Yehowa Ke Bakaka na Mbalu Ngogo na Nge “Amen”
YEHOWA ke bakaka na mbalu lusambu na beto. Yandi ‘ke tulaka dikebi mpi ke widikilaka’ bansadi na yandi mpi ke bakaka na mbalu mambu yonso ya beto ke salaka sambu na kupesa yandi nkembo, yo vanda ya fioti to ya nene. (Mal. 3:16) Mu mbandu, beto tadila ngogo “amen” yina beto ke tubaka mbala mingi. Keti Yehowa ke bakaka yo na mbalu? Ee! Sambu na kubakisa yo, beto tadila ntendula ya ngogo yai mpi mutindu Biblia ke sadilaka yo.
“BANTU YONSO TA TUBA NDE, ‘AMEN!’”
Ngogo “amen” ke tendula nde “yo vanda mpidina” to “ya kieleka.” Yo me katuka na ngogo ya Kiebreo yina ke tendula “vanda kwikama,” “kutudila ntima.” Bantangu ya nkaka, bo vandaka kusadila “amen” na ntangu ya kusambisa bantu. Na nima ya kusala lusilu, muntu fwete tuba “amen” sambu na kundimisa bantu nde mambu yina yandi me tuba kele ya kieleka mpi yandi ke ndima mambu yonso yina ta kumina yandi na nima. (Kut. 5:22) Kana yandi me tuba “amen,” yandi fwete zitisa mambu ya yandi me tuba.—Neh. 5:13.
Biblia me sadila ngogo “amen” mbala mingi na Kulonga 27. Ntangu bantu ya Izraele kotaka na Ntoto ya Lusilu, bo vukanaka na kati-kati ya Ngumba ya Ebale mpi Ngumba ya Gerizimi sambu na kuwidikila Nsiku. Bo vandaka pana sambu kuwidikila mpamba ve kansi mpi sambu na kusadila yo. Ntangu bo vandaka kutanga bampasi yina ta kumina bo kana bo zitisa ve nsiku, bo vandaka kutuba nde “Amen!” (Kul. 27:15-26) Yindula ndinga ya bantu mingi, babakala, bankento mpi bana ke pesa mvutu yina! (Yoz. 8:30-35) Ya kieleka bo vilaka ve bangogo yina bo tubaka kilumbu yina. Bantu ya Izraele zitisaka lusilu na bo sambu Biblia ke tuba nde: “Izraele landaka kusadila Yehowa na bilumbu yonso ya Yozue mpi na bilumbu yonso ya bankuluntu yina bikalaka na luzingu na nima ya Yozue mpi yina zabaka mambu yonso yina Yehowa salaka sambu na Izraele.”—Yoz. 24:31.
Yezu mpi sadilaka ngogo yai “amen” sambu na kundimisa nde mambu yina yandi vandaka kutuba vandaka kieleka kansi yandi sadilaka yo ntangu yo vandaka mfunu. Na kisika ya kusadila yo sambu na kupesa mvutu, yandi sadilaka “amen” (yina bo me balulaka nde “kieleka”) na ntwala ya kutuba kima mosi. Bantangu ya nkaka, yandi vandaka kuvutukila ngogo “amen amen.” (Mat. 5:18; Yoa. 1:51) Yandi ndimisaka bawi nde bangogo na yandi kele kibeni ya kieleka. Yezu mpamba vandaka ti kiyeka ya kutuba mutindu yina sambu balusilu yonso ya Nzambi lunganaka na nzila na yandi.—2 Bak. 1:20; Kus. 3:14.
