Daneri 6:1-28
6 Dario mwalhangira ikyuwene erihiraho abatheya b’amalhambu* 120 omwa bwami bwosi.
2 Habya abakulhu-bakulhu basathu ababya balebererya babu, Daneri ini mughuma w’okw’ibo; neryo abatheya b’amalhambu* abo ibakabahikayako emyatsi, nuku omwami syaheraye kindu.
3 Daneri mwalholha embere erilhangirika ku ni w’embaghane okwa bandi bakulhu-bakulhu n’abatheya b’amalhambu,* kundi abyako omulimu owathe wa buli kiro, neryo omwami mwanza erimuyira mwa mukulhu omwa bwami bwosi.
4 Okwa buthuku obo abakulhu-bakulhu n’abatheya b’amalhambu mubasondekania eky’erihandikiriramo Daneri ekihambire okwa myatsi y’ekithabale,* aliwe mubathabana eky’erimuhandikiriramo kutse obulibathangania bwosi-bwosi, kundi abya muyiketherwa kandi obughalhaghandya kutse obulibathangania mubithabanika omw’iyo.
5 Neryo abalhume aba mubabugha bathi: “Daneri oyu sithwendi mubanako nahake eky’erimuhandikiriramo, mbwino ithunalyayilhabaya omwa mighambo ya Nyamuhanga wiwe.”
6 Neryo abakulhu-bakulhu n’abatheya b’amalhambu aba abosi haghuma mubaghenda eyiri omwami, bamamubwira bathi: “Mwami Dario, wukothe.
7 Abakulhu abosi ab’omwa kikali, abawathikya b’abatheya b’amalhambu, abatheya b’amalhambu,* abakulhu-bakulhu, n’abagavana babirilighirana erihiraho ekihamulho ky’omwami n’erihiraho ekilhaghiro kithi omwa biro 30 owosi-wosi oyuwanga saba enyamuhanga yosi-yosi kutse omundu athe iwe, mwami, atholere iniaghuswa omwa kyuna ky’esyondale.
8 Neryo, mwami, wughumaye ekihamulho kandi wukihamayeko, nuku kibye isikyanga hindulhwa, kundi ekilhaghiro ky’Abamedi n’Abapersia, sikyanga hindulhwa.”
9 Neryo Omwami Dario mwahamya okwa kihamulho n’okwa kilhaghiro.
10 Aliwe Daneri abere anaminya ngoku ekihamulho kyabirihamibwako, mwaghenda omwa nyumba yiwe, omwa kisenge ky’endatha ekiriko amadirisa awakyungwire awasamalirene ne Yerusalemu. Kandi mirundi isathu okwa kiro iniakakukama, iniasaba, n’eripipa Nyamuhanga wiwe ngoku anabya akakolha eki kithe kyabya.
11 Okwa ndambi eyo, abalhume abo mubayiturubikamo bameya Daneri inianemusaba n’erilemba-lemba Nyamuhanga wiwe athi amuwathikaye.
12 Neryo mubaghenda eyiri omwami, bamamw’ibukya okwa kilhaghiro, bathi: “Muwuthahamya okwa kilhaghiro ekikabugha kithi omwa biro 30 omundu wosi-wosi amasaba enyamuhanga yosi-yosi kutse omundu athe iwe, mwami, atholere iniaghuswa omwa kyuna ky’esyondale?” Omwami mwasubirya athi: “Omwatsi anakanganibwe ndeke erikwamana n’ebilhaghiro by’Abamedi n’Abapersia, ebithe byanga hindulhwa.”
13 Mubalhuaho ibabwira omwami bathi: “Daneri ow’okwa Bayuda abanyewa, syathakusikya, iwe mwami, kutse erisikya ekilhaghiro ekyo wahamayako, aliwe akasaba mirundi isathu okwa kiro.”
14 Omwami abere akan’owa eki, mwakwa obulighe kutsibu, neryo mwalengaho eribana enzira eyo angalhamiryamo Daneri; eryuba mulyahika okw’ilenga inianemulengaho kutsibu erianza erimulhamya.
15 Erighunzerera abalhume abo abosi haghuma mubaghenda eyiri omwami, bamamubwira bathi: “Wuminye kino, iwe mwami ngoku ekilhaghiro ky’Abamedi n’Abapersia kiri kithi, ekilhaghiro kyosi-kyosi kutse ekihamulho ekyo omwami abirihiraho sikyanga hinduka.”
16 Neryo omwami mwahamulha, neryo mubaletha Daneri bamamughusa omwa kyuna ky’esyondale. Omwami mwabwira Daneri athi: “Nyamuhanga wawu oyowunemulholha embere erikolera akendi kulhamya.”
17 Neryo mubaletha eribwe bamalihira okwa bwingiriro* bw’ekyuna, n’omwami mwalihirako estambu y’embeta yiwe n’estambu y’embeta y’abanya bitsumbi biwe, nuku sihabye ekyosi-kyosi ekihambire oku Daneri ekikahindulhawa.
18 Neryo omwami mwaghenda omwa kikali kiwe. Mubwakya iniane omwa kisibo kandi mwaghana eriyitsemesya* lyosi-lyosi kandi mwathaghotsera.*
19 Erighunzerera, omwa mitsange omwami mwahangana amanguha eyiri ekyuna ky’esyondale.
20 Abere ahika hakuhi n’ekyuna, mwabirikira Daneri omwa mulenge w’obulighe. Omwami mwabulya Daneri athi: “Daneri, omughombe wa Nyamuhanga oyuliho, Nyamuhanga wawu oyowukalholha embere erikolera anabirikulhamya okwa syondale?”
21 Daneri mwalhuaho iniasubirya omwami athi: “Mwami, wukothe.
22 Nyamuhanga waghe mwakathuma omumalaika wiwe amakumba amuno w’esyondale, sisithanyikolha nabi kundi singaliko musango embere siwe; kutse singwithe ekibi kyosi-kyosi ekya nakukolere, mwami.”
23 Omwami mwatsema kutsibu, neryo mwahamulha athi Daneri alhusibawe omwa kyuna. Daneri abere alhusibwa omwa kyuna, abya iniane ndeke, kundi mwayikethera Nyamuhanga wiwe.
24 Neryo omwami mwahamulha, n’abalhume abahandikirira* Daneri mubalethwa, bamaghuswa omwa kyuna ky’esyondale, haghuma n’abaana babu n’abakali babu. Isibali bahika n’okwa kithaka, esyondale musyabawirira syamakereghesa amakuha wabu wosi.
25 Neryo Omwami Dario mwahandikira abandu abosi, ebihanda, n’abandu b’emibughe muthina-muthina ababya b’ikere omwa kihugho kyosi, athi: “Obuholho bwenyu bukanyirire!
26 Ngahiraho ekihamulho indi omwa bitsweka byosi by’obwami bwaghe, abandu batholere ibathithimana omw’ubaha Nyamuhanga wa Daneri. Kundi ni Nyamuhanga oyuliho kandi akakotha kera na kera. Obwami bwiwe sibwendi syathoghothibwa, n’obuthabali bwiwe ni bwa kera na kera.
27 Akasabulha, akalhamaya, kandi akakolha ebiminyikalho n’ebikathikaya omwa lhubulha n’okwa kihugho, kundi mwakalhamaya Daneri okwa syonyalha sy’esyondale.”
28 Neryo Daneri oyu mwakulha-kulhana omo bwami bwa Dario n’omo bwami bwa Kiro Omupersia.
