Okwomunani
Kyamukagha, Okwomunani 1
Hakendi syabya obulighe bunene obuthe bwathabya eritsuka aho ekihugho kikathahangikirwa erihika nalino.—Mt. 24:21.
Thwanzire abandu bangyi ngoku kyanga thokekana ibaligha erikungwa n’erithuyiyungako omw’iramya ly’okwenene munabwire. Kandi ibbwa abo abathaghendera okw’ikunga lino? Kyanganabya in’isonda lya Yehova erilhamya abandu abakabindulha emithima yabu bakalhangira erithoghothibwa lye Babeli Mukulhu. Kyamabya ikwakiri kithya, kwesi ikik’ongera eriyithaghisibwa eribakunga. Ebyo thukababwira munabwire byangana syaleka ibayira ekya bak’ibuka. (Lebaya na Zakeri 33:33.) Obundi bakendi sy’ibuka erikunga eryo thwabaha neryo ikyaleka ibanza erithuyiyungako omw’iramya ery’okwenene obuthuku buthe bwahwayo. Ng’omutheya ow’engomo owe Filipi oyuw’abindulha omuthima wiwe busana ‘n’omusiki munene,’ obundi abandi abatheligha munabwire bakendi syahindulha emithima yabu ahabw’erithoghothibwa lya Babeli Mukulhu erikendi sya suka-sukania ekihugho.—Emib. 16:25-34. w24.05 17 enu. 9-10
Kristo abiriberererya Emighambo.—Abar. 10:4.
Thuk’igha erisomo ly’omughaso okwa ebya omukwenda Paulo ahandikira Abaebrania. Abandi babya ibabirighana erikulha bunyakirimu; omo kwenene babya ‘ibakinatholere amabere butsira akalyo [ak’obunyakirimu].’ (Ebr. 5:12) Babya ibabirilemwa erighenda-ghendania n’ekwenene, eyabya iyinemughenda yikabisulhwa erilhabira omwa kithunga. (Emi. 4:18) Ng’eky’erileberyako, abikirirya bangyi Abayuda babya ibakinakulha-kulhanaya emighambo ya Musa nibya ihamabirilhaba emyaka makumi asathu emighambo yalihwereho busana n’ekihongo kya Kristo. (Tito 1:10) Owosi-wosi oyuwabirisoma ebaruha eyo Paulo asondolibawa erihandikira Abaebrania anganakakasya ngoku ekitabu eki kirimo ebyalya ebikalha-kalire eby’obunyakirimu. Ekyo ky’Abakristayo abo bayithagha nuku b’ongere eriyikethera ngoku emitheghekere y’Ekikristayo y’eyilengireyo kutsibu n’eribaha obuthubaha bw’ery’ongera erithulira.—Ebr. 10:19-23. w24.04 6 enu. 15
Hasyabya erilhubuka ly’abathunganene n’ababi [abathathunganene].—Emib. 24:15.
Aho Adamu na Eva bakathayiyungira oku Sitani n’eriyisamambulha oku Yehova Nyamuhanga, esyobiliyoni sy’abandu babiriholha. Hali mahaki okw’abandu bosi aba? Abake b’okwa bakwamire Kristo, abandu 144,000, bakendi syalhubukira okwa ngebe y’obuthaholha omwa lhubulha. (Erib. 14:1) Abalhume n’abakali bangyi ababya banzire Yehova bakendisyabya “omw’ilhubuka ly’abathunganene,” ibikalha okwa kihugho kera na kera bamalhaba omwa Myaka Rukumi y’Erithabalha lya Kristo n’erilengesibwa ly’erighunzerera ibakine bathunganene. (Dan. 12:13; Ebr. 12:1) Kandi omwa buthuku bw’emyaka Rukumi, “abathathunganene”—imwamune n’abathakolera Yehova kutse nibya “abakolha-nabi”—bakendi syahebwa akaghisa k’erihindulha emibere yabu n’eribya bathaleghulha. (Yn. 5:29; Lk. 23:42, 43) Aliwe abandi bandu babya babi kutsibu, abirithwamu athi abo sibendi syalhubuka.—Lk. 12:4, 5. w24.05 2 enu. 3; 5 enu. 15; 6 enu. 17
Bakanyisikaya n’eminywe yabo, nikwa babirisegherya emithima yabu ya haali kwingye.—Isa. 29:13.
Oyuwanzire erikokibwa omwa hema ya Yehova atholere iniabya ‘akabugha ekwenene omwa muthima wiwe.’ (Esy. 15:2) Eki sikirisubulira okw’ithendi bugha amabehi. Yehova anzire ithwabya b’okwenene omwa byosi ebya thukakolha n’eribugha. (Ebr. 13:18) Ekyo ni kikulhu, kundi “abahengemire ninye okwa Mwami Mukulhu; nikwa obwira bwiwe buli haghuma n’abathunganene.” (Emi. 3:32.) Abakabugha okwenene okuli omwa mithima yabu sibali yilingiriranaya nga ni bowa ahali abandu bangyi kandi ibane muthwa ebihano bya Nyamuhanga bubiso-biso. Bakayihighulha okw’ikolha omwa buthebya. Omuthebya anganatsuka erithika-thikira amenge awali omwa bihano birebe ebya Yehova. (Yak. 1:5-8) Anganaghana eriowa Yehova omwa myatsi eyo akalengekanaya athi si y’omughaso munene. Neryo, hamabya nga sihathabya akabi akakalhwiririra omwa buth’owa bwiwe, inianganathwa ebihano bya Nyamuhanga kinyamwisi kandi eriramya liwe irikendibya ly’obuthebya. (Omu. 8:11) Aliwe ithwe thwanzire ithwabya b’okwenene omwa myatsi yosi. w24.06 10 enu. 7-8
Musike, omukabba w’ekwenene inianabohire ndeke omwa mbindi yenyu.—Efe. 6:14.
