Abasyakulhu bakalengaho erikangania omubere wa Yehova ow’erikwira abandi b’obulighe bakakolongana n’oyuwabirilhusibwa omwa kithunga. Ng’eky’erileberyako, Yehova mwathalinda erihika aho abandu biwe abamusighanaya ab’omwa Israeli ya kera batsuke eriyira eky’erikolha. Omwakanya k’ekyo, mwayira eky’erikolha eribawathikya nibya bathe bakangania ehiminyikalho hyosi-hyosi ehy’eriyisubamu. Yehova mwakangania omubere wiwe ow’erikwira abandi b’obulighe omw’ibwira omuminyereri Hosea erisubanamo na mukali wiwe, oyuwabya iniakinasobaya. (Hos. 3:1; Mal. 3:7) Omw’igherererya Yehova, erilhua okwa muthima, abasyakulhu Abakristayo banzire omukolha-nabi iniasubulha, kandi sibali mukalirayakyo. Omwa mukya wa Yesu ow’omwana oyuwahera, Thatha “mwathibitha eyo ali [mughalha wiwe], amamuwako n’erimulyatsirira.” (Lk. 15:20) Lhangira ngoku thatha mwathalinda mughalha wiwe erimusaba ekighanyiro. Omwakanya k’ekyo, mwayira eky’erikolha, ngoku thatha wosi-wosi w’olhwanzo angakolha. w24.08 28 enu. 7-8

Ngoku ebinywe ebiri omw’isako lya munabwire bikakanganaya, Yehova syaliyikumira kw’amenge wiwe. Akahereraya kugho kw’abandi ahathe eriyikukumirira. Kuthya, lebaya ngoku Yehova akabya amaha amenge, akakolha ekyo “butsira buhemu.” Syali leka thukayowa nabi ahabw’eriligha ngoku thukayithagha obusondoli bwiwe. Omwa kwenene, akathubwira athi thubusondaye. (Emi. 2:​1-6) Kandi ibbwa ithwe? Mbwino sithwanga gherererya Yehova omw’iha abandi b’okwa menge wethu? (Esy. 32:8) Abandu ba Yehova bawithe ehighisa hingyi ehy’eribwira abandi okwa ebyo babir’igha. Ng’eky’erileberyako, mughulhu mungyi thukathendeka abahyaka omwa mubiiri w’erithulira. Omw’ighumisirizya, abasyakulhu bakawathikaya abaghombe abawathikya na baghalha bethu ababatizibirwe erigha ngoku banga berererya esyongwamirwa syabo omo kithunga. Kuthya n’abasi bingyi omwa by’obuhimbe n’eby’erisugha bakawathikaya omw’ithendeka abasi bike erikolha emibiiri okwa buhimbe bw’ekiteokrasi. w24.09 28-29 enu. 11-12

Balikyethu, eritholera eribya musyakulhu, wutholere iwabya ‘butsira kahinira,’ ni bugha ambu, eribya n’erina eryuwene omwa kithunga kundi emibere yawu siyiri kanibawako nabi. (1 Tim. 3:2) Ery’ongera okw’ekyo, wutholere iwabya ‘oyukakanibawako ndeke n’ab’eyihya.’ Abathe b’ikirirya bangana bugha nabi oko syonyikirirya syawu sy’Ekikristayo, aliwe sibatholere bakathika-thikira eky’eribya iwuli mundu oyuli mw’okwenene kutse ow’emibere mibuya. (Dan. 6:​4, 5) Yibulhaye, mbwino ng’anawithe erina libuya omwa kithunga n’eyihya sy’ekithunga?’ Wamabya ‘iwunanzire ekibuya,’ wukasondaya ebibuya omwa bandi kandi iwabasima busana n’emibere yabu mibuya. (Tito 1:8) Kandi wukatsema erikolera abandi b’ebibuya, nibya n’erikolha bingyi kwilhaba ebikayithayisibawa. Busana naki omubere oyu akayithaghisibawa okwa basyakulhu? Kundi bakakolesaya obuthuku bwabu bw’obughuli eritsomana ekithunga n’erikolha esindi ngwamirwa. (1 Pet. 5:​1-3) Nomwabine, etseme eyikalhwiririra omw’ikolera abandi yilengire kutsibu ekyosi-kyosi ekyo wangayithalyako.—Emib. 20:35. w24.11 20-21 enu. 3-5

Abaghombe abawathikya bakakolha emibiiri y’omughaso omwa bithunga. Kilhangirikire ngoku omukwenda Paulo mwasima abalhume abathaleghulha aba. Ng’eky’erileberyako, omughulhu ahandikira Abakristayo be Filipi, mwakikangania kutsibu-tsibu omw’iramukya abaghombe abawathikya haghuma n’abasyakulhu. (Flp. 1:1) Baghalha bethu bangyi ababatizibirwe, mbulha bakine balere kutse babirikulha, bakabana etseme nene bakakolha ng’abaghombe abawathikya. Ng’eky’erileberyako, Devan abya w’emyaka 18 akabya mughombe muwathikya. Okwa lhundi lhuhandi, mughalha wethu oyukahulhawamo Luis mwasombolhwa ng’omughombe omuwathikya akatsuka emyaka yiwe ya 50. Mwakangania eriyowa eryo abangyi bakabya nalyo akabugha athi, “Ngayowa ini lhusunzo lhunene erikolha ng’omughombe omuwathikya, kutsibu-tsibu namalengekania okwa lhwanzo lhunene olho ekithunga kyabirinyikangania!” Wamabya iwuli mughalha wethu oyubatizibirwe aliwe isiwuli wabya mughombe omuwathikya, mbwino siwanga kikolha mwa kilhubirirwa kyawu? w24.11 14 enu. 1-3

