Abandi b’okwa baghombe ba Yehova bakahambawako busana n’erikulha omwa myaka, amalhwere, kutse obulema. Ekyo kyanganaleka ibabulha nga nina b’omughaso embere sya Yehova. Ibangana yibulya bathi, ‘Ngakine w’omughaso embere sya Yehova?’ Omuhandiki w’Esyonyimbo 71 mwabya n’erithika-thika ng’eryo. Mwasaba athi: “Sunyirekeranaye omughulhu nyiri molho-molho.” (Esy. 71:​9, 18) Nomwabine, omuhandiki w’esyonyimbo mwasighalha inianakakasirye ngoku amakolera Nyamuhanga buthaleghulha, Yehova iniakendi musondolha n’erimuwathikya. Omuhandiki w’esyonyimbo mwaminya ngoku Yehova akatsemera abakakolha ekyosi-kyosi ekyo bangathoka erimukolera nomubanawithe erilemererwa. (Esy. 37:​23-25) Abakulire omwa myaka, mulhangire emibere eyo mulimu ngoku Yehova akalhangirayo. Angana kuwathikya erilholha embere bunyakirimu n’omwakine indi wutsekire kinyamubiri. (Esy. 92:​12-15) Omwakanya k’erihwerya amalengekania okwa bya wuthe wanga thasyathoka erikolha, lengekanaya okwa bya wangathoka. w24.10 28 enu. 14-16

Mughulhu mungyi kikakalira Abakristayo abathakulire bunyakirimu erithwamu okwa myatsi eyikabayithaghako erighanirya okwa misingyi ye Biblia n’erikolesyayo. Hamabya isihali kihano kirebe kye Biblia, abandi ibangana lengekania bathi bangana kolha ekyosi-kyosi ekyo banzire. Abandi ibangana saba erihebwa ekilhaghiro omughulhu kitheyithaghisibawa. Ng’eky’erileberyako, Abakristayo be Korinto bangabya imubasaba omukwenda Paulo y’ekilhayiro bakanza eriminya nga banatholere ibalya ebyalya ebyabirihongerwa okwa syosanamu. Omwakanya k’eribabwira eky’erikolha, Paulo mwabibukya omughaso w’obunyamuthima-thima n’eky’eribya obuli mundu iniatholere eriyithwiramo. Mwaghanirya okwa misingyi eyanga leka obunyamuthima-thima bw’obuli mundu ibwabya ibune ndeke kandi isyathathwikalya abandi. (1 Kor. 8:​7-9) Aho, Paulo abya iniali okw’iwathikya abanya Korinto erikulha bunyakirimu nuku bakolesaye amaaka wabu w’obulengekania omwakanya k’eriyikethera owundi omundu kutse erikwama kyasondekania ebilhaghiro. w24.04 5 enu. 14

Omwa biro bya Yona, abanya Ninawe babya ibanawithe akaghisa k’eriyisubamo. Ibuka ebyo Yesu abugha ‘okw’ilhubukira okwa lhubanza lhw’eritswerwa.’ Mukendi syabya imwamune “n’abakolha-nabi.” (Yn. 5:29) Neryo kikabya nga hane amaha busana n’abandu be Sodomo ne Gomora nabu. Abaghuma b’okwa bandu aba bangana syalhubuka, ithwabakangirirya oku Yehova na Yesu Kristo. Mughulhu wosi Yehova ‘yukasonda-sondaya omuthima, n’erilenga obulengekania.’ Ngoku akanakolha, n’omw’ilhubuka ly’obuthuku obukasa, ‘akendisyaha obuli mundu ng’esyonzira siwe ko siri.’ Yehova akendi syimanira okwa kihikire aliwe iniakangya obughanyiri kyamayithaghisibwa. Neryo isithwabugha thuthi omundu syawithe amaha w’erisyalhubuka thwamabya isithukakasirye ekyo! w24.05 5-6 enu. 15-16

Ahabw’emyaka mingyi, omwatsi wa Nyamuhanga abiribya inianemughumya abaghombe biwe omughulhu bawithe omubiiri owakalire ow’erikolha. Thalengekania okwa ky’erileberyako ky’omuminyereri Yeremia. Mwasagha omughulhu Yehova amuha olhukwamirwa lhw’erithulira. Yeremia mwabugha athi: “Sinyasi eribugha, kusangwa indi mulhwana.” (Yer. 1:6) Ni kyahi ekyamuwathikaya erithulira buthubaha? Ekinywe kya Nyamuhanga mukyamuha amaaka. Mwabugha athi: ‘Kiri ng’omuliro owakaghulhumira owabohere omo makuha waghe, naghe namalhuha eriyiyinia.’ (Yer. 20:​8, 9) Nomwakine indi obulhambu bwa Yeremia bwabya mw’abandu abakalire, omwatsi ogho abwirawa indi athule mwamuha amaaka agho ayithagha nuku akole omubiiri. Ekinywe kya Nyamuhanga kikaha Abakristayo b’amaaka. Omukwenda Paulo mwabugha athi erigha ekwenene kyangahirire omu balikyabo mw’omuhwa ‘w’erilendera ngoku Omukama anzire’ banemulholha embere “erikolha emibiiri yosi mibuya ya Nyamuhanga.”—Kol. 1:​9, 10. w24.04 14-15 enu. 2-4