Abandu ba Yehova banzire ekwenene eyiri omwa Kinywe kya Nyamuhanga. Erikirirya lyethu liseghemere kuyo. (Abar. 10:17) Thwabirikakasya ngoku Yehova mwahiraho ekithunga ky’Ekikristayo eribya ‘nduyi eyikasikaya omwatsi w’ekwenene.’ (1 Tim. 3:15) Sitani anzire thuheraye eriyikethera lyethu omwa Biblia kutse omwa busondoli obo thukahebawa omwa kithunga kya Nyamuhanga. (Efe. 4:14) Omwa buthuku obuthe bwa haali, Diabolo akendi kolesya amabehi awakalire eritheba ebihanda ebyosi nuku bihakanisaye Yehova. (Erib. 16:13, 14) Kandi thunasi ngoku Sitani akendi hiraho akaghalha kanene kutsibu erithebya abandu ba Yehova. (Erib. 12:9) Neryo kwesi, ni kikulhu ithwe erigha nga thwanga minyerera thuthi embaghane eyiri ahakathi-kathi k’ekwenene n’amabehi nuku thukwamirire ekwenene. (Abar. 6:17; 1 Pet. 1:22) Ekyo ky’ekikendi syaleka ithwalhama omwa buthuku bw’obulighe bunene! w24.07 8 enu. 1-3
Ekihano eki ekyo ngabahana munabwire, sikibalemire, kutse sikiri haali.—Ebi. 30:11.
Yehova abere atheghekania Abaisraeli eribya kihanda, mwakolha nabo endaghane, amahirayo omwa buhandiki. Ku baghendera okwa bihano biwe angabatheghirye n’eribatsumulha. Aliwe kubamuyisamambulhako—ng’eky’erileberyako, erithwamu eriramya esindi nyamuhanga—angabalhusiryeko emighisa yiwe, neryo ibaghalhwa. Nomwabine, kyanga thokekene ibo erithasyasimwa na Nyamuhanga. ‘Bangasubire oku Yehova Nyamuhanga [wabo] n’erikenga omulenge wiwe.’ (Ebi. 30:1-3, 17-20) Ni bugha ambu, bangayisubiremo. Ku bakolha ekyo, Yehova angabayithundireko n’erithasyabatsumulha. Abandu ba Yehova abasombwerwe ibakabera erimuyisamambulhako. Busana n’ekyo mubaghalhwa. Aliwe Yehova mwathalhuhirira okwa bandu biwe abamusighanaya. Mwabathumako abaminyereri biwe ngendo nyingyi eribalemba-lemba athi bayisubemo kandi bamusubeko.—2 Abami 17:13, 14. w24.08 9 enu. 4-5
Ekithunga ekyabya e Yerusalemu mukyendereribwa kutsibu.—Emib. 8:1.
Abakristayo Abaebrania ababya b’ikere e Yerusalemu ne Yudea mubabana ebitsibu ebikalire myaka mirebe Yesu aliholire. Buthuku buke ekithunga ky’Ekikristayo ky’alitsukire, Abakristayo mubendereribwa kutsibu. Neryo emyaka 20 enyuma waho, abigha ba Kristo mubabana ebitsibu eby’emingirirye ebikalire obundi ebyasa busana n’enzalha eyabya iyabiribya omwa kihugho ekyo. (Emib.11:27-30) Nomwabine, ng’omwa 61 E.K., Abakristayo mubathunga obuholho okwa lhulengo lhulebe bwamalinganisibwa n’ebitsibu ebya bangabwene omwa buthuku bw’embere. Okwa buthuku obo, Paulo mwabathumira ebaruha eyasondolibawa—ebaruha eya babya bakayithagha kutsibu okwa buthuku obo. Ebaruha eyo Abaebrania bahandikirawa muyasira okwa buthuku obutholere kundi obuholho obo Abakristayo bathunga bw’angabere bw’akathuku kake. Paulo mwaha erihabulha eryuwene eryanga wathikirye Abakristayo abo eriyiyinirya ebitsibu ebya babya ibakayabana. w24.09 8 enu. 1-2
Babirinyihumulikania kutsibu.—Kol. 4:11
Omughulhu thuli omwa bitsibu, balikyethu bakaleka ithwalhangira olhwanzo olho Yehova athuwithire. Abikirirya balikyethu bangana thuhumulikania omw’ithuhulikirira ndeke, kutse bangana thusighika omw’ibya haghuma nethu. Bangana thuhimba omw’ithukanirya okwa mulhondo owe Biblia owakahumulikanaya kutse erisaba haghuma nethu. (Abar. 15:4) Okwa bundi buthuku, mughalha wethu kutse mwali wethu angana thw’ibukya amalengekania wa Yehova kandi eki ikyathuwathikya erilholha embere eriyiyinia. Kandi Abakristayo balikyethu bangana thusighika omwa nzira esilhangirikire, ng’erithuha ebyalya omughulhu thuli omwa bitsibu. Thwamanza abandi bathuwathikaye, thutholere ithwabasaba obuwathikya. (Emi. 17:17) Aliwe banganabya isibasi ekya thukayithagha kutse nga thukayowa thuthi. (Emi. 14:10) Busana n’ekyo, ibya iwunayitheghekire eribwira abanywani abuwene b’eriyowa lyawu. Leka baminye obuwathikya obwa wanga yithagha. Wangana thwamu eribwira omusyakulhu kutse abasyakulhu babiri abo wukayowa buholho erikania nabu. Abandi bali bethu babirilhangira ngoku eribwira mwali wethu oyukulire omwa myaka kikahumulikanaya. w24.10 10 enu. 15-16
Obuli mundu oyukaminya Mughalha n’erimwikirirya [akendi ] syabana engebe y’erikotha.—Yn. 6:40.
