Daneri 8:1-27
8 Omo mwaka wakasathu w’obuthabali bw’Omwami Belsaza, ingye Daneri munathunga esyonzoli, eryongera okwa nzoli esyonabya inabiribana ahanyuma.
2 Omwa syonzoli, nabere nasamalira, munabya ingali omwa kikali e Susa, ekiri omwa provisi* ye Elamu; munayitheghererya esyonzoli, namabya ingali hakuhi n’olhusi Ulayi.
3 Nabere ingasumba ameso waghe, lebaya! habya embangali iyin’imene ahali omughende w’amaghetse, yabya yiwithe amahembe abiri. Amahembe abiri ayo abya mali-mali, aliwe erighuma lyabya liiri okwa lindi, eriiri lyalhasa linyuma.
4 Munalhangira embangali yikathibitha omwa mighulhuko erilholha omwa bitsweka by’ebulengera lyuba, eby’eyighulhu, n’eby’eyikwa, kandi isihali ebisoro by’omoli ebyang’imanirayo, kandi isihali oyuwanga bilhamya okwa maaka* wayo. Iyikakolha ngoku yanzire n’eriyihamya.
5 Nabere ngalholha embere erisamalira, lebaya! habya embaya iyinemwasira ebulengera lyuba erithwangana okwa kihugho kyosi iyikaghendera omo mwanya. Embaya yabya yiwithe erihembe ahakathi-kathi k’ameso wayo erilhangirikire ndeke-ndeke.
6 Yabya yikalholha eyiri embangali ey’amahembe abiri, eyo nalhangira iyin’imene ahali omughende w’amaghetse; yabya yikathibitha eyo yiri omwa mutsundo munene w’obuhithane.
7 Munalhangira yikahika hakuhi-kuhi n’embangali, iyihithene kuyo kwa kutsibu. Muyahumira embangali yamathwa amahembe wayo abiri, neryo embangali muyabya isiyikiwithe amaaka w’erimanirayo. Muyaghusa embangali y’okwa kithaka, yamalyathangirirayo, kandi sihabya oyuwanga lhamya embangali okwa maaka* wayo.
8 Neryo embaya muyayihamya kutsibu, aliwe yabere yikanathunga amaaka, erihembe erinene mulyathwika; neryo omo mwanya walyo mumwalhasa amahembe ani awalhangirikire ndeke-ndeke, inialholire eyiri amahunga ani w’ekyanya.
9 Omwa lighuma ly’okw’igho mumwalhasa erindi lihembe, akahembe akake, kamakulha kamabya k’amaaka erilholerya eyikwa n’erilholerya ebulhua lyuba n’erilholerya ew’abo Mapambo.*
10 Mukakulha kamabya k’amaaka erihikir’ighuma okwa by’omwa kyanya, neryo kamaleka ebighuma by’okwa by’omwa kyanya n’esighuma sy’okwa syongununu ibyathoghera okwa kihugho, neryo mukabiryathangirira.
11 Mukayihamirya nibya n’okwa Munya-mwami w’amahe, kandi mwalhusibwako obuhere obukahebawayo mughulhu wosi, n’omwanya owabya iniabirihirwaho ow’ahabuyirire hiwe mwatheribwa.
12 Neryo mukahebwa amahe, haghuma n’obuhere obukahebawayo mughulhu wosi, busana n’ekibi; kandi mukabera erighusa ekwenene okwa kihugho, neryo mukakolha kamasingura.
13 Neryo munowa oyubuyirire akakania, n’owundi oyubuyirire mwabwira oyukakanaya athi: “Esyonzoli sy’obuhere obukahebawayo mughulhu wosi n’esy’ekibi ekikaletha eriherya, sikendi syalholha embere erihika mughulhu wahi, erileka omwanya owabuyirire n’ebindu by’amahe ibyalyathangirirwa?”
14 Neryo mwambwira athi: “Erihika aho amagholho-gholho n’esyongyakya-ngyakya 2,300 bikendi hwera; kandi ahathe erithika-thika, omwanya owabuyirire akendi syasuba-subanibwa.”
