Yozue 24:1-33

  • Yozue me vutukila disolo ya Izraele (1-13)

  • Ndongisila sambu na kusadila Yehowa (14-24)

    • “Sambu na mono mpi bantu ya nzo na mono, beto ta sadila Yehowa” (15)

  • Kuwakana ya Yozue ti Izraele (25-28)

  • Lufwa ya Yozue mpi mutindu bo zikaka yandi (29-31)

  • Bo me zika mikwa ya Yozefi na Shekemi (32)

  • Lufwa ya Eleazare mpi mutindu bo zikaka yandi (33)

24  Ebuna Yozue vukisaka makanda yonso ya Izraele na Shekemi. Mpi yandi bingaka bankuluntu ya Izraele, bamfumu na yo, bazuzi na yo, mpi bakapita na yo,+ ebuna bo telamaka na ntwala ya Nzambi ya kieleka.  Yozue tubilaka bantu yonso nde: “Yehowa Nzambi ya Izraele me tuba nde, ‘Bamvula mingi me luta,+ ba-nkaka na beno+ vandaka kuzinga na simu yina ya nkaka ya Nzadi*—Tera tata ya Abrahami mpi tata ya Nahore—mpi bo vandaka kusadila banzambi ya nkaka.+  ‘Na nima, mono bakaka nkaka na beno Abrahami+ na simu yina ya nkaka ya Nzadi* mpi mono salaka nde yandi tambula na insi ya mvimba ya Kanana mpi mono kumisaka bana* na yandi mingi.+ Mono pesaka yandi Izaki;+  ebuna, Izaki mono pesaka yandi Yakobi ti Ezau.+ Na nima mono pesaka Ezau Ngumba ya Seire bonso dikabu na yandi;+ mpi Yakobi ti bana na yandi kulumukaka na Ezipte.+  Na nima mono tindaka Moize ti Aroni,+ mpi mono bulaka Ezipte na mambu yina mono salaka na kati na bo,+ ebuna mono basisaka beno.  Ntangu mono vandaka kubasisa batata na beno na Ezipte+ mpi beno kumaka na nzadi-mungwa, bantu ya Ezipte vandaka kulanda batata na beno ti bapusu-pusu ya bitumba mpi basoda yina ke tambusaka bampunda tii na Nzadi-Mungwa ya Mbwaki.+  Bo yantikaka kudidila Yehowa,+ yo yina yandi tulaka mpimpa na kati na beno mpi bantu ya Ezipte mpi yandi kulumusaka nzadi-mungwa na zulu na bo mpi fikaka bo,+ mpi meso na beno monaka mambu yina mono salaka na Ezipte.+ Na nima, beno zingaka na ntoto-makanga bamvula* mingi.+  ‘Mono nataka beno na insi ya bantu ya Amore yina vandaka kuzinga na simu yina ya nkaka* ya Yordani, mpi bo nwanisaka beno.+ Kansi mono pesaka bo na maboko na beno sambu beno baka insi na bo, mpi mono manisaka bo na ntwala na beno.+  Na nima, Balaki mwana ya Sipore, ntotila ya Moabi, telamaka mpi nwanisaka Izraele. Yandi bingaka Balami mwana ya Beore sambu na kusinga beno.+ 10  Kansi, mono wilaka ve Balami.+ Yo yina yandi sakumunaka beno mbala mingi,+ mpi mono gulusaka beno na maboko na yandi.+ 11  “‘Na nima beno sabukaka Yordani+ mpi kumaka na Yeriko.+ Ebuna bantwadisi* ya Yeriko, bantu ya Amore, bantu ya Perizi, bantu ya Kanana, bantu ya Heti, bantu ya Girgashi, bantu ya Hivi, mpi bantu ya Yebusi nwanisaka beno, kansi mono pesaka bo na maboko na beno.+ 12  Mono tindaka mawi ya ke lembisa nitu* na ntwala nde beno kuma, mpi yo kulaka bo na ntwala na beno+—bantotila zole ya bantu ya Amore. Yo vandaka ve na nsadisa ya mbele na nge ya bitumba to ya munduki na nge ya tolo-tolo.+ 13  Yo yina, mono pesaka beno ntoto yina beno moninaka ve mpasi mpi bambanza yina beno tungaka ve,+ mpi beno ke zinga kuna. Beno ke dia bambuma ya vinu mpi ya olive yina beno kunaka ve.’+ 14  “Yo yina, beno wa Yehowa boma mpi beno sadila yandi ti kwikama* mpi kieleka,*+ mpi beno katula banzambi yina ba-nkaka na beno sadilaka na simu yina ya nkaka ya Nzadi* mpi na Ezipte,+ mpi beno sadila Yehowa. 15  Ntangu yai, kana yo ke monana nde yo kele mbi na meso na beno na kusadila Yehowa, beno sola sambu na beno mosi bubu yai nani beno ta sadila,+ kana banzambi yina ba-nkaka na beno sadilaka na simu yina ya nkaka ya Nzadi*+ to banzambi ya bantu ya Amore yina beno ke zinga na insi na bo.