Ithwe erithoka erighasirwa omwa mubiri n’omusasi wa Yesu, thukayithagha erikirirya omwa ndongolya. (Efe. 1:7) Abo Yesu ahulhamo ‘ab’esindi mbuli’ sibalirya okwa muggati n’erinywa okwa vini okwa Kihulho ky’Omukama eky’Erigholho eky’obuli mwaka kandi sibatholere bakakolha ekyo. (Yn. 10:16) Nomwabine, bakaghasirawa omwa mubiri n’omusasi wa Yesu Kristo. Bakakolha ekyo omw’ikangania ku bikirirye amaaka aw’erilhamya aw’ekihongo kiwe. (Yn. 6:53) Mbaghane n’ekyo, abatholere erirya bakakanganaya ngoku babiringiribwa omwa ndaghane nyihya-nyihya ng’abakendi syasighalya Obwami bw’elhubulha. Busana n’ekyo, mbulha thuli bahakabibwa kutse ab’esindi mbuli, Thutholere eribya n’erikirirya eryanga leka ithwabana engebe y’erikotha. w24.12 13 enu. 14, 16

Okwa Kihulho ky’Omukama eky’Erigholho, Yesu mwaha abakwenda biwe b’omuggati owathemo kihamya n’eribabwira athi akimanira omubiri wiwe. Neryo mwabaha evini n’eribugha athi yikimanira ‘omusasi wiwe w’endaghane.’ (Mk. 14:​22-25; Lk. 22:20; 1 Kor. 11:24) Yesu akolha endaghane nyihya-nyihya ‘n’ab’ekithunga [ky’obunyakirimu] kya Israeli’ abakendi syabya “omo Bwami bwa Nyamuhanga.” (Ebr. 8:​6, 10; 9:15) Okwa Kihulho ky’Omukama eky’Erigholho, Yesu mwahwerya amalengekania w’okwa “kihyo kike.” Egurupu nyike eyo yatsukisibawa n’abakwenda biwe abathaleghulha ababya nayu omwa kisenge ekyo. N’ibo bakendi syahebwa omwanya ow’eribyamo haghuma na Yesu elhubulha. w24.12 11 enu. 9-10

Yesu mwaghoberibwa, amahambwa, amatsumwa, amahangirirwa, amahirwako omusango, nibya n’eriaghalibwa. Abasirikali mubamuthwalha ah’eriyithirwa n’erimukongomerera okwa muthi. Abere anemuyiyinirya obulhumi bwosi obo buthaleghulha, habya ihane Omundu mulebe oyuwabya omwa bulhumi bunene kwilhaba. Abya ini Yehova Nyamuhanga. Iyo ng’ow’amaaka manene, mwayikakirya okw’iyira eky’erikolha. Busana naki? Kundi Yehova athwanzire. Ekihongo kya Yesu kikakanganaya ndeke-ndeke Yehova ng’akwanzire bungahi. Mwakolha bingyi na kwilhaba, eriligha erighumira obulhumi bunene kutsibu anamathakusabulha okwa kibi n’olhuholho. (1 Yn. 4:​9, 10) Omo kwenene, anzire eriwathikya obuli mughuma w’okw’ithwe erirwanisya ekibi—n’erikinda! w24.08 6 enu. 13-14

Thwangana yitheghererya ndeke olhwanzo olho Yehova athuwithire thwamalengekania nga mwalhaba omwa bulhumi bungahi akahayo endongolya. Sitani akabugha athi sihali n’omughombe wa Nyamuhanga n’omughuma oyuwanga sighalha muthaleghulha oku Nyamuhanga omughulhu kikalire erikolha ekyo. Nuku Yehova akanganaye ngoku Sitani ni mubehi, mwalighira Yesu eriaghalhwa athali aholha. (Yobu 2:​1-5) Yehova inianasamalire, Yesu mwasekereribwa n’abanya madini abahakani, amaswiribwa n’abasirikali, kandi amahanikwa okwa muthi. Neryo Yehova mwasamalira Mughalha wiwe mwanzwa akaghalhwa n’eriholha olhuholho olhw’obulhumi. (Mt. 27:​28-31, 39) Yehova abya inianawithe amaaka aw’erikakirya ebi eribya. (Mt. 27:​42, 43) Aliwe Nyamuhanga kwakolha ekyo, endongolya siyanga hebirweyo kandi thwanga sighere isithuwithe maha. Neryo Yehova mwalighira Mughalha wiwe erighumira eriaghalhwa erihika aho athwira omuka wiwe w’erighunzerera. w25.01 22 enu. 7