Zadoki mwasighalha muthaleghulha oku Yehova nomwakine indi Omuherehi Mukulhu Abiatari mwathwamu erisighika mughalha wa Dawudi ya Adoniya, oyu wanza erimulyako ekithumbi ky’obwami. Dawudi mwathathika-thikira obuthaleghulha bwa Zadoki. Embitha ya Adoniya yabere y’aminyikalha, Dawudi mwabwira Zadoki, Natana, na Benaya athi bahakabaye Solomona ng’omwami. (1 Bam. 1:​32-34) Eribya haghuma n’abaramya ba Yehova abathaleghulha nga Natana n’abandi abasighika Omwami Dawudi, kyangabya imukyaghumya Zadoki n’erimuhimba. Solomona abere abiribya mwami, “mwahira omuhereri Zadoki omo mwanya wa Abiatari.” (1 Bam. 2:35.) Wanga gherererya wuthi Zadoki? Munywani wawu amathwamu erisighania Yehova, iwe amakirira erithwamu lyawu. (Yos. 24:15) Yehova akendi kuha amaaka n’obuthubaha obo wukayithagha. Muyikethere omw’imusaba n’erisighalha iwune bughuma n’abaramya balikyenyu abathaleghulha. Yehova akalhangira obuthaleghulha bwawu mwa bw’obughuli, kandi akendisya kuhemba busana nabo.—2 Sam. 22:26. w24.07 6-7 enu.16-17

Omwa Esyonyimbo 15:​2, NWT, omunywani wa Nyamuhanga akahulhawamo “oyukalendera butsira kahinira, n’eribera erikolha ebithunganene.” Ekinywe “oyukalendera” na “eribera erikolha” bikamanyisaya erikolha mughulhu wosi kandi buthaleka. Aliwe kwenene, ithwanalendera “butsira kahinira”? Ee. Nomwabine indi sihali mundu oyuhikene, Yehova iniakendi thulhangira ng’abakalendera “butsira kahinira” thwamalengaho erimwowa. Thukabya thukayihayo oku Nyamuhanga n’eribatizibwa, thukabya thwamatsuka erilendera nayu. Wuminye ngoku omwa buthuku bwe Biblia, omundu eribya iniali omwa kihanda kye Israeli isikirilhuaho kikamanyisya kithi abirikokibwa na Yehova. Abandi ibakamulhakira aliwe “butsira omo kwenene, kutse omo lithunganene.” (Isa. 48:1) Abaisraeli ab’emithima myolho babya b’erigha okwa ebya Yehova akabayithaghako n’eribighenderako. Kuthya, erithoka erisimwa na Yehova munabwire, ni bingyi ebikathuyithaghisibawako kwilhaba eribatizibwa n’eribya bughuma n’ekithunga ky’Ekikristayo. Thutholere ithwalholha embere “eribera erikolha ebithunganene.” w24.06 9 enu. 4; 10 enu. 6

Ni nzira nga syahi esyo Yehova akakanganirayamo omubere w’erihithya? Thalengekania okwa by’erileberyako bike bino. Yehova akathuha ebiyithawa byethu eby’ekinyamubiri. Thwanganabya isithuwithe ebindu ebyuwene-wene ebyo thukayighomba, aliwe thukasima Yehova kundi abangyi omw’ithwe thunawithe ebyo thukayithagha. Ng’eky’erileberyako, akalhangira athi thunawithe eby’erirya, eby’eriambalha, n’aherikesya. (Esy. 4:8; Mt. 6:​31-33; 1 Tim. 6:​6-8) Mbwino Yehova akathuha ebiyithawa byethu by’ekinyamubiri ahabw’erithabya iniawithe erikolha ekyo? Eyihi nahake! Thalengekania okwa binywe bya Yesu ebiri omu Matayo 6:​25, 26. Akakania okwa syonyonyi, Yesu mwabugha athi: “Sisyebiba kutse erihulhulha kutse eribika omwa bighona.” Aliwe, lebaya eby’akathasyakwamayako: “Thatha wenyu w’elhubulha akalisayasyo.” Neryo Yesu mwabulya athi: “Mbwino simuli b’obughuli kwilhabasyo?” Enzumwa? Yehova amabya iniakaha ebisoro by’ebiyithawa byabyo, thukakasirye ngoku nethu akendi thutsomana! Nga thatha oyutsomene, Yehova nayu akatsomana ab’omw’ihiika liwe busana n’olhwanzo.—Esy. 145:16; Mt. 6:32. w24.09 26-27 enu. 4-6

Omughombe omuwathikya ni mughalha wethu oyubatizibirwe oyu sombwerwe n’omulimi abuyirire eriwathikya abasyakulhu erikolha emibiiri y’omughaso mingyi omwa kithunga. Abaghombe abawathikya ni balhume abakahira eby’obunyakirimu by’embere; banzire Yehova kandi bakaghendera okwa bihano biwe ebithunganene. Kandi banzire kutsibu Abakristayo balikyabo. (Mt. 22:​37-39) Mughalha wethu oyubatizibirwe angasimbirira athi eribya omughombe omuwathikya? E Biblia yikathondogholha ebyangaleka mughalha wethu iniatholere erisombolhwa ng’omughombe omuwathikya. (1 Tim. 3:​8-10, 12) Wangana simbirira olhusunzo olhu omw’iyeghesya ebikaleka iwatholera ebiri omo Masako n’erilengaho eribighenderako. Aliwe wutholere iwatsuka erilebya ndeke ekilhubirirwa kyawu eky’erianza eribya omughombe omuwathikya.w24.11 15 enu. 4-5