+ Kansi sambu na mono mpi bantu ya nzo na mono, beto ta sadila Yehowa.” 16  Ebuna bantu vutulaka nde: “Ngindu lenda kwisila beto ve ata fioti na kuyambula Yehowa mpi kusadila banzambi ya nkaka. 17  Yehowa Nzambi na beto muntu basisaka beto mpi batata na beto na insi ya Ezipte,+ na nzo ya kimpika,+ mpi yandi muntu salaka bidimbu yina ya nene na meso na beto+ mpi yandi muntu landaka kutanina beto na nzila yonso yina beto tambulaka mpi na kati ya makanda yonso yina beto lutaka.+ 18  Yehowa kulaka bantu yina yonso, ata bantu ya Amore, yina vandaka kuzinga ntete na insi yina na ntwala na beto. Yo yina beto mpi, beto ta sadila Yehowa, sambu yandi kele Nzambi na beto.” 19  Ebuna Yozue tubilaka bantu nde: “Beno ta kuka ve kusadila Yehowa, sambu yandi kele Nzambi ya santu;+ yandi kele Nzambi yina ke lombaka nde bo kangama kaka na yandi.+ Yandi ta lolula ve mambu na beno ya mbi* mpi masumu na beno.+ 20  Kana beno yambula Yehowa mpi beno sadila banzambi ya banzenza, yandi ta balukila beno mpi ta manisa beno na nima ya kusadila beno mambu ya mbote.”+ 21  Kansi bantu tubilaka Yozue nde: “Ve, kansi beto ta sadila Yehowa!”+ 22  Yo yina Yozue tubilaka bo nde: “Beno mosi kele bambangi nde, beno me sola na luzolo na beno mosi na kusadila Yehowa.”+ Ebuna bo tubaka nde: “Beto kele bambangi.” 23  “Yo yina, beno katula banzambi ya banzenza yina kele na kati na beno, mpi beno pesa bantima na beno na Yehowa Nzambi ya Izraele.” 24  Bantu tubilaka Yozue nde: “Beto ta sadila Yehowa Nzambi na beto, mpi beto ta lemfukila ndinga na yandi!” 25  Ebuna Yozue salaka kuwakana ti bantu na kilumbu yina mpi yandi tudilaka bo bansiku ti mambu ya bo fwete landa na Shekemi. 26  Na nima, Yozue sonikaka mambu yina na mukanda ya Nsiku ya Nzambi+ mpi yandi bakaka ditadi mosi ya nene+ mpi tedimisaka yo na nsi ya nti ya nene yina kele pene-pene ya kisika ya santu ya Yehowa. 27  Yozue tubilaka bantu yonso nde: “Tala! Ditadi yai ta vanda mbangi sambu na beto,+ sambu yo me wa mambu yonso yina Yehowa tubilaka beto, mpi yo ta vanda mbangi sambu na beno, sambu beno buya ve Nzambi na beno.” 28  Ebuna Yozue pesaka bo nzila ya kukwenda, konso muntu na ntoto na yandi yina vandaka dikabu na yandi.+ 29  Na nima ya mambu yai, Yozue mwana ya Nuni, nsadi ya Yehowa, fwaka ti bamvula 110.+ 30  Ebuna bo zikaka yandi na teritware ya dikabu na yandi na Timnati-sera,+ yina kele na ntoto ya bangumba ya Efrayimi, na nordi ya Ngumba ya Gaashi. 31  Izraele landaka kusadila Yehowa na bilumbu yonso ya Yozue mpi na bilumbu yonso ya bankuluntu yina bikalaka na luzingu na nima ya Yozue mpi yina zabaka mambu yonso yina Yehowa salaka sambu na Izraele.+ 32  Mikwa ya Yozefi,+ yina bantu ya Izraele nataka tuka na Ezipte, bo zikaka yo na Shekemi na kitini ya ntoto yina Yakobi sumbaka na bana ya Amore,+ tata ya Shekemi, na mbongo 100 ya bibende;+ mpi yo me kumaka dikabu ya bana ya Yozefi.+ 33  Diaka, Eleazare mwana ya Aroni fwaka.+ Ebuna bo zikaka yandi na Ngumba ya Fioti ya Fineasi mwana na yandi,+ yina bo pesaka yandi na ntoto ya bangumba ya Efrayimi.

Banoti na nsi ya lutiti

Disongidila, Efrate.
Disongidila, Efrate.
Na kisina, “nkuna.”
Na kisina, “bilumbu.”
Disongidila, ndambu ya esti.
To mbala ya nkaka, “bankwa-ntoto.”
To mbala ya nkaka, “kumisaka bo kisaka-saka; pesaka bo boma ya ngolo.”
To “na mutindu ya kukonda kifu.”
Na kisina, “na kwikama.”
Disongidila, Efrate.
Disongidila, Efrate.
To “kukolama na beno.”