Daneri 5:1-31
5 Omwami Belsaza, mwatheghekera abandu biwe rukumi ab’ebitsumbi b’erirya inene, kandi abya inianemunywira embere syabu y’evini.
2 Busana n’erithamira omwa vini, Belsaza mwahamulha athi balethe ebikopo by’ehoro n’eby’efeza ebyo thatha wiwe Nebukadeneza alhusaya omwa hekalhu mwe Yerusalemu, nuku omwami n’abandu biwe b’ebitsumbi, abahweki biwe n’abandi bakali biwe banga binywiramo.
3 Neryo mubaletha ebikopo by’ehoro ebyalhusibawa omwa hekalhu y’omwa nyumba ya Nyamuhanga e Yerusalemu, neryo omwami n’abandu biwe b’ebitsumbi, abahweki biwe n’abandi bakali biwe mubabinywiramo.
4 Mubanywa evini, bamapipa esyonyamuhanga sy’ehoro n’efeza, esy’ekopa, ekyuma, emithi, n’amabwe.
5 Okwa ndambi eyo, eminwe y’ebyalha by’omundu muyabuthuka, yamatsuka erihandika okwa lhuhimbo olhusiripire olhw’ekikali ky’omwami ahasamalirene n’omuthaghalha w’etara neryo omwami mwalhangira olhuhandi lhw’enyuma olhw’ebyalha ibinemuhandika.
6 Neryo omwami mwaghunduka,* n’ebyo aby’akalengekania mubyamwitha obuba, ebihinga biwe mubyatukumira, n’amarwe wiwe mwahindangana.
7 Omwa mulenge munene omwami mwabirikira abathahwa, Abakaldea,* n’abakalhaghuliraya esyongununu. Omwami mwabwira abalhume b’amenge abe Babeli athi: “Omundu wosi-wosi oyukendi soma ebinywe ebi n’erinyikumbulirabyo akendy’ambalibwa esyongyimba sy’erangyi y’epapo, ekikwangyi eky’ehoro kikendi hirwa omwa bikya biwe, kandi akendi thabalha ng’owakasathu omo bwami.”
8 Neryo abanya menge bosi b’omwami mubasa, aliwe mubathathoka erisoma ebihandiko kutse eribwira omwami ekya bikamanyisaya.
9 Neryo Omwami Belsaza mwakwa obuba bunene n’obusu bwiwe mubwaghunduka; n’abandu biwe b’ebitsumbi mubakwa engitsi.
10 Busana n’ebinywe by’omwami n’abanya bitsumbi biwe, nyabaghole mwingira omwa kisenge ky’emikonga. Nyabaghole mwabugha athi: “Mwami, wukothe. Siwuleke ebya wukalengekanaya bikakubahisya, kutse erileka obusu bwawu bukaghunduka.
11 Omo bwami bwawu mune omulhume* oyuliko omulimu w’esyonyamuhanga esibuyirire. Omwa biro bya thatha wawu, eriminya n’amenge ng’amenge w’esyonyamuhanga byabya omw’iyo. Omwami Nebukadeneza thatha wawu mwamusombolha eribya mukulhu w’abahereri b’eby’obukumu, abathahwa, Abakaldea,* n’abakalhaghuliraya esyongununu; thatha wawu mwakolha eki, mwami.
12 Kundi Daneri oyo omwami ahulhamo Beltesaza, aby’ako omulimu owathe wa buli kiro n’eriminya n’amenge w’erikumbulha ebilhotho, erisoborera emikya, n’erisoha emyatsi eyikalire.* Neryo Daneri abirikirawe, akendi kubwira ngabikamanyisayaki.”
13 Neryo Daneri mwalethwa embere sy’omwami. Omwami mwabulya Daneri athi: “Niwe Daneri ow’okwa Bayuda abanyewa, oyo thatha waghe omwami alhusaya e Yuda?
14 Nabiriowa ebikuhambireko ngoku omulimu w’esyonyamuhanga ali omw’iwe kandi ngoku eriyitheghererya n’eriminya n’amenge awathe wa buli kiro biri omw’iwe.
15 Abanya menge n’abathahwa mubakalethawa embere syaghe erisyasoma ebihandiko ebi n’eribugha ekya bikamanyisaya, aliwe mubakalemawa eribugha ekya bikamanyisaya.