Abandu bangyi bakayitheghaya bikahika okwa ebya bakalya n’erilengaho erikolha ebisasayizi mughulhu wosi, erithoka eribya ibanawithe amaghalha awuwene. Nomwabine, sibali lengekanaya bathi bangana byaho kera na kera. Eriyisunza eryo likabya nga siryanga thokekana kandi wangana ghana eriyisunza ekyo ahabw’amalighe awakasa busana n’erikulha omwa myaka. Nomwabine, Yesu mwakania ndeke okwa “engebe y’erikotha,” ngoku kikanganibwe omu Yohana 3:16 na 5:24. Kiro kighuma, omwa nzira y’ekithiko-thiko Yesu mwalisya esyongumi sy’abandu b’emiggati n’esiswe. Ekyo kyabya kibuya, aliwe ebyo abugha ekiro ekyakwamako mubyaswekya kutsibu. Ekikumulha ky’abandu kyabya kyabirimukwama e Kapernaumu, hakuhi n’omusike w’Engetse ye Galilaya, eyo mwabwira abandu ngoku bakendi syalhubukibwa n’eribana engebe y’erikotha. (Yn. 6:39, 40) Ebinywe bya Yesu bikakanganaya ngoku abangyi ababiriholha bakendi syalhubukibwa kandi ngoku iwe haghuma n’abanzwa bawu mwangana syabana engebe y’erikotha. w24.12 8 enu. 1-2
Inywe abiba . . . mubahe ekitsumbi kundi munasi ngoku bolhoberere ku balhaba ng’ekindu eky’eribumba, ni bugha ambu, abakali.—1 Pet. 3:7.
Ekithongole kye World Health Organization kikakanganaya ngoku abiba bangyi bakakolha-kolha bakali babu ba nabi kinyamubiri, omwa binywe kutse omw’iyowa. Iba oyukakolha eki anganasikya mukali wiwe embere sy’abandu aliwe iniamunubya ibane eka. Ni kyahi ekyangaleka abandi balhume ibakolha-kolha bakali babu ba nabi? Banganabya imubakulibwa n’abathatha abatsurumire, neryo ibalengekania bathi erikolha-kolha bakali babu ba nabi ni kya buli kiro. N’abandi bangana hambwako n’ekalikya ey’ewabu, eyikakulha-kulhanaya amalengekania mabi awakabugha athi “omulhume w’okwenene” atholere iniakalha oku mukali wiwe erithoka erimukangania omukulhu nga nindi. Abandi balhume mubathakangiriribwa erikakirya eriyowa lyabu, imwamune n’ekinigha. Abandi balhume babirithunga amalengekania awathatholere okwa bakali n’emyatsi y’engyingo busana n’eribya bakalebya eponografe mughulhu wosi. Eryongera okw’ekyo, abasomire bingyi bakakanganaya ngoku ekihunzo kye Korona mukyalekire ebitsibu ebi iby’ongera. Omo kwenene, okwa syonzumwa syosi esi sihali eya omulhume angayihambulyamo erikolha-kolha mukali wiwe ya nabi. w25.01 8 enu. 2-3
Kundi Kristo mwaghalhwa omwa mubiri, nenyu muyitheghekere amalhwa imune n’obulengekania ng’obo.—1 Pet. 4:1.
“Wutholere iwanza Yehova Nyamuhanga wawu n’omuthima wawu wosi n’engebe yawu yosi n’akaghalha kawu kosi n’obulengekania bwawu bwosi.” (Lk. 10:27) Yesu mwakangania ndeke-ndeke ngoku eki ky’ekihano kikulhu omwa Mighambo ya Musa. Lhangira ngoku olhwanzo olhwa thuwithire Yehova lhukahamba okwa mithima yethu, ni bugha ambu ebyo thukayisunza n’eriyowa lyethu. Kandi likahamba n’okw’iyihayo lyethu erilhua okwa muthima, n’amaaka wethu—kuthya n’akaghalha kethu. Aliwe kandi, erianza Yehova kikahamba okwa bulengekania bwethu, ni bugha ambu emibere thukalengekanirayamo okwa myatsi. Ni kwenene, sithwanga yitheghererya ighuma amalengekania wa Yehova awosi. Aliwe thwangana yitheghererya ndeke amalengekania wa Nyamuhanga omw’iminya ‘obulengekania bwa Kristo’ kundi Yesu akakanganaya ndeke-ndeke amalengekania wa Thatha wiwe.—1 Kor. 2:16. w25.03 8 enu. 1
Omw’iyo thwabiriboholhwa erilhabira omwa ndongolya omwa musasi w’oyo, ee, erighanyirwa ebibi byethu, erikwamana n’olhukogho lhwiwe lhunene.—Efe. 1:7.