Iniane w’emyaka 39, Omwami Hezekia owe Yuda mwaminya ngoku abirilhwalha obulhwere obukalire. Omuminyereri Isaya mwathulha omwatsi wa Yehova owakakanganaya ngoku obulhwere bwa Hezekia obo bukendi mw’itha. (2 Bam. 20:1) Muhabya nga sihali maha busana na Hezekia. Omwatsi oyu abere abirikukubalya Hezekia, mwalira kutsibu. Amasaba Yehova ya kutsibu. Yehova mwahambwako busana na Hezekia erimulemba-lemba iniane mulira, neryo omwa lhukeri Yehova mwabugha athi: “Nabiriowa erisaba lyawu, namalhangira emisoni yawu; lebaya, ngendi kulhamya.” Erilhabira omu Isaya, omwa lhukeri, Yehova mwalhaghanisya ery’ongera engebe yiwe n’erilhamya e Yerusalemu omwa byalha by’Abasuria. (2 Bam. 20:​4-6). Mbwino wunemughumira obulhwere obukabya nga sibwendi syalhama? Bwira Yehova omwa musabe, nibya iwune muthoghongya emisoni. E Biblia yikathukakasaya yithi “Thatha w’erighanyira, na Nyamuhanga w’erikirania lyosi” akendi thuhumulikania omwa bitsibu byethu byosi.—2 Kor. 1:​3, 4. w24.12 24 enu. 15-17

Ka kikendi syatsemesya eryangirira ababirilhubuka! Thathera akasasani, nga wukendi syatsema bungahi wuk’igha bingyi oku Yehova omw’igha okwa bihangikwa biwe bingyi. (Esy. 104:24; Isa. 11:9) Ekikulhu kutsibu, ka kikendi syatsemesya kutsibu eriramya Yehova isithuwithe eriyowa ery’eribya ithunawithe ekibi kyosi-kyosi! Mbwino iwunemwendi hingisya emighisa eyikasa ey’omwa buthuku obukasa obu ‘n’eriyitsemesya ery’akathambi kake omwa bitsange by’ebibi’? (Ebr. 11:25) Eyihi nahake! Emighisa eyi yilengire ebya thwanga yithalyako lino. Wibuke, ekihugho Paradiso sikyendi syasighalha ini maha buyira. Obuthuku bukendi syahika ikyabererera. Ebyosi ebi sibyanga thokekene Yehova kwabya isyathwanzire erihika okwa kiika ky’erithuha Mughalha wiwe ng’ekihembo! w25.01 29 enu. 12

Okw’abakanibweko omwa kitabu kya Abaebrania ng’ababya bawithe erikirirya, Musa ni mughuma w’okwa babya bawithe erikirirya linene kutsibu. (Ebr. 3:​2-5; 11:​23-25) Erikirirya lya Musa mulyathakwa busa, kundi omwa nzira y’ekithiko-thiko Nyamuhanga mwabaha ebyalya n’amaghetse ebyaleka abandu ibabya ibakineho bakalhaba omwa mbwarara. (Eril. 15:​22-25; Esy. 78:​23-25) Nomwakine indi Musa abya awithe erikirirya erighumire, mwaka nga mughuma enyuma waho Abaisraeli balilhusibirwe omwa bunyewa omwa nzira y’ekithiko-thiko, Musa mwathika-thikira amaaka wa Yehova aw’eriha abandu biwe b’esiswe [esyonyama]. Mukyakalira Musa eriligha ngoku Yehova angahere esyomiliyoni sy’abandu ababya omwa mbwarara b’esyonyama esikaghunza. Omw’isubirya, Yehova mwabulya Musa athi: “Kw’ebyalha by’Omwami Mukulhu [Yehova] byabirikuhiha kwehi?” (Emig. 11:​21-23) Ni bugha ambu, Yehova mwabya ng’oyukabulhaya Musa athi, ‘Obo kwenene wukalengekanaya wuthi sinanga thoka erikolha ebyo ngabugha indi ngendi kolha?’ w25.03 26 enu. 1-2

