Daneri 11:1-45
11 “Ingye, omo mwaka w’erimbere owa Dario Omumedi, munahangana erimuha akaghalha n’erimughumya.*
2 Ebyangayakubwira y’ekwenene:
“Lebaya! Abandi bami basathu bakendi syahangana omwa Persia, owakani akendi syayikuma-kumira obugaga bunene kutsibu kwilhaba abandi bosi. Neryo akendisyabya akabya n’amaaka busana n’obugaga bwiwe, akendi syakolesya obuli kindu erilhwa n’obwami bwe Gurisi.
3 “Neryo omwami w’amaaka akendi syahangana iniathabalha oko malhambu manene kandi iniakolha ngoku anzire.
4 Aliwe akendi syabya abirihangana, obwami bwiwe bukendi syabbunangwa, n’erighabwa erilholya eyiri amahunga ani w’ekyanya, aliwe butsira okwa b’olhubutho* lhwiwe kandi butsira okwa malhambu mangaha n’agho athabalhako; kundi obwami bwiwe bukendi syakulhangwa ibwaghendera abandi butsira aba.
5 “Neryo omwami w’eyikwa akendi syabya n’amaaka, ni bugha ambu, omughuma w’okwa banya-mwami biwe; aliwe omughuma akendi syamulengya amaaka iniathabalha okwa malhambu manene, iniamulengya amaaka w’erithabalha.
6 “Hakendi syabya habirilhaba myaka mirebe bakendi syakolha obughuma, na mwali w’omwami w’eyikwa akendi syasa ew’omwami w’eyighulhu nuku bahireho emitheghekere y’erilighirana.* Aliwe mwali oyu syendi syasighalha n’obuthoki bw’okuboko kwiwe; n’omwami syendi syimana, kutse okuboko kwiwe; kandi mwali w’omwami akendi syaghemulirwa abandi, iyo n’abakamuletha, n’oyuwamubutha, kuthya n’oyukaleka iniabya n’akaghalha okwa mighulhu eyo.
7 N’oyukalhasa okwa mirihi yiwe akendi syahangana omo mwanya w’omwami, iniasa eyiri amahe, iniayalhwa n’olhuhimbo lhw’obutheya lhw’omwami w’eyighulhu kandi akendi syalhwa nabo iniamulengya amaaka.
8 Kandi akendi syasa e Misiri iniane n’esyonyamuhanga syabo, esyosanamu syabo sy’ekyuma,* ebindu byabu by’obughuli eby’efeza n’ehoro, n’abanyewa. Ahabw’emyaka mirebe akendi sy’imana haali oko mwami w’eyighulhu,
9 oyukendi syasa erisyalhwa n’obwami bw’omwami w’eyikwa, aliwe akendi syasuba omwa kihugho kiwe.
10 “Baghalha biwe bakendi syayitheghekera olhuhi kandi ibahindania amahe manene aw’amaaka. Neryo akendi syalholha embere iniabirya-birya ng’eribogha ly’amaghetse. Aliwe akendi syasubayo, kandi akendi syakwika olhuhi erihikira ighuma okwa lhuhimbo lhwiwe lhw’obutheya.
11 “Neryo omwami w’eyikwa akendi syahithana, iniaghenda iniayalhwa nayo, ni bugha ambu, omwami w’eyighulhu; akendi syahindania abandu bangyi, aliwe abandu bangyi abo bakendi syahirwa omwa byalha by’oyo.
12 Neryo abandu abo bakendi syahekwa. Omuthima wiwe akendi syayihamya, kandi akendi syaleka amakumi w’esyongumi iniawa; aliwe syendi syakolesya ekitsumbi kiwe ky’amaaka.
13 “Neryo omwami w’eyighulhu akendi syasubulha iniahindania abandu abangyi kwilhaba ab’erimbere; neryo okw’ihwererera ly’emighulhu, enyuma w’emyaka mirebe, ahathe erithika-thika, akendi syasa n’amahe manene n’ebindu bingyi by’erikolesya.
14 Okwa mighulhu eyo abangyi bakendi syahangana erilhwa n’omwami w’eyikwa.
“N’abatsibu* omwa kathi-kathi k’abandu benyu bakendi syahekwa bakanza eriberererya ebyalhangirawa omwa nzoli; aliwe bakendi syathwikalha.
15 “Neryo omwami w’eyighulhu akendi syasa iniahimba olhuhimbo lhw’erighothera, iniahamba etawuni eyiriko olhuhimbo lhw’obutheya. N’ebirwanisyo* by’eyikwa sibyendi syahangana, kutse abalhume biwe abasombwerwe; kandi sibendi syabya n’akaghalha k’erihangana.
16 Oyukasyalhwa nayu akendi syakolha ngoku anzire, kandi sihali oyukendi syamwimanira. Akendi sy’imana omwa kihugho ky’Amapambo,* n’amaaka w’erihwerekererya akendi syabya omwa byalha biwe.