Ng’omundu oyuwabya ahikene, Yesu yuwabya ingene n’omulhume w’erimbere ya Adamu, athali akolha ekibi. (1 Kor. 15:45) Neryo erilhabira omwa lhuholho lhwiwe, Yesu mwathoka erighulha ekibi kya Adamu, ni bugha ambu erisubyaho ebyosi ebyo Adamu aheraya. (Abar. 5:19) Busana n’ekyo, Yesu mwabya “Adamu w’enyuma.” Sihakiri ekindi kiyithawa ekyangaleka omundu oyuhikene iniasa eriliha ekya Adamu aheraya. Yesu mwaholha “ngendo nguma nyisa.” (Ebr. 7:27; 10:12) Kwesi, ni mbaghane yahi eyiri ahakathi-kathi k’emitheghekere y’erihanulha n’endongolya? Emitheghekere y’erihanulha ky’ekya Nyamuhanga akakolha erisubyaho obughuma obuwene ahakathi-kathi kiwe n’abandu. Endongolya y’endihi eyikalihawa nuku erihanulha lithokekane okwa bakolha-nabi. Endihi eyi yahebawayo erilhabira omwa musasi wa Yesu ow’obughuli ow’uthibawa busana nethu.—Ebr. 9:14. w25.02 5 enu. 12-13
Nyamuhanga ni muyiketherwa, kandi syangaligha mukabana erilengwako eryo muthe mwangathoka erighumira, aliwe kandi omw’ilengwako eryo akendi yira eky’erikolha nuku mwanga thoka eriyiyiniryalyo.—1 Kor. 10:13.
Erilhangira Yehova ng’omundu oyuliho kikendi leka ithwathunga amalengekania awatholere okwa bitsibu byethu. Thuthi? Thukatsuka erilhangira ebitsibu byethu ng’ekitsweka ky’omwatsi mukulhu owali ahakathi-kathi ka Yehova na Sitani. Diabolo akabugha athi thwamaghalhwa, ithukendi sighania Yehova. (Yobu 1:10, 11; Emi. 27:11) Aliwe thukabya thukathoka erighumira ebitsibu byethu, thukakanganaya ku thwanzire Yehova kandi ithwakangania ngoku Diabolo ni mubehi. Mbwino wunemuhakanisibwa n’egavumente, eribya omwa bunakwa, abandu erithendi hulikirira omw’ithulira, kutse ebindi bitsibu? Kyamabya ikwakiri kithya, wibuke ngoku emibere eyo wulimo yikakuha akaghisa ak’eritsemesya Yehova. Kandi wibuke ngoku, syanga ligha wukahikwako ekitsibu ekya wuthe wangathoka erighumira. Akendi kuha akaghalha k’eriyiyinia. w24.06 22 enu. 9
Obuli mughuma akalengawako omw’ikurwa n’eryohibwa omwa syongumbu siwe.—Yak. 1:14.
Mbwino wunasi emibere eyo kik’olhoberamo iwe erilengwako? Ni ky’akabi ithwe erighana obutseke bwethu kutse eribugha thuthi thunaghumire sithwangawa omwa kibi. (1 Yn. 1:8) Ekyo kine aho, Paulo mwabugha athi nibya ‘n’abakakolha omo Mulimu [abatholere bunyakirimu]’ bangana lengwako bamathendi lholha embere eritheya. (Gal. 6:1) Thutholere ithwayibera b’okwenene n’eriminya aho thukalemererawa. (2 Kor. 13:5) Neryo thwamabiriminya emibere eyo kik’olhoberamo ithwe erilengwako, thutholere ithwakolhaki? Ghumaya amaaka wawu w’erighana erilengwako eryo! Ng’eky’erileberyako, omwa biro bye Biblia, olhukyo lhw’esyombimbo abya mwanya ogho kyabya kik’olhoberamo esyonzighu eryingira omwa muyi. Busana n’ekyo, esyongyo isy’esikatheghibawa kutsibu. Kuthya, thutholere ithwaminya ndeke emyanya eyo kyang’olhoberamo ithwe erilengwako.—1 Kor. 9:27. w24.07 15 enu. 5-7
[Mulhole embere] erihethya ebighuma omwa buli mubiiri owuwene n’erikanyirira omw’iminya erihikire erya Nyamuhanga.—Kol. 1:10.
Ngoku kiri omw’isako lya munabwire, emibiiri mibuya eyi mwamuli erithulha engulhu yuwene. Neryo omughulhu thukasoma Ekinywe kya Nyamuhanga n’erikighaniryako, erikirirya lyethu omu Yehova likaghuma kandi thukaminya ekikaleka ikyabya kikulhu eribwira abandi b’engulhu yuwene. Erithoka erighasirwa omwa Kinywe kya Nyamuhanga, thutholere ithwayihighulha okw’iharabana thukasoma, thukayeghesya, n’erighanirya. Yithondolhaye. Wamasoma erisako erikakukalira eriyitheghererya, isiwalikyuruka. Omwakanya k’ekyo, kolesaya e Watch Tower Publications Index kutse Obusondoli obw’Erisekulya Omwa Bitabu eby’Abema ba Yehova nuku wubane erisoborera erihambire okw’isako eryo. Wamayithondolya wukayeghesya, iwukendi ghumya eriyikethera lyawu ngoku Ekinywe kya Nyamuhanga kihikire. (1 Tes. 5:21) Wukabya wuk’ongera eriyikakasirya ngoku e Biblia yihikire, kwa wukan’ongera wuthya eritsemera eribwira abandi okwa bya wuk’igha. w24.04 15 enu. 4-5
Ky’ekyaleka inathasyabahandikira: erilebya nga munemwendi kangania ku muli bowa omo myatsi yosi.—2 Kor. 2:9.
