Daneri 12:1-13

  • ‘Omughulhu w’enduli’ n’erilholha embere (1-13)

    • Mikaeli erihangana (1)

    • Ab’amenge erikolerya kutsibu (3)

    • Eriminya ery’ekwenene erikanyirira (4)

    • Daneri akahangana busana n’erighabo liwe (13)

12  “Okwa buthuku obo, Mikaeli* akendi syahangana, omunya-mwami mukulhu oyuk’imana busana n’abandu bawu.* Kandi hakendi syabya omughulhu w’obulighe obuthe bwathabyaho eritsuka aho ekihanda kikathaberaho erihika okwa buthuku obo. Okwa buthuku obo abandu bawu bakendi syabalha, obuli mundu oyukendi syabya inianahandikire omwa kitabu. 2  N’abangyi abaghotsere omwa lhuthuthu lhw’ekithaka bakendi syabuka, abandi okwa ngebe y’erikotha n’abandi okw’ihemuka n’okw’iponwa erya kera na kera. 3  “Neryo ab’amenge bakendi syakolerya kutsibu ng’erikolerya ly’ekyanya, n’abakaletha abangyi okwa lithunganene ng’esyongununu kera na kera. 4  “Iwe Daneri, wubike ebinywe ebi mwa mbitha, wubohe ekitabu erihika okwa mughulhu w’enduli. Abangyi bakendi syaya eyi n’eyi,* n’eriminya ly’ekwenene likendi syakanyirira.” 5  Neryo ingye Daneri, munasamalira namalhangira abandi babiri iban’imeneho, omughuma okwa musike ono w’olhusi n’owundi okwa musike w’omusirya olya w’olhusi. 6  Neryo omughuma mwabwira omulhume oyuwabya ambere olhukimba lhw’ekitani, oyuwabya endatha okwa maghetse w’olhusi, athi: “Hakendi lhaba mughulhu mungahi emyatsi eyikaswekaya eyi iyahika okwa nduli yayo?” 7  Neryo munowa omulhume oyuwambere olhukimba lhw’ekitani, oyuli endatha okwa maghetse w’olhusi, akasumbira ebyalha biwe by’amali n’eby’amalembe elhubulha, amalhahirya omwa lina ly’Oyuliho kera na kera athi: “Kikendi syabya okwa mughulhu owahirawaho, emighulhu eyahirawaho, n’embindi y’omughulhu.* Eritsutsanga amaaka w’abandu ababuyirire mwa bihandi-bihandi likendi syabya likanahika okwa nduli, emyatsi yosi eyi yikendi syahika okwa muhindo wayo.” 8  Neryo ingye munowa, aliwe mundayitheghererya; neryo munabugha indi: “Mukama waghe, ni byahi ebikendi syalhwiririra omo myatsi eyi?” 9  Neryo mwabugha athi: “Daneri, ghenda, kundi ebinywe ebi ni by’eribikwa mwa mbitha kandi ni by’eribohwa erihika okwa mughulhu w’enduli. 10  Abangyi bakendi syayerya, ibayihenia, kandi ibayitukurya. N’ababi bakendi syakolha omwa bubi, kandi sihali omubi oyukendi syayitheghererya; aliwe ab’amenge bakendi syayitheghererya. 11  “Neryo eritsuka okwa mughulhu obuhere obukahebawayo mughulhu wosi kikendi syalhusibwaho n’ekik’itha nye ekikaheraya erihirwaho, hakendi syabya ebiro 1,290. 12  “Obutseme buli ok’oyukabya inianalindirire n’omuhwa, kandi oyukahika okwa biro 1,335! 13  “Aliwe iwe, wughende wuhike okwa nduli. Wukendi lhuhuka, aliwe wukendi syahangana busana n’erighabo* lyawu okwa nduli y’ebiro.”

Emyatsi Ahikwa

^ Likamanyisaya “Nindi Oyuli Nga Nyamuhanga?”
^ Kinywe okwa kinywe, “abaghalha b’abandu bawu.”
^ Kutse “eriyithendya ku kyo [ni bugha ambu, ekitabu] ndeke.
^ Ni bugha ambu, emighulhu isathu n’embindi.
^ Kutse “omo mwanya ogho wuhebirwe.”

Copyrights for this publication