Abandi bandu bakabugha bathi b’abirisoma e Biblia mirundi mingyi. Aliwe kwenene ban’ikirirye ebye Biblia yikakangiriraya? Bakana bighenderako kutse eribilighira erihindulha esyongebe syabu? Eky’obulighe, mughulhu mungyi eky’erisubirya ni eyihi. Abandu ba Yehova ni bambaghane! Thukalengaho erikangania ngoku kinemukolha omwa ngebe yethu. Nomwabine, mughulhu mungyi siky’olhobire erisoma n’erighendera okwa ebya thuk’igha omwa Kinywe kya Nyamuhanga. Kyangana thukalira eribana obuthuku bw’erisoma. Kutse thwangana soma lhuba-lhuba neryo ebya thukasoma ibyaghana erihika okwa mithima yethu. Kutse thwangana lhangira nga kikalire eryuwania ebyosi ebyo thutholere ith’uwania. Mbulha ni kyahi ekikakukalira, sihali ekyo wuthe wanga singura. Omwa buwathikya bwa Yehova, iwangana thoka. Ka thuthwemu eribya abakaghendera okwa Kinywe kya Nyamuhanga. Ahathe erithika-thika, thukabya thukasoma Ekinywe kya Nyamuhanga buli kiro n’erikighenderako omwa ngebe yethu, kwa thukan’ongera thuthya eritsema.—Yak. 1:25. w24.09 7 enu. 15-16

Yehova akathuhumulikanaya erilhabira omwa mulimu wiwe abuyirire omughulhu thukabana ebitsibu ebikalire. Wamabya iwune mulhaba omwa kitsibu ekikabbuna omuthima, wangana bwira Yehova y’ebyosi ebiri okwa muthima wawu omw’isaba mughulhu wosi kandi okwa ndambi yosi-yosi. (Esy. 86:3; 88:1) Mughulhu wosi saba Yehova y’omulimu wiwe abuyirire. Syanga gheghena ebyo wukamusaba. Mbwino wuhwere amani busana n’ekitsibu ekikalire? Omulimu abuyirire angana kuha amaaka aw’erilholha embere eriramya Yehova buthaleghulha. (Efe. 3:16) Ni byahi ebyo wangakolha wabirisaba Yehova y’omulimu abuyirire? Sangira omwa bikendi kuwathikya ery’ongera eribana omulimu abuyirire. Ebi mwamuli erihindana okwa mihindano n’erithulira abandi. Usulhaya omwa malengekania wawu mw’amalengekania wa Yehova omw’isoma Ekinywe kiwe obuli kiro. (Flp. 4:​8, 9) Wunemusoma, ighira okwa bakanibweko omwa Biblia abalhaba omwa bitsibu kandi ghaniraya okwa mibere Yehova abawathikirayamo eriyiyinia. w24.10 9 enu. 12-14

Nga Yehova na Mughalha wiwe, thwanzire abandu. (Emi. 8:31) Thukakwa obulighe bunene busana ‘n’abathawithe Nyamuhanga’ kandi abali “butsira amaha.” (Efe. 2:12) Busana n’ebitsibu byabo, ibangana yowa ibali omwa kyuna kiri-kiri, kandi n’ithwe thuwithe omuhuha owanga bakurayo—engulhu yuwene y’Obwami bwa Nyamuhanga. Olhwanzo n’olhukeri ebya thubawithire bikaleka ithwahiraho akaghalha eribahikyako engulhu yuwene. Omwatsi w’obughuli oyo angan’usulya omwa mithima yabo mw’amaha, iniabawathikya eribya omwa ngebe eyuwene lino, kandi ibabya ibangana syabana ‘engebe kundu’—engebe y’erikotha—omwa kihugho kihya-kihya kya Nyamuhanga. (1 Tim. 6:19) Kandi olhwanzo olhwa thuwithire abandu lhukaleka ithwababwira ngoku enduli y’omughulhu mubi ono yiri hakuhi-kuhi. (Zake. 33:​7, 8) Thwanzire ibaminya ebikendi syabya omwa bulighe bunene —amadini w’amabehi akendi syalhusibwaho n’erithoghothibwa ly’omughulhu mubi ono iryakwamako okwa Harmagedoni.—Erib. 16:​14, 16; 17:​16, 17; 19:​11, 19, 20. w24.05 16-17 enu. 8-9

