Daneri 10:1-21
10 Omo mwaka wakasathu ow’Omwami Kiro owe Persia, Daneri oyuwabya akahulhwamo Beltesaza mwabisulirwa; n’omwatsi abya w’okwenene kandi aby’ahambire okwa malhwa manene. Neryo mwayitheghererya omwatsi kandi mwahebwa eriyitheghererya erihambire okwa by’alhangira.
2 Omwa biro ebyo, ingye Daneri nabya inamabirighunza mayenga asathu awahwererere inganemulira.
3 Mundalya ebyalya ebyuwene, n’enyama kutse evini muyithingira omwa buno bwaghe, kandi mundahakaba amaghutha wosi-wosi ahabw’amayenga asathu awahwererere.
4 Okwa kiro kya 24 eky’okwezi kw’erimbere, ingane okwa musike w’olhusi lhunene, Tigiri,*
5 munasumba ameso namalhangira omulhume oyuwambere olhukimba lhw’ekitani, n’omwa mbindi yiwe imune omukabba w’ehoro eye Ufazi.
6 Omubiri wiwe abya ng’ekrisolito, obusu bwiwe ibuwithe erisosa ly’akarabyo, ameso wiwe iniali ng’esyongoleryo sy’omuliro, amaboko wiwe n’ebisandu biwe ibiri ng’ekopa eyikangabasenie, n’omulenge w’ebinywe biwe iniali ng’omulenge w’abandu bangyi.
7 Ingye Daneri n’ingye musa nabonokerawa; abalhume ababya naghe mubathalhangira ebya nalhangira. Aliwe mubakwa obuba bunene bamathibitha, bamayabisama.
8 Neryo munasighalha ingyuwene, kandi omughulhu nalhangira ebyabya omw’ibonokerwa linene eri, munahononoka, namathumba kutsibu, ingye wosi n’amahwa akaghalha.
9 Neryo munowa omulenge wiwe akakania; aliwe nabere ing’owa akabugha, munahwera omwa thulho n’obusu bwaghe ibune okwa kithaka.
10 Aliwe neryo ebyalha mubyanyithulhako, byamanyitsingya-tsingya namahanganira okwa byalha byaghe n’amarwe.
11 Neryo mwambwira athi:
“Daneri, iwe mundu w’obughuli bunene,* hulikirira ebinywe ebyo ngayakubwira. Neryo wimane omo mwanya wawu, kundi indyathumawa eya wuli.”
Abere anyibwira eki, mun’imana, inganemuthithimana.
12 Neryo mwambwira athi: “Daneri, siwubahe. Ebinywe byawu byabiryowibwa eritsuka okwa kiro ky’erimbere omughulhu wahira omuthima wawu okw’iyitheghererya n’eriyikehya embere sya Nyamuhanga wawu, naghe namasa busana n’ebinywe byawu.
13 Aliwe omunya-mwami w’obwami bwe Persia mwanyikakirya ahabw’ebiro 21. Aliwe neryo Mikaeli* omughuma w’okwa banya-mwami bakulhu-bakulhu,* mwasanyiwathikya; munabyayo ingane n’abami be Persia.
14 Nabiryasa erisyakukengesya ebikendi syahika okwa bandu benyu okw’ihwererera ly’ebiro, kundi esyonzoli ni sy’ebiro ebikasa.”
15 Neryo abere akanyibwira ebinywe ebi mununamya omuthwe, namabya mumu.
16 Neryo oyuwabya asosire omundu mwathulha okwa minywe yaghe, neryo munakumbulha obuno bwaghe, namabwira oyuw’imene embere syaghe indi: “Mukama waghe, ngathithimana n’engitsi busana n’ebya ngalyalhangira, kandi singwithe kaghalha.
17 Neryo ingye mughombe wawu mukama waghe nangakania nawu indi iwe mukama waghe? Kundi singakiwithe akaghalha, n’omuka syakinyirimo.”
18 Oyuwabya asosire omundu mwathasyanyithulhako, amamba akaghalha.
19 Neryo mwabugha athi: “Siwubahe, iwe mundu w’obughuli bunene.* Wubye n’obuholho. Wubye n’amaaka, ee, wubye n’amaaka.” Abere akakania naghe munabya n’akaghalha, namabugha indi: “Mukama waghe kanaya, kundi wamabirimba akaghalha.”
20 Neryo mwabugha athi: “Wunasi ekyamaleka ingasa eyo wuli? Ngayasubayo eriyalhwa n’omunya-mwami we Persia. Ngendibya ingaghenda, omunya-mwami we Gurisi akendyasa.
21 Aliwe ngendi kubwira ebihandikire omwa bisakango by’okwenene. Sihali oyukanyisighika n’omuhwa omw’ebi athe Mikaeli, omunya-mwami wenyu.
