Omwa Biblia mune abanabya bathunganene abahinduka bamabya bathathunganene. Eky’erileberyako ni Solomona. Abya iniabirikangiriribwa ndeke emisingyi ya Nyamuhanga kandi Yehova iniabirimutsumulha kutsibu; aliwe enyuma waho Solomona mwatsuka eriramya esyo nyamuhanga sy’amabehi. Ebibi biwe mubyahithania Yehova yo kutsibu kandi ebithuwene ebyalhwiririramo mubyaghunza buthuku buuli. Ni kwenene, Amasako akabugha athi Solomona mwatsikwa aho “abisekulhu wiwe” batsikawa, imwamune n’abalhume bathaleghulha ng’Omwami Dawudi. (1 Bam. 11:​5-9, 43; 2 Bam. 23:13) Aliwe mbwino emibere eyo atsikawamo yikakanganaya yithi akendisya lhubukibwa? E Biblia siyiri kibughako. Erilhubuka ni kihembo erilhua oku Nyamuhanga w’olhwanzo. Akakihereraya abo akanza eriha akaghisa k’erisyamukolera kera na kera. (Yobu 14:​13, 14; Yn. 6:44) Solomona anemwendi syahebwa ekihembo ng’ekyo? Ithwe sithwasi, Yehova yuwasi. Aliwe thunasi ngoku Yehova akendi syakolha ekihikire. w24.05 4 enu. 9

Thukabya thukayihayo oku Yehova, thukabya ithwamakokibwa omwa hema yiwe y’omusyo. Thukatsemera ebyalya bingyi by’obunyakirimu n’eribya bughuma n’abandi ababirikokibwa omwa hema ya Yehova. Ehema yiwe siyiri omwa mwanya mulebe mughuma musa. Yanganabya ehosi-hosi aho abaramya ba Yehova abowa bangabya. (Erib. 21:3) Kandi ibbwa abathaleghulha ababiriholha? Ithwanabugha thuthi bakine abakokibirwe omwa hema ya Yehova? Ee! Busana naki ithwabugha ekyo? Kundi abali ng’abo Yehova akina bibukire. Yesu mwasoborera athi: “Nikwa Musa mwakangania ko abaholi bakalhubukibawa. Omo masako awakahulha ekisaka ekyaka, akahulha Omukama, ‘mwa Nyamuhanga wa Abrahamu, na Nyamuhanga wa Isaka, na Nyamuhanga wa Yakobo.’ Neryo iyo si Nyamuhanga w’abaholi, nikwa ni Nyamuhanga w’abaliho busana nayu.”—Lk. 20:​37, 38. w24.06 3 enu. 6-7

Zadoki mwaghenda e Heburoni n’ebirwanisyo kandi inianayitheghekere amalhwa. (1 Emy. 12:38) Abya inianayitheghekire erikwama Dawudi y’omwa malhwa n’eritheya Israeli y’okwa syonzighu syayo. Iyo ng’omusirikali, Zadoki sy’aby’asi bingyi eby’amalhwa, aliwe abya muthubaha. Omuhereri nga Zadoki ighira hayi eribya muthubaha? Aby’athimbirweko n’abalhume ab’amaaka kandi abathubaha. Ahathe erithika-thika, mwaghasirwa omwa by’erileberyako byabo. Ngahathya, eky’erileberyako kya Dawudi ‘eky’erihulhukya n’erisubulya e Israeli’ omwa buthubaha mukyaleka Abaisraeli abosi ibamusighika n’omuthima wosi. (1 Emy. 11:​1, 2) Mughulhu wosi Dawudi iniakayikethera Yehova erimutheya okwa syonzighu siwe. (Esy. 138:3) Zadoki abya inianawithe ebindi eby’erileberyako ebyamuhira mw’omuhwa eby’abalhume ababyaho omwa buthuku bwiwe—abalhume nga Yehoyada na mughalha wiwe omusirikali ya Benaya, kuthya n’abakulhu b’ebihanda 22 abayiyunga oku Dawudi.—1 Emy. 11:​22-25; 12:​26-28. w24.07 3 enu. 5-6

Saulo we Tarso aby’akendererya kutsibu abigha banzwa ba Kristo. Abakristayo bangyi bangabya ibabya bakamulhangira ng’oyukitheko malenguliro, oyutheko maha w’eriyisubamo. Aliwe Yesu oyuwabirilhubukibwa aby’awithe amalengekania awali mbaghane okwa w’abandu b’ekibi. Iyo na Thatha wiwe mubalhangira omu Saulo mw’emibere eyuwene. Yesu mwabugha athi: “Nabiriyisogha iyo.” (Emib. 9:15) Nibya Yesu mwakolesya ekithiko-thiko erilholerya Saulo okw’iyisubamu. (Emib. 7:58–8:3; 9:​1-9, 17-20) Abere abiribya Mukristayo, Saulo—oyo enyuma waho aminyawa mwa mukwenda Paulo—mughulhu mungyi iniakakanganaya erisima liwe busana n’enzira eyo akanganibirawamo olhukeri n’obughanyiri. (1 Tim. 1:​12-15) Paulo abere owa okwa kitsibu ekikalire eky’obusingiri ekyabya omwa kithunga ky’Ekikristayo e Korinto, mwabawathikya athi? Enzira eyo abawathikirayamo yikathukangiriraya bingyi ebihambire okw’ikunga lya Yehova ery’olhwanzo n’okwa mughaso w’erikangania obughanyiri. w24.08 13 enu. 15-16

