Abigha ba Yesu mubaligha Ekinywe kya Nyamuhanga n’erilengaho erikighenderako omwa ngebe syabo. (Yn. 17:6) Nomwabine, mubathayitheghererya ekyaleka Yesu iniaholera okwa muthi w’amaghali ng’engoli y’ebibi. Yesu mwaminya ngoku abigha biwe banawithe erikirirya kandi banzire Yehova, aliwe ngoku erithika-thika lyabu lyabya busana n’erithendi yitheghererya ndeke Amasako. (Lk. 9:​44, 45; Yn. 20:9) Mwabakangirirya nga banga ghanirya bathi okwa Amasako. Thalengekania ngoku akolha ekyo akabuthukira okwa babiri b’okwa bigha biwe omwa nzira ye Emau. Yesu mwathakwama kyabwira abalhume aba iyo nga nindi. Omwakanya k’ekyo, mwababulya ebibulyo. Busana naki? Obundi mwanza babughe ebiri omwa bulengekania bwabu n’emithima yabu. Kandi mubakolha ekyo. Mubamubwira ngoku babya bakalengekania bathi Yesu angalhusirye e Israeli omw’inubibwa ly’abanya Roma. (Lk. 24:​18-27) Yesu mwakolesya Amasako eriwathikya abalhume aba eriyitheghererya ekyabya. Enyuma waho omw’igholho eryo, Yesu mwaghunza buthuku inianemukakasya abandi bigha biwe b’ekwenene eyi.—Lk. 24:​33-48. w24.10 14 enu. 9-10

Yesu mw’ighira oku Thatha wiwe w’elhubulha ebyo angakolha n’ebyo ang’abugha. Omw’ikwama eky’erileberyako kya Yesu, ekithunga kya Yehova kikaseghemeraya esyongangirirya syakyo n’obusondoli okwa Kinywe kya Nyamuhanga. (2 Tim. 3:​16, 17) Mughulhu wosi thuk’ibukibawa erisoma Ekinywe kya Nyamuhanga n’erikighenderako. Thukaghasirawa kutsibu thwamayeghesya e Biblia omw’ikolesya ebitabu byethu. Ng’eky’erileberyako, thukathoka erilinganisya esyongangirirya sye Biblia n’obusondoli obo thukahebawa omwa kithunga. Thukabya thwamalhangira ngoku obusondoli obo thukahebawa buseghemere okwa Masako, eriyikethera lyethu omwa kithunga kya Yehova likayongera. (Abar. 12:2) Yesu mwathulha “engulhu yuwene y’Obwami bwa Nyamuhanga.”  (Lk. 4:​43, 44) Yesu kandi mwalhaghira abigha biwe athi bathulhughanaye ebihambire okwa Bwami. (Lk. 9:​1, 2; 10:​8, 9) Munabwire abosi abali omwa kithunga kya Yehova bakathulha omwatsi w’Obwami nomubangabya ib’ikere. w24.04 9 enu. 5-7

Yikethere obusondoli bw’ekiteokrasi. Omwa Israeli ya kera, Yehova mwakolesya Musa n’enyuma waho amakolesya Yosua eriha abandu biwe b’obusondoli. (Yos. 1:17) Abaisraeli mubatsumulhwa bakalhangira abalhume aba ng’ab’imaniri ba Yehova Nyamuhanga. Bighana bingyi enyuma waho, ekithunga ky’Ekikristayo mukyatsuka, abakwenda 12 ibabakaha obusondoli. (Emib. 8:​14, 15) Neryo egurupu eyo muyongerwamo abandi basyakulhu be Yerusalemu. Omw’ighendera okwa busondoli obo abalhume abathaleghulha aba babya bakabaha, “esyokanisa musyabana amaaka omw’ikirirya, n’erighanza lyabo mulyakanya obuli kiro.” (Emib. 16:​4, 5) Nethu munabwire thukatsumulhawa thukakwama obusondoli bw’ekiteokrasi obo ekithunga kya Yehova kikaha. w24.07 10 enu. 10

Yehova aby’anzire kutsibu Omwami Dawudi. Nibya mwamwahulhamo “omundu oyo nyanzire.” Aliwe Dawudi mwasangira omwa bibi ebikalire kutsibu, imwamuli obusingiri n’obwithi. Erikwamana n’emighambo ya Musa, Dawudi aby’atholere iniakwa. (Law. 20:10; Emig. 35:31) Aliwe omwa lhukeri Yehova mwamuwathikya. Mwathuma omuminyereri Natana athi abungire omwami, nomwakine indi Dawudi abya isyathakangania ekiminyikalho kyosi-kyosi ky’eriyisubamo. Natana mwakolesya omukya owahika okwa muthima wa Dawudi. Dawudi mwahambwako kutsibu, neryo amayisubamo. (2 Sam. 12:​1-14) Mwahandika olhwimbo olhukalhua okwa muthima olhwakanganaya omuthima wiwe w’eriyisubamo. (Esy. 51, ehinywe ehiri ahighulhu okwa sura) Olhwimbo olho lhwabiri humulikania abakolha-nabi bangyi n’eribahiramo omuhwa w’eriyisubamo. Mbwino sithuli tsema eribya Yehova imwalholerya omughombe wiwe mwanzwa Dawudi y’okw’iyisubamo omo lhwanzo? w24.08 10 enu. 9

