Daneri 9:1-27
9 Omo mwaka w’erimbere owa Dario mughalha wa Ahasuero—ow’olhubutho lhw’Abamedi oyuwabya iniabiriyirwamo mwami w’obwami bw’Abakaldea—
2 omo mwaka w’erimbere ow’erithabalha liwe, ingye Daneri munabana omwa bitabu* mw’omughanzo w’emyaka eyikanibweko omwa binywe ebya Yehova abwira Yeremia omuminyereri eyo e Yerusalemu yangaghunzire inina kihuma, emyaka 70.
3 Neryo munabindukira Yehova Nyamuhanga w’okwenene, erimulemba-lemba omwa musabe, kuthya n’eribya omwa kisibo n’eriambalha esyongyimba sy’obulighe n’eribya omw’ibu.
4 Munasaba Yehova Nyamuhanga waghe, namabikulha indi:
“Kisi Yehova Nyamuhanga w’okwenene, ow’amaaka kandi oyuk’ubahisaya, oyukaberereraya endaghane yiwe kandi oyukakanganaya abamwanzire kandi abakaghendera okwa bihano biwe olhwanzo olhutheleghulha,
5 thwabirikolha amalholho kandi thwabirisobya kandi thwabirihalya kandi thwabiriyisamambulha; kandi thwabirisighania ebihano byawu n’eritswera lyawu.
6 Sithuthahulikirira abaghombe bawu abaminyereri, abakaniraya abami bethu, abanya-mwami bethu, abathatha-kulhu bethu n’abandu bosi b’ekihugho kyethu omwa lina lyawu.
7 Yehova, erithunganene ni lyawu, aliwe ithwe thuhemukire ngoku kiri munabwire, n’abandu be Yuda, abikalhani be Yerusalemu, ne Israeli yosi, abali hakuhi n’abali haali, omwa bihugho byosi ebyo wabapanziramo kundi mubakuleghulhako.
8 “Yehova, ithwe thuhemukire, abami bethu, abanya-mwami bethu, n’abathatha-kulhu bethu, kundi thwabirikuhalyako.
9 Yehova Nyamuhanga wethu ni w’obughanyiri kandi akaghanyira, kundi thwabirimuyisamambulhako.
10 Sithuthaghondera omulenge wa Yehova Nyamuhanga wethu omw’ithendi kwama ebihano biwe ebyo athuhiriraho erilhabira omwa baghombe biwe abaminyereri.
11 Abaisraeli bosi babirithwa Emighambo yawu n’erisighaniayo omw’ithendi ghondera omulenge wawu, neryo muwathuthulirako omukino n’ekilhahiryo ekihandikire omwa Mighambo ya Musa omughombe wa Nyamuhanga w’okwenene, kundi thwabirimuhalyako.
12 Abiriberererya ebinywe biwe eby’athubughako n’ebyo abugha okwa bathabali bethu abathuthabalhako,* omw’ithulethako akabi akakalire; sihali ekyabirikolhwa ahisi sy’olhubulha ekiri ng’ekyakolhawa e Yerusalemu.
13 Ngoku kinahandikire omwa Mighambo ya Musa, akabi akosi aka kabirithuhikako, aliwe sithuthalemba-lemba* Yehova Nyamuhanga wethu thuthi athukwire obulighe omw’ileka ebibi byethu n’omw’ikangania amenge omwa kwenene yawu.*
14 “Neryo Yehova mwabya inianatheghirye kandi amathulethako akabi, kundi Yehova Nyamuhanga wethu athunganene omwa mibiiri yosi eyo abirikolha; aliwe sithuthaghondera omulenge wiwe.
15 “Yehova Nyamuhanga wethu, iwe walhusaya abandu bawu omwa kihugho kye Misiri omwa byalha by’amaaka n’eriyikolera erina erihika namunabwire, thwabirihalya n’erikolha ebibi.
16 Yehova erikwamana n’emibiiri yawu yosi eyithunganene, kisi ambi ekinigha kyawu n’erihithana lyawu ibyalhua okwa tawuni yawu e Yerusalemu, ekithwe kyawu ekibuyirire; kundi busana n’ebibi byethu n’amalholho w’abathatha-kulhu bethu, e Yerusalemu n’abandu bawu babiribya kindu ky’erisekererya okwa bosi abathuthimbireko.