Ahabw’ebighana bingyi, Yehova mwaghenda akongera erikangania ndeke-ndeke ngoku abakolha-nabi bangayithundire okw’iyo. Abeli, mughalha wa Adamu na Eva owakabiri, yuwabya mundu w’erimbere erikirirya Yehova enyuma w’ekitsibu ekyabya omwa Edeni. Kundi Abeli aby’anzire Yehova kandi mwanza erimutsemesya n’eriyithunda okw’iyo, mwahayo ekihongo. Abeli abya mulisya, neryo mwimya okwa byana by’esyombuli siwe, amabikera, amabihayo oku Yehova. Yehova mwakolhaki? Yehova “mwasima Abeli n’obuhere bwiwe.” (Enz. 4:4) Yehova mwakangania kw’akasima ebihongo ng’ebyo ebyo abandu abamwanzire kandi abakamuyikethera bakahayo—ng’ebya Noa. (Enz. 8:​20, 21) Yehova abere akaligha ebihongo ng’ebyo, mwakangania ngoku abandu abakolha-nabi bangana bana erisimwa liwe kandi ibayithunda okw’iyo. w24.08 3 enu. 5-6

Obuthe bulingirirania bwanganaleka ithwayiponera kandi ithwabya omwa bulighe. (Omu. 7:7) Abathaleghulha nga Yobu na Habakuki, nabu mubayowa bathya. (Yobu 6:​2, 3; Hab. 1:​1-3) Nomwakine indi eriyowa ng’eri ni ry’obuhangiranwa, thutholere ithwayitheya okw’ikolha ebindu by’obukiru n’eryongera erikalirya ighuma emyatsi. Abakakanganaya obuthe bulingirirania bamathendi suyirwa, ithwangana lengekania thuthi sikiwithe mughaso erikolha ebihikire. Thalengekania okwa muhandiki w’esyonyimbo oyuwalhangira ababi bakakulha-kulhana kwilhaba abathunganene. Mwabugha athi: “Ababi ku bali bathya! Bawithe bingyi.” (Esy. 73:12) Obuthe bulingirirania obo aby’akalhangira mubwaleka iniathayikethera emighisa eyikalhwiririra omw’ikolera Yehova, mwabugha athi: “Neryo munalenga eriminya omwatsi oyu, muneya omwatsi oyu iniakalire.”—Esy. 73:​14, 16. w24.11 3 enu. 5-7

Thukaha Yehova y’olhukengerwa kundi thumusikirye kutsibu. Thuwithe esyonzumwa nyingyi esyangaleka ithwamusikya. Yehova ni muthoki w’ebyosi; amaaka wiwe syawithe busubuliro. (Esy. 96:​4-7) Amenge wiwe mangyi akalhangirika ndeke-ndeke omwa ebyo abirihangika. N’iyo Nzuko y’engebe yethu kandi Yukatheghayayo. (Erib. 4:11) Ni muthaleghulha. (Erib. 15:4) Ebyosi eby’akakolha bikathokekana, kandi akaberereraya emilhaghe yiwe. (Yos. 23:14) Ky’ekyaleka n’omuminyereri Yeremia iniabugha oku Yehova athi: “Omo kathi-kathi k’abandu b’amenge bosi b’ebihanda, kandi omwa mami wosi wabu sihali oyuli ng’iwe”! (Yer. 10:​6, 7) Ahathe erithika-thika, thuwithe esyonzumwa mbuya esyangaleka ithwasikya Thatha wethu w’elhubulha. Sithuli subulira okw’isikya Yehova lisa—aliwe kandi thumwanzire. Kandi, ekikulhu kutsibu, thukaha Yehova y’olhukengerwa kundi thumwanzire kutsibu. w25.01 3 enu. 5-6

Abakahanisaya Nyamuhanga bakalengaho erileka ebibuya ebya ekithunga kiwe kikakolha bilhangirike nga ni bibi. Ng’eky’erileberyako, muthw’igha omwa Masako ngoku Yehova anzire abaramya biwe ibabya ab’erire kinyamubiiri, omwa by’esyongeso, na bunyakirimu. Akabugha athi owosi-wosi oyukalholha embere erikolha ebibi ahathe eriyisubamo alhusibawe omwa kithunga. (1 Kor. 5:​11, 12; 6:​9, 10) Thukaghondera ekihano ekiseghemere okwa Masako ekyo. Aliwe abakathuhakanisaya bakalengaho erikolesya ekyo erithutsweba bathi thukamayirira ekyethu, thukatswera-tswera abandi, kandi sithuwithe lhwanzo. Thutholere ithwaminyerera enzighu y’ekithunga nga nindi. Sitani yukakulha-kulhanaya amabehi wosi awahambire okwa kithunga. Iyo ni “ise w’amabehi.” (Yn. 8:44; Enz. 3:​1-5) Neryo thutholere ithwaminya ngoku Sitani akendi kolesya abakamusighika nuku akulha-kulhanaye amabehi awahambire okwa kithunga kya Yehova. w24.04 10-11 enu. 13-14

