Daneri 4:1-37
4 “Ono w’omwatsi ogho Omwami Nebukadeneza akabwira abandu bosi, ebihanda, abandu b’emibughe muthina-muthina ab’ikere omwa kihugho kyosi: Obuholho bwenyu bukanyirire!
2 Ngali n’obutseme erithulha ebiminyikalho n’ebikathikaya ebyo Nyamuhanga ow’Endatha Kutsibu abirinyikolera.
3 Ebiminyikalho biwe ka ni binene, n’ebikathikaya biwe ka ni by’amaaka! Obwami bwiwe ni bwami obwa kera na kera, n’obuthabali bwiwe ni bw’esyondengo syosi.
4 “Ingye Nebukadeneza, nabya ingane buholho omwa nyumba yaghe n’engebe iyin’uwene omwa kikali kyaghe.
5 Munalhotha ekilhotho ekyanyubahisaya. Inganaghotsere omwa ngyingo yaghe, ebyo nalhangira mubyanyitha engitsi.
6 Neryo munahamulha indi banyilethere abalhume bosi b’amenge abe Babeli nuku banga nyikumbulira ekilhotho.
7 “Okwa ndambi eyo abahereri by’eby’obukumu, abathahwa, Abakaldea,* n’abakalhaghuliraya esyongununu mubasa. Nabere ingababwira ekilhotho, mubathathoka erinyikumbulirakyo.
8 Erighunzerera, Daneri mwasa, oyukahulhawamo Beltesaza erina ly’enyamuhanga yaghe kandi oyuliko omulimu w’esyonyamuhanga esibuyirire, munamubwira ekilhotho:
9 “‘Kisi Beltesaza omukulhu w’abahereri by’eby’obukumu, nganasi ngoku omulimu w’esyonyamuhanga esibuyirire ali omw’iwe kandi ngoku sihali erikumbo eryanga kukalira. Neryo nyisoborere ebyo nalhangira omwa kilhotho kyaghe n’ekyabikamanyisaya.
10 “‘Omwa syonzoli esyalhaba omwa muthwe waghe ingane omwa ngyingo yaghe, munalhangira omuthi omwakathi-kathi k’ekihugho, abya muuli kutsibu.
11 Omuthi mwakulha amabya w’amaaka n’akasweswe kagho mukahika okwa lhubulha, kandi iniakalhangirirawa omwa kihugho kyosi.
12 Ebikoma byawu ibyuwene kutsibu, n’ebighuma byawu ini binene, kandi ikuli eby’erirya okwa bosi. Ebisoro ibikasa omwa kyutsutsu kyagho, n’esyonyonyi sy’omwa kyanya isik’ikalha omwa mithahi yawu n’ebihangikwa* byosi ibikalya kugho.
13 “‘Nabere nganemuthungerera ebyabya omwa syonzoli sy’omuthwe waghe ingane okwa ngyingo yaghe, munalhangira omutheya, oyubuyirire, akandaghalha omwa kyanya.
14 Mwabirikira omwa mulenge munene athi: “Mukonde omuthi, muthwe emithahi yagho, mulhaghalhaye ebikoma byagho, kandi mutsatsange ebighuma byagho! Ebisoro ebiri omw’isi syagho bithibithe, n’esyonyonyi esiri omwa mithahi yagho.
15 Aliwe muleke ekisiki n’emirihi* yakyo omwa kithaka, ikinabohire omwa museghe w’ekyuma n’ow’ekopa, omwa kisuki. Kitsape omwa kime ky’ekyanya, n’obwikalho bwakyo bubye omwa bisoro omwa kisuki.
16 Omuthima wakyo ahindulhawe erilhua okw’ibya w’omundu, kihebawe omuthima w’ekisoro, kandi emighulhu musanju yikilhabeko.
17 Eri n’ihamulha ly’abatheya, n’ababuyirire bo balyasaba eki nuku abandu abaliho banga minya ngoku ow’Endatha Kutsibu ya Muthabali w’obwami bw’abandu kandi ngoku akabuha owosi-wosi oyo anzire, kandi akasingika omundu w’ahisi omwa bandu eributhabalhako.”
18 “‘Eki ky’ekilhotho ekyo ingye Omwami Nebukadeneza nalhangira; neryo iwe, kisi Beltesaza kikumbule, kundi abandi balhume bosi b’amenge ab’omwa bwami bwaghe babirilemwa erinyikumbulirakyo. Aliwe iwe wukendi thoka erikolha ekyo, kundi omulimu w’esyonyamuhanga esibuyirire ali omw’iwe.’
19 “Okwa ndambi eyo, Daneri oyukahulhawamo Beltesaza, mwakwa engitsi, n’ebyo alengekanaya mubyam’ubahisya.
“Omwami mwabugha athi, ‘Kisi Beltesaza, isiwaleka ekilhotho n’erikumbulha lyakyo bikak’ubahisya.’
“Beltesaza mwasubirya athi, ‘Mwami waghe, ambi ekilhotho ikyabya ikihambire okwa bakuponire, n’erikumbulha lyakyo okwa syonzighu syawu.