Abangyi ibakendi ligha ngoku eribya mubuthi ni mubiiri munene. Wamabya iwuli mubuthi oyuwithe omwana omulere, thukakusima ahabw’erikolha kutsibu erighumya erikirirya liwe. (Ebi. 6:​6, 7) Omwana wawu akendibya anemukulha, iniangana tsuka eribulya ebibulyo ebikalire ebihambire okwa ebya thw’ikirirye ebiseghemere okwa Biblia, imwamune n’ebihano bye Biblia eby’esyongeso. Okw’itsuka, ebibulyo by’omwana wawu byangana leka iwayilhalikirira. Nibya iwangana lengekania wuthi ebibulyo ebiri ng’ebi byangana subya erikirirya liwe ly’enyuma. Aliwe, omo kwenene, abaana abane mukulha bakayithagha eribulya ebibulyo erithoka eriyikakasirya eby’abikirirye. (1 Kor. 13:11) Neryo sihali ekyangaleka w’ukubaha. Wutholere iwalhangira ebibulyo ebya omwana wawu akabulhaya ebikalhua okwa muthima ebihambire okwa ebyo thw’ikirirye ng’akaghisa ak’erimuwathikya erikulha-kulhania amaaka wiwe w’erilengekania. w24.12 14 enu. 1-2

Abakristayo Abaebrania mubayithagha erikirirya erighumire eryanga bawathikirye erilhama okwa bulighe obwabya ibukayabya omwa Yudea. (Ebr. 10:​37, 38) Yesu abya iniabiribwira abigha biwe athi batholere ibathibitha omughulhu basyalhangira ebilhalhiriro by’amahe ibyabirithimba okwa Yerusalemu. Erikunga eri lyabya lihambire okwa Bakristayo abosi, mbulha babya b’ikere omwa tawuni kutse omwa byalu. (Lk. 21:​20-24) Abandu b’omwa buthuku obo ababya bak’ubahisibwa n’amahe ibakasondaya obutheya omwa muyi owathimbirweko olhuhimbo nga e Yerusalemu. Erithibitha okwa bithwe kyangabere ng’ekithe ky’amenge kandi kyanga yithaghire erikirirya linene. Abakristayo Abaebrania kandi babya batholere eriyikethera abo Yesu abya akakolesya erisondolha ekithunga. Ababya bakasondolha bangabya ibabya bakahebwa eby’erighenderako birebe ebyanga wathikirye abosi omwa kithunga erithoka erighendera okwa busondoli bwa Yesu okwa buthuku obutholere kandi omwa buyithondeke.—Ebr. 13:17. w24.09 10 enu. 9-10

Iniane okwa kihugho, Yesu mwakolha ndeke omubiiri ogho Thatha wiwe amuha. (Yn. 17:4) Aliwe Yesu syabya awithe amalengekania w’eribugha indi, ‘Wamanza ekindu kikolhawe ndeke, ambi iwayikolerakyo.’ Mwathendeka abandi erikolha omubiiri oyu. Yesu mwaha abigha biwe b’olhukwamirwa lhw’eritsomana esyombuli siwe esy’obughuli n’erisondolha omubiiri w’erithulira n’erikangirirya. Yesu mwahabulha abigha biwe ahathe eribisirira aliwe omwa lhwanzo. Abaghuma b’okw’ibo ibawithe omubere w’erithika-thika, neryo mwabahabulha. (Lk. 24:​25-27; Yn. 20:27) Mwabawathikya eriminya ngoku kikayithayisibawa erihira omuwatho munene w’okw’itsomana abandu ba Yehova omwakanya k’emibiiri yabu y’ekihugho. (Yn. 21:15) Mwab’ibukya erithendibya n’eriyowa erithatholere okwa syonzunzo esyo abandi bangahebwa. (Yn. 21:​20-22) Kandi mwahengulha amalengekania malebe awathatholere agho babya bawithe okwa Bwami n’eribawathikya erihwerya amalengekania okw’ithulhughania engulhu yuwene.—Emib. 1:​6-8. w24.10 15-16 enu. 13-14

Obwowa bukalhamaya esyongebe syethu. Ng’Abaisraeli ababya ibakisiya ibahika omwa Kihugho Ekyalhaghanisibawa, nethu thukisiya ithw’ingira omwa kihugho kihya-kihya ekyo Nyamuhanga abirilhaghanisya, eyo thukendisyalhangirira ekihugho kikahinduka mwa paradiso. (Isa. 35:1; Lk. 23:43) Diabolo n’esyombinga siwe bakendisyabya isibakiriho. (Erib. 20:​2, 3) Amadini w’amabehi awak’iha abandu b’oku Yehova akendi syabya isyakiriho. (Erib. 17:16) Esyogavumente esikanubaya abandu abali ahisi sy’obusondoli bwasyo sisyendi syabyaho. (Erib. 19:​19, 20) Omwa paradiso simwendisyabya bayisamambuli. (Esy. 37:​10, 11) Abandu ehosi bakendi syaghondera ebihano bya Yehova ebithunganene, ebikaleka ihabya obughuma, n’obuholho. Busana n’ekyo, bakendi sy’anzana n’eriyiketherana. (Isa. 11:9) Ayo ka ni maha awuwene kutsibu! Kandi ibbwa ekikulhu kutsibu, thwamowa Yehova, ithukendi syalholha embere eribya omwa kihugho paradiso butsira ahabw’ebikumi by’emyaka aliwe kera na kera.—Yn. 3:16. w24.11 9 enu. 7