Nibya n’obulighe bunene ibwabiritsuka, abaghuma b’okwa bakendi syalhangira “Babeli Mukulhu” akathoghothibwa bakendi sy’ibuka ngoku Abema ba Yehova bamabirighunza mughulhu muuli ibanemukania okwa mwatsi oyo. Mbwino abaghuma b’okwa bakendi syalhangira ebindu ebi bikabya bangana syakolha esyombinduka omwa ngebe syabu? (Erib. 17:5) Ekyo kyamabya, ikikendibya ng’ekyabya Emisiri omwa biro bya Musa. Wibuke ngoku n’abandi bandu bangyi mubayiyunga okwa Baisraeli bakalhua Emisiri. Abaghuma b’okwa bandu aba bangabya imubathunga erikirirya bakalhangira erikunga lya Musa erihambire okwa bithiko-thiko ikumi likabererera. (Eril. 12:38) Ekiri ng’eki kyamabya Babeli Mukulhu yabirithoghothibwa, mbwino ikikendi syaponesya, abandu bakathuyiyungako enduli yikayahika? Eyihi nahake! Thwanzire ithwagherererya Thatha wethu w’elhubulha, “Omwami Mukulhu Nyamuhanga oyo woswire n’erighanyira n’ow’olhukogho, sianguhire okw’ihithana, oyo woswire n’obwenge bw’olhwanzo n’omwatsi w’ekwenene.”—Eril. 34:6. w24.05 11 enu. 12-13

Ni kyahi ekyangabya thwamasighania “ebinywe by’ekwenene”? Thalengekania okwa ky’erileberyako kino. Kilhangirikire ngoku omwatsi abya inianemulhandaghana omwa Bakristayo balebe owakakanganaya ngoku ekiro kya Yehova kiri hakuhi. Hangabya ihabya ihane ebaruha eyangabya imuyahandikwa n’omukwenda Paulo eyaleka ihabya amalengekania ng’ayo. Abakristayo balebe e Tesalonika mubaligha ebinyambwirwa ebyo n’erilhandaghaniabyo isibali baminya okwenene kw’omwatsi. Sibanga thebibwe ku baligha emyatsi eyo Paulo abakangiriraya iniakine haghuma nabo. (2 Tes. 2:​1-5) Paulo mwahabulha balikyabo athi isibaligha ebyosi ebyo bak’owa. Kandi erithoka eribawathikya omwa buthuku obw’embere, Paulo mwaghunzerera ebaruha yiwe y’akabiri okwa banya Tesalonika n’ebinywe bino: “Eriramukya lyaghe eryo namayihandikira omwa byalha byaghe, ingye Paulo, ly’eryo, nalyo ini kaminyikalho omwa buli baruha; ku ngahandika indya.”—2 Tes. 3:17. w24.07 12 enu. 13-14

Abakristayo Abaebrania babya bakayithagha eriyiyinia omughulhu erikirirya lyabu ly’alengawako emibere ye Yudea yikongera erikalha. Nomwakine indi abaghuma b’okw’Abakristayo Abaebrania babya ibabiribana eriendereribwa erikalire, abangyi mubabya Bakristayo omwa buthuku habya obuholho okwa lhulengo lhulebe. Omukwenda Paulo mwakangania ngoku nomwakine indi mubayiyinia erikirirya lyabu likalengwako, mubathaghalhwa nga Yesu, ni bugha ambu, erihika okwa kiika ky’eriholha. (Ebr. 12:4) Aliwe Ekikristayo kyabere kine mw’ongera, Abayuda abahakani mubalholha embere eribya batsurumi kandi b’ithi. Myaka mike enyuma waho, Abayuda abalhabire okwa 40 “mubayisema erithendi gherya akalyo bathe b’itha Paulo.” (Emib. 22:22; 23:​12-14) Nomwakine indi amadini mwabendererya n’eribapona, Abakristayo abo babya bakayithagha erihindana haghuma eriramya, erithulhughania engulhu yuwene, n’erilholha embere eribya n’erikirirya erighumire. w24.09 12 enu. 15

Yohana yuwabya mukwenda mwanzwa wa Yesu Kristo. (Mt. 10:2) Yohana iniakaghenda na Yesu omw’ithulira liwe lyosi, mwayilhangirira ebithiko-thiko biwe, kandi mwasighalha muthaleghulha okw’iyo n’omwa mighulhu eyikalire. Mwalhangira Yesu ak’ithibwa kandi mwamulhangira iniabirilhubukibwa. Kandi mwayilhangirira Ekikristayo kikakulha-kulhana omwa kighana ky’erimbere erilhua omw’ibya gurupu nyike y’abathaleghulha erihika okw’ithulhughanibwa ly’engulhu yuwene “okwa bandu bosi omwa kihugho.” (Kol. 1:23) Okw’ighunzerera ly’engebe yiwe, Yohana mwathunga olhusunzo olhw’erihandika Ekinywe kya Nyamuhanga ekyasondolibawa. Mwahandika ebikaswekaya ‘ebyo Yesu Kristo abisulha.’ (Erib. 1:1) Yohana mwahandika ekitabu ky’Enjiri ekiri omwa lina liwe. Kandi mwahandika esyobaruha isathu esyasondolibawa. Ebaruha yiwe yakasathu mwahandikirayo Omukristayo omuthaleghulha ya Gayo, oyo Yohana aby’akalhangira ng’omwana wiwe mwanzwa ow’obunyakirimu. (3 Yn. 1) Ebya omusyakulhu muthaleghulha oyu ahandika byabiribya ibinemuhimba abigha ba Yesu abosi erihika namunabwire. w24.11 12 enu. 15-16

