Daneri 7:1-28
7 Omo mwaka w’erimbere ow’Omwami Belsaza owe Babeli, Daneri mwalhotha amalhangira ebindu omwa syonzoli sy’omuthwe wiwe inianakesirye okwa ngyingo yiwe. Neryo mwahandika ekilhotho; mwahandika ndeke ebyosi.
2 Daneri mwabugha athi:
“Munalhangira omwa nzoli syaghe omwa kiro, neryo lebaya! amahunga ani w’ekyanya abya inianemuddunga engetse nene.
3 Neryo ebisoro bbini binene-binene mubyalhua omwa ngetse, obuli kighuma ikiri mbaghane okwa kindi.
4 “Eky’erimbere kyabya ng’endale kandi ikiwithe ebipupa by’erisamba. Munalhangira erihika aho ebipupa byakyo byatsupirawa kukyo, nakyo mukyahanganibwa okwa kithaka kyamimanibwa okwa maghulhu abiri ng’omundu, neryo kyamahebwa omuthima w’omundu.
5 “Neryo lebaya! ekindi kisoro, ekyakabiri, ekiri ng’edubu. Mukyasumbwa okwa lhuhandi lhughuma, esyonganga isathu syabya omwa buno bwakyo ahakathi-kathi k’ameno wakyo; neryo mukyabwirwa indi, ‘Hangana, wulye eminyoku mingyi.’
6 “Enyuma w’eki munalholha embere erisamalira, neryo lebaya! ekindi kisoro ekiri ng’engwe, aliwe okwa mughongo wakyo kwabya ebipupa bbini ebiri ng’eby’ekinyonyi. Ekisoro eki kyabya kiwithe emithwe ini, kandi mukyahebwa obuthoki bw’erithabalha.
7 “Enyuma w’ebi munalholha embere erisamalira omwa syonzoli omwa kiro, neryo munalhangira ekisoro ekyakani, ekik’itha obuba kandi ekikubahisaya kandi eky’amaaka awathe wa buli kiro, kandi ikiwithe ameno manene-manene aw’ekyuma. Ikikasathangaya omwa meno n’eritsutsanga obuli kindu, ebikasighalira ikikabilyathangirira omwa bisandu byakyo. Kyabya mbaghane okwa bindi bisoro ebyatsuka eriasa, kandi kyabya kiwithe amahembe ikumi.
8 Nabere ingayitheghererya ndeke amahembe, lebaya! erindi lihembe, akahembe kake, mukalhasa mugho, neryo amahembe asathu aw’okwa w’erimbere mwakulhangwa embere syako. Neryo lebaya! ameso awali ng’aw’omundu abya okwa kahembe aka, kandi kabyako obuno obukabugha eby’emiyiheko.*
9 “Munalholha embere erisamalira erihika aho ebithumbi by’obwami byatheghekanibirawa, n’ow’Ebiro n’Ebiro mw’ikalha okwa kithumbi. Esyongyimba siwe syabya sy’enzeru* ng’esyonzururu, esyonzwiri sy’okwa muthwe wiwe syabya sihenirye ng’obweya bw’enzeru obw’embuli. Ekithumbi ky’obwami kiwe kyabya birimi by’omuliro; ebiringo byakyo abya muliro owakaka.
10 Olhusi lhw’omuliro lhwabya lhukasenda erilhua embere siwe. Esyongumi n’esyongumi syabya isinemumuherezya, n’amakumi w’esyongumi emirundi makumi w’esyongumi babya b’imene embere siwe. Ekoti muy’ikalha n’ebitabu mubyasanzulhwa.
11 “Munalholha embere erisamalira okwa ndambi eyo busana n’omulenge w’ebinywe by’emiyiheko* ebyo erihembe lyabya likabugha; munasamalira erihika aho ekisoro k’ithibirawa n’omubiri wakyo amatsandalikanibwa n’erihebwayo nuku kihisibawe omwa muliro.
