Daneri 3:1-30
-
Esanamu y’ehoro ey’Omwami Nebukadeneza (1-7)
-
Akalhaghira athi esanamu yiramibawe (4-6)
-
-
Abahebrania basathu bakahirawako olhubanza lhw’erithendibya bowa (8-18)
-
“Sithwendi kolera esyonyamuhanga syawu” (18)
-
-
Erighuswa omw’irunga ly’omuliro (19-23)
-
Erisabulhwa omwa muliro omwa nzira y’ekithiko-thiko (24-27)
-
Omwami akapipa Nyamuhanga w’Abahebrania (28-30)
3 Omwami Nebukadeneza mwakolha esanamu y’ehoro ey’obuuli bw’esyokyubbiti 60* n’obunene bw’esyokyubbiti 6.* Mwasingikayo omwa bwerere bwe Dura omwa provisi* ye Babeli.
2 Neryo Omwami Nebukadeneza mwalhaghira athi bahindanaye abatheya b’amalhambu,* abawathikya b’abatheya b’amalhambu, abagavana, abahabuli, ababikyi, abatsweri, abaramuzi, n’abathabali abosi ab’omwa syoprovisi* eryasa okwa mukonga w’erikyungulha buthongole eriramya esanamu eya Omwami Nebukadeneza asingika.
3 Neryo abatheya b’amalhambu,* abawathikya b’abatheya b’amalhambu, abagavana, abahabuli, ababikyi, abatsweri, abaramuzi, n’abathabali abosi ab’omwa syoprovisi* mubahindana okwa mukonga w’erikyungulha buthongole eriramya esanamu eya Omwami Nebukadeneza asingika. Neryo mubimana embere sy’esanamu eya Nebukadeneza asingika.
4 Omurangiriri mwaranga omwa mulenge munene athi: “Inywe bandu, ebihanda, abandu b’emibughe muthina-muthina, mukalhaghirawa,
5 indi mukendibya mukowa omulenge w’erihembe, enyabulere, ekidari, enanga, enzenze, omughobiro, n’eyindi miringo yosi y’eby’omuziki, mutholere imwawa ahisi imwaramya esanamu ey’ehoro eya Omwami Nebukadeneza abirisingika.
6 Owosi-wosi oyuthendiwa ahisi akaramya akendilhuaho iniaghuswa omw’irunga ly’omuliro owakaghulhumirira.”
7 Neryo abandu abosi babere bowa omulenge w’erihembe, enyabulera, ekidari, enanga, enzenze, n’eyindi miringo yosi y’eby’omuziki, abandu bosi, ebihanda, n’abandu b’emibughe muthina-muthina, mubawa ahisi, bamaramya esanamu y’ehoro eya Omwami Nebukadeneza asingika.
8 Neryo okwa ndambi eyo abaghuma b’okwa Bakaldea mubasa, bamatsongera* Abayuda.
9 Mubabwira Omwami Nebukadeneza bathi: “Mwami, wukothe.
10 Mwami, muwahamulha wuthi obuli mundu oyukowa omulenge w’erihembe, enyabulera, ekidari, enanga, enzenze, omughobiro, n’eyindi miringo yosi y’eby’omuziki, atholere iniawa ahisi iniaramya esanamu y’ehoro;
11 kandi wuthi oyuthendiwa ahisi akaramya, atholere iniaghuswa omw’irunga ly’omuliro owakaghulhumirira.
12 Aliwe hane Abayuda balebe abo wasombolha eribya bathabali omwa provisi* ye Babeli: Sadraka, Misaki, na Abedenego. Abalhume aba sibathakusikya mwami. Sibali kolera esyonyamuhanga syawu, kandi babirighana eriramya esanamu y’ehoro eyo wabirisingika.”
13 Neryo Nebukadeneza, omw’itsuruma kutsibu, mwalhaghira athi Sadraka, Misaki, na Abedenego balethawe. Neryo abalhume abo mubalethwa embere sy’omwami.
14 Nebukadeneza mwabugha nabo athi: “Sadraka, Misaki, na Abedenego, nina kwenene indi simuli kolera esyonyamuhanga syaghe kandi indi mwabirighana eriramya esanamu y’ehoro eyo nabirisingika?
15 Lino mukendibya mukowa omulenge w’erihembe, enyabulera, ekidari, enanga, enzenze, omughobiro, n’eyindi miringo yosi y’eby’omuziki, mwamaligha eriwa ahisi mukaramya esanamu eyo nabirikolha, ikyuwene. Aliwe mwamaghana eriramya, imukendilhuaho imwaghuswa omw’irunga ly’omuliro owakaghulhumirira. Kundi ibbwa ni nyamuhanga yahi eyanga basabulha omwa byalha byaghe?”
16 Sadraka, Misaki, na Abedenego mubasubirya omwami bathi: “Mwami Nebukadeneza, sihali ekyanga leka ithwakusubirya oko mwatsi oyu.