Omulhume oyuwanzire mukali wiwe akamuyisyethera n’erimulhangira mo w’obughuli. Akamulhangira ng’ekihembo ky’obughuli bunene erilhua oku Yehova. (Emi. 18:22; 31:10) Busana n’ekyo, akakolongana nayu omwa mibere y’olhukeri n’erisikya, nibya n’omughulhu bali omwa by’olhwanzo eby’ekathi. Syalikaka mukali wiwe erisangira omwa by’emyatsi y’engyingo ebyangaleka iniayowa isyali buholho, ebikamuhemulha, kutse ebikaleka obunyamuthima-thima bwiwe ibwamulyambya. Kuthya n’omulhume atholere iniasighalha inianawithe obunyamuthima-thima obuhenirye embere sya Yehova. (Emib. 24:16) Abiba, mubye imunasi ngoku Yehova akalhangira kandi akasima akaghalha ako mukahiraho eriha bakali benyu b’ekitsumbi omwa ngebe yenyu yosi. Muthwemu eriha bakali benyu b’ekitsumbi omw’iyihighulha okwa mibere eyitheha ekitsumbi, omw’ibakangania olhukeri, erisikya, n’olhwanzo. Omw’ikolha ekyo, mukakanganaya ku mwanzire bakali benyu kandi ku mukabayisyethera. Iha mukali wawu y’ekitsumbi, neryo wukendi theya obughuma bwawu obulengireyo—obunywani bwawu na Yehova.—Esy. 25:14. w25.01 13 enu. 17-18

Ekighuma ky’okwa bindu ebikaleka abaghombe ba Yehova ibabya mbaghane okwa bakayahulhamo Bakristayo, w’omuhwa wabu ow’erithulira. Ni kyahi ekyangathuwathikya erisighalha ithunawithe omuhwa omwa mubiiri w’erithulira kutse nibya ery’ongeragho? Thwangan’igha omwatsi mulebe owahambire okw’ibya n’omuhwa omw’ithulira thwamalengekania okwa ky’erileberyako kya Yesu. Omw’ithulira liwe, omuhwa wiwe isyali keha. Erithwalira haghuma, obuthuku ibukabya bunemulhaba, iniak’ongera erikolha bingyi. Ng’omukoli w’omw’irima ly’emithini oyuwabya iniamabirighunza myaka isathu inianemulimirira emithi y’ebighuma eyithehethaya ekighuma kyosi-kyosi, Yesu mwaghunza emyaka ng’isathu iniane muthulira Abayuda. Aliwe, ngoku omukoli w’omw’irima ly’emithini athalhuhirira okwa mithi yiwe, Yesu nayo mwathalhuhirira okwa bandu kutse erisebebera omwa mubiiri wiwe w’erithulira. (Lk. 13:​6-9) Erighira okw’ebyo abugha n’erigherererya ebyo akolha kikendi thuwathikya erisighalha ithune n’omuhwa lino. w25.03 14-15 enu. 1-4

Kandi ibbwa wamayowa wuthi omundu mulebe anganatholera iwe eringira nayu omwa butheke? Mbwino wunatholere iwakangania aho n’aho ku wabirimwanza? E Biblia yikabugha yithi ow’amenge akatsuka erilengekania athali ayira eky’erikolha. Neryo iwukendibya iwamakangania amenge wamayitheghererya omundu ya ndeke ahabw’akathuku wuthe wakangania ku wumwanzire. Wanga kolhaki erithoka eriminya ndeke omundu mulebe? Okwa mihindano y’ekithunga kutse okw’iyitsemesya, iwangana lhangira ebindu birebe ebihambire okwa obunyakirimu, emibere, n’emikolere y’omundu oyo. Banywani biwe ni bahi, kandi ni byahi ebyo akakanayako? (Lk. 6:45) Ebilhubirirwa biwe binasosene n’ebyawu? Iwangana kania n’abasyakulhu b’omwa kithunga kyabu kutse owundi Mukristayo oyukulire oyunamwasi ndeke. (Emi. 20:18) Iwangana bulya omundu oyo ng’asibwe athi kutse ngawithe mibereki. (Ruta 2:11) Wunemulebya ndeke omundu, lhangira wuthi akabya inianayowire buholho. Sikaya eriyowa liwe, esyombitha siwe, kandi lhangira wuthi siwulibya aho ali obuli ndambi. w24.05 22 enu. 7-8