17 Akendi syathwamu* eryasa n’amaaka manene w’obwami bwiwe, kandi hakendi syabya erilighirana* nayu; akendi syakolha ekyo abirithwamu. Akendi syahebwa ehamuli y’erithoghothya omwali w’abakali. Mwali oyo syendi syimana, kandi syendi syalholha embere eribya wiwe.
18 Akendi syalholya obusu bwiwe eyiri ebitsweka by’okwa musike w’engetse kandi akendi syahamba ebitsweka bingyi. Na kamanda akendi syaleka ekihemu ekimuliko ikyamuhwako, nuku ekihemu kiwe kibye isikikiriho. Akendi syaleka ikyasuba okw’olya.
19 Neryo akendi syalholerya obusu bwiwe eyiri esyombimbo sy’obutheya obw’ekihugho kiwe, kandi akendi syathwikalha n’eriwa, iniabya isyanga thasyabanika.
20 “Neryo omo mwanya wiwe mukendi syahangana oyukalhabaya omulihisya* omo bwami bw’olhukengerwa, aliwe omwa biro bike akendi syabbunangwa, butsira omwa kinigha kutse omwa malhwa.
21 “Neryo omo mwanya wiwe mukendi syahangana oyuponirwe,* kandi sibendi syamuha olhukengerwa lhw’obwami; neryo akendi syasa omwa mughulhu w’obutheya,* iniayihambira obwami omw’ikolesya amathebo.*
22 N’ebirwanisyo* by’eribogha ly’amaghetse bikendi syabirya-biribwa busana nayo, kandi bikendi syabbunangwa; ngoku kikendi syabya oko Musondoli w’endaghane.
23 Kandi busana n’obughuma obo bawithe nayo, akendi syabugha amabehi, iniahangana kandi iniabya n’amaaka erilhabira omwa kihanda kike.
24 Omwa buthuku bw’obutheya* akendi syasa omo myanya eyigagire kutsibu* ey’omwa provisi,* iniakolha ebyo abathatha wiwe n’abathatha wabo bathakolha. Akendi syabaghabira ebyahungawa n’ebyanyeghawa n’ebindu; akendi syaya orukwa lhw’erilhwa n’emyanya ey’obutheya obughumire aliwe habw’akathuku kalebe.
25 “Neryo omwa maaka wiwe wosi n’omuthima wiwe wosi akendi syahongokera omwami w’eyikwa iniane n’amahe manene, n’omwami w’eyikwa akendi syayitheghekera olhuhi iniane n’amahe amanene kutsibu kandi aw’amaaka manene. Syendi syathoka erimwimanira kundi bakendi syamughoberya.
26 Abakalya okwa byalya biwe ebyuwene-wene bakendi syaleka iniathera.
“Amahe wiwe akendi syabirya-biribwa,* n’abangyi bakendi syabya binda.
27 “Abami babiri aba, emithima yabo yikendi syanza erikolha ekibi, kandi bakendi sy’ikalha oko meza nguma eribwirana amabehi. Aliwe sihendi syabya ekikathokekena, kundi enduli yikendi syahika okwa mughulhu owabirihirwaho.
28 “Neryo akendi syasuba omwa kihugho kiwe iniane n’ebindu bingyi, n’omwa muthima wiwe akendi syathwamu erilhwa n’endaghane eyibuyirire. Akendi syakolha ekyo abirithwamu neryo iniasuba omwa kihugho kiwe.
29 “Okwa buthuku obwahirawaho akendi syasubulha erisyalhwa n’eyikwa. Aliwe okwa ndambi eyi sibyendi syabya ngoku byabya,
30 kundi amathu we Kitimu akendi syalhwa nayu, nayu akendi syakehibwa.
“Akendi syasubayo iniabugha ebitsumi* okwa ndaghane eyibuyirire kandi iniakolha ekyo abirithwamu; neryo akendi syasubayo inialengekania okwa bakasighanaya endaghane eyibuyirire.
31 N’ebirwanisyo* bikendi syahangana bikalhua okw’iyo; neryo bakendi syatsandya ahabuyirire, olhuhimbo lhw’obutheya, kandi ibalhusyaho obuhere obukahebawayo mughulhu wosi.
“Neryo bakendi syahiraho ekik’itha esyonye ekikaheraya.
32 “N’abakakolha ebibi omw’ithwa endaghane, akendi syab’ingirya omwa buyisamambuli omw’ikolesya ebinywe by’ekisehya. Aliwe abandu abasi Nyamuhanga wabo bakendi syasingura kandi ibakolha ekya babirithwamu.
33 N’abawithe amenge omwa kathi-kathi k’abandu bakendi syaleka abangyi ibayitheghererya. Bakendi syathinirwa omwa muyali n’omwa kirimi ky’omuliro, omw’ithwalhwa omwa bunyewa n’omw’ihunga ebindu byabu, ahabw’ebiro birebe.
