Ovandu ovengi mouye ve hepa ovikurya noruveze okukara po. Tjiva ve hepa omaundjiro omawa woruyaveze uriri. Ozongondjero zetu zokuvatera ovandu otja imbo, ze tjita kutja Jehova me tu yakure nu me tu sere ondaya.

“Ngu ṱotjari nomusyona u yazema ku Muhona, nu Muhona me mu sutire po ouwa we.”—OMIANO 19:17.

Jesus wa hungira ohunga notjisasanekero tjomurumendu ngwa tonwa i yovapunde na isiwa ohinga kokukoka. (Lukas 10:29-37) Omundu wozonganda wa ṱotjari na kurama okuvatera omurumendu ngwa tonenwe tjinene ngwi. Eye wa tjita nao nandarire kutja wa ri o womuhoko warwe.

Omurumendu omunatjari ngwi ka kutire ovirwaro vyomurumendu ngwi nokuyandja ombatero ndjaai heperwa po uriri, posi yokutja eye wina we mu yanḓiparisa nokumuhuhumiṋa.

Matu rihongo tjike okuza komasasanekero ngo? Jesus wa raisa kutja eṱe matu sokukondja pu matu yenene okuvatera imba mbu mave hepa ombatero. (Omiano 14:31) Ombeibela i honga kutja moruveze rwa tjimanga Mukuru ma isapo ousyona nomauzeu. Eṱe mape ya atu ripura kutja oruṋe nomomuano uṋe Mukuru mu ma yenene okutjita nao? Orupa ndu maru kongorereko maru kahungirira kozondaya Omuute wetu worusuvero nḓe tu kwizikira.