Dawudi mwabugha athi: “Ni mubuya kandi anayitheghekire erighanyira.” (Esy. 86:5) Mika mwahandika athi: “Nindi yo Nyamuhanga ng’iwe, oyukabuyira ebibi, n’erikiruka okw’ihona ly’amasighalira w’abandu biwe kwehi?” (Mika 7:18) Na Isaya mwabugha athi: “Omubi aleke enzira yiwe, n’omundu oyuthathunganene aleke amalengekania wiwe. Asube oko Mwami Mukulhu, nayu asyamughanyira; asube ahali Nyamuhanga wethu, kusangwa asyamubuyira ndeke.” (Isa. 55:7) Erithoka erigherererya Yehova, ekithunga kye Korinto mukyabwirwa erithangirira omulhume oyuwabiriyisubamu n’erimukakasya ku bamwanzire. Omw’ighendera okwa busondoli obo, ekithunga mukyakangania ngoku ‘ni b’owa omo myatsi yosi.’ Ni kwenene, habya ihamathalhaba mezi make omulhume oyo alilhusibirwe omwa kithunga. Aliwe erikunga lyabya iryabirimuhikya okw’iyisubamu isihali ekyangaleka ibalindirirya erimusubya omwa kithunga. w24.08 17-18 enu. 12-13
Omughuma asyathwalhwa n’owundi asyasighalha.—Mt. 24:40.
Thuli omwa buthuku obukasisimulha! Yesu akisiya iniatswera obuli mundu oyuliho. Yesu mwakania okwa buthuku obwanga hikirye okw’itswera eri omw’ibwira abigha biwe “ekiminyikalho” ky’obuminyereri eky’eryasa liwe erithendi syalhangirwa “n’erihwererera ly’emighulhu.” (Mt. 24:3) Obuminyereri obu buli omu Matayo sura 24 na 25 n’omwa myatsi eyihambangene n’obuminyereri obu eyiri omu Mariko sura 13 na Luka sura 21. Yesu mwaha erikunga eryanga thuwathikya erilhabira omwa mikya isathu. Mwamuli omukya ow’esyombuli n’esyombene, abasika abathebathabana mulhume ab’amenge n’abakiru, n’ow’esyotalanta. Obuli mukya akathuwathikaya eriyitheghererya ngoku obuli mundu akendi syatswerwa erikwamana n’emibere yiwe. w24.09 20 enu. 1-2
Obuli kindu ekya mukakolha kikolhawe omo lhwanzo.—1 Kor. 16:14.
Ebyosi ebya Yesu Kristo oyuli ky’erileberyako kyethu kikulhu akolha, abikolha busana n’olhwanzo olhw’awithire Thatha wiwe n’abandu. Olhwanzo olho mulhwaleka iniakolha kutsibu n’erikolha emibiiri eyahisi busana n’abandi. (Mt. 20:28; Yn. 13:5, 14, 15) Balikyethu, olhwanzo lhwamabya ilhwa lhukakuhira mw’omuhwa, Yehova iniakendi kutsumulha n’erikuwathikya erihika okwa bilhubirirwa byawu by’obunyakirimu n’eritholera eribya omughombe omuwathikya. (1 Pet. 5:5) Mughulhu mungyi, abandu omwa kihugho bakayighomba abakayihamaya. Kwabithe bithya omwa kithunga kya Yehova. Mughalha wethu oyuwanzire abandi, nga Yesu kw’akolha, syalianza erithabalha okwa bandi kutse erilhangirwa mw’ow’ekitsumbi. Omundu w’emiyiheko ng’oyo amasombolhwa omwa kithunga, inianganaghana erikolha emibiiri y’ahisi eyikayithaghisibawa eritsomana esyombuli sya Yehova esy’obughuli. Angana yowa emibiiri eyo nga siyimutholere.—Yn 10:12. w24.11 15 enu. 6-7
Omulimu abuyirire abiribasombolha eribya balebererya.—Emib. 20:28.
Erithimba omwa kihugho kyosi, thukayithagha baghalha bethu bangyi abangakolha ng’abalhume b’olhusunzo. (Efe. 4:8) Wamabya iwuli mughalha wethu oyubatizibirwe, mbwino wunawithe “amaaka omwa byalha byawu erikolhakyo”? (Emi. 3:27) Wunanzire eritholera erikolha ng’omughombe omuwathikya? Wunanzire eritholera eritsomana ebiyithawa bya balikyenyu omw’ikolha ng’omusyakulhu? Mbwino wangana thoka erikolha esyombinduka ndebe omwa ngebe yawu nuku w’usuliriraye efomu y’erighenda okwa Sukuru y’Abathuliri b’Obwami? Esukuru eyi yikendi kuthendeka n’erileka Yesu iniakukolesya omwa buswire. Wamayowa nga siwutholere, saba Yehova. Musabe obuwathikya bw’omulimu wiwe abuyirire erithoka eriberererya ndeke olhukwamirwa lhwosi-lhwosi olho wukahebawa. (Lk. 11:13) Erikolha kutsibu lya baghalha bethu abo Yesu abirisombolha ng’abalhume b’olhusunzo likaleka ithwakakasya ngoku anemuthusondolha omwa biro bino eby’enyuma-nyuma. (Mt. 28:20) Mbwino siwuli sima eribya ithuwithe Omwami w’olhwanzo, oyukahithaya, oyutsomene kandi oyukathuha baghalha bethu abatholere erithutsomana? w24.10 23 enu. 16-17
N’emyatsi y’erimbere siyendi syasy’ibukwa.—Isa. 65:17.