Abasyakulhu sibalilhuaho bakaghunzerera bathi omukolha-nabi syendi yisubamu. Nomwakine indi abandi bangana yisubamu ekomiti yikikalha nabo omurundi w’erimbere, abandi bangana yithagha eribanwa emirundi mingyi. Neryo abasyakulhu bangana hiraho emitheghekere y’eribanangana n’omukolha-nabi emirundi eyilhabire okwa mughuma. Obundi enyuma w’eribanangana nayu omurundi w’erimbere, Omukristayo oyuwabirihalya anganatsuka erilengekania buuli okwa ebya balyamubwira. Omw’iyikehya inianganahikira Yehova omwa musabe. (Esy. 38:18) Neryo, ibakendibya bakathasyabanangana nayu, omukolha-nabi inianganabya iniabiribya n’amalengekania awali mbaghane okwa agho akanganaya bakabanangana nayu omurundi w’erimbere. Eriwathikya erilholerya omukolha-nabi okw’iyisubamu, abasyakulhu bakakanganaya erilhumirirwa n’olhukeri. Bakabya n’amaha kandi ibasaba Yehova bathi atsumule akaghalha kabu kuthya n’Omukristayo oyuwabirihalya abuke kw’obulengekania n’eriyisubamu.—2 Tim. 2:​25, 26. w24.08 22-23 enu. 12-13

Yehova syanzire omundu n’omughuma akathoghothibwa! Anzire abakolha-nabi ibamusubako. (2 Kor. 5:20) Ky’ekikaleka omw’ibyaho ly’abandu, Yehova abiribya inianemusaba abandu biwe abakamusighanaya—imwamune n’erisaba obuli mundu oyuwabirimusighania—eriyisubamu n’erimusubako. Abasyakulhu b’ekithunga bawithe olhusunzo olhw’erikolha haghuma na Yehova bakalengaho erilholerya abakolha-nabi b’okw’iyisubamu. (Abar. 2:4; 1 Kor. 3:9) Thathera akasasani elhubulha nga yikabya tseme nyingahi abakolha-nabi bakayisubamu! Thatha wethu w’elhubulha, Yehova, akatsema obuli erilhangira embuli yiwe eyiherire yikasuba omwa kithunga. Olhwanzo olhwa thuwithire Yehova lhukalholha embere eryongera thukaghanirya okwa mubere wiwe ow’erikwira abandi b’obulighe, obughanyiri, n’olhukogho.—Lk. 1:78. w24.08 31 enu. 16-17

Yesu kw’alighira abandu erimuyira mwa mwami, angabere iniamasangira omwa by’ekipolitiki by’Abayuda, ababya ahisi sy’obuthabali bwe Roma. Yesu ‘mwathasyasuba okwa kithwe.’ Neryo nomwanabya akabana akahathikano erilhua okwa bandi, isyali yingiraya omwa by’ekipolitiki. Eri ka n’isomo okw’ithwe! Ni kwenene, abandi sibendi thusaba erikanyia ebyalya kutse erilhamya abalhwere omwa nzira y’ekithiko-thiko; kutse erilengesya erithuyira mw’abami kutse abathabali. Aliwe bangananza thw’ingire omwa by’ekipolitiki omw’ikoma omundu oyo bakalengekanaya bathi angan’uwania emyatsi kutse erianza thumusighike. Aliwe, eky’erileberyako kya Yesu kilhangirikire. Mwaghana eriyingirya omwa myatsi ey’ekipolitiki, nibya n’enyuma waho mwabugha athi: “Obwami bwaghe si bw’ekihugho kino.” (Yn. 17:14; 18:36) Munabwire, Abakristayo batholere ibagherererya amalengekania n’emikolere ya Yesu. Thukasighika Obwami bwiwe, ithwaha obwema obuhambire kubo, kandi ithwasaba thuthi bwase.—Mt. 6:10. w24.12 4 enu. 5-6

Wunemw’igha, sondekanaya esyonzira mbyaka esyo wanga koleseryamo ebyo wune mw’igha. Ng’eky’erileberyako, gherereraya obulingirirania bwa Yehova omw’ithendisolholha abandi. Gherereraya olhwanzo olho Yesu awithire Thatha wiwe n’abandi omw’ibya iwunayitheghekire eriaghalhwa busana n’erina lya Yehova n’eriyihayo busana n’Abakristayo balikyenyu. Kandi, gherereraya Yesu omw’iha abandi b’obwema nuku n’abo babane akaghisa ak’eriligha ekihembo kya Yehova eky’obughuli. Thukabya thuk’ongera eriyitheghererya ebihambire okwa ndongolya n’erisimayo, kwathukan’ongera thuthya erianza Yehova na Mughalha wiwe. Kuthya, nabu bakendyongera erithwanza. (Yak. 4:8) Neryo kwesi thukolesaye ebya Yehova abirithuha erilholha embere eriminya ebihambire okwa ndongolya. w25.01 25 enu. 16-17