17 Kyamabya ikitholere ikyabya, Nyamuhanga wethu oyo thukakolera anganathoka erithusabulha omw’irunga ly’omuliro owakaghulhumirira, mwami, n’erithusabulha omwa byalha byawu.
18 Aliwe nomwanga ghana erikikolha, mwami, wuminye kino, ngoku sithwendi kolera esyonyamuhanga syawu kutse eriramya esanamu y’ehoro eyo wabirisingika.”
19 Neryo Nebukadeneza mwahithana kutsibu oku Sadraka, Misaki, na Abedenego, obusu bwiwe bwamasunza,* neryo amahamulha athi omuliro ak’ibawe, aghulhumirire mirundi musanju kwilhaba owa buli kiro.
20 Mwalhaghira abaghuma b’okwa balhume b’amaaka ab’omwa mahe wiwe athi babohe Sadraka, Misaki, na Abedenego, babaghuse omw’irunga ly’omuliro owakaghulhumirira.
21 Neryo abalhume abo mubabohwa ibanambere esyokanzu syabo, esyongyimba, esyosapeho, n’ebindi byambalho byabo, neryo mubaghuswa omw’irunga ly’omuliro owakaghulhumirira.
22 Kundi erihamulha ly’omwami lyabya likalire kutsibu, n’erirunga iryabiriseruka kwilhaba buli kiro, abalhume abaghusa Sadraka, Misaki, na Abedenego omwa muliro n’ibo babya bakwire omwa birimi by’omuliro.
23 Aliwe abalhume basathu aba, Sadraka, Misaki, na Abedenego mubawa omw’irunga ly’omuliro owakaghulhumirira ibanabohire.
24 Neryo Omwami Nebukadeneza m’ubaha kutsibu neryo aho naho mwahangana amabwira abatheya biwe athi: “Mbwino muthuthethaboha abalhume basathu, thwamabaghusa omwa muliro?” Mubasubirya omwami bathi: “Ee, mwami.”
25 Mwabugha athi: “Lebaya! Ngalhangira abalhume bbani ibanemulhaba-lhaba bwiranda omwa muliro, kandi sibalihya, n’owakani asosire ng’omughalha w’esyonyamuhanga.”
26 Nebukadeneza mwasa okwa lhukyo lhw’erirunga ly’omuliro owakaghulhumirira, amabugha athi: “Sadraka, Misaki, na Abedenego, inywe baghombe ba Nyamuhanga ow’Endatha Kutsibu, mulhuemo mwase hano!” Sadraka, Misaki, na Abedenego mubalhua omwa muliro.
27 Neryo abatheya b’amalhambu,* abawathikya b’abatheya b’amalhambu, abagavana, n’abatheya b’omwami ababya bahindene aho mubalhangira ngoku omuliro syawithe ekyo akolire okwa mibiri y’abalhume abo; isihali n’olhuywiri lhw’okwa mithwe yabo olhubebukire, esyokanzu syabo syabya isine ngoku sinalhue, kandi isibali behako n’omubebu.
28 Neryo Nebukadeneza mwabugha athi: “Nyamuhanga wa Sadraka, Misaki, na Abedenego apipawe, oyulyathuma omumalaika wiwe erisyasabulha abaghombe biwe. Mubamuyikethera, bamaghana erighondera erilhaghira ly’omwami, kandi babya ibanayitheghekire eriholha* omwakanya k’erikolera kutse eriramya enyamuhanga yosi-yosi athe Nyamuhanga wabo.
29 Busana n’ekyo ngahiraho ekihamulho indi omundu owosi-wosi, ekihanda, kutse abandu b’emibughe muthina-muthina oyukabugha nabi oku Nyamuhanga wa Sadraka, Misaki, na Abedenego atholere iniasathangibwa, n’enyumba yiwe iyabya kabbina;* kundi sihali owundi nyamuhanga oyuwanga thoka erisabulha ng’oyu.”
30 Neryo omwami mwakulya* Sadraka, Misaki, na Abedenego omw’ib’ongera ebitsumbi omwa provisi* ye Babeli.
Emyatsi Ahikwa
^ Mita nga 27 (futi 88). Lebaya Enyongezyo B14.
^ Mita nga 2.7 (futi 8.8). Lebaya Enyongezyo B14.
^ Kutse “obulhambu bwosi obwa bathabereko.”
^ Kutse “abasatrapa.”
^ Kutse “amalhambu wosi agho bathabereko.”
^ Kutse “abasatrapa.”
^ Kutse “amalhambu wosi agho bathabereko.”
^ Kutse “erihangirira.”
^ Kutse “obulhambu bwosi obwa bathabereko.”
^ Kutse “emibere yiwe muyahindukira ighuma.”
^ Kutse “abasatrapa.”
^ Kutse “kandi mubatsama emibiri yabu.”
^ Kutse obundi, “ebyabu; ebirundo by’ebise.”
^ Kinywe okwa kinywe, “mwaleka ibakulha-kulhana.”
^ Kutse “obulhambu bwosi obwa bathabereko.”