Obuminyereri obu bunemubererera munabwire kwilhaba kera. Omwatsi w’Obwami anemuthulhughanibwa omwa mibughe eyilhabire omu 1,000, n’erilhabira okwa muthahulha we jw.org, abandu bangyi omwa kihugho banemw’owagho. Nomwabine, Yesu mwabwira abigha biwe athi “simwendisyalhaba omwa miyi yosi ye Israeli,” kutse erithulira obuli mundu, athali asa. (Mt. 10:23; 25:​31-33) Ebinywe bya Yesu bikendi bererera n’omwa buthuku bwethu buno. Esyomiliyoni sy’abandu munabwire b’ikere omwa myanya eyo omubiiri wethu w’erithulira abirihirwako olhukako. Eryongera okw’ekyo, esyongumi sy’esyomekeke sikabuthawa obuli dakika. Thukalengaho eribwira abandu omwa “buli kihanda, n’obuli mubughe” b’engulhu yuwene. (Erib. 14:6) Aliwe okwenene kuli kuthi sithwanga thoka eribwira obuli mundu y’engulhu yuwene enduli yithe yasa. w24.05 10 enu. 6-7

Yesu mwahumulikania abandi n’eribalhuhukya. Isyali tsurumira abigha biwe. (Lk. 8:​47, 48) Ekyo ka ni ky’erileberyako ekyuwene kutsibu okwa biba Abakristayo! Yesu mwalhaghira abiba athi babye bathaleghulha oku bakali babu. Mwasuba omwa ebya Thatha wiwe abugha, athi omulhume atholere ‘iniamathana na mukali wiwe.’ (Mt. 19:​4-6) Ekinywe ky’Ekigiriki ekyakolesibawa omwa mulhondo oyu ekya “erimathana” erikithwalha ngoku kine kikamanyisaya “erihambania omwa gamu.” Busana n’ekyo, obughuma obuli ahakathi-kathi k’omulhume na mukali wiwe butholere ibwabya ibughumire kutsibu eribya ng’abamathanibwe haghuma omwa gamu. Obughuma bwabu bwamathwika abosi ibakendi hambwako. Iba oyuwithe obughuma obuli ng’obu na mukali wiwe iniakendi ghanira ighuma obuli mulingo wosi w’eponografe. Aho naho akalhusaya “ameso okwa bithawithe mughaso.” (Esy. 119:37) Aho, akabya iniamakolha endaghane na meso wiwe ey’erithendi samalira owundi mukali oyuthe mukali wiwe omwa meso w’olhukumbu-kumbu.—Yobu 31:1. w25.01 10 enu. 12-13

Erighanyira ly’abandu likalire eriyitheghereribwa. Emibere eyo Yehova akaghanyiramu ni y’embaghane kutsibu okwa mibere eyo ithwe bandu abathahikene thukaghanyiramo abandi. Omuhandiki w’esyonyimbo mwakania oku Yehova athi: “Nikwa iwe wukathubuyira, ithwathoka erik’ubaha.” (Esy. 130:4) Akathuhiriraho eky’erileberyako ekikakanganaya erighanyira ly’okwenene. Okwa bundi buthuku, abahandiki be Biblia mubakolesya ekinywe ky’Ekihebrania ekikamanyisaya erighanyira ekithe kolesibawa erighanyira ly’abandu likakanibwako. Yehova akabya akaghanyira omundu, ekibi kiwe kikalhusibirawaho ighuma. Obughuma obwabiritsandibwa bukathasyasuba-subana ndeke. Thukasima Yehova kundi akathughanyira ighuma kandi mughulhu wosi. w25.02 8 enu. 1-3

Ithwe eribana ebibuya omw’ithulira sikiseghemere okwa bikalhwiririramo. Busana naki? Kundi thukabya ithwabirikolha ekya Yehova na Mughalha wiwe banzire ithwakolha—thukabya ithwabiriha obwema. Nibya n’omughulhu sithuthabana ow’erikania nayu kutse omughulhu omwatsi wethu amaghanwa, thwangana tsema kundi thunasi ku thukatsemesaya Thatha wethu w’elhubulha. (Emi. 27:11) Kandi thwangana tsema owundi muthuliri amabana omwa bulhambu mw’omundu oyuwanzisibirwe. Akaleberyo kakalinganisaya omubiiri wethu n’erisondya omwana oyuwabirithalha. Ni bandu bangyi abakamusondaya, kandi bakamusondaya ehosi-hosi. Akabya akabanika, oyulyamubana musa s’iyo akatsema—abosi bakatsema. Kuthya, omubiiri w’eriyira abigha ni w’erikolera haghuma. Abosi bakayithaghisibawa erithoka erighunza obulhambu, kandi abosi bakatsema omuhyaka akatsuka erihindana. w24.04 18 enu. 13-14