Ni Nisani 16, 33 E.K. Abigha ba Yesu bane omwa bulighe bw’eriholerwa kandi babiry’ubaha kutsibu. Ababiri b’okw’ibo bakalhua e Yerusalemu eriya e Emmau. Omulhume oyo bathasi mwahika aho bali, amaghenda haghuma nabo. Abigha mubamubwira ngoku babiriyiponera busana n’ebyabya oku Yesu. Neryo omulhume oyo mwatsuka erikania okwa bindu ebya bathe bang’ibirirwe. “Mwatsuka oku Musa n’Abaminyereri abosi,” erisoborera ekyangalekire Masiya iniabya w’eriaghalhwa n’eriholha. Abalhume basathu aba babere bahika e Emmau, omulhume oyo bathasi oyu mwayiminyikalya ku ni Yesu oyuwabirilhubukibwa! (Lk. 24:​13-35) Yesu mwabuthukira okwa bigha biwe mirundi mingyi omwa biro biwe 40 eby’erighunzerera okwa kihugho. Omwa buthuku obo, abigha ba Yesu ababya omwa bulighe bw’eriholerwa n’eryubaha mubatsema, bamasika, n’eribya mahe w’abathuliri b’Obwami kandi bakangirirya. w24.10 12 enu. 1-3

Erikulha kinyamubiri ni kindu ky’obuhangiranwa, aliwe erikulha bunyakirimu siririyiretha. Ng’eky’erileberyako, balikyethu be Korinto mubaligha engulhu yuwene, bamabatizibwa, bamahebwa omulimu abuyirire, kandi bamaghasirwa omwa busondoli obo Omukwenda Paulo abaha. (Emib. 18:​8-11) Aliwe myaka mirebe balibatizibirwe, abangyi babya isibali bakulha bunyakirimu. (1 Kor. 3:2) Erithoka erikulha bunyakirimu, thutholere ithwatsuka erikulha-kulhania eriyisunza ly’erikulha. Abanzire “obuthaminya,” eryanza erisighalha baana bunyakirimu, bakalemawa erikulha-kulhana. (Emi. 1:​22, NWT) Sithwanzire thukabya nga babirikulha omwa myaka aliwe abakinalholha embere eriyikethera ababuthi babu eribathwiramo. Omwakanya k’ekyo, thwanzire ithwalhangira erikulha lyethu bunyakirimu mwa lhukwamirwa lhwethu. Wamabya iwukinakolha kutsibu nuku wukule bunyakirimu, saba Yehova wuthi akuhe “omuthima w’erianza n’amaaka w’eriyira eky’erikolha.”—Flp. 2:13. w24.04 4 enu. 9-10

Yehova akabya akatswera abandu, akathubisulira eriyowa liwe. (Zake. 33:11) Yehova syalikwama kyathoghothya abandu isahali eky’amaleka. Ni w’obughanyiri bunene, akakanganaya obughanyiri kyamayithaghisibwa. Ni byahi ebyo thwasi okwa bandu abathendi syalhubukibwa? Omo Biblia mune eby’erileberyako. Yesu mwakangania ngoku Yuda Iskariota syendi syalhubukibwa. (Mk. 14:21; lebaya na Yoane 17:12) Omw’ikighenderera Yuda mwakolha ebikahakanisaya Yehova Nyamuhanga na Mughalha Wiwe. (Lebaya Mariko 3:29) Yesu mwabugha n’okwa bakulhu b’amadini abamuhakanisaya athi bakendi syaholha ahathe amaha w’erisyalhubuka. (Mt. 23:33; lebaya Yoane 19:11) N’omukwenda Paulo mwabugha athi abakayisamambulha okw’ikirirya abatheyisubamo sibendi syalhubukibwa.—Ebr. 6:​4-8; 10:29. w24.05 4 enu. 10-11

Thwamasighalha bughuma na Yehova, Sitani syanga thukolha kw’ekyosi-kyosi ekyanga thuhuthalya erihika kera na kera. (1 Yn. 3:8) Omwa kihugho kihya-kihya, Yehova akendi syalholha embere eritheya banywani biwe abathaleghulha okw’akabi k’obunyakirimu n’olhuholho. (Erib. 21:4) Omo kwenene, ni kitsumbi kinene erikokibwa omwa hema ya Yehova—eribya bughuma nayu n’erilholya obughuma obo bw’embere. (Zake. 37:27) Thutholere ithwakolhaki thwamanza erisighalha omwa hema yiwe? Omundu amakukokya ewiwe, iwukendianza eriminya eby’anzire iwakolha. Kuthya, thwanzire ithwaminya ebya Yehova akayithagha okw’abo abanzire erisighalha omwa hema yiwe. Olhwanzo olhwa thuwithire Yehova lhukaleka ithwalengaho erikolha ebyosi “ebikamutsemesaya” ngoku thwanga thoka. (Kol. 1:10) Mughulhu wosi thutholere ithwamusikya, omw’ithend’ibirirwa iyo nga nindi. Erisikya ngeryo likendi thuwathikya eriyihighulha okwa byanga muhithania. Ahathe erithika-thika, thwanzire ithwalendera na Nyamuhanga wethu ithunahenirye.—Mika 6:8. w24.06 4 enu. 8-9