Erisako lya munabwire lyangana somwa omwa nzira eno: “Wabirighusa ebibi byaghe byosi enyuma sy’omughongo wawu.” Ebinywe ebi bikakanganaya ngoku Yehova akaheka ebibi by’abakayisubamu kandi akaghusabyo eyo bithe byangathasyalhangirwa. Ebinywe ebi byangana thasyabuwa omwa nzira eno: “Wabiriyira [ebibi byaghe] ng’ebithe byathabyaho.” Yehova mw’ongera erikania okwa nzumwa eyo, omwa binywe ebiri omu Mika 7:​18, 19. Aho, Yehova akakanibawako ng’oyukaghusa ebibi byethu omwa mithobero y’engetse. Kera, kyabya isikyanga thokekana erithasyasubulya ekindu ekyabirighuswa omwa mithobero y’engetse. Erilhabira omwa by’erileberyako ebi, thwamabiriminya ngoku Yehova amathughanyira, akathulhusayako omuheke w’ebibi byethu. Omo kwenene, ngoku Dawudi anabugha, ‘obutseme buli okwa babiribuyirwa amalholho wabo, kandi obutseme buli okw’abo ebibi byabo byabirikuningirwa na Nyamuhanga.’ (Abar. 4:7) Eri ka ni ghanyira ly’okwenene! w25.02 9 enu. 7-8

Munabwire okwa kihugho kune eparadiso eyiri mw’abandu abanemukolha emibiiri minene. Y’oswiremo abandu abawithe obuholho bw’okwenene. Ababiringira omwa Paradiso eyi babirithwamu erithendi sighaniayo. Kandi banzire abandu bangyi ngoku kyanga thokekana eribayiyungako omwa mibere y’embaghane eyi. Emibere y’embaghane eyi y’eyahi? Eparadiso y’obunyakirimu! Ekikaswekaya, Yehova abirihiraho omwanya owathalhangirika, omo abandu biwe bali omwa buholho nomwakine indi bali omwa kihugho kya Sitani eky’oswiremo eriponangana, obubi, kandi ekyakabi. (1 Yn. 5:19; Erib. 12:12) Nyamuhanga wethu w’olhwanzo akabya inianalhangire ngoku omughulhu mubi ono akathuhambako nabi kandi akathuha obutheya obo thukayithagha nuku thukulha-kulhane bunyakirimu. Ekinywe kiwe kikakanaya okwa paradiso y’obunyakirimu ng’omwanya ‘w’erisaghiramo’ kandi ‘ng’eririma lyahirawamo amaghetse.’ (Isa. 4:6; 58:11) Busana n’emighisa ya Yehova, abali omwa paradiso eyi bakathoka eribya ibanatsemire kandi ibane omwa butheya omwa biro by’enyuma-nyuma bino ebikalire.—Isa. 54:14; 2 Tim. 3:1. w24.04 20 enu. 1-2

Ahathe erithika-thika, wabirisaba busana n’eribana ow’eringira nayu omwa butheke wamabya iwunakyanzire. Ni kwenene, Yehova syali lhaghanisaya eriha owosi-wosi y’ow’eringira nayu omwa butheke. Aliwe atsomene ebiyithawa n’eriyowa lyawu, kandi angana kuwathikya wukasondya ow’eringira nayu omwa butheke. Neryo lholha embere erimubwira eriyisunza n’eriyowa lyawu. (Esy. 62:8) Saba erihebwa erighumisirizya n’amenge. (Yak. 1:5) Nomuwanga ghana eribana ow’eringira nayu omwa butheke oyutholere aho naho, Yehova akayilhagha erilholha embere erikutsomana kinyamubiri n’omw’iyowa. (Esy. 55:22) Aliwe eky’eriyitheyako kya kino: Isiwahweraya amalengekania w’okw’isondya ow’eringira nayu omwa butheke. (Flp. 1:10) Etseme y’okwenene siyiseghemere okwa ky’eribya iwuli omwa butheke kutse eyihi, aliwe okwa bughuma bwawu na Yehova. (Mt. 5:3) Kandi omughulhu wuli muhuru, iwangana thunga obwiranda bunene obw’erikanyirirya omubiiri wawu. (1 Kor. 7:​32, 33) Kolesaya obuthuku obu bwa ndeke. w24.05 21 enu. 4; 22 enu. 6

Obuthethane bwenyu butholere ibwaghunza mughulhu mungahi? Mughulhu mungyi erithwamu lhuba-lhuba likalhwiririramo ebitsibu. (Emi. 21:5) Mutholere imwaha obuthethane bwenyu bw’obuthuku obukaghunza erithoka eriminyana ndeke. Aliwe obuthethane bwenyu isibwaghunza buthuku buuli kyamabya isikiriyithaghisibawa. Ne Biblia yikabugha yithi: “Amaha awakalindirirawa akaleka omuthima iniasimba.” (Emi. 13:12) ‘Ni byahi ebya abandi bangakolha omughulhu abandi bali omwa buthethane? Ithwangana bakokya okw’irya, okw’iramya ly’eka, kutse eriyitsemesya haghuma. (Abar. 12:13) Mbwino bakayithagha oyo wangabya nabo, etrasipoti, kutse omwanya ogho banganza erikaniryamo? Kyamabya ikwakiri kithya, mbwino wangana yihayo eriwathikya? (Gal. 6:10) Wamasabwa eribya haghuma n’abali omwa buthethane, busana naki iwathalhangira olho mwa lhusunzo? Isiwakwama kyabaleka ibobene, aliwe kandi ambi iwalebya nga ni buthuku bwahi obwa bakayithaghiramo erikania okwa bya wuthatholere eriowa. w24.05 30 enu. 13-14

