံပူၤန့ၣ် အိၣ်ဒီးအခီပညီ. အဒိ, နီၣ်ဂံၢ်တဆံ ဒီးနီၣ်ဂံၢ်နွံန့ၣ် အဲၣ်ဒိးတဲဝဲ တၢ်လၢတၢ်ပှဲၤ. ပမ့ၢ်ကွၢ် “ဆၣ်ဖိကီၢ်ဖိလၢ အအၢတဒုအဂီၤ” အဂ့ၢ်အကျိၤန့ၣ် ပကသ့ၣ်ညါထီၣ် ဆၣ်ဖိကီၢ်ဖိလၢအအိၣ်ဒီး “အနၢၤ အဘိတဆံ ဒီးအခိၣ်သၣ်ဃံနွံဖျၢၣ်” လၢ လီၣ်ဖျါ အဆၢဒိၣ် ၁၃ ပာ်ဖျါထီၣ်ဝဲ. ဆၣ်ဖိကီၢ်ဖိလၢအအၢတဒုအဂီၤန့ၣ် လၢခံလံာ်လီၣ်ဖျါပာ်ဖျါထီၣ်ဝဲလၢ အမ့ၢ်ဝဲဆၣ်ဖိကီၢ်ဖိလၢအအၢ လၢအလွဲၢ်ဂီၤဆှုၣ်ကလာ် လၢအအိၣ်ဒီးအခိၣ်သၣ်ဃံနွံဖျၢၣ် ဒီးအနၢၤအဘိတဆံ. (လီၣ်ဖျါ ၁၃:၁, ၁၄, ၁၅; ၁၇:၃) လံာ်စီဆှံတဲဝဲလၢ ဆၣ်ဖိကီၢ်ဖိလၢအအၢတဒု အခိၣ်သၣ်ဃံနွံဖျၢၣ်န့ၣ် အဲၣ်ဒိးတဲဝဲ “စီၤပၤနွံဂၤ” မ့တမ့ၢ် ပဒိၣ်ပပှၢ်တဖၣ်.—လီၣ်ဖျါ ၁၇:၉, ၁၀.
ဒ်န့ၣ်အသိး ဆၣ်ဖိကီၢ်ဖိလၢအအၢ လၢအအိၣ်ဒီးအခိၣ်သၣ်ဃံနွံဖျၢၣ်လၢ လီၣ်ဖျါ ၁၃:၁ ပာ်ဖျါထီၣ်ဝဲန့ၣ် အဲၣ်ဒိးတဲဝဲ တၢ်ပၢတၢ်ပြးနွံခါ. တၢ်ပၢတၢ်ပြးတဖၣ်အံၤ လၢတၢ်စံၣ်စိၤတဲစိၤအပူၤန့ၣ် အဝဲသ့ၣ်အစိကမီၤဒိၣ်ဝဲဒိၣ်မး ဒီးမၤအၢမၤသီ ကစၢ်ယွၤအခ့အပှၤ. တၢ်ပၢတၢ်ပြးနွံခါအံၤန့ၣ် မ့ၢ်ဝဲ အဲၤကူပတူး, အၤၡူၢ်, ဘၤဘူၤလိၣ်, မၤဒဲ-ဖၢၡၢၣ်, ကြံးစ်, ရိမ့ၤ ဒီးဘြံးတၢၣ်-အမဲရကၤလီၤ. ဆၣ်ဖိကီၢ်ဖိလၢအအၢတဒုအနၢၤ အဘိတဆံန့ၣ် အဲၣ်ဒိးတဲဝဲ ထံကီၢ်အဒိၣ်ဒီးအဆံးခဲလၢာ် လၢအပၢတၢ်. ဒီးခိၣ်သလုးလၢအအိၣ်လၢ အနၢၤတဘိဘၣ်တဘိအလိၤန့ၣ် အဲၣ်ဒိးတဲဝဲ ထံကီၢ်တဖၣ်အံၤန့ၣ် ပၢတၢ်လၢတၢ်ဆၢကတီၢ်တကတီၢ်ဃီဒီး ထံကီၢ်လၢအစိကမီၤဒိၣ်တဖၣ်.