Yehova mwabwira Abrahamu erihayo mughalha wiwe-wiwe Isaka ng’ekihongo. Ahathe erithika-thika, Abrahamu mwalhangira eki ini kindu ekikendi letha obulhumi bunene kutsibu. Nomwabine, mwowa Yehova. Aliwe Nyamuhanga mwamubwira athi aleke erikolha ekyo okwa ndambi y’erighunzerera. Nomwabine, eky’erileberyako ekyo kikeghesaya abandu bosi ab’erikirirya b’ekwenene ngulhu. Ahathe erikakwa Yehova angahereyo Mughalha wiwe-wiwe omwanzwa ng’ekihongo. Yehova kw’anzire athya abandu ba kutsibu. (Enz. 22:​1-18) Enyuma w’ebighana bingyi, Emighambo eyahebawa Abaisraeli yabya yikabugha yithi abandu ba Nyamuhanga batholere ibahayo ebihongo bingyi nuku baghanyirawe ebibi byabo. (Law. 4:​27-29; 17:11) Ebihongo ng’ebyo byabya bikakangania ku hakendi syabya ekihongo kikulhu, ekyanga lhamirye ighuma abandu okwa kibi. Abaminyereri ba Nyamuhanga mubasondolibwa erisoborera ngoku olhubutho olhwalhaghanisibawa, oyuwabya abere Mughalha wa Nyamuhanga ow’embaghane, angaghalibirwe n’erithibwa busana n’erilhamya abandu—okwa kibi n’olhuholho—nawu imwawune!—Isa. 53:​1-12. w24.08 4 enu. 7-8

Omughulhu wukasoma e Biblia, lhangira wuthi wukaghendera okwa ebya wukasoma. Wunemusoma akatsweka kake k’Ekinywe kya Nyamuhanga, yibulhaye, mbwino nangaghendera indi okwa mwatsi oyu lino kutse omwa buthuku obukasa?’ Ng’eky’erileberyako, thuthabugha thuthi omwa busomi bwawu bwe Biblia wamabirisoma 1 Abanya Tesalonika 5:​17, 18. Enyuma w’erisoma emilhondo ibiri eyi, wangan’imana hake n’erilengekania nga wukanabera erisaba mughulhu wosi kandi emisabe yawu nga yikanalhua oko muthima. Kandi, iwangana lengekania okwa bindu ebya wukasima. Obundi iwathwamu wuthi wukendi sima Yehova habw’ebindu bisathu birebe. Nibya n’erighunza esyodakika nyike iwunemulengekania wuthya, iwukendibya mundu oyukakolha n’eriowa ebinywe bya Nyamuhanga okwa lhulengo lhulebe. Lengekanaya nga wanga ghasirwa wuthi wamabya wukakolha ikyan’ekyo okwa bindi bitsweka bye Biblia ebyo wukasoma obuli kiro! Omo kwenene, wukendi yongera eribya mundu oyukakolha n’eriowa ebinywe bya Nyamuhanga. w24.09 4-5 enu. 9-10

Yehova mwathuhangika n’amaaka w’embaghane. Nomwakine indi thukatsema thukahebwa, thukatsema kutsibu thwamahithya. Thukayowa ndeke thwamathoka eriwathikya abikirirya balikyethu. Kandi thukatsema bamakangania erisima. Nomwabine, mbulha oyo thulyawathikaya amakangania erisima kutse eyihi, thukatsema kundi thwabirikolha ekitholere. Isiwibirirawa ngoku ekyosi-kyosi ekya wukahithaya, “Omwami Mukulhu [Yehova] awithe nyingi kwilhaba esi erikuhasyo.” (2 Emy. 25:9) Neryo, sithwanga hithya bingyi kwilhaba ebyo Yehova angathuha! Kandi sihali tseme eyirengire eyo thwangabana Yehova iyuwene-wene amathuliha. Kwesi, thuthwemu erigherererya Thatha wethu w’elhubulha oyukahithaya. w24.09 31 enu. 20-21

Yehova ni w’obughanyiri kandi akakwira abandi b’obulighe. (Esy. 103:13; Isa. 49:15) Akathulhumirirawa; thwamayowa nabi, nayu akayowa nabi. (Zak. 2:8) Akaleka ikyathwolhobera eriyithunda okw’iyo ng’omunywani. (Esy. 25:14; Emib. 17:27) Kandi ayikehirye; “akunama, erilhangira olhubulha n’ekihugho. Akasumba abera okwa lhuthuthu.” (Esy. 113:​6, 7) Obo kwenene, owosi-wosi inianaghana eriha Nyamuhanga wethu w’amaaka y’olhukengerwa? Thukaha Yehova y’olhukengerwa kundi thwanzire abandi ibamuminya. Abangyi sibasi ekwenene eyihambire oku Yehova. Busana naki? Kundi Sitani abirilibania amalengekania wabu omw’ilhalhania amabehi awakalire oku Yehova. (2 Kor. 4:4) Sitani abirileka abandu ibaligha bathi Yehova akathuhulhaya, syalitsomana, kandi akaleka ihabya eriaghalhwa lingyi omwa kihugho. Aliwe thunasi ekwenene eyihambire oku Nyamuhanga wethu. Thuwithe akaghisa ak’eryerya erina liwe n’erileka abandi ibamuha olhukengerwa.—Isa. 43:10. w25.01 3 enu. 6-7

