Daneri 1:1-21
1 Omo mwaka wakasathu ow’obuthabali bw’Omwami Yehoyakimu owe Yuda, Omwami Nebukadeneza owe Babeli mwasa e Yerusalemu, amaghotherayo.
2 Endambi muyahika Yehova amahira Omwami Yehoyakimu owe Yuda omwa byalha biwe, haghuma n’ebindu birebe eby’omwa nyumba* ya Nyamuhanga w’okwenene, mwabiletha omwa kihugho kye Sinari* omwa nyumba* ya nyamuhanga wiwe. Mwahira ebindu ebyo omw’ibikiro lya nyamuhanga wiwe.
3 Neryo omwami mwalhaghira Aspenazi omukulhu w’abakakolera omwa kikali athi alethe abaghuma b’okwa Baisraeli,* imwamune abanya-mwami n’ab’ebitsumbi.
4 Babya batholere ibabya ini minyethu* eyitheko bulema, abalhangirikire ndeke, ab’oswire n’amenge, eriminya, kandi ab’obuyitheghererya, kandi abanga thoka erikolera omwa kikali ky’omwami. Abya w’eribakangirirya emihandikire y’Abakaldea n’omubughe wabo.
5 Eryongera okw’ekyo, omwami mwahamulha athi babye bakahebwa okwa byalya ebyuwene-wene eby’omwami n’okwa vini eyo akanywa. Babya b’erithendekwa* habw’emyaka isathu, neryo obuthuku obo bukahwa ibatsuka erikolera omwami.
6 Omw’ibo mwabya imune abaghuma b’okwa b’omwa kihanda* kya Yuda: Daneri,* Hanania,* Misaeli,* na Azaria.*
7 Neryo omukulhu w’abakakolera omwa kikali mwabalhuka amena;* mwahulha Daneri mwa Beltesaza, Hanania mwa Sadraka, Misaeli mwa Misaki, na Azaria mwa Abedenego.
8 Aliwe Daneri mwathwamu omwa muthima wiwe athi syendi yitsandya omwa byalya ebyuwene-wene eby’omwami kutse omwa vini eyo akanywa. Neryo mwasaba omukulhu w’abakakolera omwa kikali athi amulighire syayitsandaye omw’ebi.
9 Neryo Nyamuhanga w’okwenene mwaleka omukulhu w’abakakolera omwa kikali iniatsomana* Daneri n’erimukangania olhukeri.
10 Aliwe omukulhu w’abakakolera omwa kikali mwabwira Daneri athi: “Ngasaghire omukama waghe omwami, oyuwabirihamulha athi mubye mukahebwa ebyalya n’eby’erinywa. Amathalhangira imwabirisosa nabi okwa yindi minyethu* y’emyaka yenyu? Imukendi leka ingabya* kw’olhubanza embere sy’omwami.”
11 Aliwe Daneri mwabwira omutheya oyuwasombolhawa n’omukulhu w’abakakolera omwa kikali eritheya Daneri, Hanania, Misaeli, na Azaria athi:
12 “Kisi, lengesaya abaghombe bawu habw’ebiro ikumi, babye bakahebwa okwa byalya by’ebirimwa birebe eby’erirya n’amaghetse w’erinywa;
13 neryo wanalinganisya emisosere yethu n’emisosere y’eminyethu* eyikalya okwa byalya ebyuwene-wene eby’omwami, neryo wukendi tswera abaghombe bawu erikwamana ngoku wamabalhangira.”
14 Neryo mwalighirana n’ekilengekanio kyabu, amabalengesya habw’ebiro ikumi.
15 Ebiro ikumi ebyo byabere byahwa, emisosere yabu yabya iyabiryuwana kandi ibabiribya n’amaghalha awuwene kwilhaba eyindi minyethu* yosi eyabya yikalya okwa byuwene-wene by’omwami.
16 Neryo omutheya mwabya akab’ihako ebyuwene-wene byabu n’evini, iniabaha ebirimwa.
17 Na Nyamuhanga w’okwenene mwaha eminyethu* ini eyi y’amaaka w’eriminya obuli ebihandikire haghuma n’amenge; kandi Daneri mwathokesibwa eriyitheghererya obuli mulingo wosi w’eribonokerwa n’ebilhotho.
18 Obuthuku obwa omwami abya iniabirihiraho obw’eribaletheramo bwabere bwahwa, omukulhu w’abakakolera omwa kikali mwabaletha embere sya Nebukadeneza.
19 Omwami abere akania nabu, omwa gurupu yosi mumuthabanika oyuli nga Daneri, Hanania, Misaeli, na Azaria; neryo mubalholha embere erikolera omwami.
20 Omwa buli mwatsi ow’abya akayithagha amenge n’eriyitheghererya ogho omwami aby’akababulyako, mwalhangira ibalengire mirundi ikumi abahereri abosi b’eby’obukumu n’abathahwa ab’omwa buthabali bwiwe bwosi.
21 Neryo Daneri mwabyayo erihika oko mwaka w’erimbere w’Omwami Kiro.
Emyatsi Ahikwa
^ Kutse “ehekalhu.”
^ Kutse “Babiloni.”
^ Kutse “ehekalhu.”
^ Kinywe kwa kinywe, “abaana ba Israeli.”
^ Kinywe okwa kinywe, “abaana.”
^ Kutse obundi, “ibalisibwa.”
^ Likamanyisaya “Yehova abiritsomana.”
^ Likamanyisaya “Yehova Abiriwathikya.”
^ Obundi likamanyisaya “Nindi oyuli Nyamuhanga?”
^ Likamanyisaya “Omutsweri waghe ni Nyamuhanga.”
^ Kinywe okwa kinywe, “abaana.”
^ Ni bugha ambu, amena w’abanya Babeli.
^ Kutse “iniamukwira obulighe.”
^ Kinywe okwa kinywe, “abaana.”
^ Kinywe okwa kinywe, “omuthwe waghe.”
^ Kinywe okwa kinywe, “abaana.”
^ Kinywe okwa kinywe, “abaana.”
^ Kinywe okwa kinywe, “abaana.”