Ka thulindirire omughulhu ow’akasisimulha! Omwa buwathikya bwa Yehova, thuwithe amaha ngoku abangyi bakendi syaligha ekwenene obulighe bunene buthe bwatsuka. Kandi, thune mutsema busana n’ekikendi syathokekana nibya n’omwa obulighe bunene, thukendibya ithunemulhangira abandu bangyi bakalhua omwa kihugho kya Sitani ekitsandire n’erithuyiyungako omw’iramya Yehova! Ekyo kine aho, thuwithe omubiiri ow’erikolha. Thuwithe olhusunzo lhw’erisangira omw’ithererera erithendi syasubwamu—erithulhughanibwa ly’engulhu yuwene y’Obwami bwa Nyamuhanga omwa kihugho kyosi. Okwa buthuku ibwan’obo, thutholere ithwabya ithunemukunga abandu. Abandu batholere ibaminya ngoku enduli y’omughulhu mubi ono yine museghera hakuhi-kuhi. Olhwanzo olhwa thuwithire engulhu yuwene, abandu, ibbwa kwilhaba n’aho olhwathuwithire Yehova Nyamuhanga n’erina liwe—lhukendi leka ithwalholha embere erithulira ithunayitheghekire, omwa byalhuba, kandi n’omuhwa erihika aho Yehova akendi sy’abughira athi, “Omubiiri amahwa!” w24.05 19 enu. 14-16

Omw’igholho-gholho ly’ekiro Yesu ithibawa, mwakangirirya Petero n’abandi bakwenda b’erisomo likulhu erihambire okw’iyikehya. Ekyaswekaya abakwenda biwe ba kutsibu, mwakolha ekindu ekyabya kikakolhwa n’omughombe. Yesu mwayihako olhukimba lhwiwe olhw’eriyithomekako, amabohera eky’eriyisangulhamo ky’omwa mbindi, amahira amaghetse w’omwa bbafu, n’eritsuka erinabya ebisando byabu. (Yn. 13:​4, 5) Kyangabya imukyathwalha buthuku erinabya ebisando by’abakwenda abosi 12—imwamune Yuda, oyuwabya iniakayamughoberaya. Aliwe omw’iyikehya, Yesu mwaghunzerera omubiiri oyo. Neryo omw’ighumisirizya, Yesu mwasoborera athi: “Mwanamayitheghererya ekyo namabakolera? Mukanyahulhamo ‘Mukangirirya’ kandi ‘Mukama,’ kandi muhikire, kundi ekyo kyo nyiri. Busana n’ekyo, ingye, Omukama kandi Mukangirirya, namabya inamanabya ebisando byenyu, nenyu mutholere imwanabania ebisando.”—Yn. 13:​12-14. w25.03 10 enu. 9-11

Ekihugho kikaleka ikyakalha erisighalha ithune bughuma na Yehova. Abanene bakaghana eky’eribugha indi Nyamuhanga aneho. Mughulhu mungyi, kikalhangirika ngoku abakaghana ebya Yehova akabayithaghako bakabya nga bali omwa ngebe eyuwene. Thukabya thukalhangira eki kikabya, erikirirya lyethu lyangana lengwako. Nomuthwangabya isithwanga ghania eky’eribya Nyamuhanga inianeho, ithwangana tsuka erithika-thika ng’anemwendi thuwathikya. Omuhandiki we Esyonyimbo 73 mwayisanga iniabiriyowa athya ahabw’obuthuku. Mwalhangira abamuthimbireko ibanemugheghena ebihano bya Nyamuhanga aliwe ibane mutsemera engebe. Busana n’ekyo, mwatsuka eriyibulya nga kinahikire erikolera Nyamuhanga. (Esy. 73:​11-13) Ni kyahi ekyawathikaya omuhandiki w’esyonyimbo erihengulha amalengekania wiwe? Mwaghanirya okwa kyangabya okw’abo abak’ibirirawa Yehova. (Esy. 73:​18, 19, 27) Kandi mwalengekania okwa mighisa eyanga lhwiririra omw’ikolera Nyamuhanga. Nethu thwangana lengekania okwa mighisa eya Yehova abirithuha. w24.06 25 enu. 16-17

Omwa buthuku bwe Biblia, abandi ibakaghalhaya balikyabo abanakwa omw’ibasaba amaghoba okwa syosente esyo babya bakababweka. Kandi abandi batsweri ibakaligha ebraibu neryo ibatswera abathawithe lhubanza omwa buthe bulingirirania. Yehova aponire emikolere ng’eyi. (Zake. 22:12) Kyuwene eriyilebya nga thuwithe malengekaniaki okwa syosente. Yibulhaye: ‘Nganabera erilengekania okwa syosente n’ebyo sikaghulha? Namayibweka esyosente, nganakerererawa erisithuha, omw’ibugha nyithi omundu oyulyanyibwekasyo syali yithaghasyo? Mbwino eribya n’esyosente likaleka ingayowa ingali w’omughaso aliwe ikyaleka ikyakalha ingye eribya mwenge? Nganatswera balikyethu indi banzire ebindu bya kutsibu habw’erithabya ibawithe esyosente? Ngananywana abagaga kwilhaba abanakwa?’ Thwangana theya obunywani bwethu na Nyamuhanga omw’iyitheya okw’anza esyosente sya kutsibu. Thwamakolha ekyo, Yehova isyendi syathusighania! w24.06 12-13 enu. 17-18