Thunatholere ithwalhangira omwatsi w’erighunga ly’amaghetse nga ni buminyereri? Eyihi. Busana naki? Kundi sihali risako erikasighika ekyo. Ni kwenene, Yesu mwalinganisya ebiro bya Noa n’ebiro by’erihika liwe, aliwe syamanyisaya athi abandu n’ebyabya omwa buthuku obo byabya ibiwithe ekya bik’imanibira; kutse syamanyisaya athi erikinga olhukyo lhw’obwathu liwithe obuminyereri bwosi-bwosi obo likendi syaberererya. (Mt. 24:​37-39) Noa mwakolhaki abere ak’owa erikunga lya Yehova? Mwakangania kw’awithe erikirirya akahimba obwathu. (Ebr. 11:7; 1 Pet. 3:20) Kuthya, abandu abak’owa engulhu yuwene eyihambire okwa Bwami bwa Nyamuhanga batholere ibaghendera okwa bya bak’owa. (Emib. 3:​17-20) Petero mwabugha athi Noa abya “muthuli w’erithunganene.” Munabwire thunemusangira omwa mubiiri w’erithulira omwa kihugho kyosi, kandi thukalengaho erisangira mugho n’omuhwa. Nomwabine, nomuthwanga lengaho thuthi, sithwanga thoka erihikya okwa buli mundu kw’engulhu yuwene enduli yithe yasa. w24.05 9-10 enu. 3-5

Thukasondaya esyonzira sy’erikanganiryamo abanywani ba Yehova b’olhukeri n’erisikya. (Abar. 12:10) Thuthi? Enzira nguma y’eno, ngoku kiri omwa Esyonyimbo 15:​4, oyo Yehova akakokaya omwa hema yiwe “syaliyisubako omwa by’akayilhagha, nomukyangabya ikyangana mulhumya.” Omo kwenene, erithendi berererya ebya thukayilhagha kikaponesaya abandi. (Mt. 5:37) Ng’eky’erileberyako, Yehova anzire abo akakokaya ibaberererya eriyilhagha lyabu ery’obutheke. Kandi Yehova akatsema ababuthi bakalengeho eriberererya ebyo bakalhagha abaana babu. Olhwanzo olhwa thuwithire Nyamuhanga n’abandu lhukendi thusukuma erilengaho ngoku thwanga thoka eriberererya ebyo thukayilhagha. Eyindi nzira eyo thwanga sikiryamu abanywani ba Nyamuhanga mw’omw’ibya bakokya kandi benge. (Abar. 12:13) Obuthuku bw’eriyitsemesya obwa thukaghunza n’abalikyethu bukathuwathikaya erighumya obunywani obwa thuwithe nabu n’obwa thuwithe na Yehova. Nibya, omw’ikokya abandi, thukabya ithwamagherererya Yehova. w24.06 12 enu. 15-16

Yehova akabisulira abayikehirye b’ekwenene. (Mt. 11:25) Omw’iyikehya, muthwaligha obuwathikya obw’erigha ekwenene. (Emib. 8:​30, 31) Nomwabine, thutholere ithwayihighulha okw’ibya b’emiyiheko. Eribya ab’emiyiheko kyangana leka ithwalengekania thuthi amalengekania wethu ingene n’emisingyi y’Amasako n’obusondoli obwa ekithunga kya Yehova kikaha. Erithoka erisighalha ithunayikehirye, thutholere ithw’ibuka ngoku thuli buyira thwamalinganisibwa na Yehova. (Esy. 8:​3, 4) Kandi thutholere ithwasaba erikulha-kulhania eriyikehya, n’omuthima w’erianza erigha. Yehova akendi thuwathikya erihira amalengekania wiwe w’embere okwa wethu, amalengekania agho akathuha erilhabira omwa Kinywe kiwe n’ekithunga kiwe. Sondaya omwa busomi bwawu bwe Biblia mw’esyonzumwa esikakanganaya ngoku Yehova anzire abakayikehaya kandi ngoku aponire emiyiheko, emiyitumyo, n’abakapona abandi. Kandi lhangira wuthi wukasighalha iwunayikehirye wukahebwa olhusunzo olhukaleka iwasikibwa okwa lhulengo lhulebe. w24.07 10 enu. 8-9

Erilhua 1919, Yesu abiribya inianemukolesya egurupu nyike y’abalhume abahakabibwa eritheghekania omubiiri w’erithulira n’eriha abamukwamire b’ebyalya by’obunyakirimu. (Lk. 12:42) Ahathe erithika-thika, Yehova anemutsumulha omubiiri w’egurupu eyo. (Isa. 65:​13, 14) Ku thwabya isithuli omwa buyithondeke, sithwanga thokire erikolha omubiiri ogho Yesu abirithuha. (Mt. 28:​19, 20) Ngahathya, thuthabugha thuthi ku thwabya isithuli hebawa amalhambo w’erithuliramo; obuli mundu angabere akathulira aho anzire. Awandi malhambo angabere akabera erisubwamo n’abathuliri muthina-muthina, aliwe awandi iniaghana erisyahikwamo. Wangana lengekania okwa sindi nzira esyo thwanga ghasirwamo thwamabya omwa buyithondeke? Ebyo Yesu akolha okwa kihugho bikaleka ithwalhangira emibere akathondekanirayamo abandu ba Nyamuhanga munabwire. w24.04 8-9 enu. 2-4