Omukwenda Paulo mwahira omwa Bakristayo mw’omuhwa ‘w’erileke erihithana lya Nyamuhanga likole.’ Thukaleka erihithana lya Yehova likole omw’imuleka alethe obulingirirania okwa buthuku obutholere kandi omwa nzira yiwe. Mughalha wethu John abere abirikanganibwa obuthe bulingirirania, mwabugha athi: “Nabya w’erirwanisya eky’eryanza eriyikolera okwa myatsi ngoku nganzire. Abanya Roma 12:19 muhangwathikya erilinda Yehova.” Thukaghasirawa thwamalinda Yehova erihengulha omwatsi. Thwamakolha ekyo, ithukendi yihighulha okwa muheke n’eriyiponera erikasa thukalengaho erianza eriyikolera okwa emyatsi ahabwethu. Yehova anayitheghekire erithuwathikya. Akabya ng’oyukabugha athi: ‘Wunyilekere obuthe bulingirirania obo ngendi yira eky’erikolha.’ Thwamaligha omulhaghe wa Yehova ow’eribugha athi “nasyaliha,” isithwendi hithana lhughumerera, ithukendibya ithunayikethere ngoku akendikolha okwa mwatsi omwa nzira eyuwene. w24.11 6 enu. 14-15

Thutholere ithwahira eby’ekinyamubiri omwa mwanya wabyo. Omukwenda Paulo mwakania okw’eki akahandikira Abakristayo ababyaho omughulhu w’Ekiyuda iniakisiya iniahwa. Mwakania okwa bindu birebe ebyabya okwa Baisraeli, imwamune n’ebyabya ibane hakuhi n’Ekithwe Sinai. Mwaghusa n’okwa Bakristayo kw’akasali athi sibabye bakakwama “esyongumbu sy’emyatsi mibi, ngoku abo nabu [Abaisraeli] bakwama esyongumbu esyo.” (1 Kor. 10:​6, 7, 11) Abaisraeli mubalighira erianza ebyalya bya kutsibu, nibya kyamaleka n’ebithiko-thiko ebya Yehova abakolera ibyabya nga ni “emyatsi mibi.” (Emig. 11:​4-6, 31-34) Kandi omughulhu baramaya ekyana ky’ende eky’esyamaghetse, mubalya, bamanywa kandi bamatsema. (Eri. 32:​4-6) Paulo mwahandika ebya bahikako ng’erikunga okwa Bakristayo ababyaho okw’ihwererera ly’omughulhu we Kiyuda omwa mwaka we 70 E.K. Lino thuli okw’ihwererera ly’omughulhu mubi ono, neryo thutholere ithwaghendera ndeke okw’ihabulha lya Paulo. w24.12 6 enu. 13

Yehova ni “Nyamuhanga oyutsemire,” kandi anzire nethu ithwatsema. (1 Tim. 1:11) Abirithuha ebihembo bingyi ebikaleka ithwatsemera engebe. (Yak. 1:17) Ekighuma ky’okwa bihembo ebyo bw’obutheke. Omughulhu omulhume n’omukali bak’ingira omwa butheke, bakayilhagha erianzana, erisikania, n’obuli mughuma erilhangira owundi mo w’omughaso. Bamalholha embere eribya n’obughuma obukamathire ikyangana balethera etseme y’okwenene. Eky’obulighe, abathahenie bangyi munabwire omwa kihugho bak’ibirirawa ebya bayilhagha okwa kiro kyabu ky’obulunga. Ekyo kikaleka ibathatsema. Yehova anzire abalhume ibathwalha bakali babu bo bathi? Yehova akalhaghira abiba athi bahe bakali babu b’ekitsumbi. Eriha omundu y’ekitsumbi kikamanyisaya emibere thukathwaliramo omundu oyo thusikirye. Omulhume oyukaha mukali wiwe y’ekitsumbi akamuthwalha omwa mibere y’olhukeri n’ey’olhwanzo.—1 Pet. 3:7. w25.01 8 enu. 1-2; 9 enu. 4-5

Ahathe erithika-thika, ebaruha ey’omukwenda Paulo ahandikira Abaebrania muyawathikya Abakristayo ab’omwa kighana ky’erimbere eriyitheghekera obulighe obo bangabwene. Paulo mwahira omwa balikyabo mw’omuhwa ow’eriminya buuli amasako n’eriyitheghereryawo. Erikolha ekyo kyanga bawathikirye eriminyerera esyongangirirya esyanga tsekirye erikirirya lyabu n’erighanasyo. Mwabahiramo muhwa ow’erighumya erikirirya lyabu nuku omwa byalhuba bathoke erighendera okwa busondoli bwa Yesu n’obw’abakasondolha omwa ekithunga. Kandi mwawathikya Abakristayo erighumya eriyiyinia lyabu omw’ibya n’amalengekania awatholere okwa bitsibu n’erilhangira ebitsibu ng’akaghisa ak’erithendekwa na Thatha wabu w’olhwanzo. Kwesi, nethu thughendere okw’ihabulha eryasondolibawa eri. Neryo ithukendi thoka eriyiyinia buthaleghulha erihika okwa nduli.—Ebr. 3:14. w24.09 13 enu. 17, 19

Ngoku kiri omwa Biblia, endongolya y’endihi eyikalihawa nuku habye erihanulha n’erisubanamo. Oku Yehova, yikaleka ikyathokekana erisubyaho ekyaheribawa. Omwa nziraki? Wibuke, Adamu na Eva mubaherya engebe eyihikene haghuma n’akaghisa k’eribyaho kera na kera. Neryo endongolya yanga yithaghisibirwe eriliha ekindu ekingene n’ekyahera. (1 Tim. 2:6) Yanga lihirwe omulhume oyunakulire oyuwangabere (1) iniahikene; (2) oyuwangana byaho kera na kera okwa kihugho; kandi (3) inianayitheghekire erihayo engebe yiwe eyo busana nethu. Thulebaye esyonzumwa isathu esyaleka ikyathokekana Yesu eriliha endongolya. (1) Aby’ahikene—“mwathakolha ekibi.” (1 Pet. 2:22) (2) Busana n’ekyo, abya iniangana byaho kera na kera okwa kihugho. (3) Abya inianayitheghekire eriholha n’erihayo engebe yiwe eyo busana nethu.—Ebr. 10:9. w25.02 4-5 enu. 11-12

