Malaki 3:1-18
3 “Lebaya! Ngathuma omukwenda waghe, akendi nyithulira* enzira. Kandi kitsumbukirania, Omukama w’okwenene oyo mukasondekanaya, akendisyasa omwa hekalhu yiwe; n’omuthumwa w’endaghane akendisyasa, oyo mukatsemera. Lebaya! Ahathe erithika-thika akendisyasa,” Yehova w’amahe athya.
2 “Aliwe nindi oyukendi syayiyinirya eryasa ly’ekiro kiwe, kandi nindi oyukendi syathoka er’imana akahika? Kundi akendisyabya ng’omuliro w’omutukurya kandi ng’esabbuni y’oyuk’oghaya esyongyimba.
3 Kandi akendi syikalha ng’omutukurya kandi oyukeraya efeza kandi akendi sy’erya baghalha ba Lawi; kandi akendi syab’erya* ng’ehoro kandi ng’efeza, kandi ahathe erithika-thika, neryo oku Yehova bakendi syabya bandu abakaha ekihembo ky’obuhere omwa lithunganene.
4 N’ekihembo ky’obuhere ekya Yuda ne Yerusalemu bakahayo, omo kwenene kikendi syatsemesya Yehova, ngoku kyabya omwa biro bya kera n’omwa myaka ya kera-kera.
5 “Ngendi syabasegherako hakuhi eribatswera, kandi ngendi syabya mwema oyubangukire busana n’eritswera abakumu, eritswera abamaraghane, eritswera abakalhahiraya omwa mabehi, eritswera abakanyegha abakoli, abakwakali, n’omwana oyuthawithe thatha,* n’eritswera abakaghana eriwathikya* omubunga. Aba sibathanyubaha,” Yehova w’amahe athya.
6 “Kundi ingye indi Yehova; sindi hinduka.* Inywe muli baghalha ba Yakobo; simuli mwahika okw’ihwerekerera lyenyu.
7 Eritsuka okwa biro by’abathatha-kulhu benyu, mwabirisighania ebilhaghiro byaghe kandi simwathabikwama. Munyisubeko, naghe ngendi basubako,” Yehova w’amahe athya.
Aliwe mukabugha muthi: “Thutholere ithwakusubako thuthi?”
8 “Omundu buyira anatholere er’iba Nyamuhanga? Aliwe munemunyiba.”
Kandi mukabugha muthi: “Thwabirikwiba thuthi?”
“Omwa kimu-kikumi* n’omwa bikahebawayo.
9 Omo kwenene mwabirithakirwa,* kundi mukanyiba, ee, ekihanda kyosi kinemukolha ekyo.
10 Mulethe ekimu-kikumi* ekyosi omwa sitoha, nuku omwa nyumba yaghe mwangabya ebyalya; kisi, munyilengeko omw’eki,” Yehova w’amahe athya, “erilhangira nga sinendi bakyungulira esyonyukyo sy’eribogha sy’elhubulha n’eributhulirako* omughisa erihika aho mukendibya isimukibulirweki.”
11 “Kandi ngendisyathakira ekikatsandaya,* kandi sikyendi syatsandya ebighuma byenyu by’ekithaka, kutse emizabibu y’omwirima lyenyu siyendi syabya buthahethya,” Yehova w’amahe athya.
12 “Ebihanda byosi bikendi syabahulhamo ab’obutseme, kundi mukendi syabya kihugho ekikatsemesaya,” Yehova w’amahe athya.
13 “Ebinywe ebyo mukanyibughako bikalire,” Yehova athya.
Aliwe mukabugha muthi: “Thwabirikubughako thuthi omwa kathi-kathi kethu?”
14 “Mukabugha muthi, ‘Erikolera Nyamuhanga siriwithe mughaso. Thwabirighasirwa thuthi omw’imughondera n’erilendera embere sya Yehova w’amahe ithunayibombekire?
15 Thukalhangira ab’emiyilhabiriryo nga ni bandu abatsemire. N’abakabera erisangira omwa bubi ng’abathokire. Buthakw’isoni bakalenga oku Nyamuhanga aliwe ibathasuyirwa.’”
16 Okwa buthuku obo abak’ubaha Yehova mubakanirania, obuli mughuma na mulikyabo, na Yehova mwalholha embere eribathegha amathwe n’eribahulikirira. N’ekitabu ky’ery’ibukwa mukyahandikirwa embere siwe busana n’abakubaha Yehova n’abakaghaniraya* okwa lina liwe.
17 “Neryo bakendi syabya baghe,” Yehova w’amahe athya, “okwa kiro ngendi syahulhukya ekindu kyaghe ky’obughuli.* Ngendi syabakwira obulighe ngoku omulhume akakwira mughalha wiwe oyukamukolera y’obulighe.
18 Kandi mukendi syalhangira embaghane eyiri ahakathi-kathi k’omundu omuthunganene n’omundu mubi, ahakathi-kathi k’omundu oyukakolera Nyamuhanga n’oyuthemukolera.”
Emyatsi Ahikwa
^ Kutse “nyitheghekera.”
^ Kutse “eritukurya.”
^ Kutse “engubi.”
^ Kutse “oyukalyathangirira obughabe bwa.”
^ Kutse “sindinathahinduka.”
^ Kutse “ekighuma ky’okw’ikumi.”
^ Kutse obundi, “Omw’ithakira eryo wukanyithakiramo.”
^ Kutse “ebyosi by’ekighuma ky’okw’ikumi.”
^ Kinywe okwa kinywe, “eribasanulirako.”
^ Obundi erimanyisya ebihunzo by’ehihuka.
^ Kutse “erilengekania.” Kutse obundi, “erililhangira mwa ly’obughuli.”
^ Kutse “ekikatsemerawa.”