Omwa kighana ky’erimbere, mughulhu mungyi abakasighika Sitani ibakabugha amabehi mangyi oku Mughalha wa Nyamuhanga oyuhikene kandi oyuwakolha ebithiko-thiko. Ng’eky’erileberyako, abakulhu b’amadini mubabwira abandu bathi obuthoki obo Yesu akolesaya bwabya bukalhua ‘okw’omukulhu w’esyombinga.’ (Mk. 3:22) Omughulhu Yesu abya inianemuthondesibwa, abakulhu b’amadini mubabugha bathi ni mutsumi kandi bamatsotsomererya abandu nuku babughe bathi Yesu ithawe. (Mt. 27:20) Enyuma waho, abigha ba Kristo babere banemuthulha engulhu yuwene, ababya bakabahakanisya “mubatsotsererya amalengekania” w’abandu aw’eriendererya Abakristayo abo. (Emib. 14:​2, 19) Yikakania okwa Emibiri 14:​2, e Watchtower eya 1 Okwerikuminibiri, 1998, muyasoborera yithi: “Abayuda babere babirihakanisya omwatsi ogho Abakristayo babya bakathulha, omw’akasolholho mubalengaho eribwira ab’Ebihanda b’omwatsi w’amabehi owahambire okwa Bakristayo.” Namunabwire, Sitani akinatheba “ekihugho kyosi.” w24.04 11 enu. 15-16

Engebe y’omundu ey’erikotha ey’obuthuku obukasa siyiseghemere okwa mughulhu ogho akaholeramo. Yehova ni mutsweri oyuhikene—erithwamu liwe ni ry’obulingirirania kandi lithunganene. (Esy. 33:​4, 5) Thwangana yikethera ngoku “Omutsweri w’ekihugho kyosi” akendi kolha ekihikire. Kandi kihikire eribugha thuthi engebe y’omundu ey’erikotha siyiseghemere okwa mwanya ow’akendi syabya in’ikeremo. Sikihikire erilengekania thuthi Yehova iniasyatswera abandu abali omwa kitsweka eyo bathe bathabana akaghisa k’eriowa omwatsi w’Obwami mwa “syombene-hene”. (Mt. 25:46) Omutsweri oyuthunganene ow’ekihugho kyosi atsomene kutsibu abandu aba kwilhaba ngoku thwanga lengekania. Sithwasi Yehova ng’akendisya bindulha athi emyatsi omwa bulighe bunene. Obundi abaghuma b’okwa bandu aba bakendi syabana akaghisa k’erigha oku Yehova, ibamuyikethera, kandi ibakakangania ku bali okwa lhuhandi lhwiwe omughulhu ak’eraya erina liwe embere sy’ebihanda byosi.—Zake. 38:16. w24.05 12 enu. 14-15

Abandu ba Yehova banzire eriwathikania. (2 Kor. 8:4) Aliwe, okwa bundi buthuku, erikolha ekyo kikayithagha obuthubaha. Ng’eky’erileberyako, hamabya olhuhi, abasyakulhu bakabya ibanasi ngoku balikyabo bakayithagha erihimbwa, erisighikwa, obundi nibya eribawathikya bunyakirimu kutse kinyamubiri. Busana n’erianza esyombuli, abasyakulhu bakahira engebe yabu y’omw’akabi erithoka erihayo ebikayithaghisibawa. Omwa mibere eyiri ng’eyo, ni ky’omughaso erisighalha ithune bughuma. Ghendera okwa busondoli erilhua okwa kyaghanda ky’omuthahulha eky’ewenyu. (Ebr. 13:17) Abasyakulhu batholere ibabya ibanemulhaba omwa mitheghekere eyo babirihiraho ey’eriyitheghekera ekitsinduli kuthya n’obusondoli bw’ekithunga bikahika okwa ky’erikolha hamabya ekitsinduli. (1 Kor. 14:​33, 40) Ibya muthubaha aliwe oyukayitheghaya. (Emi. 22:3) Lengekanaya wuthe w’ayira eky’erikolha. Isiwakwama kyayingirya omw’akabi aho kithayithaghisibawa. Yikethere Yehova. Anganakuthokesya eriwathikya balikyenyu nibya engebe yawu isiyathabya omw’akabi. w24.07 4 enu. 8; 5 enu. 11