Kaina abya kambere ka Adamu na Eva. Mwasighalya obubi bw’ababuthi biwe. Eryongera okw’ekyo, e Biblia yikamubughako yithi: “Emibiiri ya Kaina yabya mibi.” (1 Yn. 3:12) Obundi ekyo ky’ekyaleka Yehova ‘iniathasima Kaina n’obuhere bwiwe’ omughulhu ahayo obuhere. Omwakanya k’erihindulha esyonzira siwe, “Kaina mwahithana kutsibu, n’obusu bwiwe mubwahina.” Ni kindi kyahi ekya Yehova akolha? Mwakania na Kaina. (Enz. 4:​3-7) Lhangira ngoku omwa lhukeri Yehova aghaniraya na Kaina, akamuha amaha n’erimukunga okwa kabi akakalhwiririra omwa kibi. Eky’obulighe, Kaina mwaghana erihulikirira. Mwathalighira Yehova akamulholerya okw’iyisubamo. Abere abirighana, mbwino mukyanaleka inialekeraho erilholerya abandi bakolha-nabi okw’iyisubamo? Eyihi na hake! w24.08 10 enu. 8

Ekihanda kye Israeli kyabya kilindirire obuthuku obuwene obukasa. Omw’itsumulhwa na Yehova, Abaisraeli bangabereho ahabw’obuthuku buuli omwa kihugho ekyo Yehova abya iniabiribalhaghanisya. Kandi ka ky’abya kihugho ekyuwene, ekiri mw’omubogha! Musa mwakikaniako athi: “Emiyi minene-minene mibuya, eyo muthahimba, n’amanyumba aghoswire mw’ebindu ebyuwene, ebyo muthusulhayamo, n’ebiriba ebithakwire, ebyo muthathakulha, n’amalima w’ebinyu, n’emithi y’emizeituni, eyo muthahera.” (Ebi. 6:​10, 11) Musa kandi mwakunga Abaisraeli. Erithoka erilholha embere eribya omwa kihugho kyabu eky’omubogha, babya b’erighondera ebihano bya Yehova. Musa mwababwira athi ‘bayisoghe engebe’ omw’ihulikirira Yehova ‘n’erimwamakirira.’ (Ebi. 30:20) Aliwe, Abaisraeli mubaghana Yehova. Habere halhaba buthuku, Yehova mwalighira Abasuria n’enyuma waho abanya Babeli eribakinda n’eribathwalha omwa bunyewa—2 Bam. 17:​6-8, 13, 14; 2 Emy. 36:​15-17, 20. w24.11 9 enu. 5-6

Abangyi abakayahulhamo Bakristayo bakayowa ibangana lhamibwa bamakwama “kyathikirirya omu [Yesu]” ng’omulhamya wabu. (Yn. 6:​29, King James Version) Nomwabine, abandi ababya omwa kikumulha ky’abandu abanabya bikirirye omu Yesu, mubamusighania. Busana naki? Abangyi omwa kikumulha ky’abandu ekyo Yesu alisaya babya ibanayitheghekire erimukwama ekikulhu amabya inianemubaha ebyo bakayithagha. Babya bakanza abalhamaye kw’amalhwere wabu omwa nzira y’ekithiko-thiko, abahe ebyalya bya bbule, kutse esyongangirirya esyo banzire ibowa. Nomwabine, Yesu mwabakangania ngoku ni bingyi ebikayithaghisibawa okwa bigha biwe ab’okwenene. Syasa okwa kihugho ahabw’erikwama ky’athaha abandu b’ebyo banzire eby’ekinyamubiri. Babya batholere eriligha erikokya liwe ‘ery’eryasa okw’iyo’ omw’imuligha n’erighendera okwa byosi ebya abakangiriraya.—Yn. 5:40. w24.12 12 enu. 12-13

Ni kyahi ekyanga wathikya omulhume erisingura omutse w’erikolha-kolha mukali wiwe ya nabi n’erimuhemulikania? Anganalengaho erigherererya Yesu. Emibere Yesu abya akathwaliramo abigha biwe ni ky’erileberyako ngoku omulhume angathwalha mukali wiwe. Thalebya ekyo ababi bang’ighira okwa mibere Yesu abya akathwaliramo abakwenda biwe n’okwa mibere abya akakanirania nabu. Yesu iniakathwalha abigha biwe omwa nzira y’olhukeri n’ey’ekitsumbi. Isyali batsurumira kutse eribabendekerya. Nomwakine indi abya Mukama wabu, Yesu mwathayowa iniatholere erikangania obukulhu bwiwe omw’ikolha ebikendi leka ibamusagha. Omwakanya k’ekyo, omw’iyikehya iniakabakolera. (Yn. 13:​12-17) Mwabwira abigha biwe athi: “Munyighireko, kundi ngali w’omuthima mwolho n’oyuhehere, neryo mukendi syabana erilhuhuka.” (Mt. 11:​28-30) Wibuke ngoku Yesu abya w’omuthima mwolho. Sikirimanyisaya indi omundu mwolho syawithe maaka. Aliwe, awithe amaaka aw’eriyikakirya. Amahithanibwa, akasighalha inianathekene kandi iniakakirya eriyowa liwe. w25.01 10 enu. 10-11.