20 “‘Omuthi ogho walhangira, owakulha amabya munene kandi ow’amaaka, ogho akasweswe kagho kahika okwa lhubulha kandi owabya akalhangirirwa omwa kihugho kyosi,
21 owabyako ebikoma ebyuwene kutsibu, ebighuma binene, eby’erirya okwa bosi, ebisoro by’omoli ibik’ikalha omw’isi syagho n’esyonyonyi sy’omwa kyanya isik’ikalha omwa mithahi yagho,
22 n’iwe, iwe mwami, kundi wabiribya w’amaaka kandi ow’akaghalha, n’olhukengerwa lhwawu lhwabirikanyirira erihika okwa lhubulha, n’obuthabali bwawu bwabirihika okwa nduli-nduli sy’ekihugho.
23 “‘Neryo omwami mwalhangira omutheya, omubuyirire, inianemwandaghalha omwa kyanya, inianemubugha athi: “Mukonde omuthi kandi muthoghothayegho, aliwe muleke ekisiki n’emirihi* yakyo omwa kithaka, ikinabohire omwa museghe w’ekyuma n’ow’ekopa, omwa kisuki. Kandi ekime ky’ekyanya kikitsapaye, n’obwikalho bwakyo bubye omwa bisoro omwa kisuki erihika aho emighulhu musanju yikendi kilhabirako.”
24 Mwami, erikumbulha lya lino; n’ihamulha ly’ow’Endatha Kutsibu eritholere iryahika oko mukama waghe omwami.
25 Wukendi highithwa omwa bandu, n’obwikalho bwawu bukendibya haghuma n’ebisoro by’omoli, kandi wukendibya wukalya ebithi ng’esyonume; kandi wukendi tsapa omwa kime ky’ekyanya, n’emighulhu musanju yikendi kulhabako, erihika aho wukendi minyira ngoku ow’Endatha Kutsibu ya Muthabali w’obwami bw’abandu kandi ngoku akabuha owosi-wosi oyo anzire.
26 “‘Aliwe kundi mubabugha bathi ekisiki ky’omuthi n’emirihi* yakyo birekawe, obwami bwawu bukendi syakusubulira wabiriminya ngoku olhubulha lhunemuthabalha.
27 Busana n’ekyo, mwami, ambi iwaligha erihabulha lyaghe. Wuleke ebibi byawu omw’ikolha ekihikire, kandi wuleke ebibi byawu omw’ikangania abanakwa b’obughanyiri. Nuku wanga tsemera engebe yawu habw’omughulhu muuli.’”
28 Ebyosi ebi mubyahika oko Mwami Nebukadeneza.
29 Habere halhaba amezi ikuminabiri, abya inianemuyighendya-ghendya okwa lhuthwe lhw’enyumba y’okwa kikali kye Babeli.
30 Omwami abya inianemubugha athi: “Mbwino eyi si Babeli Mukulhu eyo ingyuwene-wene nahimba busana n’enyumba y’obwami omwa kaghalha kaghe, obuthoki, amaaka, n’olhukengerwa lhw’obukulhu bwaghe?”
31 Omwami abere athali aghunza eribugha ebi, omulenge mwandaghalha akalhua elhubulha athi: “Bino by’ebyabiribuwa okw’iwe, Mwami Nebukadeneza, ‘Wamalhusibwako obwami,
32 kandi wamahighithwa omwa bandu. Obwikalho bwawu bukendibya haghuma n’ebisoro by’omoli, kandi wukendibya wukalya ebithi ng’esyonume, n’emighulhu musanju yikendi kulhabako, erihika aho wukendi syaminyira ngoku ow’Endatha Kutsibu ya Muthabali w’obwami bw’abandu kandi ngoku akabuha owosi-wosi oyo anzire.’”
33 Okwa ndambi eyo ekinywe mukyabererera oku Nebukadeneza. Mwahighithwa omwa bandu, amatsuka erirya ebithi ng’esyonume, n’omubiri wiwe amatsapa omwa kime ky’ekyanya, n’esyonzwiri siwe syamahika okw’ibya nyiri-nyiri ng’ebyeya by’erisamba n’ebinyalha biwe ng’esyonyalha sy’esyonyonyi.
34 “Emighulhu eyo yabere yahwa, ingye Nebukadeneza munalhalhamira omwa kyanya, obulengekania bwaghe mubwatsuka erithasyakolha ndeke; neryo munapipa ow’Endatha Kutsibu, kandi Oyuliho kera na kera munamupipa n’erimuha olhukengerwa, kundi erithabalha liwe n’ithabalha lya kera na kera n’obwami bwiwe ni bw’esyondengo syosi.
35 Abosi abali okwa kihugho bakalhangirawa nga buyira, kandi akakolha erikwamana n’erisonda liwe omwa kathi-kathi k’amahe w’elhubulha n’abali okwa kihugho. Kandi sihali oyuwanga mukakirya* kutse erimubwira athi, ‘Wamakolhaki?’
36 “Okwa ndambi eyo obulengekania bwaghe mubwatsuka erithasyakolha ndeke, neryo olhukengerwa lhw’obwami bwaghe, ekitsumbi kyaghe, n’erikangabasania lyaghe mubyanyisubako. Abakulhu-bakulhu b’obuthabali bwaghe n’ab’ebitsumbi mubanyisondya n’omuhwa, kandi munasubibwa oko bwami bwaghe, kandi munathasy’ongerwa amaaka manene.
37 “Neryo ingye Nebukadeneza, ngapipa n’erihamya n’eriha Omwami w’elhubulha y’olhukengerwa, kundi emibiiri yiwe yosi ni y’okwenene, esyonzira siwe ni sy’obulingirirania, kandi kundi akathoka erihemulikania abakalendera omwa miyiheko.”