“BANTU . . . TUBAKA NDE, ‘AMEN!’ MPI BO KUMISAKA YEHOWA”
Bantu ya Izraele vandaka mpi kusadila ngogo “amen” ntangu bo vandaka kusamba mpi kukumisa Yehowa. (Neh. 8:6; Nk. 41:13) Na nima ya kuwa kisambu, bo vandaka kutuba “amen” sambu na kumonisa nde bo me ndima kisambu yina. Bantu yonso yina vandaka pana vandaka kundima, yo vandaka kupesa bo diaka kiese ya kusambila Yehowa. Diambu yai salamaka ntangu ntotila Davidi nataka Sanduku ya Yehowa na Yeruzalemi. Ntangu bo vandaka kusala nkinsi, yandi salaka kisambu ya masonga yina vandaka bonso nkunga ya kele na 1 Bansangu 16:8-36. Mambu yina yandi tubaka pesaka bantu yina vandaka pana kikesa mpi “bantu yonso tubaka nde: ‘Amen!’ mpi bo kumisaka Yehowa.” Mvutu yina bo pesaka na kimvuka pesaka bo kiese mingi kilumbu yina.
Bakristu ya mvu-nkama ya ntete mpi sadilaka ngogo “amen” ntangu bo vandaka kukumisa Yehowa. Mbala mingi bansoniki ya Biblia sadilaka yo na mikanda na bo. (Bar. 1:25; 16:27; 1 Pie. 4:11) Mukanda ya Kusonga ke monisa bigangwa ya kimpeve na zulu ke pesa Yehowa nkembo mpi ke tuba nde: “Amen! Beno kumisa Yah!” (Kus. 19:1, 4) Bakristu ya mvu-nkama ya ntete vandaka ti kikalulu ya kutuba “amen” na nsuka ya kisambu na balukutakanu. (1 Bak. 14:16) Kansi bo vandaka ve kuvutukila yo kukonda kuyindula.
SAMBU NA NKI “AMEN” NA NGE KELE MFUNU
Disolo yai me sadisa beto na kubakisa mfunu ya kutuba “amen” na nsuka ya kisambu. Ntangu beto ke tubaka yo na nsuka ya kisambu, beto ke ndimaka nde mambu yina bo me tuba kele ya masonga. Ntangu beto ke ndimaka “amen,” ata na nsi ya ntima na kisambu yina bo me sala na meso ya bantu, beto ke monisaka nde beto me ndima mambu yina bo me tuba. Beto tadila kikuma ya nkaka yina “amen” na beto kele mfunu.
Yo ke sadisaka beto na kuwidikila na dikebi yonso. Ntangu kisambu ke salamaka, beto ke kumisaka Yehowa na bangogo mpi na bikalulu na beto. Ntangu beto ke tubaka “amen” yo ke sadisaka beto na kuvanda ti mabanza ya mbote mpi na kutula dikebi na kisambu.
Yo ke vukisaka beto. Ntangu mpangi ke sala kisambu sambu na bantu yonso, dibundu ya mvimba fwete tula dikebi na mambu yina yandi ke tuba. (Bis. 1:14; 12:5) Ntangu beto ke ndimaka na kimvuka, beto ke kumaka diaka na bumosi. Ata beto me ndima na ndinga ya ngolo to na nsi ya ntima, “amen” na beto ke salaka nde Yehowa kundima kisambu na beto.
“Amen” na beto ke pesaka Yehowa nkembo
Beto ke pesaka Yehowa nkembo. Yehowa ke monaka mambu ya fioti-fioti ya beto ke salaka na lusambu. (Luka 21:2, 3) Yandi ke monaka bikuma yina ke pusaka beto mpi mambu yina kele na ntima na beto. Ata beto ke landa lukutakanu na telefone, beto fwete ndima nde Yehowa ke waka “amen” na beto. Na kimvuka, beto ke pesaka Yehowa nkembo.
Yo lenda monana bonso nde “amen” na beto kele mfunu ve kansi yo kele mfunu mingi. Étude perspicace ke tuba nde: “Ntangu bansadi ya Nzambi ke tubaka ngogo yai, bo ke monisaka nde bo ke tulaka ntima, ke kwikilaka mpi ke vandaka ti kivuvu ya ngolo.” Bika nde “amen” na beto kupesa Yehowa nkembo.—Nk. 19:14.