Enduli y’omughulhu mubi ono yine museghera hakuhi, thuminye ngoku obunakwa bwangana yongera kutsibu. Akatabanguko k’eby’ekipolitiki, esyonyuhi, ebitsinduli, kutse ebihunzo bihyaka byangana leka ithwakolesya esyosente omwa nzira eyo thuthayitsulirye, kutse eriherya emibiiri yethu, ebya thuwithe, kutse emiyi yethu. Ni kyahi ekyanga thuwathikya erikolha erithwamu erikendi kangania ku thuyikethere ebyalha bya Yehova? Ekiika kikulhu kandi ekitholere ly’eribwira Yehova y’ebitsibu byawu. Musabe amenge agho wukayithagha erithoka erikolha erithwamu eryuwene n’erikuwathikya erithekana omwa muthima nuku wuyihighule ‘okw’ihangya-hangya’ busana n’emibere eyo wulimo. (Lk. 12:​29-31) Mulembe-lembe wuthi akuwathikaye erikulha-kulhania omubere w’eritsemera ebikayithaghisibawa omwa ngebe. (1 Tim. 6:​7, 8) Sekulhaya omwa bitabu byethu okwa mibere eya thwanga thokeramu erighumira ebitsibu by’esyosente. Abangyi babirighasirwa omwa myatsi eyiri okwa jw.org eyihambire okw’ighumira ebitsibu by’esyosente. w25.03 28-29 enu. 10-11

Endambi yabya iyamahika ey’Abanya Bihanda abathabanibwe eribya bandu ba Nyamuhanga. Omukwenda Petero mwahebwa olhukwamirwa olhw’erithulira Omunya Bihanda ya Kornelio, oyuwangabere ow’erimbere omwa gurupu mbyaka ey’abaramya eyi. Abayuda isibali kolongana nahake n’abanya Bihanda, neryo sikiriswekaya eribya Petero imwayithagha obuwathikya eriyitheghekera olhukwamirwa lhwiwe olhu. Petero abere abiriminya erisonda lya Nyamuhanga okwa mwatsi oyu, mwahindulha amalengekania wiwe. Erighunzerera, abere akabirikirwa, ‘mwathaghana.’ (Emib. 10:29) Mwathulira Kornelio n’ab’omwa nyumba yiwe, kandi mubabatizibwa. (Emib. 10:​21-23, 34, 35, 44-48) Myaka mingyi enyuma waho, Petero mwahira omwa Bakristayo balikyabo mw’omuhwa w’eribya “n’obulengekania bughuma.” (1 Pet. 3:8) Ng’abandu ba Yehova, thwanganabya n’obulengekania bughuma omw’ikangania amalengekania wa Yehova ngoku kikanganibwe omwa Kinywe kiwe. w25.03 9-10 enu. 7-8

Amalengekania w’ekihugho anemuyongera eribya wambaghane kutsibu oko wa Nyamuhanga awahikene. (Emi. 17:15) Busana nekyo, thutholere ithwaghumya amaaka wethu w’eriminyerera n’erighana amalengekania aw’abahakani bakakolesaya erithughunza amani kutse nibya erithuherya. Thutholere ithwabya ithun’ibukire erihabulha ery’omukwenda Paulo aha Abakristayo Abaebrania ery’erilholha embere erikulha-kulhana bunyakirimu. Ekyo mwamuli eriminya ekwenene ya buuli n’erighenda-ghendania n’amalengekania wa Yehova. Eki kikalholha embere nibya n’enyuma w’eriyihayo n’eribatizibwa. Mbulha thwamaghunza mughulhu mungahi omwa kwenene, ithwe bosi thutholere ithwasoma n’eriyeghesya Ekinywe kya Nyamuhanga mughulhu wosi. (Esy. 1:2) Endegheka eyuwene ey’eriyeghesya yikendi thuwathikya erighumya erikirirya lyethu, omubere owa Paulo ahirako omuwatho omwa baruha ey’ahandikira Abaebrania.—Ebr. 11:​1, 6. w24.09 10 enu. 7-8

Yehova amabya iniane munywani wethu, ikikendi thw’olhobera erisighalha bathaleghulha okw’iyo. Ekyo ky’ekyahika oku Yozefu. Inianasikire mwaghana erikolha obusingiri. Nyamuhanga abya munywani wiwe kandi syabya anzire akamuponesya. (Enz. 39:9) Yehova eribya munywani wethu, thutholere ithwathunga endambi y’erisaba n’eriyeghesya Ekinywe kiwe. Neryo obughuma bwethu nayu ibukendi y’ongera. Nga Yozefu, thwamathunga obughuma obwa hakuhi na Yehova, isithwendi kolha ekyosi-kyosi ekyanga muponesya. Abak’ibirirawa ngoku Yehova ni Nyamuhanga oyuliho kyangana bolhobera erimusighania. Thalengekania okwa kyahika okwa Baisraeli omughulhu babya omwa mbwarara. Babya ibanasi ngoku Yehova aneho, aliwe mubatsuka erithika-thika ng’anemwendi baha ebiyithawa byabu. (Eri. 17:​2, 7) N’enyuma waho, mubayisamambulha oku Nyamuhanga. Omo kwenene, thwanzire ithwayihighulha okwa buthowa bwabu, obwabiribya eky’erileberyako ekikathukunga.—Ebr. 3:12. w24.06 24 enu. 14-15

