Ebaruha y’Erimbere Oku Timoteo 2:1-15

  • Omusabe busana n’abandu b’emisindo yosi (1-7)

    • Nyamuhanga mughuma, omusangania mughuma (5)

    • Endongolya eyingene-ngene n’ekyaheribawa busana n’abosi (6)

  • Erihabulha abalhume n’abakali (8-15)

    • Eryambalha omw’iyisunako (9, 10)

2  Neryo eky’erimbere okwa byosi, ngasaba indi emisabe, erilemba-lemba Nyamuhanga, erisabira abandi, n’eriha ewasingya bikolhawe busana n’abandu b’emisindo yosi, 2  busana n’abami n’abosi ab’ebitsumbi by’endatha,* nuku thwangabya omwa ngebe eyithekene kandi eyiri bukuthu ithunem’ubaha ndeke Nyamuhanga kandi butsira masatha-satha. 3  Eki ni kibuya kandi kikalighawa embere sy’Omulhamya wethu, Nyamuhanga, 4  oyo erisonda liwe liri lithi abandu b’emisindo yosi balhamibawe n’eribana eriminya erihikire ery’ekwenene. 5  Kundi hali Nyamuhanga mughuma, n’omusangania mughuma ahakathi-kathi ka Nyamuhanga n’abandu, omulhume, Kristo Yesu, 6  oyuwayihayo busana n’abandu abosi* ng’endongolya eyingene-ngene n’ekyaheribawa—eki ky’ekikendi syahebwako obwema okwa buthuku bwakyo obutholere. 7  Busana n’ekighendererwa ky’obwema obu munasombolhwa eribya muthuliri kandi mukwenda—ngabugha okwenene, sindi yitheba—omukangirirya w’abanya bihanda busana n’omwatsi w’erikirirya n’ekwenene. 8  Neryo ngayisunza indi ehosi abalhume balhole embere erisaba, basumbe ebyalha ebibuyirire, ahathe kinigha n’erikakalhukana. 9  Kuthya, n’abakali bambale esyongyimba esitholere,* omwa buyithondeke n’eribya n’obulengekania bw’amenge,* butsira omwa madelya-delya w’emilhukire y’esyonzwiri n’ehoro kutse elulu kutse esyongyimba sy’obughuli bunene, 10  aliwe omwa nzira eyitholere abakali abakakenga Nyamuhanga, ni bugha ambu, erilhabira omwa mibiiri eyuwene. 11  Omukali ighe iniane bukuthu* ahisi sy’obusondoli. 12  Sindi lighira omukali erikangirirya kutse eribya n’obuthoki oko mulhume, aliwe omukali atholere iniabya bukuthu.* 13  Kundi Adamu yuwatsuka erihangikwa, n’enyuma waho Eva. 14  Kandi Adamu mwathathebibwa, aliwe omukali yuwathebawa ndeke-ndeke neryo mwabya mukolha-nabi. 15  Aliwe, akendi syatheghibwa omw’ibutha abaana, amalholha embere omw’ikirirya n’omwa lhwanzo n’omwa bubuyirire n’omw’ibya n’obulengekania bw’amenge.*

Emyatsi Ahikwa

^ Kutse “omwa bitsumbi by’ab’obuthoki.”
^ Kutse “abandu b’emisindo yosi.”
^ Kutse “esikaha ekitsumbi.”
^ Kutse “oyukathwamu ndeke; oyuyitheghererye.”
^ Kutse “inianahunire; inianathekene.”
^ Kutse “eribya inianathekene; eribya inianahunire.”
^ Kutse “oyukathwamu ndeke; oyuyitheghererye.”

Copyrights for this publication