Omwami Dawudi abya asi Yehova kandi iniakamuyikethera. Omughulhu esyonzighu siwe syabya sikamuhigha-highania, imwamune Omwami Saulo, Dawudi mwasaba Yehova y’obuwathikya. Nyamuhanga abere abirisubirya omusabe wiwe n’erimulhamya, Dawudi mwabugha athi: “Omwami Mukulhu aneho!” (Esy. 18:46) Ebinywe ebi, sibiri kwama ky’akangania bithi Dawudi abya inianasi ngoku Nyamuhanga aneho. Ekitabu kighuma kikabugha kithi abya akakangania kw’ayikethere Yehova nga “Nyamuhanga oyukawathikaya abandu biwe mughulhu wosi.” Ni kwenene, busana n’ebyo abya iniabirilhabamo, Dawudi abya inianasi ngoku Nyamuhanga wiwe aliho, kandi erikakasya eryo mulyaleka iniathasyakolera Yehova n’erimupipa. (Esy. 18:​28, 29, 49.) Ithwe eribya ithunakakasirye ngoku Yehova ni Nyamuhanga oyuliho kyangana thuwathikya erimukolera n’omuhwa. Eki ikikendi leka ithwabya n’akaghalha k’eriyiyinirya ebitsibu n’omuhwa w’erilholha embere erikolha kutsibu omwa mubiiri wiwe. Kandi ithukendi thwamu eribya ithune bughuma na Yehova. w24.06 20-21 enu. 3-4

Ebinywe ebyo omukwenda Paulo ahandikira abanya Tesalonika bikathweghesayaki? Thwam’owa omwatsi owathahambene n’ebyo thwabirigha omwa Biblia kutse thuk’owa amabehi awak’itha obuba, thutholere ithwakolesya obuyitheghererya. Omwa Soviet Union eyakera, esyonzighu syethu musyaha balikyethu b’ebaruha eyalhangirika ng’eyikalhua okwa kyaghanda kikulhu. Ebaruha muyabugha yithi balikyethu balebe bayighabule okwa kithunga kya Yehova, batsukisaye ekindi. Ebyabya omwa baruha mubyalhangirika nga ni by’okwenene. Aliwe balikyethu abathaleghulha mubathathebibwa. Mubaminya ngoku omwatsi owabya omwa baruha syabya ahambene n’ebyo babya ibabirikangiriribwa. Munabwire, hakanayira abakahakanisaya ekwenene ibakolesya etekinologia bakanza erithuherya n’erithughabulha. Omwakanya ‘k’erisuka-sukanibwa omo malengekania [wethu],’ thwangana yitheya omw’ilebya ebyo thuk’owa kutse erisoma nga binahambene n’ebyo thwabir’igha.—2 Tes. 2:2; 1 Yn. 4:1. w24.07 12 enu. 14-15

Mughulhu wosi wukakolesaya ekihembo eki wukathwamu. Erithwamu likulhu ery’omundu wosi-wosi angakolha ly’erithwamu eriyihayo oku Yehova n’eribya mughuma w’okw’ihiika ly’abaramya biwe. Yehova anzire obuli mundu iniakolha ekyo. Busana naki? Anzire ibatsemera obunywani haghuma nayu n’eribyaho kera na kera. (Ebi. 30:​19, 20; Gal. 6:​7, 8) Nomwabine, Yehova syali kaka owosi-wosi athi amukolere. Akalighira obuli mundu erithwamu ekyo akendi kolha. Kandi ibbwa Omukristayo oyubatizibirwe amathwa ekihano kya Nyamuhanga, omw’ikolha erilholho erikalire? Amathendi yisubamu, atholere inialhusibwa omwa kithunga. (1 Kor. 5:13) Aliwe, Yehova akabya inianawithe amaha manene ngoku omukolha-nabi akendi syamusubako. Kundi nibya, eyo y’enzumwa ngulhu eyaleka iniahayo endongolya—erileka kithokekane oko mukolha-nabi oyukayisubamu erighanyirwa. Omo lhwanzo, Nyamuhanga wethu w’olhwanzo akalemba-lemba abakolha-nabi athi bayisubemu.—Zak. 1:3; Abar. 2:4; Yak. 4:8. w24.08 14 enu. 1-2

Okwa buthuku obo omukwenda Yohana ahandikiramu ebaruha yiwe yakasathu, abandi babya ibanemulhalhania esyongangirirya sy’amabehi n’erileka ihabya erighabulhana. Aliwe, abandi mubalholha embere ‘erikwama ndeke omwatsi w’ekwenene.’ Mubowa Yehova kandi ‘mubakwama ebihano biwe.’ (2 Yn. 4, 6) Abakristayo abathaleghulha aba mubatsemesya Yohana na Yehova iyuwene-wene. (Emi. 27:11) Thuk’ighaki? Obuthaleghulha bukaletha etseme. (1 Yn. 5:3) Ng’eky’erileberyako, thutsemire habw’eriminya ku thukatsemesaya Yehova. Akatsema akalhangira thukaghana erilengwako ly’ekihugho kandi thukaligha ekwenene. Abamalaika nabo bakatsema bakalhangira eki. (Lk. 15:10) Nethu thwangana tsema thukalhangira obuli mughuma w’okw’ithwe akasighalha muthaleghulha. (2 Tes. 1:4) Neryo omughulhu ono akendisyabya abirihwaho, thukendisyatsema kutsibu thukaminya ngoku muthwakangania obuthaleghulha bwethu oku Yehova nibya n’omwa kihugho ekithaberweko na Sitani. w24.11 12 enu. 17-18