Abasyakulhu bakalengaho eriminya emibere eyilyamukolhaya okwa kibi. Ng’eky’erileberyako, mbwino Omukristayo mwakaghenda akasebebera busana n’erigheghena endegheka yiwe y’eriyeghesya kutse erithulira? Mbwino alhue isyakisaba Yehova mughulhu wosi? Mbwino alhwe akalighira esyongumbu siwe nyibi erimusondolha? Mbwino abirisombolha abanywani babi n’eby’eriyitsemesya? Erithwamu ng’eryo lyangabya iryabirihamba lithi okwa muthima wiwe? Mbwino anasi ngoku erithwamu liwe erya lino-lino n’ebyakakolha bikahamba oku Thatha wiwe Yehova? Omw’imubulya ebibulyo ebyangana leka inialengekania ahathe ery’ingira kutsibu omwa ngebe yiwe, abasyakulhu b’olhukeri bangana wathikya omukolha-nabi kandi ibaleka iniaghanirya okw’ithwamu liwe libi. (Emi. 20:5) Eryongera okw’ekyo, ibangana kolesya emikya eriwathikya omundu erilengekania n’erilhangira emikolere yiwe mibi. Obundi okw’imubana ery’erimbere, omundu inianganatsuka eriyowa nabi busana n’enzira yiwe nyibi eyo abirikwama. Nibya anganayisubamu. w24.08 22 enu. 9-11

Yesu mwathulhughania “engulhu yuwene y’Obwami” n’omuhwa kundi abya inianasi ngoku w’omubiiri ogho Nyamuhanga abyanzire iniakolha. Yesu mwayira omubiiri w’erithulira mwa kindu kikulhu omwa ngebe yiwe. Nibya n’omwa biro by’erighunzerera by’erithulira liwe, mwaghenda “omwa buli tawuni n’omwa buli kyalu,” inianemukangirirya abandu. (Lk. 13:22) Kandi mwathendeka abandi bigha erikolha nayu ng’abathuliri. (Lk. 10:1) Na munabwire, erithulha engulhu yuwene w’omubiiri mukulhu ogho Yehova na Yesu banzire ithwakolha. (Mt. 24:14; 28:​19, 20) Thwangan’ongera omuhwa wethu w’erithulira omw’ilhangira’ abandu ngoku Yehova akabalhangira. Anzire abandu bangyi ngoku kyangathokekana ibowa engulhu yuwene n’erilighayo. (1 Tim. 2:​3, 4) Busana n’ekyo, akathuthendeka ndeke nuku thuthulhe omwatsi w’erilhamya esyongebe oyu. Abandu nomubanga ghana erikolera Yehova lino, bangana syahebwa akaghisa k’erikolha ekyo obulighe bunene buthe bwahwa. w25.03 15-16 enu. 5-7

Obuli Mukristayo atholere iniakolesya obunyimuthima-thima obuthendekirwe akakolongona n’oyuwabirilhusibwa omwa kithunga. Abandi bangana yowa buholho eriramukya kutse erithangirira omundu oyo amasa okwa mihindano. Aliwe, sithutholere thukakania bingyi n’omundu oyo kutse eritsanga nayu ng’omunywani. Abandi ibangana yibulya bathi, mbwino e Biblia siyiribugha yithi oyukaramukaya omundu ng’oyo akabya iniamasangira omwa mibiiri yiwe mibi? (2 Yn. 9-11) Ebithimbire okw’isako eri bikakanganaya ngoku obusondoli obu buhambire okwa bakayisamambulha okw’ikirirya n’abandi abakakulha-kulhanaya emibere mibi. (Erib. 2:20) Busana n’ekyo, omundu amabya iniakakulha-kulhanaya esyongangirirya sy’abakayisamambulha okw’ikirirya, abasyakulhu isibendi hiraho emitheghekere ey’erimubungira. Ni kwenene, hane amaha ngoku akendi syabukako obulengekania. Aliwe ekyo kithe kyabya, sithwangaramukya omundu ng’oyo kutse erimukokya okwa muhindano. w24.08 30-31 enu. 14-15

Yesu abere abirilisya ekikumulha ky’abandu, mwabwira abigha biwe athi balhue omwa mwanya oyo baghende e Kapernaumu omwa bwathu, nayu amaghenda okwa kithwe nuku akakiraye abandu abanza erimuyira mwa mwami. (Yn. 6:​16-20) Abakwenda babere bane omwa bwathu, ekiyagha mukyahitha, kyamaletha erihunga linene n’ebisunda. Neryo Yesu mwasa eyo bali, iniane muthandayira okwa maghetse. Kandi mwabwira omukwenda Petero athi akole ikyan’ekyo. (Mt. 14:​22-31) Yesu abere abirihika omwa bwathu, ekiyagha mukyathekana. Eki mukyaleka abigha ibabugha bathi: “Kwenene wuli Mughalha wa Nyamuhanga.” (Mt. 14:33) Nomwabine, mubathalhangira erisosana eryabya ahakathi-kathi k’ekithiko-thiko eki n’ekya kolerawa ekikumulha ky’abandu. Mariko akathasyabugha okwa mwatsi iwan’oyo athi: “[Abakwenda] mubasweka kutsibu, kundi nibya babya isibali bayitheghererya eby’emiggati.” (Mk. 6:​50-52) Omo kwenene, mubalemwa eriyitheghererya Yehova ng’abya iniabiriha Yesu y’akaghalha kangahi ak’erikolha ebithiko-thiko. w24.12 5 enu. 7