Yehova akwanzire kandi anzire iwabya mughuma w’okw’ihiika liwe. Ekyo kihikire nomuhangabya ihane ebikakulemesaya eribatizibwa. Yesu mwabwira egurupu y’abigha biwe ab’omwa kighana ky’erimbere athi: “Mwamabya n’erikirirya eryingene n’enguma y’eharadali, mwasyabwira ekithwe eki muthi, ‘Huma hano wuye erya,’ nakyo kyasyahuma, kandi sihali n’ekikendi syabalema.” (Mt. 17:20) Ababyaho erihulikirira ebinywe ebi, babya ibamabiribya na Yesu ahabw’emyaka mike buyira, neryo babya ibakinayithagha eryongera erikirirya lyabu. Aliwe Yesu mwabakakasya ngoku bamakulha-kulhania erikirirya erikaghunza, Yehova angabawathikirye erisingura ebikabalemesaya ebiri ng’ebithwe. Kandi Yehova akendi kuwathikya erikolha ekiri ng’ekyo! Wamaminya ebindu birebe ebikakulemesaya eribatizibwa, ithwa ebiika ebyanga kuwathikya eriyilhusya byoko ahathe erilindirirya. Wuyiheyo oku Yehova kandi batizibawa. Eryo ly’erithwamu eryuwene kutsibu eryo wanga kolha! w25.03 7 enu. 18-20

Nethu thwangana thoka erighumira ebitsibu thwamibuka ngoku Nyamuhanga oyuliho anayitheghekire erithuwathikya. Thwangana ghumya eriyikethera lyethu omw’ekyo omw’ilengekania okwa by’abirithakolha. (Isa. 37:​17, 33-37) Kandi, lebaya kutse erisoma esyoripoti okwa muthahulha wethu we jw.org esikakanganaya ngoku Yehova anemuwathikya balikyethu munabwire. Eryongera okw’ekyo, ibuka emighulhu Yehova akuwathikirayamu. Wamabya isiwang’ibuka ekyo Yehova akulhabayamo ekikalire kutsibu isiwahwa amani. Busana naki? Omo kwenene, hane bingyi ebyo Yehova abirikukolera! Abirikuyira mo munywani wiwe. (Yn 6:44) Busana naki iwuthamusaba wuthi akuwathikaye eryibuka omughulhu asubiraya emisabe yawu, omughulhu akuwathikaya okwa buthuku obutholere, kutse erikuwathikya erilhaba omwa kitsibu ekikalire? Erilengekania okwa byalholirweko ng’ebyo kikendi ghumya eriyikethera lyawu ngoku Yehova akendi lholha embere erikuwathikya. w24.06 21 enu. 8

Thwanganabya ithwabirithwamu erithendi lighira ekyosi-kyosi kikathulhusya oku Yehova. Nomwabine, nethu sithuhikene kandi kyangan’olhoba erithebibwa. (Abar. 7:​21-23) Kitsumbukirania, ithwangana yisanga omwa mibere eyikaleka ekindu ekithuwene ikyabya nga kyamatsemesya. Erithoka erisighalha bathaleghulha oku Yehova na Mughalha wiwe, thutholere ithwaghendera okw’ihabulha ery’erilholha embere eriyitheya okw’ilengwako ery’erikolha ekibi. Ithwe bosi thukalengawako erikolha ekibi. Aliwe obuli mughuma w’okwithwe anawithe aho akalemererawa, mbulha n’ikolha ekibi ekikalire, kutse erisangira omwa mutse mubi mulebe, kutse erihambwako nabi n’amalengekania w’ekihugho. Ng’eky’erileberyako, omundu mulebe anganabya iniane murwanisya erilengwako ly’erisingira. Owundi anganabya iniane murwanisya omutse mubi, ng’erinyighitha bitsuko by’olhubutho kutse erilebya eponografe. Nibya owundi anganabya iniane murwanisya eky’eryubaha abandu, amalengekania w’eriyisondolha, erihithana lhuba-lhuba, kutse ekindi kindu. w24.07 14 enu. 3; 15 enu. 5

Thalengekania okwa kyangabere abasyakulhu ku baghana erilighira omulhume oyuwabiriyisubamu omo kwenene erisuba omwa kithunga, kutse ekithunga erighana erimukangania olhwanzo abirisubulha. “Obulighe bunene” bwanga mukindire. Angalhuireho iniayowa nga syakiriko malenguliro. Nibya angalekere aho erihiraho akaghalha ak’erisuba-subania obughuma bwiwe na Nyamuhanga. Ekikalire okw’aho, abandi balikyethu omwa kithunga ku baghana erighanyira omukolha-nabi oyuwabiriyisubamo, bangahirire obughuma bwabu na Yehova omw’akabi. Busana naki? Bangabere ibamakangania amalengekania wa Sitani ng’obutsurumi n’erithendi kangania obughanyiri, butsira amalengekania wa Yehova aw’erighanyira omukolha-nabi oyuwabiriyisubamu. Ni bugha ambu, Diabolo angabakolesirye, erithoghothya obunyakirimu bw’omulhume oyo.—2 Kor. 2:​10, 11; Efe. 4:27. w24.08 17 enu. 7, 10-11