Thuli haali omwa biro by’enyuma-nyuma, kandi thunakyasi ngoku ebikaleka ithwathoghongya emisoni bikendi yongera. Yehova akalhangira emisoni eya thukathoghongoya kandi akahambawako kutsibu. Emisoni yethu ni y’obughuli embere siwe. Neryo omughulhu thukabana ebitsibu ebikalire, ahathe erithika-thika thwanzire ithwabwira Yehova y’ebyosi ebiri omwa mithima yethu omw’isaba. Ambi isithwasyayisolholha oku balikyethu ab’olhwanzo abali omwa kithunga. Kwesi ka thulhole embere erihumulikanibwa omwa binywe ebikahumulikanaya ebiri omwa Biblia. Ithwangana kakasya ngoku thwamalholha embere eriyiyinia buthaleghulha, Yehova akendi syathuhemba. Ekyo mwamune n’omulhaghe mubuyanga owakakanganaya ngoku omwa buthuku obuthe bw’ahaali Yehova akendi sangulha omwa meso wethu mw’emisoni y’obulighe, ey’erighoberibwa, n’ey’erihwa amani. (Erib. 21:4) Neryo thukendi syathoghongya emisoni y’obutseme misa. w24.12 20 enu. 3; 25 enu. 19

Yehova abirithusombolha eribya Bema biwe, kandi akayilhagha erithuwathikya eribya bathubaha. (Isa. 43:​10,11) Thalengekania okwa syonzira ini nyisa esyo akakoleramo ekyo. Eky’erimbere, Yesu akabya iniane nethu thukathulha engulhu yuwene. (Mt. 28:​18-20) Ekyakabiri, Yehova abirisombolha abamalaika erithuwathikya. (Erib. 14:6) Ekyakasathu, Yehova abirithuha omulimu wiwe abuyirire ng’omuwathikya w’erithwibukya ebyo thwabir’igha. (Yn. 14:​25, 26) Ekyakani, Yehova abirithuha balikyethu erikolha haghuma nethu. Omwa buwathikya bwa Yehova n’obw’olhughanda lhw’abalikyethu ab’olhwanzo, thunawithe ebyosi ebyo thukayithagha eribya bathubaha n’erilholha embere erithulira. Aliwe wamahwa amani omughulhu wukeghaya okwa miyi mingyi isikuli bandu, busana naki iwuthayibulya wuthi: ‘Abandu b’omwa bulhambu bwaghe bakabya hayi okwa ndambi eno?’ (Emib. 16:13) ‘Mbwino bali okwa mubiiri kutse babirighenda omwa kathali?’ Kyamabya ikwakiri kithya, mbwino siwanga bana abandu bangyi wamathulira okwa nzira? w24.04 17 enu.10-11

Wamabya iwuli iba kandi iwunanzire eribya musyakulhu, eky’erileberyako eky’eka yawu kikahamba okw’itholera lyawu. Busana n’ekyo, wutholere ‘iwasondolha ndeke eka yawu.’ Wutholere iwaminywa ng’omuthwe w’eka oyuwithe olhwanzo kandi oyukatsomana eka yiwe. Eki mwamuli erisondolha ab’eka yawu omwa myatsi yosi ey’eriramya lyethu. Wamabya iwuli thatha, wutholere iwalhangira wuthi abaana bawu abali ahisi sy’emyaka ikumi na munani, ni ‘baana abakakwowa.’ (1 Tim. 3:5) Wutholere iwabakangirirya n’eribathendeka omo lhwanzo. Aliwe wibuke, ng’abaana bosi, nabo bakanza amasatha n’eriseka. Aliwe busana n’erithendeka lyawu eryuwene, bakendibya bowa, abakasikaya abandi, kandi ab’esyongeso. Kandi wutholere iwalengaho eriwathikya abaana bawu eribya n’obughuma obuwene na Yehova, erighendera okwa misingyi ye Biblia omwa ngebe syabu, n’erikulha-kulhana erihika okw’ibatizibwa. w24.11 22 enu. 10-11

Thukabya thukongera erisangira omwa mubiiri wa Yehova, kwathukan’ongera thuthya eriyilhangirira obuwathikya bwiwe, neryo ikyaleka ithw’ongera erimuyikethera. (1 Kor. 3:9) Aliwe, wibuke ngoku Yehova syali linganisaya obunene bw’ebyo thukahayo n’ebya bandi bakahayo; ekyo akalhangira, by’ebiri omwa muthima wawu. Akatsema akalhangira erisima lyawu erikalhua okwa muthima busana n’ekihembo eky’obughuli eky’endongolya. (1 Sam. 16:7; Mk. 12:​41-44) Endongolya yikaleka ithwaghanyirwa ebibi byethu, ithwabya banywani ba Yehova, kandi ithwabya n’amaha w’engebe y’erikotha. Kwesi thulhole embere erikangania ku thukasima olhwanzo lhwa Yehova olhwaleka inialhangira athi thukabana emighisa eyi! (1 Yn. 4:19) Kandi thulhole embere erikangania ku thukasima Yesu oyuwathwanza kutsibu n’erihika okw’ihayo engebe yiwe busana nethu! w25.01 31 enu. 16-18