Wanga ghunza mughulhu mungahi iwune mulebya ndeke omundu wuthe wakangania ku wumwanzire? Wamalhuaho wukahika okwa mundu, iniangana lengekania athi wamamuhikako isiwuthalengekania. (Emi. 29:20) Okwa lhundi lhuhandi, wamalhabya buthuku buuli, iniangana kulhangira ng’oyukathika-thika, kutsibu-tsibu omundu oyo amabya iniabiriminya ku wumwanzire. (Omu. 11:4) Wibuke, wuthe wahika okwa mundu mulebe, siwutholere wukakasya wuthi wukend’ingira nayu omwa butheke. Aliwe wutholere iwakakasya ku wunayitheghekere obutheke kandi ngoku omundu oyo anganabya iy’oyukutholere. Kandi ibbwa wamaminya ngoku omundu mulebe akwanzire? Wamabya isiwumwanzire, kikanganaye ndeke omwa mikolere. Isikyendibya kibuya erileka omundu akalengekania athi obundi wunamwanzire kandi ikwabithe bithya.—Efe. 4:25. w24.05 22-23 enu. 9-10

Abahakabibwa ab’okwenene kandi abathaleghulha basa bo Yesu akendi syangirira omwa Bwami bw’elhubulha. Omuhakabibwa wosi-wosi oyuthesighalha inianatheghirye bunyakirimu syendi syahindanibwa haghuma ‘n’abasombolhwa.’ (Mt. 24:31) Eryongera okw’ekyo, abandu ba Nyamuhanga abosi, nomubangabya ibawithe mahaki batholere ibalhangira ebinywe bya Yesu ng’erikunga ly’erilholha embere eritheya n’erisighalha bathaleghulha. Thwabiriminya Yehova ya ndeke, neryo thukayikethera eritswera liwe. Yehova amabya inianemuhakabya abathaleghulha balebe omwa myaka ya lino-lino, ekyo sikirileka thukahangya-hangya. Thuk’ibuka ekyo Yesu abugha okwa bakoli abasa oku saha 11 omwa ky’erileberyako kiwe ky’eririma ly’emizabibu. (Mt. 20:​1-16) Abakokibawa erikolera omw’irima ly’emizabibu ekiro iky’abiritsuka mubathuhwa obuhingyi bughumerera n’obw’abalyatsuka erikolha omwangyakya. Kuthya, abahakabibwa nomubangabya imubasombolhwa mughulhu wahi, bakendi syaghenda elhubulha bamatswerwa ng’abathaleghulha. w24.09 24 enu. 15-17

Yesu mwahiraho eky’erileberyako ekyuwene akaghumira obuthe bulingirirania. Thalengekania okwa buthe bulingirirania obo abana erilhua okwa bandu imwamune n’ab’efamile yiwe. Abahughu biwe abathikirirye mubabugha bathi abiribya musire, abakulhu b’amadini mubamuhangirira bathi akakolongana n’esyombinga, n’abasirikali baba Roma mubamusekerera, bamamuswirya, n’erighunzerera bamamw’itha. (Mk. 3:​21, 22; 14:55; 15:​16-20, 35-37) Aliwe, Yesu mwayiyinirya obuthe bulingirirania obwosi obu ahathe erithuhulya. Eky’erileberyako kiwe kikathweghesyaki? (1 Pet. 2:​21-23) Yesu mwathuhiriraho eky’erileberyako ekyuwene eky’erikwama thukakanganibwa obuthe bulingirirania. Abya inianasi omughulhu w’erihuna n’omughulhu w’erikania. (Mt. 26:​62-64) Mwathasubirya okwa buli mwatsi owabamubughako owathahikire. (Mt. 11:19) Iniakabya akabugha, isyalitsuma abakamwendereraya kutse eribahayira. w24.11 4-5 enu. 9-10

Thathera akasasani wukaha omundu oyo wanzire y’ekihembo ky’embaghane, ekyuwene kandi eky’akayithagha. Ikikendi kuponesya bungahi omundu oyo amakwama kyabika ekihembo ekyo n’erithendi kitsomana! Okwa lhundi lhuhandi, iwukendi tsema amakolesya ndeke ekihembo ekyo n’erikangania ngoku amakisima. Enzumwa y’eyahi? Yehova abirihayo Mughalha wiwe busana nethu. Yehova ka atholere eribya iniakatsema thukakangania ku thukasima ekihembo ky’obughuli n’olhwanzo lhwiwe olhwa musukuma erihayo endongolya! (Yn. 3:16; Abar. 5:​7, 8) Nomwabine, obuthuku bukabya bunemulhaba, ithwangana tsuka erighalha-ghandya ekihembo ky’endongolya. Aliwe thwamabya isithukitsemera endongolya, ithukendibya ng’abamabika ekihembo ekyuwene ekyo Nyamuhanga abirithuha omwa mwanya ogho thuthe thwanga kilhangira kutse erikilengekaniako. Erithoka eriyitheya okw’ekyo, thutholere ithwabya thukalengekania mughulhu wosi okwa ekya Nyamuhanga na Kristo babirithukolera. w25.01 26 enu. 1-2