Erithoka eriyitheya okw’ilengwako, thutholere ithwakulha-kulhania esyongumbu esitholere. Thwam’igha ‘erighalirwa okwa bibi n’erianza ebibuya,’ ithukendi ghumya erithwamu lyethu ly’erikolha ekihikire. (Amo. 5:15) Kandi esyongumbu esitholere sikendi leka ithwasighalha ithunasikire thwamayisanga omw’irengwako. Thutholere ithwayihwerya omwa mibiiri y’obunyakirimu ngoku thwanga thoka. Omughulhu thuli okwa mihindano y’Ekikrisitayo kutse omw’ithulira, thukaghumaya eriyisunza lyethu ly’eritsemesya Yehova. (Mt. 28:​19, 20; Ebr. 10:​24, 25) Omw’isoma Ekinywe kya Nyamuhanga n’erikighaniryako, thukaghumaya olhwanzo lhwethu busana n’ekibuya n’eryongera eripona ekibi. (Yos. 1:8; Esy. 1:​2, 3; 119:97) Wibuke, Yesu mwabwira abigha biwe athi: “Mubye mukasaba . . . , isimwingira omw’irengwako.” (Mt. 26:41) Busana n’ekyo, thukaghasirawa omwa buwathikya bwiwe n’erighumya erithwamu lyethu ly’erimutsemesya.—Yak. 4:8. w24.07 17-18 enu. 14-16

Abakathendeka abandi batholere ibagherererya enzira eyo Yehova akakolesaya eriha abandi okwa menge wiwe. Wibuke ngoku Yehova akaha amenge ahathe eriyikukumirira. Kuthya nethu, thwanzire ithwabwira abak’igha b’ebyo thwasi ahathe eriyikukumirira. Sithuli sagha eribwira abathukathendeka b’ebyo thwasi ahabw’erisagha thuthi endambi yanganahika ibasuba omwa bwethu. Kutse sithuli thunga amalengekania aw’eribugha indi: ‘Ingye sihali oyuwanyithendeka! Leka ayeghesaye iyuwene-wene.’ Amalengekania ng’ayo syawithe mwanya omwa bandu ba Yehova. Omwakanya k’ekyo, sithuli subulira okw’ibwira abo thukathendeka b’ebyo thwasi aliwe thukahayo “n’esyongebe syethu nibya”. (1 Tes. 2:8) Thuwithe amaha ngoku nabo, bakendithoka “erikangirirya abandi bandu.” (2 Tim. 2:​1, 2) Thwamakolha ekyo, ithukendi leka omubere w’erihithya n’etseme eyikalhwiririramo ibyalholha embere. w24.09 29 enu. 12-13

Wamayowa wuthi siwuwithe amaaka w’embaghane, isiwahwa amani. Ahathe erithika-thika, wunawithe emibere eyangaleka iwabya w’omughaso omwa kithunga. Erilhabira omw’isaba, wangana ghasirwa ndeke omw’isoma omwatsi wa Paulo owali omwa 1 Abanya Korinto 12:​12-30. Ebinywe bya Paulo bikakanganaya ndeke-ndeke ngoku nawu, ng’obuli mughombe wa Yehova, wukayithaghisibawa kandi wuli w’omughaso omwa kithunga. Kolha ekyosi-kyosi ekyo wangathoka nuku wubye w’omughaso embere sya Yehova n’abalikyenyu. Yikethere ngoku abasyakulhu bakendi lengekania okwa maaka wawu bikahika okwa lhusunzo lhwosi-lhwosi olho bangakuha. (Abar. 12:​4-8.) Abakristayo abosi batholere ibayithunda hakuhi na Yehova, ibayibanira etseme y’erihithya, n’erihiraho eky’erileberyako ekyuwene omwa ngebe y’Ekikristayo. w24.11 17 enu. 12-13

Hana mwalhaba omwa bitsibu muthina-muthina ebyaleka iniathoghongya emisoni y’obulighe. Ekighuma ky’okwa bitsibu ebi ly’eribya omwa butheke obw’omulhume oyuwithe abakali babiri, kandi owundi mukali wa mwira wiwe, ya Penina, iniamuponire. Ekilhabire okw’aho, Hana syabya awithe omwana, aliwe Penina iniawithe abaana bangyi. (1 Sam. 1:​1, 2) Penina iniakabera erisekererya Hana ahabw’eribya mughumba. Hana mwahithana kutsibu erihika ‘okw’ilira n’eriyira [erighana] akalyo,’ kandi mwabya “n’obulighe omo muthima. (1 Sam. 1:​6, 7, 10) Hana mwakolhaki erithoka erihumulikanibwa? Ekindu kighuma ekyamuwathikaya ly’erighenda ahali eriramya ly’okwenene, omwa hema y’erihindanamo. Iniane eyo, Mwalemba-lemba Yehova athi: ‘Samalira kwenene obulighe bw’omughombe wawu w’obukali, n’erinyibuka.’ (1 Sam. 1:11) Yehova mwalhangira obulighe bwiwe, amowa akalira, n’enyuma waho amamutsumulha omw’imulighira eriheka obukule.—1 Sam. 1:​19, 20; 2:21. w24.12 21 enu. 5-7