Lengekanaya ngoku omuhandiki w’Esyonyimbo 73 ayowa. Mwalhangira abandi ibanemutsemera eyikabya nga ni engebe eyiri mw’amaghalha awuwene, engulha-kulhana, kandi eyithe mw’ebitsibu. (Esy. 73:​3-5, 12) Iniakabya akalhangira erikulha-kulhana lyabo iniakayowa nga sikiwithe mughaso iyo erihira h’akaghalha erikolera Yehova. ‘Mwaghalhwa omwa musibo wosi’ busana n’amalengekania ayo awakaghunza amani. (Esy. 73:​13, 14) Mwaghumira athi eriyowa erikaghalhaya eri? Omuhandiki w’esyonyimbo mwaghenda ahabuyirire ha Yehova ahali obuholho. (Esy. 73:​16-18) Inianeyo, mwathoka erilengekania ndeke. Mwaminya ngoku nomwakine indi engebe yabu yanganabya nga yuwene, sibabya bawithe amaha aw’obuthuku obukasa. Abere abiriminya eki, mwathekana, amaminya ngoku erikwamirira ebindu by’obunyakirimu ly’erithwamu eryuwene kutsibu. Ekyalhwiririramu, mwathasyathwamu erilholha embere erikolera Yehova.—Esy. 73:​23-28. w24.10 27 enu. 11-12

Yehova abirithusombolha eribya ‘balhangiri [Abema]’ biwe. (Isa. 43:​10-12) Myaka mirebe enyuma, ebaruha erilhua okwa kathunga akakasondolha muyabugha yithi: “Ekitsumbi ekilengireyo ekya obuli mughuma w’okw’ithwe angabya nakyo ly’ery’ahulhwamo Mwema wa Yehova.” Busana naki ikyabya kithya? Thulebaye eky’erileberyako. Wamanza omundu oyuwanga kulhwirako omwa koti, iwukendi sombolha omundu oyo wasi kandi oyo wukayikethera, omundu oyunawithe emibere eyuwene eyangaleka abandi ibaligha obwema obw’akahayo. Omw’ithusombolha eribya Bema biwe, Yehova abirikangania kw’athwasi ndeke kandi kw’akayikethera ku thukendi mulhwirako nga Nyamuhanga mughuma ow’okwenene. Thukayowa ithuli b’ekitsumbi eribya Bema biwe erihika okw’ibya ithukakolesaya obuli kaghisa ak’erilhwira okwa rina liwe n’erirwanisya amabehi mangyi awakamubughawako. Omw’ikolha ekyo, thukakolha erikwamana n’erina erya thukayisyethera eribya nalyo, Abema ba Yehova!—Abar. 10:​13-15. w24.05 18 enu. 13

Yesu abere akakolera abandi mukyamulethera etseme nene. Buthuku bughuma omughulhu Yesu akolera abandu bangyi, mwathasubulira okw’ibakangirirya. Mwabaha n’ebiyithawa byabu by’ekinyamubiri. Omwa nzira y’ekithiko-thiko, mwababanira ebyalya neryo amabiha abigha biwe athi babaghabirebyo. (Mk. 6:41) Omw’ikolha ekyo, mwakangirirya abigha biwe ngoku bangakolera abandi. Kandi mwabakangania ngoku emibiiri eyikaghasa ni y’omughaso munene. Thalengekania okwa tseme eyo abakwenda babana bakakolha na Yesu omw’ighabira abandu b’ebyalya ebyabanika omwa nzira y’ekithiko-thiko erihika aho ‘abosi balira n’ery’ughutha’! (Mk. 6:42) Oyu si w’omurundi mughuma musa ogho Yesu ahiriramo ebiyithawa by’abandi by’embere okwa biwe. Mwakolesya engebe yiwe yosi y’okwa kihugho erikolera abandu. (Mt. 4:23) Yesu mwabana etseme n’erithekana busana n’erikangirirya abandi na busana n’eritsomana ebiyithawa byabo inianayikehirye. w24.11 16 enu. 10-11

Emibere omwa “biro by’enyuma-nyuma” yinemutsandir’ighuma, ahathe erithika-thika thukendi bana ehighisa hingyi ehy’eriwathikania. Kandi thwangana humulikania balikyethu n’eribakangania olhwanzo olho bakayithagha erikanganibwa. Enzira nguma eyo thwanga kolera mw’ekyo ly’erileka bayowe buholho okwa Kisenge ky’Obwami. Neryo omughulhu balikyethu bakasa okwa mihindano, thwanzire ithwakolha ekyosi-kyosi ekya thwanga thoka nuku bayowe ibanzibirwe, erihumulikanibwa, n’eritheghibwa. Abasyakulhu banganabya busaghiro bw’abali omwa kithunga abakaghumira ebitsibu ebiri ng’ekiyagha. Omughulhu hakabya ebitsinduli, n’eriyithaghisibwa ly’obubalya obwa lhuba-lhuba, abasyakulhu bakahira h’emitheghekere y’eriwathikya. Kandi bakaha obuwathikya bw’obunyakirimu. Ikikendy’olhobera balikyethu erihika okwa musyakulhu oyuwasibwe ng’omwolho, oyukalhumirirawa abandi, kandi oyukabya inianayitheghekire erihulikirira. Emibere ng’eyo yikaleka abandi ibayowa ibatsomenwe, neryo ikyabolhobera erighendera okwa busondoli obuseghemere okwa Biblia obo musyakulhu akabaha.—1 Tes. 2:​7, 8, 11. w24.06 29 enu. 12-13