15 Ingye Daneri nabere nganasamalire ebiri omwa syonzoli n’erianza eribiyitheghererya, kitsumbukirania munalhangira embere syaghe iyin’imene oyuli ng’omundu.
16 Neryo munowa omulenge w’omundu omwa kathi-kathi ke Ulayi, mwabirikira athi: “Gabrieli, musoborere, ayitheghereraye ebyo alyalhangira.”
17 Neryo mwasa hakuhi n’aho nabya ng’imene, aliwe abere asa munakwa obuba bunene kutsibu kyamaleka inayithulika ahisi. Mwambwira athi: “Iwe mughalha w’omundu, wuyitheghereraye ngoku ebiri omwa syonzoli ni by’omwa mughulhu w’enduli.”
18 Aliwe abere anemukania naghe, munahwera omwa thulho n’obusu bwaghe ibune okwa kithaka. Neryo mwanyithulhako, amanyihangania, amanyimania aho nabya ng’imene.
19 Neryo mwabugha athi: “Ngakuminyisaya ebikendi syabya okw’ihwererera ly’obuthuku bw’erihithana, kundi ni ry’obuthuku obwahirawaho obw’enduli.
20 “Embangali y’amahembe abiri eyo walhangira, yik’imanira omwami we Media n’owe Persia.
21 Embaya y’amalerembu w’obweya, yik’imanira omwami we Gurisi; n’erihembe linene eryabya ahakathi-kathi k’ameso wayo, lik’imanira omwami w’erimbere.
22 Erihembe eryathwika, omo mwanya walyo mwamalhasa amahembe ani, ni mami ani erilhua omwa kihanda kiwe awakendi syahangana, aliwe butsira omwa maaka wiwe.
23 “Okw’ihwererera ly’obwami bwabu, ababi ibabirikolya obubi bw’okwa muhindo,* omwami w’emisosere eyik’ubahisaya oyukayitheghereraya ebikalire eriyitheghererya* akendi syahangana.
24 Amaaka wiwe akendi syabya manene, aliwe butsira omwa kaghalha kiwe. Akendi syaletha erithoghothya omwa mibere eyithe ya buli kiro,* kandi akendi syasingura n’erithoka ndeke ebyo akakolha. Akendi syathoghothya ab’amaaka, kuthya n’ababuyirire.
25 Kandi omwa bughobya bwiwe akendi syakolesya amathebo erisingura; n’omwa muthima wiwe akendi syayihamya; n’omwa buthuku bw’obutheya* akendi syathoghothya abangyi. Nibya akendi syahangana erilhwa n’Omunya-mwami w’abami, aliwe akendi syabbunangwa butsira omwa byalha by’omundu.
26 “Ebiryabughawa omwa syonzoli ebihambire okwa magholho-gholho n’esyongyakya-ngyakya ni by’okwenene, aliwe wutholere iwabika esyonzoli esyo mwa mbitha, kundi sikakanaya okwa mughulhu owakendi syabya ebiro bingyi embere.”*
27 Ingye Daneri, munalhuha kutsibu kandi munalhwalha habw’ebiro birebe. Neryo munahangana namakolha emibiiri y’omwami; aliwe munabya inganatingirwe busana n’ebyo nalhangira, kandi sihabya oyuwanga biyitheghererya.
Emyatsi Ahikwa
^ Kutse “obulhambu bwosi obwa bathabereko.”
^ Kinywe okwa kinywe, “oko byalha.”
^ Kinywe okwa kinywe, “oko byalha.”
^ Kutse “Bubuya.”
^ Kutse “bakahika okwa ngunzerero yabo.”
^ Kutse “oyuwasi ndeke ebikatha-kathenie.”
^ Kutse “erihwerekererya.”
^ Kutse obundi, “isibayitsulirye.”
^ Kutse “obuthuku obuthe bwahakuhi.”