16 Aliwe nabiriowa ngoku wukathoka erikumbulha n’erisoha emyatsi eyikalire.* Neryo wamathoka erisoma ebihandiko n’erinyikumubulirabyo, iwukendyambalibwa esyongyimba sy’epapo, ekikwangyi ky’ehoro ikyahirwa omwa bikya byawu, kandi iwathabalha ng’owakasathu omo bwami.”
17 Neryo Daneri mwasubirya omwami athi: “Wubye n’ebihembo byawu kandi ebihembo ebyo wubihe abandi. Aliwe ngendi somera omwami ebihandiko n’erimuminyisya ekya bikamanyisaya.
18 Mwami, Nyamuhanga Omuthoki w’Ebyosi mwaha Nebukadeneza thatha wawu y’obwami n’obukulhu n’ekitsumbi n’amaaka.
19 Busana n’obukulhu obo amuha, abandu bosi, ebihanda, abandu b’emibughe muthina-muthina ibakathithimana omwa buba embere siwe. Iniak’itha kutse inialeka owosi-wosi oyo amanza, kandi iniahamya kutse erihemulikania owosi-wosi oyo amanza.
20 Aliwe omwa muthima wiwe mwabere mwasa emiyiheko n’ekirimu kiwe erikalha, n’eryasa mw’erighundu, mwalhusibwa okwa kithumbi kiwe ky’obwami, kandi amalhusibwako ekitsumbi kiwe.
21 Mwahighithwa omwa bandu, n’omuthima wiwe mwabya ng’ow’ekisoro, n’obwikalho bwiwe mubwabya haghuma n’esyopunda sy’omoli. Mwabya akalya ebithi ng’esyonume, n’omubiri wiwe mwatsapa omwa kime ky’ekyanya, erihika aho aminyira ngoku Nyamuhanga ow’Endatha Kutsibu ya Muthabali w’obwami bw’abandu kandi ngoku akabuha oyo anzire.
22 “Aliwe iwe, Belsaza mughalha wiwe, siwuthayikehya omwa muthima wawu, nomwakine indi wunasi ebyosi ebi.
23 Omwakanya k’ekyo, wabiriyihaghatha omw’ighaya Omukama w’elhubulha, kandi muwukabugha wuthi bakulethere ebikopo by’omwa nyumba yiwe. Neryo iwe n’abanya bitsumbi bawu, abahweki bawu n’abandi bakali bawu mumukabinywiramo evini n’eripipa esyonyamuhanga sy’efeza n’ehoro, esy’ekopa, ekyuma, emithi, amabwe, esyonyamuhanga esithelhangiraki kandi esithowaki n’eriminyaki. Aliwe siwuthaha olhukengerwa oku Nyamuhanga oyuhambire omuka wawu n’esyonzira syawu syosi omwa byalha biwe.
24 Neryo ebyalha yulyabithuma, erisyasakanga ebihandiko ebi.
25 N’ebihandiko ebiryasakawa bya bino: MENE, MENE, TEKELI, na PARSINI.
26 “Ebinywe ebi ekya bikamanyisaya kya kino: MENE, Nyamuhanga athi ebiro by’obwami bwawu bibarirwe kandi abiribughunzaho.
27 “TEKELI, wabiripimwa okwa munzani wamabya iwubulirweko.
28 “PERESI, obwami bwawu bwabirighabwa, bwabirihebwa Abamedi n’Abapersia.”
29 Neryo Belsaza mwalhaghira, bamambalya Daneri olhukimba lhw’epapo n’ekikwangyi ky’ehoro kyamahirwa omwa bikya biwe; neryo bamaranga busana nayu bathi akendibya wakasathu omo bwami.
30 Ekiro ikya n’ekyo omwa kiro, Omwami Belsaza Omukaldea mw’ithibwa.
31 Na Dario Omumedi mwahebwa obwami; abya w’emyaka nga 62.
Emyatsi Ahikwa
^ Kutse “emisosere y’omwami muyahinduka.”
^ Ni bugha ambu, egurupu y’abasi ndeke eby’obukumu n’erilhaghulirya esyongununu.
^ Kutse “omulhume oyuwanga thoka.”
^ Ni bugha ambu, abandu ababya basi ndeke eby’obukumu n’erilhaghulirya esyongununu.
^ Kinywe okwa kinywe, “eriboholha amakundu.”
^ Kinywe okwa kinywe, “eriboholha amakundu.”