Mughalha wethu oyuwanga tholera eribya musyakulhu w’ekithunga syatholere akabya “mwikirirya muhyaka.” Sibugha indi wutholere iwabya iwamabirighunza myaka mingyi walibatizibirwe, aliwe hatholere ihatsuka erilhaba akathuku iwe erikulha bunyakirimu. Wuthe wasombolhwa eribya musyakulhu, wutholere iwatsuka erikangania ku wuyikehirye nga Yesu, kandi ku wunayitheghekire erilinda Yehova erikuha olhukwamirwa lhwosi-lhwosi. (Mt. 20:23; Flp. 2:​5-8) Wangana kangania ku ‘wuli muthaleghulha’ omw’amakirira Yehova n’ebihano biwe ebithunganene n’erighendera okwa busondoli obwa ekithunga kiwe kikaha. Amasako akakanganaya ndeke-ndeke ngoku omusyakulhu atholere iniabya “oyuwasi erikangirirya.” Mbwino eki kikamanyisaya kithi wutholere iwabya iwuli mbuyi eyikalhabaya emikania eyuwene kutsibu? Eyihi. Nomwabine indi abasyakulhu bangyi abanatholere si mbuyi esyasi ndeke erilhabya emikania, bakakangiriraya ndeke omw’ithulira n’okwa sy’ombungo sy’erilisya. w24.11 23-24 enu. 14-15

Wamabana omwatsi ogho wuthethayitheghererya ndeke omwa Biblia, sekulhaya. Neryo ekiro kyosi, ghaniraya oko ebyo wam’igha kandi nga bikakweghesayaki oku Yehova, oku Mughalha wiwe, n’olhwanzo olho bakuwithire. (Esy. 119:97) Obuli sekulya kutse erisoma, isiwahwa amani wamathendi bana ekindu kihyaka kutse ekikatsemesaya. Wuli ng’omundu oyukasondekanaya ehoro. Omw’ighumisirizya, abakasondekanaya ehoro bakaghunza esyosaha n’ebiro bingyi erisalha babana n’ehoro nyike. Aliwe, bakaghumisirizaya kundi obuli katotorera ak’ehoro ni k’obughuli okw’ibo. Kwesi ebihyaka ebya wuk’igha ebihambire okwa kwenene ye Biblia ka ni by’obughuli bunene! (Emi. 8:10) Neryo ghumisirizaya kandi lholha embere n’endegheka yawu y’obusomi bwe Biblia.—Esy. 1:2. w25.01 25 enu. 14-15

Yehova anzire ithwabya ithunayitheghekire erighanyira abakathuponesaya. (Esy. 86:5; Lk. 17:4; Efe. 4:32) Kyangana thuhithania kutsibu omundu mulebe amabugha kutse erikolha ebikathuponesaya, kwilhabirirya amabya ini munywani w’okwa ndungu kutse omuhughu. (Esy. 55:​12-14) Okwa bundi buthuku, obulhumi obwa thukabya nabu bwangana linganisibwa n’obulhumi bw’eritimbwa omwa muhamba. (Emi. 12:18) Thwangananza erigheghena obulhumi obukalhwiririra omw’iponesibwa. Aliwe erikolha ekyo lyanganabya ng’erikutimba neryo ibasigha omuhamba w’omwa kironda. Kuthya, isithwalengekanaya thuthi obulhumi obukalhwiririra omw’iponesibwa bukendi keha omw’ikwama kya bugheghena. Omundu amathuhithania, ithwangana hithana aho naho. E Biblia yikakanganaya ngoku thwangana hithana. Aliwe, yikathukunga okw’ihithana lhughumerera. (Esy. 4:4; Efe. 4:26) Busana naki? Kundi erihithana mughulhu mungyi likalhwiririramo ebithuwene. (Yak. 1:20) Wibuke, erihithana ni yowa, aliwe erisighalha iwunahithene ni yithwiramo. w25.02 15 enu. 4-6