Kandi ibbwa ebindu byosi ebyabirileka abandu ba Nyamuhanga ibabya omwa bulhumi n’obulighe? Erighunzerera, ebindu byosi ebyo ‘sibyendi syasibukwa [kandi] bibisamire okwa meso wa [Nyamuhanga].’ (Isa. 65:16) Yehova akendi syaghunzaho ebitsibu byethu ebyosi, kandi obuthuku bunemulhaba obulhumi obukasa busana n’eryibuka ebindu ebyo bukendi syahweraho ighuma. Nibya nalino, erighenda okwa mihindano yethu kikaleka ithwahumulikana, ithwathekana, n’erithendi lengekania okwa bitsibu by’ekihugho kibi kino. Thukaleka balikyethu ibathekana thwamakangania emibere ng’olhwanzo, obutseme, obuholho, obwenge, n’omuthima mwolho ebiri omwa kighuma ky’omulimu abuyirire wa Nyamuhanga. (Gal. 5:22, 23) Ka ni mughisa eribya omwa kithunga kya Nyamuhanga! Abakasighalha omwa paradiso y’obunyakirimu bakendisya yilhangirira eribererera ly’omulhaghe wa Nyamuhanga ‘ow’olhubulha lhuhya-lhuhya n’ekihugho kihya-kihya’ omwa buswire. w24.04 22 enu. 9-10
Ni kithegho oko mundu eribugha lithya-lithya athi, Kibuyirire, n’enyuma w’erilhahirya eribulya-bulya.—Emi. 20:25.
Nomwakine indi obuthethane bwanga tsemesya, aliwe ni kiika kikulhu ekyangana kolya okw’ingira omwa butheke. Okwa kiro kyabu ky’obulunga, abathahenie bakayilhagha embere sya Yehova erianzana n’erisikania omwa ngebe yabu yosi. Thuthe thwayilhagha, thutholere ithwalengekania okwa mwatsi oyu kwa ndeke. Omo kwenene, ekyo kihikire bikahika okw’iyilhagha ly’obutheke. Obuthethane bukaleka omulhume n’omukali ibaminyana neryo ibathwamu ndeke. Okwa bundi buthuku, erithwamu eryo likabya in’ingira omwa butheke; n’okwa bundi buthuku likabya in’ithwa obuthethane. Omulhume n’omukali bamalekana, eki sikirimanyisaya kithi obuthethane bwabu sibuthaghasa. Omwakanya k’ekyo, obuthethane bukabya ibwabiriberererya ekighendererwa kyabo—eribawathikya erithwamu ndeke. Busana naki ni kikulhu eribya n’amalengekania awatholere okwa buthethane? Abahuru bamathunga amalengekania awatholere, isibend’ingira omwa by’olhwanzo n’omundu oyo bathanzire eryingira nayu omwa butheke. w24.05 26-27 enu. 3-4
Isiwakwa esisoni sy’eriha obwema oko Mukama wethu.—2 Tim. 1:8.
Okwa bundi buthuku, Abakristayo abalere bangana sagha erilhwira okwa ebya bikirirye. Ibangana sagha omughulhu omwatsi ow’ebindu eriyibuthukira akakanibawako omwa klasi. Busana naki? Abahalimu babu ibangana bugha bathi omwatsi ow’ebindu eriyibuthukira ahikire. Wamabya iwuli mubuthi, wangawathikya wuthi omwana wawu erithoka erisighalha inianakakasirye eby’ikirirye? Mukakasaye ngoku syatholere akakwa esisoni ahabw’eribya iniasi ekwenene eyihambire okw’ihangika. Busana naki? Ekwenene yiri yithi abanya sayansi bangyi nabu banasi ngoku engebe siyayibuthukira. Erikatha-kathania eriri omwa bihangikwa erya bakalhangira likakanganaya ndeke-ndeke ngoku hane omuhangiki w’amenge oyuwabihangika. Busana n’ekyo, sibali lighirana n’engangirirya ey’ebindu eriyibuthukira. Omwana wawu anganaghumya eby’ikirirye omw’ilengekania okwa syonzumwa esyaleka abandi balikyethu ibikirirya ngoku engebe yahangikawa. w24.12 18 enu. 14-15
Mwatsema kutsibu omwa mulimu abuyirire.—Lk. 10:21.
Yesu mwasighalha inianawithe eriyikethera ngoku hakendibya abakahulikirira engulhu yuwene. Ekyo mukyamuwathikya erisighalha inianawithe omuhwa omw’ithulira liwe. Ng’eky’erileberyako, okw’ihwererera ly’omwaka wa 30 E.K., Yesu mwalhangira ngoku abandu bangyi babya ibananzire ibahulikirira engulhu yuwene, kandi mwabalinganisya n’eririma ery’erire ini ly’erighesa. (Yn. 4:35) Habere halhaba mwaka nga mughuma, Yesu mwabwira abigha biwe athi: “Eby’erighesa ni bingyi.” (Mt. 9:37, 38) Kandi enyuma waho mwathasyakihirako omuwathu athi: “Eby’erighesa ni bingyi . . . Mulembe-lembe Omukama w’erighesa athume abaghesi omw’ighesa liwe.” (Lk. 10:2) Yesu mwasighalha inianawithe amaha ngoku abandu bakendi hulikirira engulhu yuwene kandi mwatsema bakakolha ekyo. Yesu mwakangirirya abigha biwe eribya ibanayikethere ngoku omwatsi wabu akendi hulikirirwa, ekindu ekyangalekire ibalholha embere n’omuhwa. w25.03 18-19 enu. 15-16
Nyamuhanga waghe ni muhanganiri [Olhukuka] waghe.—Esy. 94:22.