Sithutholere thukalengekania thuthi Nyamuhanga syawithe eriyowa ahabw’eribya ini muthoki w’ebyosi! Thukolirwe omwa kisosekanio kiwe, thuhangikirwe n’amaaka w’eriyowa, eki kikamanyisaya kithi Yehova awithe eriyowa. E Biblia yikamukanayako ng’oyukanakwa “obulighe” kandi ‘oyukanahithana.’ (Esy. 78:​40, 41) Yehova angabya mwabya omwa bulighe akalhangira abandu babi bakaghalya Mughalha wiwe erihika okw’iholha! Endongolya yikathweghesaya ngoku sihali mundu oyuthwanzire kutsibu kwilhaba Yehova—nomwangabya ini muhughu oyuthwanzire kutsibu kutse omunywani w’okwa ndungu. (Abar. 8:​32, 38, 39) Ahathe erithika-thika, Yehova athwanzire kw’ilhaba ngoku thuyanzire. Mbwino wunanzire iwabyaho kera na kera? Yehova anzire ekyo kw’ikulhaba. Mbwino wunanzire ebibi byawu ibyaghanyirwa? Yehova anzire ekyo kw’ikulhaba. Ekyo akathuyithaghako kisa ly’eriligha ekihembo kiwe ky’olhukogho omw’ikangania erikirirya n’eribya bowa. Omo kwenene, endongolya ni kindu ekikakanganaya olhwanzo lhunene lhwa Nyamuhanga.—Omu. 3:11. w25.01 22-23 enu. 8-9

Ithwe bosi hakanayira ithwakolha erithwamu erikwamana n’ebyo thukalhangira, eriowa, n’erithulhako. Okwa bundi buthuku, ebyo thukalhangira n’eriowa byangana thuthebya. Nomubyangabya isibyatha thuthebya, thwamalendera erikwamana n’ebyo thukalhangira bisa, ithwangana yisanga ithwabirigheghena erisonda lya Nyamuhanga kutse erihabulha liwe. (Omu. 11:9; Mt. 24:​37-39) Aliwe, thwamalendera omw’ikirirya, ithukendi kolha erithwamu erihambene n’ebya Omukama akaligha. Erighendera okw’ihabulha lya Nyamuhanga kikendi thuha obuholho bw’omuthima n’erileka ithwabana etseme y’okwenene. (Esy. 16:​8, 9; Isa. 48:​17, 18) Kandi thwamalholha embere erilendera omw’ikirirya, ithukendi syathunga engebe y’erikotha omwa buthuku obukasa. (2 Kor 4:18)Thwanga minya thuthi ku thukalendera omw’ikirirya kutse omw’ilhangira? Erithoka erikolha ekyo, thutholere ithwayibulya ebibulyo nga bino: Ni byahi ebikasondolha erithwamu lyethu? Mbwino thukasondolhawa n’ebyo thulhangire bisa? Kutse thukasondolhawa n’eriyikethera eryo thuwithe omu Yehova n’omw’ihabulha liwe? w25.03 20-21 enu. 3-4

Obuli mughuma w’okw’ithwe awithe olhukwamirwa lhukulhu olhw’erikolha nuku abandi banze eryasa omwa paradiso y’obunyakirimu. Thwangana berererya olhukwamirwa olhu thwamagherererya Yehova. Syalikaka abandu eryasa omwa kithunga kiwe. Omwakanya k’ekyo, omwa bolho-bolho ‘akayilethako’ abandu. (Yn. 6:44; Yer. 31:3) Abandu b’emithima myolho abak’igha okwa lhwanzo lhwa Yehova n’emibere yiwe eyuwene bakamwasako ahathe erikakwa. Emibere yethu eyuwene n’ebibuya ebya thukakolha byangaleka bithi abandu ibanza eryasa omwa paradiso y’obunyakirimu? Enzira nguma eyo ly’erikangania abaramya balikyethu b’olhwanzo n’olhukeri. Abahyaka bamahindana okwa mihindano yethu y’ekithunga, thwanzire ibabya n’eriyowa ng’ery’abathabya b’ikirirye abangabya imubahindana okwa mihindano omwa Korinto ya kera. Mubabugha bathi: “Kwenene Nyamuhanga ali omo kathi-kathi kenyu.” (1 Kor. 14:​24, 25; Zak. 8:23) Busana n’ekyo, thutholere ithwaghendera okw’ihabulha eriri omw’isako lya munabwire. w24.04 23-24 enu. 16-17