Endongolya yikathweghesaya ngoku Yesu atsomene kutsibu abandu, kutsibu-tsibu abigha biwe. (Yn. 13:1) Ng’eky’erileberyako, Yesu mwaminya ngoku ebighuma by’okwa bindu ebyo angakolire omw’ithulira liwe okwa kihugho sibyangabere byolho, kutsibu-tsibu, eriholha olhuholho lhw’obulhumi. Aliwe Yesu abere anemukolha omubiiri wiwe okwa kihugho, syabya okw’iberererya mukoro. Omwakanya k’ekyo, Yesu mwahira omuthima wiwe w’okw’ithulira, erikangirirya n’eriwathikya abandi. Nibya n’ekiro aholha, Yesu mwabana endambi y’erinabya ebisando by’abakwenda biwe, amabahumulikania n’eribaha obusondoli. (Yn. 13:​12-15) Neryo abere ane okwa muthi, Yesu mwabana akathuku kake k’eriha omukolha-nabi oyukayaholha y’amaha n’erihiraho emitheghekere y’eritsomana mama wiwe. (Lk. 23:​42, 43; Yn. 19:​26, 27) Busana n’ekyo, Yesu mwathasubulira okw’ikangania olhwanzo erilhabira omwa lhuholho lhwiwe lhusa aliwe kandi mwalhukangania omwa byosi ebyo akolha okwa kihugho. w25.01 23 enu. 11

E Biblia yikakolesaya ekindi ky’erileberyako erithuwathikya eriyitheghererya obwiranda obukalhwiririra omw’ighanyira ery’okwenene. Busana n’obuthahikana bwethu n’amalengekania w’ekibi, thukasosekanibawa ‘ng’abakobe b’ebibi.’ Aliwe thukasima Yehova busana n’erighanyira liwe, thuli ng’abakobe ‘ababiriboholhwa okwa bibi.’ (Abar. 6:​17, 18; Erib. 1:5) Omo kwenene, erighanyira lya Yehova lyabirileka ithwalhua omwa bukobe. Busana n’ekihongwa ky’endongolya ekya Yehova ahayo erilhabira omu Mughalha wiwe, thukakanibawako omwa nzira ey’omusyo ng’abandu ababirilhamibwa. (1 Pet. 2:24) Endongolya yikaleka ikyathokekana erisuba-subania obughuma bwethu na Yehova, obwabya ibwabiritsandibwa omwa bulhwere bw’obunyakirimu. Ngoku omundu oyuwabirilhamibwa kw’obulhwere obukalire akanatsema kutsibu, nethu thukatsema thukalhamibwa bunyakirimu kandi thukathasyasimwa na Yehova busana n’erighanyira liwe. w25.02 11 enu. 16; 13 enu. 17

Omwa mukya ow’esyotalanta, Yesu mwakania okwa baghombe babiri ababya bathaleghulha okwa mukama wabu n’owundi oyuwaleghulha. (Mt. 25:​14-30) Abaghombe babiri abathaleghulha bak’imanira Abakristayo abahakabibwa abathaleghulha. Omukama, Yesu, akabakokaya “omo butseme bw’omukama [wabu].” Bakathunga ekihembo kyabu ky’elhubulha, erilhubuka ly’erimbere. (Mt. 25:​21, 23; Erib. 20:5b) Okwa lhundi lhuhandi, eky’erileberyako eky’omughombe omughatha kikakunga abahakabibwa. Kithi? Batholere ibakangania ku banawithe omuhwa. Omwa mukya w’esyotalanta, kuthya n’ow’abasika abathebathabana mulhume, Yesu abya isyali okw’ilhaghulha athi abahakabibwa balebe bangabere baghatha. Aliwe, abya akasoborera ekyangabere ku baherya omuhwa wabu. Banga lemirwe eriberererya ekyaleka ibabirikirwa n’erisombolhwa, sibanga lighirwe eryingira omwa Bwami bw’elhubulha. w24.09 22 enu. 10; 23 enu. 12-13