Kristo Yesu mwaha Ekithunga abalhume b’olhusunzo abakakolha omwa yindi nzira. Omwa busondoli bwiwe, abasyakulhu omwa Yerusalemu mubathuma Paulo, Barnaba, n’abandi ng’abalebererya abakabalhama. (Emib. 11:22) Busana naki? Ahabw’enzumwa ngumerera eyikaleka abaghombe abawathikya n’abasyakulhu ibasombolhwa: erighumya ebithunga. (Emib. 15:​40, 41) Mughulhu wosi abalebererya b’omuthimbo bakabya ibanemughenda-ghenda. Abandi bakaghenda esyongumi sy’esyokilomita bakabungira ebithunga. Obuli wiki, omulebererya w’omuthimbo akalhabaya emikania nga y’eyo, iniaghenda okwa syombungo sy’erilisya, iniasondolha omuhindano w’abatemburi, kuthya n’ow’abasyakulhu, n’erisondolha emihindano y’eriyathulira. Akathegheka emikania n’eritheghekania emihindano eminene-minene. Akasomesaya esukuru y’abatemburi, iniahira h’emitheghekere ey’eribya n’omuhindano w’embaghane haghuma n’abatemburi b’omwa muthimbo—n’erikolha okwa yindi myatsi, okwa bundi buthuku imwamune eyikayithaghisibawa lhuba-lhuba eyo ekyaghanda ky’omuthahulha kikabugha kithi akole. w24.10 21 enu. 12-13

Omuminyereri Yeremia akabugha ebinywe ebyo Yehova abugha omw’isako lya munabwire. Akakania okwa binywe ebi, omukwenda Paulo mwakolesya ebinywe ibyan’ebyo athi: ‘Sinendi syasibuka ebibi byabo.’ (Ebr. 8:12) Aliwe ekyo kikamanyisayaki? Omwa Biblia, ekinywe ‘ery’ibuka’ mughulhu mungyi sikirimanyisaya omundu ery’ibuka ekindu kirebe kutse erikilengekaniako. Aliwe, kyangana manyisya omundu eriyira eky’erikolha. Omukolha-nabi oyuwabya ahanikirwe okwa muthi hakuhi na Yesu mwasaba athi: “Yesu wunyibuke omughulhu wukasa omo Bwami bwawu.” (Lk. 23:​42, 43) Syabya akakwama kyasaba athi Yesu amulengekanayeko okwa buthuku obo. Ekya Yesu asubiraya mukyakangania ngoku akendi yira eky’erikolha erilhubukya omukolha-nabi oyu. Kwesi, Yehova amabugha athi sy’ak’ibukire ebibi byethu, akamanyisaya athi amathughanyira kandi syendi syathusuyira omwa buthuku obukasa busana n’ebibi ebyo. w25.02 10-11 enu. 14-15

Omo kwenene, erikenga ery’okwenene likasa busana n’eriminya emibere ya Yehova, ekighendererwa kiwe, n’eby’anzire kutse ebyo aponire. Yibulhaye, ‘Erikwamana n’ebyo ngasi oku Yehova, ni thwamu lyahi eryo nangakolha eryanga mutsemesya?’ (Efe. 5:17) Erithoka eritsemesya Yehova, ikyangana thuyithaghisya okwa bundi buthuku eriponesya ab’okw’ithwe. Ng’eky’erileberyako, abandi babuthi abathe n’ekighendererwa kibi ibangana hathikana omwana wabu w’obukali oyukulire bathi atholere iniathahibwa n’omulhume omugaga—kutse oyukendi baha omuthahyo munene—nomwakine indi syali ndeke bunyakirimu. Omo kwenene, banzire mwali wabu iniatsomanwa kinyamubiri, aliwe nindi oyukendi muwathikya erikulha-kulhana erihika okw’ibya mundu w’obunyakirimu? Yehova akalhangira athi omwatsi oyu? Thukabana eky’erisubirya omu Matayo 6:33. Aho, Abakristayo bakahiribawamo omuhwa ‘ow’eritsuka erisondekania Obwami.’ Nomwakine indi thukaha ababuthi bethu b’ekitsumbi n’erisikya abandu b’omwa bulhambu bwethu, ekikulhu kutsibu okw’ithwe ly’eritsemesya Yehova. w25.01 17 enu. 9-10