Yehova ni busaghiro. Ngoku omundu anganabisama omwa lhukuka lhunene akayibisa okwa kiyagha kinene, Yehova akathutheghaya thukabana ebitsibu ebikalire omwa ngebe yethu. Akathutheghaya kandi akalhangira athi sithuli ghalhawa erihika kera na kera. Kandi nibya akayilhagha bingyi kw’aho: Erighunzerera akendi syaghunzaho ekyosi-kyosi ekikahamba nabi okwa buholho n’obutheya bwethu. (Zake. 34:25, 26.) Enzira nguma eyo thukakanganirayamo ngoku Yehova ni Busaghiro bwethu obuli ng’olhukuka ly’erimusaba. Thukabya thukasaba, Yehova akathuha obuholho bwiwe obukatheghaya emithima yethu n’amalengekania wethu. (Flp. 4:6, 7) Yehova akabya inianayitheghekire erithuwathikya. Thwangana muyikethera kundi iyo ni “ribwe erya kera na kera.” (Isa. 26:3, 4) Mughulhu wosi akendibya inianayitheghekire eriberererya emilhaghe yiwe, erihulikirira emisabe yethu, n’erithuha obuwathikya obo thukayithagha. Kandi thwangana yikethera Yehova kundi syali leghulha okwa bakamukolera. (2 Sam. 22:26) Syendi sy’ibirirwa ebyo thukakolha, kandi akendi syabya inianemuthuhemba.—Ebr. 6:10; 11:6. w24.06 27 enu. 4-6
Theghaya omuthima wawu n’omuhwa wosi; kusangwa mugho mukalhua esyongununuko sy’engebe.—Emi. 4:23.
Eby’eriyitsemesya ebithuwene byangana leka omuthima wethu iniayighaba. Kuthya n’abanywani babi, n’amalengekania w’erianza ebindu. Thwamalhangira ekindu kirebe ikyabiritsuka eritsekya olhwanzo olhwa thuwithire Yehova, ambi ithwathwamu aho naho eriyilhusyakyomo. (Mt 5:29, 30) Sithutholere thukalighira emithima yethu eriyighaba. Ithwangana yitheba omw’ilengekania thuthi erikanyirirya emibiiri yethu y’obunyakirimu kikendi thutheya okwa byanga thuhambako nabi. Ng’eky’erileberyako, thalengekania iwune eyihya okwa kiro ky’omuyagha owali mw’ekihuhiriro kinene. Wukahika eka, iwukendi ghenda ahali ekihuhania. Mbwino iwune mwend’ighasirwa wamathendi kinga olhuyi? Ekihuhiriro ikikendi lhuaho iky’usulha omwa nyumba yawu. Erisomo? Sithutholere thukakwama kyasubulira okw’irya ebyalya eby’obunyakirimu ebyanga huha-huhania obughuma bwethu na Yehova. Aliwe kandi thutholere ithwakinga olhuyi olhwang’ingirya amalengekania awathuwene nuku “embeho” y’ekihugho, kutse amalengekania awathatsemesaya Nyamuhanga, sy’ingire omwa muthima wethu n’erighabulhawo.—Efe. 2:2. w24.07 21 enu. 6-7
Mulhole embere erianza esyonzighu syenyu kandi musabire abakabendereraya.—Mt. 5:44.
Ithwangana tsuka erilengekania okwa bulhumi obo Yesu alhabamo kuthya n’erithendihebwa ekitsumbi n’obuthe bulingirirania obo ayiyiniraya. Nomwabine, mwathakindwa n’obuthe bulingirirania obo abana. Omwakanya k’eritsuma abasirikali abamukongomerera okwa muthi, mwasaba athi: “Thatha, baghanyire, kundi sibasi ebyo bakakolha.” (Lk. 23:34) Thwamasabira abakathukolha nabi, ekyo kikakehaya eriyowa lyethu ery’eribika ekinigha n’erihithana n’erihindulha amalengekania awathuwithe okw’abakathuponesaya. Sithwangaminya nga ni buthebulingirirania bwahi obo thukisiya ithwakanganibwa omughulhu mubi ono athali ahwaho. Ekyosi-kyosi ekyanga thwasira, isithwalekeraho erisaba Yehova y’obuwathikya. Kandi thugherereraye ebya Yesu akolha akakolhwa nabi n’erilholha embere erighendera okwa misingyi ye Biblia. Thwamakolha ekyo, ithukendibya ithunasi ngoku Yehova akendi syathutsumulha.—1 Pet. 3:8, 9. w24.11 6 enu. 16; 7 enu. 17, 19
Si wuli Nyamuhanga oyukatsemera ebibi, ebibi sibiri haghuma nawu.—Esy. 5:4.
Yehova syaliligha omulingo wosi-wosi w’emitse mibi; aponire ekibi. (Esy. 5:4-6) Anzire ithwasikya ebihano biwe ebithunganene, ebyo abirithuhirira omwa Kinywe kiwe. Ni kwenene, Yehova syalisondaya okwa bandu abathahikene kw’erihikana. (Esy. 130:3, 4) Okwa ndambi iyan’eyo, syalilighira ‘abandu abakahengemaya olhukogho lhwiwe omo nzira y’erikwama esyongumbu nyibi.’ (Yuda 4) Ni kwenene, e Biblia yikakanganaya ngoku “abandu abathekenga Nyamuhanga” bakendi syathoghothibwa omwa lhuhi lhwa Nyamuhanga olhwe Harmagedoni. (2 Pet. 3:7; Erib. 16:16) Nomwabine, Yehova syanzire owosi-wosi akathoghothibwa. E Biblia yikakanganaya ndeke-ndeke ngoku “anzire abandu bosi ibabindulha emithima yabu n’erileka ebibi.” (2 Pet. 3:9) Omw’ighumisirizya, abasyakulhu b’ekithunga bakagherereraya Yehova bakalengaho eriwathikya abakolha-nabi erihindulha emibere yabu n’erithasyasimwa na Yehova. w24.08 26 enu. 1-2
Akahabyo ebitholerebyo, kandi akughuthaya obwagha bw’abosi.—Esy. 145:16.