Ithwe bosi thwanzire ithwathoka eribana ebiyithawa byethu n’ebya b’omw’eka yethu. (Omu. 7:12; 1 Tim. 5:8) Thukathwamu nga thunalighe omubiiri, kikayitheghereribawa eribya ithwangana lengekania okwa sente esyo thwangahebwa. Aliwe, omundu amalengekania okw’ekyo kisa ikyanganabya indi ali okw’ilendera erikwamana n’ebyo akalhangira. Kandi thwamabya ithunemulendera omw’ikirirya, ithukendi lengekania okwa mibere omubiiri oyo angahamba okwa bughuma bwethu na Yehova. Ithwangana yibulya: ‘Mbwino omubiiri oyu akendi nyiyithaghisya erisangira omwa bindu ebyo Yehova aponire?’ (Emi. 6:​16-19) ‘Mbwino akend’ingirira eriramya lyaghe kandi obundi inialeka ingasighania ab’omw’eka yaghe ahabw’obuthuku buuli?’ Eby’erisubirya okwa bibulyo ng’ebi byamabya ini ee, ikikendibya ky’amenge erithendiligha omubiiri oyo, nomukyangabya isikyolho eribana omubiiri. Kundi thukalendera omw’ikirirya, thukakolha erithwamu erikakanganaya ku thuyikethere ngoku Yehova akendi lengaho erithuha ebiyithawa byethu.—Mt. 6:33; Ebr. 13:5. w25.03 21 enu. 5-6

Mughulhu wosi thutholere ithwalengaho erilhangira Abakristayo balikyethu ngoku Yehova akabalhangira. Thukakolha ekyo omw’ihwerya amalengekania okwa mibere yabu mibuya omwakanya k’ebisobyo byabu, ebyo erighunzerera bikendi syahwaho. Omwa lhwanzo, thwangana ghunzaho erithendi yitheghererangania lyosi-lyosi eriri ahakathi-kathi kethu. Neryo abandu abanzire erithwalhwa omwa mibere eyiri ng’eyo ibakendyanza eryasa omwa paradiso y’obunyakirimu. Kwesi thulhole embere erihika kera na kera eritsemera eparadiso eyo Yehova abirithuhiriraho. Owosi-wosi oyukanza erihumulikanibwa, eritsema, erithekana, n’eribya omwa butheya atholere iniasa omwa paradiso y’obunyakirimu n’erithendi sighaniayo! Nomwabine, minya ngoku Sitani anemulengaho erithuthebererya nuku thulhwe muyo. (1 Pet. 5:8; Erib. 12:9) Sithutholere thukamulighira akasingura. Thukole kutsibu eritheya obubuya, obubuyirire, n’obuholho bw’eparadiso y’obunyakirimu. w24.04 24-25 enu. 18-19

Ababuthi, mwangana wathikya abaana benyu eribya n’omuhwa omw’iramya lya Yehova. Kangiriraya abaana bawu omwa binywe n’omwa mikolere ngoku emyatsi y’obunyakirimu—ng’erigha e Biblia, erihindana okwa mihindano, n’erisangira omw’ithulira—bitholere ibyabya embere okwa yindi mibiiri yosi. Bithe bithya abaana benyu ibangana ghunzerera bathi eribya Mwema wa Yehova kiri ng’erikwama kyabya omwa “dini y’efamile.” Busana n’ekyo, ibangana ghana erihira eriramya ly’okwenene ly’embere kutse ibalisighanirya ighuma. Mbwino omundu oyuwabirileka erikolera Yehova syakiri kw’amalenguliro? Eyihi, kundi angana yisubamu n’erithasyasuba omw’iramya ly’okwenene. Erithoka erikolha ekyo, atholere iniayihamo emiyiheko n’eriligha obuwathikya bw’abasyakulhu b’ekithunga. (Yak. 5:14) Akaghalha ak’akahiraho nuku athasyasimawa na Yehova kakalhwiririra mw’ebibuya! w24.07 24-25 enu. 18-19

Mwanga kolhaki nuku obuthethane bwenyu bubye ibunahere ekitsumbi? Eriyowa erya muwithirene likendibya linemuyongera, kwamunemwendy’ongera muthya erianzana. Ni kyahi ekyanga bawathikya eribya imunahenirye omwa by’esyongeso? Muyihighule okw’ikania eby’obutswatswa, okw’ibya inywibene, n’okw’inywa obwabu bunene. (Efe. 5:3) Ebi byangana bukya esyongumbu sy’erikolha emyatsi y’engyingo n’eritsekya erithwamu lyenyu ly’erikolha ekihikire. Busana naki imuthabya imunemukania okwa ebya mwangakolha ebyangaleka obuthethane bwenyu ibwabya ibune bw’ekitsumbi? (Emi. 22:3) Erikolerana ehindu hy’olhwanzo ihyanganabya ihinatholere olhwanzo lhwenyu lhune mulholha embere. Aliwe esyongumbu syenyu sy’emyatsi y’engyingo syamay’ongera, ikyanganaleka imuthathwamu ndeke. (Olhw. 1:2; 2:6) Ehindu hy’olhwanzo ehyo mukakolerana ihyangana lhabirirania imwalhwiririra erikolha ekibi. (Emi. 6:27) Busana n’ekyo, okw’inatsuka ly’obuthethane bwenyu muyihirire h’olhubibi okwa ehyo mwanga kolerana ehithethwa emisingyi ye Biblia.—1 Tes. 4:​3-7. w24.05 29 enu. 10-11