Thwanganakangania ku thukasima olhwanzo lhwa Yehova omw’ikolesya obuthuku buno obw’Eryibuka erikangania Yehova nga thukasima bungahi endongolya. Ery’ongera okw’iyitheghekera eribyaho okw’Ibuka, thutholere ithwakokya n’abandi eribyaho. Soborera abo wukakokaya ebikendi syabya okw’Ibuka. Ikikendi wathikya wamabakangania evidiyo Busana naki Yesu mwaholha? na Ibuka Olhuholho Lhwa Yesu esiri okwa jw.org. Abasyakulhu batholere ibalhangira bathi bakakokaya ababirisebebera. Thalengekania okwa tseme eyikabya omwa lhubulha n’okwa kihugho abaghuma b’okwa syombuli sya Yehova esithere bamahambwako n’erisuba omwa kihangulho kiwe! (Lk. 15:​4-7) Okw’Ibuka, isithwasubulira okw’iramukya abo thwasi basa, aliwe kutsibu-tsibu thutholere ithwaramukya abahyaka n’ababirighunza buthuku buuli isibali hindana. Thwanzire ibayowa buholho!—Abar. 12:13. w25.01 29 enu. 15

Nomwakine indi endongolya yikathuwathikaya eriyitheghererya obulingirirania bwa Yehova, kutsibu-tsibu yikathuwathikaya eriyitheghererya olhwanzo lhwiwe nga ni lhungahi. (Yn. 3:16; 1 Yn. 4:9) Engangirirya y’endongolya yikathubisulira ngoku Yehova anzire ithwabyaho kera na kera kandi ithwabya b’okw’ihiika liwe. Thalengekania oku kino: Omughulhu Adamu ahalhaya, Yehova mwamuthibithako omw’ihiika ly’abaramya biwe. Ekyalhwiririramu, ithwe bosi muthwabuthwa isithuli b’omw’ihiika lya Nyamuhanga. Aliwe busana n’endongolya, Yehova akathughanyira ebibi byethu kandi erighunzerera akendi letha abandu bosi abakakanganaya er’ikirirya kandi abowa omw’ihiika liwe. Nibya namunabwire thwanganabya n’obughuma obuwene na Yehova haghuma n’abaramya balikyethu. Omo kwenene, thukaghasirawa omo lhwanzo lhwa Yehova!—Abar. 5:​10, 11. w25.01 21 enu. 6

Ni kwenene wukaligha ngoku endongolya ni kihembo eky’obughuli bunene! (2 Kor. 9:15) Kundi Yesu mwahayo engebe yiwe, wanganabya munywani wa Yehova Nyamuhanga. Kandi wangana thunga amaha w’eribya n’engebe y’erikotha. Kwesi, ka thuli b’erisima Yehova busana n’erithuha endongolya ahabw’eribya iniathwanzire! (Abar. 5:8) Erithuwathikya erisighalha ithune bandu abakasima n’erithendi lhangira endongolya ng’ekindu ekithawithe mughaso, Yesu mwatsukisya omukonga w’obuli mwaka ow’Eryibuka olhuholho lhwiwe. (Lk. 22:​19, 20) Omwaka ono, Eryibuka likendibya Kyakani Okwakani 2, 2026. Ahathe erithika-thika, ithwe bosi thune muthegheka erisyabyaho. Omwa buthuku bw’Eryibuka buno, ithukendi ghasirwa kutsibu thwamaghanirya okwa ekya Yehova na Mughalha wiwe babirithukolera. w25.01 20 enu. 1-2

Wangana lholha embere erigha ebihambire okwa lhwanzo olho Yehova Nyamuhanga na Kristo Yesu bathuwithire omw’ilholha embere erilhughaniryako. Obundi omwa buthuku bw’Eryibuka ly’omwaka ono, iwangana soma ndeke ekighuma ky’okwa bitabu by’Enjiri kutse bingyi kwaho. Isiwalengaho erisoma esyosura nyingyi okwa buthuku bughumerera. Omwakanya k’ekyo, imana hake n’erisondekania esindi nzumwa esyangaleka ithwabya ithutholere erianza Yehova na Yesu. Wamabya iwamabirighunza myaka mingyi omwa kwenene, iwangana yibulya nga kikinathokekene erithasyaminya ebihyaka ebihambire oko myatsi eyinasibwe ng’obulingirirania bwa Nyamuhanga, olhwanzo lhwiwe, n’endongolya. Ekwenene yiri yithi thukendi syabya ithunemw’igha ebihyaka ebihambire okwa myatsi eyi n’eyindi. Neryo ghasirawa omwa myatsi mingyi eyiri omwa bitabu byethu. w25.01 24-25 enu. 13-15