Thukayithagha obuwathikya bwa Yehova erithoka erilholha embere erithulira n’omuhwa nomuhane erihakanisibwa munabwire. (Erib. 12:17) Busana naki wutholere iwayikethera ngoku Yehova akendi kusighika? Thalengekania okwa musabe wa Yesu owali omu Yohana esura 17. Yesu mwasaba Yehova athi atheghaye abakwenda kandi Yehova mwasubirya erisaba liwe. Ekitabu ky’Emibiiri ya Bakwenda kikathubwira ngoku awathikaya abakwenda erithulira n’omuhwa nomuhanabya eriendereribwa. Kandi omwa musabe wiwe, Yesu mwasaba Yehova eritheya abang’ikirirye ebyo abakwenda banga thulire. Nawu mwawune. Yehova akinasubiraya omusabe wa Yesu; akendi kuwathikya ngoku awathikaya abakwenda. (Yn. 17:​11, 15, 20) Nomwakine indi kyangana kalha erithulha engulhu yuwene n’omuhwa enduli yinemuseghera hakuhi, thukendi bana obuwathikya obwosi obo thukayithagha.—Lk. 21:​12-15. w25.03 18 enu. 13-14

Abandu ba Nyamuhanga ‘bangan’utha obwogho bw’obutseme’ kundi emithima yabu yiri mw’erisima linene. Ekwenene eyikahimba n’emilhaghe eyikahumulikanaya eyiri omwa Kinywe kya Nyamuhanga kuthya n’amaha wethu awaghumire ebiseghemere okwa ndongolya y’ekihongo kya Kristo bikaleka ithwathunga “obutseme bw’omuthima.” Erikania okwa bindu ebi ithune n’abalikyethu ab’obunyakirimu kikaleka ithwatsema kutsibu! (Esy. 34:8; 133:​1-3) Ebindu bibiri bikulhu-bikulhu ebikaminyikalhaya eparadiso y’obunyakirimu lhw’olhwanzo n’obughuma ebiri omwa bandu ba Yehova. Obughuma bukaleka ithwathera akasasani engebe nga yikendisyabya yithi omwa kihugho kihya-kihya, omo abaghombe ba Yehova bakendi syabya n’obughuma n’olhwanzo lhunene kwilhaba munabwire. (Kol. 3:14) Owosi-wosi oyuwanzire eribana etseme y’okwenene n’eritsemera ebyo awithe atholere iniabya omwa paradiso y’obunyakirimu. Ekihugho nomukyangabya n’amalengekaniaki okwa baghombe ba Yehova, bawithe erina libuya embere sya Yehova n’abosi abakamuramaya.—Isa. 65:15. w24.04 21 enu. 7-8

Ithwe bosi thwanga wathikya thuthi Abakristayo abahuru abakanza eringira omwa butheke? Enzira nguma ly’eriyitheya okwa bya thukabugha. (Efe. 4:29) Ithwangana yibulya thuthi: ‘Nganahira okwa banzire eryingira omwa butheke kw’akahathikano? Namalhangira dada na ndugu abahuru ibanemukania, nganalengekanaya indi bali omwa buthethane?’ (1 Tim. 5:13) Eryongera okw’ekyo, isithwaleka Omukristayo omuhuru akayowa ng’abulirweko kundi syali omwa butheke. Kwesi ka kyuwene erisondya ehighisa hy’erisimiramo Abakristayo abahuru! Kandi ibbwa thwamalengekania thuthi mughalha wethu na mwali wethu balebe bangana kolha obutheke obuwene? E Biblia yikathubwira yithi thulengekanaye okw’iyowa ly’abandi. (Abar. 15:2) Abahuru bangyi sibalyanza abandi bakabakangania ow’eringira nayu omwa butheke oyutholere, kandi thutholere ithwasikya eriyowa lyabu. (2 Tes. 3:11) Abandi ibanganasima obuwathikya bulebe, aliwe isithway’ingiraya omo myatsi yabo.—Emi. 3:27. w24.05 24-25 enu. 14-15

Thuli omwa kihugho omo ebitsibu ebikasa kitsumbukirania byangana leka engebe iyakalha—kutse nibya ibyahindulir’ighuma esyongebe syethu. Ka kikahumulikanaya eribya ithwangana saba Yehova y’obuwathikya! Thukabya thukabana obuwathikya bwiwe, ekyo kikathukakasaya ngoku “Omwami Mukulhu aneho!” (Esy. 18:46) Aliwe Dawudi abere abiribugha ebyo, mwabugha athi Nyamuhanga ni lhukuka lhwiwe. Busana naki Dawudi mwalinganisya Yehova, n’ekindu ekithawithe engebe—olhukuka? E Biblia yikakolesaya ekinywe “lhukuka” ng’eky’erileberyako eky’erithuwathikya eriminya Yehova ng’awithe mibereki. Mughulhu mungyi kikabanika omwa myatsi eyikapipa Nyamuhanga ng’oyuthawithe ekyanga linganisibwa nayu. Ebinywe by’erimbere ebikakanaya oku Yehova ‘ng’Omuhanganiri’ kutse Lhukuka biri omwa Eryibuka Ebihano 32:4. Omwa musabe, Hana mwabugha athi “Sihali lhundi lhukuka nga Nyamuhanga wethu.” (1 Sam. 2:​2, NWT) Habakuki mwahulha Yehova mwa “Lhukuka.” (Hab. 1:12) Omuhandiki wa Esyonyimbo 73 mwahulha Nyamuhanga mwa ‘kaghalha kiwe [olhukuka].’ (Esy. 73:26) Kandi nibya na Yehova mwayahulhamo ribwe kutse olhukuka.—Isa. 44:8. w24.06 26 enu. 1, 3