Thwanzire abandi ibathuyikethera, kutsibu-tsibu omwa mughulhu owakalire. (Emi. 17:17) Thwanga kolhaki nuku thuminyawe ng’abayiketherwa? Thwangana lengaho erikangania emibere ng’eya Nyamuhanga, ng’eriberererya eriyilhagha lyethu n’omw’ikolera okwa buthuku. Abasyakulhu abayiketherwa bakaghasira ekithunga. Bathi? Abathuliri bakayowa ndeke bamabya ibangana hikira abasyakulhu, kwilhabirirya omulebererya ow’egurupu yabu ey’erithulira. Abathuliri bakayowa ibanzibirwe bamaminya ngoku abasyakulhu banayitheghekire eribawathikya. Kandi abasyakulhu bamaseghemerya erihabulha lyabu ly’okwa Biblia n’ebitabu by’omughombe oyutheleghulha omwakanya k’amalengekania wabu, abaramya balikyabo bakabayikethera. Balikyethu bawithe esyonzumwa nyingyi esyangaleka ibayikethera omusyakulhu oyuthebisulha omwatsi w’embitha kandi oyukalhangira athi akaberereraya eby’akayilhagha erikolha. w24.06 30 enu. 14-15

Munabwire, sithwanga lengekania thuthi Yehova akendi ghunzaho ebitsibu byethu byosi, aliwe thunasi ngoku akendi thuwathikya. (Esy. 41:3) Erilhabira omwa mulimu wiwe abuyirire, Yehova akathuha amaaka, amenge, n’obuholho bw’omuthima erithoka eribighumira. (Emi. 18:14; Flp. 4:13) Kandi akathuhumulikanaya omw’ithuha amaha aw’aseghemere okwa Biblia aw’erisyalhangira emiringo yosi y’amalhwere yikahwaho. (Isa. 33:24) Yehova abirithuha e Biblia omuli ebinywe ebikahumulikanaya ebikaleka ithwayowa ndeke thukabana ebitsibu. (Abar. 15:4) Omughulhu mwali wethu owe West Africa apimawamo ekansa, iniakabera eririra. Akabugha athi: “Erisako erikanyihumulikanaya kutsibu ly’eriri omu Isaya 26:3. . . . Omulhondo oyo akanyikakasaya ngoku Yehova anganathuha obuholho bw’omuthima obwangaleka ithwabya ithunathekene thukayira eky’erikolha omughulhu thuwithe ebitsibu.” Mbwino hane erisako erikakuhumulikanaya omughulhu wuwithe ekitsibu ekikakulengako kutsibu, obundi nibya ekikabya nga sikyangahwaho? w24.12 24 enu. 17-18

Abasyakulhu bakalengaho erikangania omubere w’erighanyira oko ababiriyisununulha oku Yehova. Banzire abandu ababirisighania Yehova ibamusubako. (Lk. 15:​22-24, 32) Elhubulha yikabya etseme omukolha-nabi akasubulha, kuthya n’okwa kihugho. (Lk. 15:7) Kilhangirikire ngoku Yehova syalilighira abakolha-nabi abatheyisubamo bakasighalha omwa kithunga. Nomwabine, syalilholhaya okwa bakolha-nabi kw’omughongo. Anzire ibasubulha. Eriyowa lya Yehova okwa bakolha-nabi abakayisubamu likanganibwe omu Hosea 14:4: “Ngendisyalhamya erisuba enyuma lyabu, nasyanzabo ndeke; kundi erihithana lyaghe lyabirilhua kubo.” Eki kitholere ikyahira omwa basyakulhu mw’omuhwa munene ow’eriyira eky’erikolha bamalhangira akaminyikalho kosi-kosi ak’eriyisubamu. Kandi eki kitholere ikyahira omwa babirisighania Yehova mw’omuhwa munene ow’erisubulha ahathe erilindirirya. w24.08 28 enu. 8-9

Erithabugha okwenene, abandi banganaghana erikangania erisima mughulhu wosi. Okwa bundi buthuku, thwanganahayo endambi, akaghalha, kutse ebyo thuwithe aliwe enyuma waho ithwabulha abathulyabikolera nga mubakanasima. Ekyo kyamabya, thwanga kolhaki eriyihighulha okw’iherya etseme yethu kutse okw’ihithana? Ibuka etseme yethu eyikalhwiririra omw’ihithya siyiseghemere okw’isimwa n’abandi. (Emib. 20:35) Thwangana thwamu eritsemera erihithya abandi nomubangabya nga sibathasima. Thuthi? Hweraya amalengekania okw’igherererya Yehova. Akaha abandu b’ebibuya mbulha bamasima kutse eyihi. (Mt. 5:​43-48) Yehova akathulhaghanisaya athi thwamahithya isithuwithe “amaha w’erithuhwa; n’olhuhembo lhwethu lhukendi syabya lhunene.” (Lk. 6:35) “Amaha w’erithuhwa” anganabya imwamuli erisimwa. Thwamasimwa kutse eyihi, mughulhu wosi Yehova akendi lhangira athi thukahembawa busana n’ebibuya ebyo thukakolha eriwathikya abandi, erihithya ithunatsemire.’—Emi. 19:17; 2 Kor. 9:7. w24.09 29 enu. 14-16