34 Aliwe bakendi syabya babirithinirwa, bakendi syahebwa obuwathikya buke; neryo abangyi bakendi syabayiyungako omwa binywe by’amathebo.*
35 N’abaghuma b’okwa b’amenge bakendi syathinirwa, nuku hakolhawe omubiiri w’eritukuribwa busana nabo n’eryeribwa n’erihenibwa erihika okwa mughulhu w’enduli; kundi ni ky’omwa buthuku obwabirihirwaho.
36 “Omwami akendi syakolha ebikamutsemesaya, kandi akendi syayihamya n’eriyiyiramo mukulhu okwa buli nyamuhanga; kandi akendi syabugha oku Nyamuhanga w’esyonyamuhanga kw’ebikaswekaya. Kandi obuli kindu kikendi syamughendera ndeke erihika aho eritswera ly’erisuyira likendi syahwera; kundi ekyabirithwibwamo kitholere ikyabya.
37 Syendi syasikya Nyamuhanga wa bathatha wiwe; kutse syendi syatsomana eriyisunza ly’abakali kutse eyindi nyamuhanga yosi-yosi, aliwe akendi syayihamya endatha okwa buli mundu.
38 Aliwe omwakanya k’ekyo* olhukengerwa akendi syalhuha nyamuhanga w’esyombimbo sy’obutheya; olhukengerwa akendi syalhuha enyamuhanga eyo abathatha wiwe bathabya basi erilhabira omwa horo n’efeza n’amabwe w’obughuli n’ebindu ebyanzibirwe.*
39 Akendi syakolha ekyo abirithwamu erilhwa n’obubisamu obuliko esyombimbo sy’obutheya, haghuma* n’enyamuhanga ey’ehandi. Akendi syaha abakamusikaya* olhukengerwa lhunene, akendi syaleka ibathabalha okwa bangyi; kandi akendi syaghaba ekithaka akakighulya.
40 “Omwa mughulhu w’enduli omwami w’eyikwa akendi syasukumana* nayu, n’omwami w’eyighulhu akendi syamwasira ng’erithu iniane n’ebiggali n’abakaghendaya esyosabayiri n’amathu mangyi; kandi akendi sy’ingira omwa bihugho iniabirya-birya ng’eribogha ly’amaghetse.
41 Kandi akendi sy’ingira omwa kihugho ky’Amapambo,* n’ebihugho bingyi bikendi syathinirwa. Aliwe abakendi syabalha omwa byalha biwe babano: Edomu na Moabu n’ekitsweka kikulhu ky’Abaamoni.
42 Kandi akendi syalholha embere erisumba ebyalha biwe erilhwa n’ebihugho; n’ekihugho kye Misiri sikyendi syabalha.
43 Neryo akendi syathabalha okwa by’obughuli ebibisirwe, ehoro n’efeza n’ebindu byosi ebyanzibirwe* ebye Misiri. Abanya Libia n’ab’Etiopia bakendi syamukwama.
44 “Aliwe esyongulhu esikalhua ebulhua lyuba n’eyighulhu sikendi syamutabura, neryo omwa kinigha kinene akendi syayahwerekererya n’erithoghotherya ighuma abangyi.
45 Kandi akendi syahanda esyohema siwe sy’ekikali ahakathi-kathi k’engetse nene n’ekithwe kibuyirire ky’Amapambo;* neryo akendi syathwangana erihikira ighuma okw’ihwaho liwe, syendi syabana kiwathikya.
Emyatsi Ahikwa
^ Kutse “kandi erimubera lhuhimbo lhw’obutheya.”
^ Kutse “olhulengo olhw’embere.”
^ Kutse “endaghane.”
^ Kutse “esanamu eyikolirwe omwa byuma ebiyeyirye.”
^ Kutse “abaana b’ababbandi.”
^ Kutse “amahe.”
^ Kutse “Bubuya.”
^ Kinywe okwa kinywe, “akendi syahira obusu bwiwe.”
^ Kutse “akendi syakolha endaghane nayu.”
^ “Oyukalihisaya,” obundi ow’emisolho. Kutse “oyukakolesaya abandi b’emibiiri.”
^ Kutse “mbulha-mughaso.”
^ Kutse obundi, “isibayitsulirye.”
^ Kutse “ebinywe ebikatha-kathenie.”
^ Kutse “amahe.”
^ Kutse obundi, “isibayitsulirye.”
^ Kutse “obulhambu bwosi obwa bathabereko.”
^ Kinywe okwa kinywe, “obunenehe.”
^ Kutse “eribogha mw’amaghetse.”
^ Kutse “erikangya obuhithane.”
^ Kutse “amahe.”
^ Kutse “buthebya.”
^ Kutse “iniane omwa mwanya wiwe.”
^ Kutse “eby’obughuli.”
^ Kutse “eriwathikibwa na.”
^ Kutse obundi, “abo akasikaya.”
^ Kutse “erihumirana.”
^ Kutse “Bubuya.”
^ Kutse “eby’obughuli.”
^ Kutse “Bubuya.”