Nga Yehova, nethu thwangana hithya ebindu by’ekinyamubiri busana n’olhwanzo. Ng’eky’erileberyako, wunasi omwikirirya mulikyethu oyuli omwa buyithawa bw’ekyerirya kutse eby’eriambalha? Yehova angana kukolesya erimuha ekindu ekikendi leka iniabana ekiyithawa kiwe ekyo. Abandu ba Yehova banasibwe ng’abakakanganaya omubere w’erihithya hakawa ekitsinduli. Ng’eky’erileberyako, omwa mughulhu w’ekihunzo ky’ekorona Covid19, balikyethu ibakaha abandi abali omwa buyithawa b’ebyalya, eby’eriambalha, n’ebindi bindu. Kandi abangyi mubahayo ahathe erikakwa erisighika omubiiri w’ekihugho kyosi. Ekyo mukyaleka ikyathokekana eriwathikya balikyethu abali omwa buyithawa erithimba omwa kihugho kyosi. Mubaghendera okwa binywe ebiri omwa Abaebrania 13:16: “Simwibirirawe erikolha ebibuya n’eriwathikania, kusangwa ebi biri ng’amahere awakatsemesaya Nyamuhanga.” w24.09 27 enu. 6-7
Minya ebikulhu kutsibu.—Flp. 1:10
Thalengekania iwune omwa mibere eno. Wune murondya omubiiri erithoka erisighika eka yawu. Hali emibiiri ibiri. Iwalengekania ndeke okwa bihambire okwa mwatsi oyo, ng’eriminya nga ni mubiiriki, endegheka y’okwa mubiiri, obuthuku obwa wanga ghunza omwa nzira wukayayo, n’ebindi-n’ebindi. Emibiiri yosi ibiri eyi, yikalighirawa omwa Masako. Obundi wanzire omughuma w’okwa mibiiri eyo kundi wukatsemera ebyo wukendi kolhayo kutse kundi omusara ni munene okwa w’owundi mubiiri. Nomwabine, hane ebindi eby’erilengekaniako wuthe wathwamu. Ng’eky’erileberyako, mbwino okwa mibiiri eyi kune owang’ingirira obuthuku bwawu bw’emihindano? Mbwino okwa mibiiri eyi sikuli owangakehya obuthuku obwa wukayithagha eritsomana eriyowa ly’ab’efamile yawu n’obunyakirimu bwabu? Eriyibulya ebibulyo ng’ebi kikendi kuwathikya erihira “ebikulhu kutsibu”—eriramya lyawu n’ebiyithawa ebya b’omwa famile yawu—embere sy’ebindu by’ekinyamubiri. Neryo iwukendihika okw’ithwamu eryo Yehova akendi tsumulha. w25.01 17 enu. 11-13
[Yehova] ali hakuhi n’ab’emithima ibbunangikire.—Esy. 34:18.
Nomwakine indi abandi babirikukolha nabi, wangana yikethera ngoku Yehova akwanzire kandi ngoku akakulhangira mwa w’obughuli. Wamayowa ‘isiwuwithe maha,’ wibuke ngoku Yehova mwalhangira ebibuya omwa muthima wawu neryo amakuletha okw’iyo. (Yn. 6:44) Anayitheghekire erikuwathikya kundi wuli w’obughuli embere siwe. Thwangana minya Yehova ng’akayowa athi omw’ilengekania okwa ky’erileberyako kya Yesu. Iniane okwa kihugho, Yesu mwalhangira ababya bakalhangirwa mwa b’ahisi, neryo mwabakangania olhukeri. (Mt. 9:9-12) Omughulhu omukali oyuwabya awithe amaha w’erilhamibwa kw’obulhwere obukalire ahamba oko lhukimba lhwa Yesu, mwamuhumulikania kandi amamusima busana n’erikirirya liwe. (Mk. 5:25-34) Yesu akagherereraya ndeke-ndeke emibere ya Thatha wiwe. (Yn. 14:9) Neryo kwesi wangana yikethera ngoku Yehova akakulhangira mwa w’obughuli kandi ngoku akalhangira emibere yawu mibuya, imwamune erikirirya lyawu n’olhwanzo olhwa wumuwithire. w24.10 7 enu. 4-5
Wabirisaka emighanzo y’emisoni yaghe.—Esy. 56:8.
Omwa ngebe yiwe, Dawudi mwaghumira ebitsibu muthina-muthina ebikabbuna omuthima ebyaleka iniathoghongya emisoni. Mwakanganibwa obuyighu n’erighoberibwa n’abandu abo ayikethere. (1 Sam. 19:10, 11; 2 Sam. 15:10-14, 30) Buthuku bughuma, mwahandika athi: “Namalhuha omw’isimba lyaghe; obuli kiro ngatsapaya engyingo yaghe omo misoni, ngatsapaya aho ngaghotsera busana n’erilira.” (Esy. 6:6) Nomwakine indi Dawudi mwabana ebitsibu, abya inianakakasirye ngoku Yehova amwanzire. Mwahandika athi: “Kundi Omwami Mukulhu [Yehova] akowa erilira lyaghe.” (Esy. 6:8) Ebinywe ebiri omw’isako ly’ethu erya munabwire bikathukanganaya ndeke-ndeke ngoku Yehova athwanzire kandi ngoku athutsomene. Dawudi mwayowa Yehova ng’amasorokerya emisoni yiwe y’omwa tsupa kutse erihandikayo omwa kitabu. Dawudi abya inianakakasirye ngoku Yehova akalhangira n’eryibuka obulhumi bwiwe. Dawudi abya inianakakasirye ngoku Thatha wiwe w’elhubulha ow’olhwanzo syali subulira okw’iminya ebyo abirilhabamo aliwe kandi anasi nga byabirimuhambako bithi. w24.12 22 enu. 11-12

