Ovandu mbe u ungura oukukutu kave hene koviungura vyawo. Kunao, owo ve tjaterwa okuungura oukukutu kutja ve yenenise oviṋa mbi mave hepa nokuvatera varwe nandarire kutja oviungura mbi mave ungura kaviwa.

Kutja movanga poo konokuvanga, ehupo rina omerizirira omengi. Mouye muna ovandu ovengi mbe havanga okuungura oukukutu, kunao ma rire nawa kove indu tjimo ungura oukukutu.—Omuzuvarise 3:13.

“Ami mbe rihonga kutja indu tji moungura oukukutu, u kara nohange na ove omuini nu u kara nondjoroka momuinyo. Okukara nohange momuinyo kwa tjita kutja mbi rihonge okusuvera oviungura. Indu tji u raisa kutja oove omundu wongurameno moviungura tji kuvatera kutja u kare nena ewa.”—Reyon.

OMURARI WOMBEIBELA: “Ungura, nu mo munu omahupiro.”—Omiano 14:23.

Kondja okukara noumune ouwa ohunga noviungura nu ukongorere ondunge ndjiri kehi mba.

Suvera okurihonga okuungura oviṋa nawa. Nandarire kutja moungura oviungura kaaṋi mbyo, kutja okumana oviungura mbi wa pewa ponganda, poo oviungura vyarwe, yandja ombango aihe ku imbi mbi moungura. Tji moyenene okuungura otjiungura nawa, paha omiano mbi mavi kuvatere okuungura otjiungura ho tjimanga poo nawa. Otja pu moyende a motjiwa otjiungura nawa, opu moyende a mokara nondjoroka motjiungura ho.

OMURARI WOMBEIBELA: “Tji pe nomurumendu ngu tjiwa otjiungura tje, tjiri, eye ma yenene okukaungura pozombara; eye ke nokuhepa okurikuta kuna ovandu vokehi.”—Omiano 22:29.

Ripurira keyuva ra muhuka. Potwingi, indu tji u nomerizirira, u vatera ovandu varwe. Otjotjihorera, indu tji uungura oviungura vyoye oukukutu, utjita kutja oviungura vi rire ovipupu ku varwe meṱunḓu.

OMURARI WOMBEIBELA: “Mokuyandja mu nenyando tjinene pokupewa.”—Oviungura 20:35.

Kondja okuungura oviungura vyarwe pendje na imbi mbi wapewa. Pendje nokuungura oviungura oviṱiṱi, kondja okuungura oviungura ovingi pendje na imbi mbi wapewa. Tji wa tjiti nao, moyenene okutjiwa kutja moungura ovingi, mena rokutja movanga okuungura, nu kamena rokutja moṋiṋikiziwa.—Mateus 5:41.

OMURARI WOMBEIBELA: “Kokutja ihi tji mo tjiti o ha ṋiṋikizirwa ko, nungwari u tjite nombango yoye omuini.”—Filemon 14.

Rirekena omuini. Ovandu mbe ungura oukukutu kave notjirweyo, kavandu mbe rizepa oveni noviungura. Ve rirekena oveni, nu vemuna ondjoroka tji mave ungura oukukutu na tji mave suva.

OMURARI WOMBEIBELA: “Okokuwa okukara noviṋa ouṱiṱi meke rimwe au nohange komeho yokukara nomake ayeyevari nge ura nozongondjero, nu tjandje okurora okurambera ombepo uriri.”—Omuzuvarise 4:6.