17 Neryo wuhulikirire iwe Nyamuhanga wethu, omusabe w’omughombe wawu n’erilemba-lemba liwe, kandi wuleke obusu bwawu bukoleraye ahabuyirire hawu ahabiribya kihuma, busana n’erina lyawu, iwe Yehova.
18 Wutheghe okuthwe kwawu, iwe Nyamuhanga waghe, wowe! Libulha ameso wawu wulhangire emibere eyathulimu ey’erisighanibwa n’etawuni eyabiryahulhwa omwa lina lyawu; kundi sithuli kulemba-lemba busana n’ebikorwa byethu ebithunganene aliwe busana n’obughanyiri bwawu bunene.
19 Kisi Yehova wowe. Kisi Yehova wughanyire. Kisi Yehova wuhulikirire kandi wuyire eky’erikolha! Siwulindiriraye, busana n’erina lyawu, iwe Nyamuhanga waghe, kundi etawuni yawu n’abandu bawu bakahulhawa omwa lina lyawu.”
20 Nabere ngakinabugha n’erisaba n’eribikulha ekibi kyaghe n’ekibi ky’abandu bethu Israeli n’erilemba-lemba Yehova Nyamuhanga waghe busana n’ekithwe kibuyirire ekya Nyamuhanga waghe,
21 ee, nabere ngakinabugha omwa musabe, omulhume Gabrieli oyo nabya ingabirilhangira omo nzoli, mwasa aho ngali ingabirilhuha kutsibu ng’okwa ndambi aho y’erihayo ekihembo ky’obuhere eky’erigholho.
22 Neryo mwangwathikya eriyitheghererya, mwabugha athi:
“Daneri, namasa erisyakuha amenge n’eriyitheghererya.
23 Muwukabya wukatsuka erilemba-lemba lyawu, ekinywe mukikahulhuka, neryo namasa erisyakubwirakyo, kundi wuli mundu w’obughuli bunene.* Neryo wulengekanaye ndeke oko mwatsi, wanayitheghererya esyonzoli.
24 “Hali amayenga* 70 awabirihirwaho busana n’abandu benyu n’etawuni yenyu eyibuyirire, busana n’erighunzaho amalholho, erighunzaho ekibi, eriliha embanulho busana n’amalholho, eriletha erithunganene erya kera kera, erighumya esyonzoli n’obuminyereri,* n’erihakabya Ahabuyirire h’Ahabuyirire.*
25 Wutholere iwaminya n’eriyitheghererya ngoku eritsuka aho ekihamulho ky’erisuba-subania n’erithasyahimba e Yerusalemu kyahamulirawa erihika oku Masiya* Omusondoli, hakendi syabya amayenga 7, n’amayenga 62. E Yerusalemu yikendi syasuba-subanibwa n’erithasyahimbwa, ikune ekibugha n’omughende, aliwe omwa mighulhu y’obulighe.
26 “Amayenga 62 akendi syabya abirihwa, Masiya akendi syalhusibwaho,* isyakiwithe okuki.
“N’abandu b’omusondoli oyukasa bakendi syathoghothya etawuni n’omwanya owabuyirire. Nayu yikendi syahwaho omw’ibogha ly’amaghetse. Kandi erihika okwa nduli hakendi syabya ihane olhuhi; ekyabirihamibwako ly’eriherya.
27 “Neryo akendi syaleka endaghane iyalholha embere busana n’abangyi habw’eyenga nguma; kandi omwa kathi-kathi k’eyenga, akendi syaghunzaho eby’erihayo obuhere.
“N’okwa kipupa ky’ebindu ebik’itha nye kukendi syabya oyukaheraya; kandi erihika okw’ithoghothya, ekyabirihamibwako kikendi syuthulirwa n’okwa oyuli kihuma.”
Emyatsi Ahikwa
^ Ni bugha ambu, ebitabu ebibuyirire.
^ Kinywe okwa kinywe, “abatsweri bethu abathutswera.”
^ Kutse “eryolhobya obusu.”
^ Kutse “obuthaleghulha.”
^ Kutse “oyuwanzibirwe kutsibu; oyusimirwe kutsibu.”
^ Ni bugha ambu, amayenga w’emyaka.
^ Kinywe okwa kinywe, “omuminyereri.”
^ Kutse “Ahabuyirire Kutsibu.”
^ Kutse “Omuhakabibwa.”
^ Kutse “er’ithibwa.”