Abami be Israeli abatsemesaya Yehova mubamuramya n’omuthima wosi. Ebinywe ebyasondolibawa bikabugha oku Yosia bithi: “Muhathabya mwami ng’iyo embere siwe, oyuwabindukira Omwami Mukulhu n’omuthima wiwe wosi.” (2 Bam. 23:25) Kandi ibbwa Solomona, oyo enyuma waho akolha ebindu bibi? “Omuthima wiwe syabya akwamire Omwami Mukulhu Nyamuhanga wiwe.” (1 Bam. 11:4) Kandi bikahika oku Abiyamu, owundi mwami oyuwaleghulha, e Biblia yikabugha yithi: “N’omuthima wiwe mwathakwama ndeke oko Mwami Mukulhu.” (1 Bam. 15:3) Neryo kwesi, erikolera Nyamuhanga n’omuthima wosi kutse owathaghabene kikamanyisayaki? Omundu oyuwithe omuthima owathaghabene syaliramaya Nyamuhanga habw’erithabya iniatholere erimuramya. Omwakanya k’ekyo, akakolha busana n’olhwanzo n’eriyihayo. Ery’ongera okw’ekyo, akasighalha inianawithe olhwanzo olho n’eriyihayo omo ngebe yiwe yosi. w24.07 21 enu. 4-5

Yehova akakolesaya eky’erileberyako ekisosene n’ekyo erithukangania ngoku akasangulha ebibi byethu. Akabugha athi: ‘Nabirisangulha ebibi byawu ng’ekithu kinene, n’amalholho wawu ng’obuheha bulithohire [ekithu ekikinirene].’ (Isa. 44:22) Yehova akabya akaghanyira, akabya ng’oyukakolesaya ekithu ekikinirene eribisa ebisobyo byethu nuku bibuliranire ighuma. Eby’erileberyako ebi bikathweghesayaki? Yehova amaghanyira ebibi byethu, sithutholere thukalholha embere eriyowa nabi omwa ngebe yethu yosi busana n’ebibi ebyo. Erilhabira omwa musasi wa Yesu Kristo, amabanza wethu abirighanyirwa ighuma. Nibya ebibi ebyo sibyanga thasy’ibukwa. Erighanyira ly’okwenene erikalhua oku Yehova ku likathughasira lithya thwamayisubamu ndeke. Kandi erighanyira lya Yehova likaleka ithwabya n’obughuma obuwene nayu n’erithuwathikya eriyihighulha okw’iyowa nabi kutsibu. w25.02 10 enu. 11-14

Abasyakulhu abakabya okwa syokomiti bawithe olhukwamirwa embere sya Yehova olhw’erilhangira bathi ekithunga kikabya ikinahenirye. (1 Kor. 5:7) Kandi kyamathokekana banzire omukolha-nabi iniahika okw’iyisubamo. Busana n’ekyo, abasyakulhu bakabya ibane n’amalengekania awatholere kandi ibanawithe amaha ngoku akendi kolha esyombinduka. Busana naki? Kundi banzire erigherererya Yehova, ‘ow’erighanyira kutsibu, kandi akaghanyira abandu.’ (Yak. 5:11) Lhangira ngoku omukwenda Yohana oyukulire omwa myaka akanganaya omuthima ng’oyu. Mwahandika athi: “Inywe, abaana baghe balere, ngabasakira emyatsi eyi, isimwakolha ebibi. Nikwa omundu amakolha ekibi, thuwithe embuyi [omuwathikya] oku Thatha, ye Kristo oyuthunganene.” (1 Yn. 2:1) Eky’obulighe, hakanayira Omukristayo iniaghana eriyisubamu. Ekyo kyamabya, atholere inialhusibwa omwa kithunga. w24.08 25 enu. 19-20

Iwangananza erilinganisya ebya wukakolha n’ebyo abandi bakathoka. Rwanisaya eriyowa eryo! Busana naki? Kundi Yehova syali kolha erilinganisya ng’eryo. (Gal. 6:4) Ng’eky’erileberyako, Maria mwaha Yesu y’ekihembo ky’amaghutha aw’akakumba ndeke. (Yn. 12:​3-5) Mbaghane n’ekyo, omukwakali oyuli omwa buyithawa mwahayo okwa hekalhu ebinusu bibiri eby’obughuli buke. (Lk. 21:​1-4) Aliwe Yesu mwalhangira ebihembo byosi bibiri ng’ebikakanganaya erikirirya. Thatha wiwe, Yehova, akalhangira ekyosi-kyosi ekyo wukakolha busana n’eriyihayo okw’iyo, n’olhwanzo olhwa wumuwithire ini by’obughuli, nomuwanga bilhangira nga ni bike. Ithwe bosi hakanayira ithwathika-thika. Nomwabine, ekwenene ya Nyamuhanga eyiri omwa Biblia, eyanga yiketherwa, yangana thuwathikya erirwanisya erithika-thika. Subaya omwa mwanya w’erihangya-hangya lyawu mw’erisika. Omwa kwenene, Yehova akakulhangira iwe ng’omundu ahabwawu. Akasima eriyihayo lyawu kandi anzire iniakuhemba. Yehova akalhangira abaramya biwe bosi abathaleghulha ng’abatholere olhwanzo lhwiwe n’eritsomana liwe. w24.10 25 enu. 3; 29 enu. 17-18