12 Aliwe ebindi bisoro, mubyalhusibwako erithabalha lyabyo, n’esyongebe syabyo musyongerwa habw’omughulhu n’ekirimo.
13 “Munalholha embere erisamalira omwa syonzoli omwa kiro, kandi lebaya! omwa bithu by’ekyanya, mumwasira oyusosire mughalha w’omundu; neryo mwahika ahali ow’Ebiro n’Ebiro, neryo mubamuletha hakuhi embere sy’Oyo.
14 Neryo mwahebwa obuthabali, erisikya, n’obwami, nuku abandu, ebihanda, abandu b’emibughe muthina-muthina abosi bamukolere. Obuthabali bwiwe ni buthabali bwa kera na kera obuthendi syahwaho, n’obwami bwiwe si bwendi syathoghothibwa.
15 “Ingye Daneri, ekirimu kyaghe mukyasyendekerera omwa kathi kaghe kundi esyonzoli syaghe musyany’itha obuba.
16 Munaseghera hakuhi n’omughuma w’okwa babya bimeneho erimubulya ebi nga bikamanyisayaki omo kwenene. Neryo mwasubirya amanyiminyisya erikumbulha ly’emyatsi eyi.
17 “‘Ebisoro binene-binene ebi, bbini, ni bami bbani abakendi syakununuka okwa kihugho.
18 Aliwe ababuyirire ab’ow’Obuthoki Obulengethukireyo bakendyangirira obwami, kandi obwami bukendi syabya bwabu kera na kera, ee, kera na kera.’
19 “Neryo munanza eriminya bingyi ebihambire okwa kisoro ekyakani, ekyabya mbaghane okwa bindi ebyosi; kyabya kik’ubahisya kutsibu, ikiwithe ameno w’ekyuma n’esyonyalha sy’ekopa, kandi ikikasathangaya n’eritsutsanga obuli kindu, n’ebikasighalira ikyabilyathangirira omwa bisandu byakyo;
20 n’ebihambire okwa mahembe ikumi aw’okwa muthwe wakyo, n’erindi lihembe eryalhasa, eryo awasathu athogha embere syalyo, erihembe eryabyako ameso n’obuno obukabugha eby’emiyiheko* kandi eryalhangirika ini linene okwa wandi.
21 “Munalholha embere erisamalira erihembe eryo likalhwa n’ababuyirire, kandi lyabya irinemubakinda,
22 erihika aho ow’Ebiro n’Ebiro asira, hamabya eritswera, ababuyirire ab’ow’Obuthoki Obulengethukireyo bamasingana, n’obuthuku obwahirawaho busana n’ababuyirire erimya obwami mubwahika.
23 “Bino byo abugha: ‘Ekisoro ekyakani, ni bwami obwakani obukendi syabya okwa kihugho. Bukendi syabya mbaghane okwa wandi mami wosi, kandi bukendi syasathangya ekihugho kyosi, ibwakilyathangirira, n’erikitsutsanga.
24 Amahembe ikumi, abami ikumi bakendi syahangana erilhua omo bwami obo; ihathasya hangana owundi mwami babirilhuaho, akendi syabya mbaghane okwa b’erimbere, kandi akendi syahemulikania abami basathu.
25 Akendi syakania nabi ok’ow’Endatha kutsibu, kandi akendi syabera eritsutsubya ababuyirire ab’ow’Obuthoki Obulengethukireyo. Akendi syanza erihindulha emighulhu n’ebilhaghiro, neryo bakendi syahirwa omwa byalha biwe habw’omughulhu, emighulhu, n’embindi y’omughulhu.*
26 Aliwe Ekoti muy’ikalha, bamamulhusyako obuthabali bwiwe, nuku banga mughunzaho n’erimuthoghotherya ighuma.
27 “‘Neryo obwami, obuthabali, n’olhukengerwa lhw’amami awali omwisi sy’olhubulha lhwosi mubyahebwa abandu ababuyirire ab’ow’Obuthoki Obulengethukireyo. Obwami bwabu ni bwami bwa kera na kera, n’amathabali wosi akendi syabakolera n’eribaghondera.’
28 “Hano h’omwatsi akahwera. Ingye Daneri ebyo nabya ingalengekania mubyanyubahisya, mubyaleka ingaghunduka;* aliwe munalholha embere eribika omwatsi omwa muthima waghe.”