Yesu mwakania okwa mukya owakakanganaya ngoku ni ky’obukiru eriyibikira esyosente isiwuli “mugaga embere sya Nyamuhanga.” (Lk. 12:​16-21) Sihali oyuwasi ebikendibya omungya. (Emi. 23:​4, 5; Yak. 4:​13-15) Thukabana ebitsibu muthina-muthina ithwe ng’abakwamire Kristo. Yesu mwabugha athi thutholere eribya ithunayitheghekire “erisighania” ebyosi ebyo thuwithe erithoka eribya bigha biwe. (Lk. 14:​33, omwatsi ahikwa.) Abakristayo ab’omwa kighana ky’erimbere abe Yudea mubaligha eriherya ebindu byabo ibanatsemire. (Ebr. 10:34) Munabwire, balikyethu bangyi babiribya b’erisighania emibiiri yabu busana n’erighana eriyingirya omwa by’ekipolitiki. (Erib. 13:​16, 17) Ni kyahi ekyabiribawathikya erikolha ekyo? Bayikethere ndeke-ndeke omulhaghe wa Yehova ono: “Sinendi syakuleka na kera, kandi, sinendi syakusighania nahake.” (Ebr. 13:5) Thukakolha ngoku thwanga thoka erihiraho emitheghekere ey’erisyabana ebiyithawa byethu eby’obuthuku obukasa, kandi hamabya ekikathuhikako kitsumbukirania, thukayikethera ngoku Yehova akendi thusighika. w25.03 29 enu. 13-14

Yehova syalilengekanaya athi thwangana kulha bunyakirimu ahabwethu. Abakakolha ng’abalisya kandi ng’abakangirirya omwa kithunga ky’Ekikristayo banayitheghekire erithuwathikya erikulha ndeke bunyakirimu, ‘ithwathoka erihikana omwa lhulengo lhw’erihikana lya Kristo.’ (Efe. 4:​11-13) Kandi Yehova akathuha omulimu wiwe abuyirire nuku thubye ‘n’obulengekania bwa Kristo.’ (1 Kor. 2:​14-16) Eryongera okw’ekyo, Nyamuhanga mwasondolha erihandikwa ly’ebitabu bbini eby’enjiri erithukangania Yesu ngabya akalengekania athi, n’eby’abugha n’erikolha omw’ithulira liwe okwa kihugho. Omw’igherererya emibere Yesu aby’akalengekaniryamo n’emikolere yiwe, iwangana hika okwa kilhubirirwa kyawu ky’eribya Mukristayo oyukulire bunyakirimu. Erithoka erikulha-kulhana bunyakirimu, kandi thutholere ithwalholha embere ‘erisighania erikangirirya ly’eritsuka ly’engulhu ya Kristo,’ ni bugha ambu, esyongangirirya sy’omusingyi esy’Ekikristayo. w24.04 4-5 enu. 11-12

Obuli kiro thukabya b’erikolha erithwamu. Okwa bundi buthuku, erikolha erithwamu kyangan’olhoba, ng’eky’erileberyako omughulhu wukathwamu nga wulye eky’engyakya kutse ng’awughotsere saha singahi. Kikalire kutsibu erithwamu okwa yindi myatsi. Ebya thukathwamu byangana hamba okwa maghalha wethu, etseme yethu, abanzwa bethu, kutse okw’iramya lyethu. Thwanzire ebyo thukathwamu ibyathughasira haghuma n’ab’omwa famile yethu. Ekikulhu kutsibu, thwanzire erithwamu lyethu iryatsemesya Yehova. (Abar. 12:​1, 2) Ekiika kikulhu ekyanga kuwathikya erikolha erithwamu eryuwene ly’eriminya bingyi okwa mwatsi. Busana naki eki ni kikulhu? Thalengekania okwa mulhwere oyukayabanangana na dokita ahabw’eribya inialhwere obulhwere obukalire. Mbwino omudokita anganathwamu erimuha obubalya bulebe athali amupima ndeke kutse erimubulya ebibulyo birebe? Ekyo sikyangabya. Nawu kuthya wukendi kolha erithwamu eryuwene wamatsuka eriminya bingyi ebihambire okwa mwatsi oyo. w25.01 14 enu. 1-3

Ni byahi ebyo thwasi okwa bughanyiri bwa Yehova? Abirikangania athi ngoku “syanzire owosi-wosi akathoghothibwa”? (2 Pet. 3:9) Thalengekania okwa bughanyiri obw’akanganaya abandu balebe abakolha ebibi ebikalire. Omwami Dawudi mwakolha ebibi ebikalire, imwamuli erisingira n’er’itha. Aliwe Dawudi mwayisubamo, Yehova amamughanyira. (2 Sam. 12:​1-12) Omwami Manase abya mubi kutsibu hakuhi omwa ngebe yiwe yosi. Nomwanahika okwa lhulengo olho, Yehova mwaligha eriyisubamo ly’omulhume oyo kandi amamughanyira. (2 Emy. 33:​9-16) Eby’erileberyako ebi bikathw’ibukaya ngoku Yehova akakanganaya obughanyiri amalhangira athi kyamayithaghisibwa. Akendi syalhubukya abandu ng’abo kundi mubaminya ngoku babirikolha ebibi ebikalire kandi bamayisubamo. w24.05 4 enu. 12